Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 6: Se Atalii Lelei ma Sē e Leaga

Tala 6: Se Atalii Lelei ma Sē e Leaga

VAAI atu nei iā Kaino ma Apelu. Ua matutua uma i la‘ua. Ua avea Kaino ma se faifaato‘aga. Na te totōina ni fatu ma laau aina ma fualaau.

O loo ofoina taulaga a Kaino ma Apelu i le Atua.

Ua avea Apelu ma se e tausi mamoe. E fiafia o ia e tausi tama‘i mamoe. E tutupu a‘e i latou e avea ma mamoe lapopo‘a, ma e le‘i umi ae maua sana lafu mamoe na te tausia.

O se tasi aso sa avatu ai ni a la mea alofa i le Atua. Sa aumaia e Kaino ni fua sa ia totōina. Ae o Apelu o ana mamoe e sili atu ona lelei. Sa fiafia Ieova i a Apelu ma lana mea alofa. Ae sa le fiafia o ia i a Kaino. Pe e te iloa aiseā?

E le gata sa lelei le mea alofa a Apelu, ae o ia fo‘i o se tagata lelei. E alofa o ia iā Ieova ma lona uso. Ae o Kaino e leaga; e lē alofa o ia i lona uso.

Sa fai atu le Atua iā Kaino e sui ona ala. Ae sa lē faalogo i ai Kaino. Sa ita tele o ia auā sa fiafia le Atua iā Apelu. Sa fai atu loa Kaino iā Apelu, ‘Se‘i ta ō ia i le fanua.’ I inā, ina ua na o i la‘ua, sa ta ai loa e Kaino lona uso o Apelu. Sa telē le ta sa ia fasiotia ai o ia. Pe e le o se mea leaga ea lea ua faia e Kaino?

Na sola Kaino ina ua uma ona ia fasiotia Apelu

E ui lava ina oti Apelu, ae o loo manatua pea o ia e le Atua. Sa lelei Apelu, ma e le faagaloina e Ieova tagata faapena. O lea la i se isi aso o le a toe faaola mai e le Atua Apelu, ma o le a lē toe oti o ia. E mafai ona ola e faavavau o ia i lenei lalolagi. Pe e le o se mea lelei le iloaina o tagata lelei faapena e pei o Apelu?

Ae e lē fiafia le Atua i tagata e pei o Kaino. Ina ua uma ona fasiotia e Kaino lona uso, sa faasala loa o ia e le Atua i lona tuli mamao eseina o ia mai le tele o isi tagata o lona aiga. Ina ua alu ese atu Kaino e ola i le isi vaega o le lalolagi, sa ia aveina se tasi o ona tuafafine, ma avea ma ana avā.

Mo se vaitaimi na nonofo ai Kaino ma lana avā ma fai ai se la fanau. Sa faaipoipo isi atalii ma afafine o Atamu ma Eva ma sa maua fo‘i ni fanau. Ma ua to‘atele loa tagata i le lalolagi. Se‘i o tatou a‘oa‘oina e uiga i ni isi o i latou.

Kenese 4:2-26; 1Ioane 3:11,12; Ioane 11:25.



Fesili

  • O ā galuega ua faia e Kaino ma Apelu?
  • O ā meaalofa na aumaia e Kaino ma Apelu iā Ieova?
  • Aiseā sa fiafia ai Ieova i le meaalofa a Apelu, ae aiseā sa le fiafia ai i le meaalofa a Kaino?
  • Na faape‘ī le amio a Kaino, ma na faapefea ona taumafai Ieova e faasa‘o o ia?
  • O le ā na faia e Kaino ina ua na o i la‘ua ma lona uso i le fanua?
  • Faamatala le mea na tupu iā Kaino ina ua uma ona fasiotia lona uso.

Fesili faaopoopo

  • Faitau le Kenese 4:2-26.

    Na faapefea ona faamatala e Ieova le tulaga mata‘utia sa iai Kaino? (Kene. 4:7)

    Na faapefea ona faaalia e Kaino le mea sa i lona loto? (Kene. 4:9)

    O le ā le silafaga a Ieova i le faamasaaina o le toto o ē e lē sala? (Kene. 4:10; Isa. 26:21)

  • Faitau le 1 Ioane 3:11, 12.

    Aiseā na ita tele ai Kaino, ma e faapefea ona avea lenā ma lapata‘iga mo i tatou i aso nei? (Kene. 4:4, 5; Faata. 14:30; 28:22)

    E faapefea ona faaalia e le Tusi Paia, e mafai ona tatou tutumau i le faamaoni tusa lava pe e tetee tagata uma o lo tatou aiga iā Ieova? (Sala. 27:10; Mata. 10:21, 22)

  • Faitau le Ioane 11:25.

    O le ā le faamautinoaga ua saunia e Ieova mo i latou uma e maliliu ona o le amiotonu? (Ioa. 5:24)

Faitau Atili

Apelu—“E ui Ina Oti o Ia, ae o Loo Tautala Mai Pea”

O le ā e mafai ona tatou a‘oa‘oina mai iā Apelu ma lona faatuatua, e ui e itiiti ni faamatalaga o loo i le Tusi Paia e uiga iā te ia?