Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 112: Ua Tu‘ia le Vaa i se Motu

Tala 112: Ua Tu‘ia le Vaa i se Motu

VAAI! Ua pagatia le vaa! Ua taapeape i ni vaega! Pe e te iloaina atu tagata na ua fepuna i le sami? O isi ua taunuu i le matafaga. Pe o Paulo ea lenā e tuu mai i ina? Se‘i o tatou su‘eina po o a mea o loo tutupu iā te ia.

O latou na faasaoina ina ua tu‘ia le vaa

Manatua e lua tausaga o iai pea Paulo i le falepuipui i Kaisareia. Ona faaee ai lea o ia ma isi pagota i le vaa ma ō atu i Roma. Ina ua latou ui ane i le motu o Kereta, na taia i latou e se afā malosi. Ua malosi tele le matagi ua lē mafai ai e tamāloloa ona ave le vaa. Ma ua latou lē vaaia le lā i le ao po o fetu i le pō. Mulimuli ane, ina ua mavae le tele o aso, ona lē toe iai lea o se faamoemoe i ē na i luga o le vaa mo le faasaoina.

Ia, ona tū lea o Paulo i luga ma fai atu: ‘E lē ma‘imau se ola o se tasi o outou; na o le vaa o le a leaga. Auā na sau le agelu a le Atua anapō ma faapea mai iā te au: “Aua e te fefe Paulo! E te tū i luma o le pule o Roma o Kaisara. Ma o le a faasaoina e le Atua ē uma o loo folau ma oe.” ’

E tusa o le vaeluaga o le pō o le aso lona 14 talu ona afā, ua iloa ai e le ‘au vaa ua amata ona papa‘u le suāsami! Ona o lo latou fefe ne‘i fetaui ma ni maa i le pogisa, na latou lafo ai i lalo a latou taula. I le taeao na sosoo ai na latou vaaia ai se faga. Na latou filifili ia folau e oo atu i le matafaga lenā.

Ia, ina ua latou latalata i le matafaga, na so‘a e le vaa se faaputuga oneone ma pa‘ulia ai. Ona taia lea e galu, ma amata ai ona tu‘ia le vaa. Na fai atu le ta‘ita‘i ‘au: ‘O outou uma e mafai ona aau ia feosofi muamua nei loa i le sami ma aau atu i le matafaga. Ae o isi ia tulioso i lalo, ma ia pipii atu i ni fasi laupapa mai le vaa.’ O le auala lenā na taunuu ma le manuia uma ai le 276 tagata sa i le vaa i le matafaga e pei ona tautō ai le agelu.

Ua ta‘ua lea motu o Melita. Sa agalelei tagata, ma sa latou tausia lelei i latou na o mai i le vaa. Ina ua lelei le tau ona toe faaee lea o Paulo i le isi vaa ma avatu i Roma.

Galuega 27:1-44; 28:1-14.



Fesili

  • O le ā na tupu i le vaa na iai Paulo a o ui ane i le motu o Kereta?
  • O le ā na fai atu ai Paulo i ē na i luga o le vaa?
  • Na faapefea ona tu‘ia le vaa?
  • O le ā na fai atu ai le ta‘ita‘i ‘au, ma e to‘afia tagata na taunuu ma le manuia i le matafaga?
  • O le ā le igoa o le motu na taunuu i ai, ma o le ā na tupu iā Paulo ina ua lelei le tau?

Fesili faaopoopo

  • Faitau le Galuega 27:1-44.

    E faapefea ona faamalosia lo tatou mautinoa i le sa‘o a‘ia‘i o faamaumauga o le Tusi Paia pe a tatou faitau i le tala o le folauga a Paulo i Roma? (Galu. 27:16-19, 27-32; Luka 1:3; 2 Timo. 3:16, 17)

  • Faitau le Galuega 28:1-14.

    Pe afai na “ma‘eu lava le alolofa” o tagata faapaupau o Melita i le aposetolo o Paulo ma ē na latou afātia faatasi, o le ā la e ao ona faaalia e Kerisiano ma i le ā le auala e faaalia ai? (Galu. 28:1, 2; Epe. 13:1, 2; 1 Pete. 4:9)