Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 111: O se Tama na Moe

Tala 111: O se Tama na Moe

OI! AUE! O le ā le me o tupu i inā? Pe o manu‘a tigāina le tama lenā e i le palapala? Vaai! O Paulo lenā e sau mai fafo o le fale. Pe e te iloa atu fo‘i ma Timoteo i ina? Pe na pa‘ū le tama mai luga o le faamalama?

Ua sau Paulo e toe faatūina Eutiko

Ioe, o le mea tonu lenā na tupu. Na lauga Paulo i soo i ina i Teroa. Na ia iloa lelei o le a ia lē toe vaai iā i latou mo se taimi umi auā o le a alu o ia i se vaa i le aso e sosoo ai. O lea na talanoa ai pea o ia se‘ia oo i le vaeluaga o le pō.

O le tama lenei e igoa iā Eutiko sa nofo i le faamalama ma moe ai. Na pa‘ū o ia mai le faamalama o le fogāfale lona tolu! Ua e iloa nei la le māfuaaga ua foliga popole ai tagata. Ina ua sii e tamāloloa le tama, sa fefefe i latou. Ioe, ua oti o ia!

Ina ua vaai atu Paulo ua oti le tama, ona faō lea i ona luga ma fusi iā te ia. Ona ia faapea atu lea: ‘Aua le popole. O loo lelei pea o ia!’ Sa faapea lava! O se vavega! Ua toe faaola mai o ia e Paulo! Sa fiafia uma tagata.

Ona toe o lea o i latou i le falealuga ma fai se latou ‘aiga. Na talanoa pea Paulo se‘ia oo ina malamalama. Ae ua e mautinoa nei e le toe moe Eutiko! Ona o atu lea o Paulo, Timoteo ma isi sa malaga faatasi ma i latou i le vaa. Pe e te iloa o fea o loo o atu iai?

Faato‘a uma lava le malaga lona tolu a Paulo, ma o loo aga‘i atu nei o ia i lona fale. I lenei malaga na nofo ai Paulo i le aai o Efeso mo le tolu tausaga. Ma o se malaga umi la lenei i lo lana malaga lona lua.

Ina ua tuua e ia Teroa, sa tū le vaa i Meleto mo sina taimi puupuu. Talu ai o Efeso e fai sina mamao ese, na aami ai e Paulo le au toeaiina o le faapotopotoga e o mai i Meleto ina ia talanoa mulimuli o ia iā i latou. Mavae lenā, ina ua oo i le taimi e alu ai le vaa, pagā le faanoanoa tele o i latou e vaai atu ua alu Paulo!

Mulimuli lava na toe oo mai le vaa i Kaisareia. A o nofo Paulo i le fale o le soo o Filipo, na lapata‘i atu le perofeta o Akapo iā Paulo. Na ia faapea atu o le a avea Paulo ma pagota pe afai o le a alu o ia i Ierusalema. Ma na tupu lenā mea. Mavae tausaga e lua o i ai o ia i le falepuipui i Kaisareia, ona auina atu lea o Paulo i Roma mo lona faamasinoga e le pule o Roma o Kaisara. Se‘i o tatou vaai po o le a na tupu i le malaga i Roma.

Galuega mataupu e 19 se‘ia oo atu i le 26.



Fesili

  • O ai le tama lenā e i le palapala e pei ona vaaia i le ata, ma o le ā na tupu iā te ia?
  • O le ā na faia e Paulo ina ua iloa ua oti le tama?
  • O fea o loo aga‘i atu iai Paulo, Timoteo ma ē o loo latou malaga faatasi, ma o le ā na tupu ina ua latou tutū i Meleto?
  • O le ā na lapata‘i atu ai le perofeta o Akapo iā Paulo, ma e faapefea ona tupu e pei lava ona ta‘ua e le perofeta?

Fesili faaopoopo

  • Faitau le Galuega 20:7-38.

    E faapefea ona tatou ‘mamā i le toto o tagata uma,’ e tusa ai ma upu a Paulo o loo tusia i le Galuega 20:26, 27? (Eseki. 33:8; Galu. 18:6, 7)

    Aiseā e ao ai i toeaina ona “taofi mau i le upu moni” a o a‘oa‘o atu? (Galu. 20:17, 29, 30; Tito 1:7-9; 2 Timo. 1:13)

  • Faitau le Galuega 26:24-32.

    Na faapefea ona faaaogā e Paulo lona tulaga o se tagata Roma e faataunuu ai le tofiga o le tala‘iga lea na maua mai iā Iesu? (Galu. 9:15; 16:37, 38; 25:11, 12; 26:32; Luka 21:12, 13)