Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 4: Aiseā na Leiloa ai lo La Aiga

Tala 4: Aiseā na Leiloa ai lo La Aiga

IA VAAI i le mea ua tupu nei. Ua tulia ese nei Atamu ma Eva i fafo o le faato‘aga manaia. Pe e te iloa aiseā?

Ua tulia ese Atamu ma Eva i fafo o le faato‘aga o Etena

Talu ai sa la faia se mea leaga tele. Ua faasalaina nei i la‘ua e Ieova. Pe e te iloaina le mea leaga sa faia e Atamu ma Eva?

Sa la‘ua faia se mea na fai atu ai le Atua e aua le faia. Sa fai atu le Atua e mafai ona la aai i fua o laau o le faato‘aga. Ae tasi lava le laau e aua le aai ai, auā o le a la feoti ai. Sa ia taofia le laau o sana mea. Ua tatou iloa e sesē pe a tatou aveina se mea e lē o sa tatou mea, a ea? Ia, o le ā la sa tupu?

I se tasi aso a o i ai na o Eva i le faato‘aga, sa tautala atu se gata iā te ia. Se‘i mafaufau i ai! Sa ia ta‘u atu iā Eva e ai le fua mai i le laau sa fai atu i ai le Atua e aua le aia. Ina ua faia e Ieova gata sa le‘i faia i latou ia tautala. O lona uiga la o se tasi sa ia faatautalaina le gata. O ai la ia?

Sa le o Atamu. E tatau la ona avea ma se tasi o i latou ia ua leva ona faia e Ieova a o le‘i faia le lalolagi. O na peresona o ni agelu, e lē mafai ona tatou vaaia i latou. O le agelu lenei e tasi sa faamaualuga tele ia. Sa amata ona ia mafaufau e pule e pei o le Atua. Sa ia mana‘o fo‘i ia usiusita‘i atu tagata iā te ia a e lē o i ā Ieova. O ia lea o le agelu sa ia faatautalaina le gata.

Sa mafai ona faavalea e lenei agelu ia Eva, ina ua ia fai atu o le a avea o ia e pei o le Atua pe afai na te aiina le fua. Sa ia aia loa, faapena fo‘i ma Atamu. Ua le usiusita‘i Atamu ma Eva i le Atua, ma leiloa ai loa lo la faato‘aga matagofie.

Ae i se tasi aso o le a taga‘i i ai le Atua ua toe faia le lalolagi ia matagofie pei o Etena. O le a tatou a‘oa‘oina fo‘i pe faapefea ona e auai i le faia faapea. Se‘i o tatou su‘eina po o le ā ua tupu nei i a Atamu ma Eva.

Kenese 2:16,17; 3:1-13,24; Faaaliga 12:9.



Fesili

  • I le ata lenei, o le ā ua tupu i a Atamu ma Eva?
  • Aiseā na faasalaina ai i la‘ua e Ieova?
  • O le ā na ta‘u atu e se gata i a Eva?
  • O ai na faapogaia le gata ina ia tautala i a Eva?
  • Aiseā na leiloa ai e Atamu ma Eva lo la faato‘aga matagofie?

Fesili faaopoopo

  • Faitau le Kenese 2:16, 17 ma le 3:1-13, 24.

    Aiseā na faatupu manatu sesē ai le fesili a le gata i a Eva e faatatau i a Ieova? (Kene. 3:1-5; 1 Ioa. 5:3)

    E faapefea ona avea Eva ma faaa‘oa‘oga lapata‘i mo i tatou? (Fili. 4:8; Iako. 1:14, 15; 1 Ioa. 2:16)

    Na faapefea ona lē mananao Atamu ma Eva e tuua‘ia i la‘ua i le mea na la faia? (Kene. 3:12, 13)

    Na faapefea ona lagolagoina le pule silisili ese a Ieova e kerupi, na tofia i le itu i sasa‘e e leoleoina le faato‘aga o Etena? (Kene. 3:24)

  • Faitau le Faaaliga 12:9.

    O faape‘ī le taulau manuia o Satani i le faaliliueseina o tagata mai le pulega a Ieova? (1 Ioa. 5:19)