Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 113: Paulo i Roma

Tala 113: Paulo i Roma

VAAI i filifili o loo iā Paulo, ma vaai i le fitafita Roma o loo leoleoina o ia. Ua avea Paulo ma pagota i Roma. O loo faatali o ia se‘ia filifili Kaisara po o le ā o le a fai iā te ia. A o pagota o ia, e taga ona asiasi atu tagata iā te ia.

Tolu aso talu ona taunuu Paulo i Roma na ia auina ai se fe‘au i ta‘ita‘i Iutaia e ō mai e vaai ia. O le i‘uga, ua to‘atele Iutaia i Roma ua ō atu. Ua tala‘i Paulo iā i latou e uiga iā Iesu ma le malo o le Atua. O isi ua talitonu ma avea ma Kerisiano a o isi e le‘i talitonu.

O loo i le falepuipui Paulo

Na tala‘i atu fo‘i Paulo i fitafita eseese na leoleoina o ia. Mo le lua tausaga na iai o ia i ina o se pagota, na tala‘i atu Paulo i tagata uma lava na te mafai ona tala‘i iai. Ma o le i‘uga, e oo fo‘i i le aiga o Kaisara sa faalogo i le tala lelei o le malo, ma avea ai isi ma Kerisiano.

Ae o ai le tagata asiasi lenā e tusitusi? Pe e mafai ona e mateina? Ioe, o Timoteo. Sa iai fo‘i Timoteo i le falepuipui ona o le tala‘iga o le malo, ae ua tatala nei o ia. Ma ua alu o ia e fesoasoani iā Paulo. Pe e te iloa o le ā o loo tusi e Timoteo? Se‘i o tatou vaai.

Pe e te manatua le aai o Filipi ma Efeso i le Tala 110? Na fesoasoani Paulo e amataina faapotopotoga Kerisiano i aai na. I le taimi nei la, a o iai o ia i le falepuipui, e tusi e Paulo ni tusi i na Kerisiano. O loo iai ia tusi i le Tusi Paia ma ua ta‘ua o le Efeso ma le Filipi. O loo faamatala atu nei e Paulo iā Timoteo mea e tusia i ana uō Kerisiano i Filipi.

O tagata Filipi na agalelei tele iā Paulo. Na latou aumaia se meaalofa mo ia i le falepuipui, ma o loo faafetai atu Paulo iā i latou mo lenā mea. O Epaferoti na aumaia le meaalofa. Ae na ma‘i o ia ma tāli oti. Ae o lenei ua toe malosi ma sauni e toe fo‘i i lona aiga. O le a alu o ia ma ave lenei tusi mai iā Paulo ma Timoteo pe a toe fo‘i i Filipi.

A o iai Paulo i le falepuipui na ia tusia isi tusi e lua o loo iai nei i le Tusi Paia. O le tasi e mo Kerisiano i le aai o Kolose. Pe e te iloa o le a lona ta‘u? O le Kolose. O le isi o se tusi totino mo lana uō mamae e igoa iā Filemoni e nofo i Kolose. O le tusi e faatatau iā Onesemo le auauna a Filemoni.

Na sola ese Onesemo mai iā Filemoni ma alu i Roma. E iai se auala na iloa ai e Onesemo o loo i le falepuipui Paulo i ina. Na ia alu e asiasi, ma na tala‘i atu ai Paulo iā Onesemo. E le‘i leva ae avea fo‘i Onesemo ma Kerisiano. Ua faanoanoa nei Onesemo ina ua ia sola ese. Pe e te iloa la o le ā o tusia e Paulo i lana tusi iā Filemoni?

O loo talosaga atu Paulo iā Filemoni ia faamagalo iā Onesemo. ‘Ua ou toe auina atu o ia iā te oe,’ o le tusi lea a Paulo. ‘Ae o le taimi nei ua lē gata ina avea o ia ma sau auauna. Ae o ia fo‘i o se uso Kerisiano lelei.’ Ina ua toe fo‘i Onesemo i Kolose na ia avea nei tusi e lua, o le tasi mo tagata Kolose a o le isi mo Filemoni. E mafai ona tatou mafaufauina le fiafia tele o Filemoni, ina ua avea lana auauna ma Kerisiano.

Ina ua tusi Paulo i tagata Filipi ma Filemoni, na iā te ia se tala lelei moni lava. ‘O le a ou auina atu Timoteo iā te outou,’ o upu ia a Paulo i tagata Filipi. ‘Ae e lē o toe mamao ona ou asiasi atu lea iā te outou.’ Ma na ia tusi iā Filemoni: ‘Ia e sauni se mea ou te nofo ai i ina.’

Ina ua sa‘oloto Paulo na ia asiasi i ona uso ma tuafafine Kerisiano i le tele o nofoaga. Mulimuli ane ua toe faapagota fo‘i Paulo i Roma. I le taimi lenei na ia iloa ai o le a fasiotia o ia. O lea na ia tusi iā Timoteo e alu atu faanatinati. ‘Ua ou faamaoni i le Atua,’ o le tusi lea a Paulo, ‘ma o le a tauia au e le Atua.’ I ni nai tausaga mulimuli ane ai, ona fasiotia lea o Paulo, ua toe faaumatia Ierusalema, e ‘au a Roma.

Ae tele ni mea o i le Tusi Paia. Na tuuina atu e Ieova le Atua i le aposetolo o Ioane ia tusia tusi mulimuli e aofia ai le tusi o Faaaliga. O lea tusi e uiga i le lumana‘i. Se‘i o tatou a‘oa‘oina pe o le a o taofia e le lumana‘i.

Galuega 28:16-31; Filipi 1:13; 2:19-30; 4:18-23; Eperu 13:23; Filemoni 1-25; Kolose 4:7-9; 2 Timoteo 4:7-9.



Fesili

  • O ai na tala‘i iai Paulo a o avea o se pagota i Roma?
  • O ai le tagata asiasi lenā e tusitusi e pei ona vaaia i le ata, ma o le ā ua ia faia mo Paulo?
  • O ai Epaferoti, ma o le ā na alu ma ave ina ua toe fo‘i i Filipi?
  • Aiseā na tusia ai e Paulo se tusi i lana uō mamae o Filemoni?
  • O le ā na faia e Paulo ina ua sa‘oloto o ia, ma o le ā na tupu mulimuli ane iā te ia?
  • O ai na faaaogā e Ieova e tusia tusi mulimuli o le Tusi Paia, ma o le ā o loo faamatalaina e le tusi o Faaaliga?

Fesili faaopoopo

  • Faitau le Galuega 28:16-31 ma le Filipi 1:13.

    Na faapea ona faaaogā e Paulo lona taimi a o saisaitia i Roma, ma o le ā le aafiaga o lona faatuatua malosi i le faapotopotoga Kerisiano? (Galu. 28:23, 30; Fili. 1:14)

  • Faitau le Filipi 2:19-30.

    O ā faaupuga talisapaia na faia e Paulo e faatatau iā Timoteo ma Epaferoti, ma e faapefea ona tatou mulimuli i le faaa‘oa‘oga a Paulo? (Fili. 2:20, 22, 25, 29, 30; 1 Kori. 16:18; 1 Tesa. 5:12, 13)

  • Faitau le Filemoni 1-25.

    Na ‘ai‘oi atu Paulo iā Filemoni ina ia fai le mea tonu ona o le ā, ma e faapefea ona avea lenei mea ma ta‘iala mo toeaina i aso nei? (File. 9; 2 Kori. 8:8; Kala. 5:13)

    E faapefea i upu a Paulo i le Filemoni 13, 14 ona faaalia ai lona manatu mamafa i lotofuatiaifo o isi i le faapotopotoga? (1 Kori. 8:7, 13; 10:31-33)

  • Faitau le 2 Timoteo 4:7-9.

    I le pei o le aposetolo o Paulo, e faapefea ona tatou mautinoa o le a tauia i tatou e Ieova pe a tatou tumau ma le faamaoni se‘ia oo i le i‘uga? (Mata. 24:13; Epe. 6:10)