Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 110: Timoteo—Fesoasoani Fou a Paulo

Tala 110: Timoteo—Fesoasoani Fou a Paulo

O LE tama talavou lenā o Timoteo o loo e vaai iai o faatasi ma le aposetolo o Paulo. E nofo Timoteo ma lona aiga i Lusa. O le igoa o lona tinā o Eunike a o le tinā o lona tinā o Loi.

O le faatolu lenei ona asiasi atu Paulo i Lusa. E tusa o se tausaga ua mavae talu ona ō Paulo ma Panapa i ina i se la tala‘iga muamua. Ae o lenei ua toe fo‘i atu iai Paulo ma Sila.

Timoteo ma Paulo

Pe e te iloa le tala a Paulo o loo fai iā Timoteo? ‘Pe e te fia sau iā i ma‘ua ma Sila?’ o lana fesili lea. ‘E mafai ona ma faaaogāina lau fesoasoani i le tala‘i atu i tagata i nuu mamao.’

‘Ua lelei,’ o le tali lea a Timoteo, ‘Ou te fia alu.’ Ona tuua lea e Timoteo lona aiga ae ō atu ma Paulo ma Sila. A o le‘i tatou a‘oa‘oina e uiga i la latou malaga, se‘i o tatou vaai muamua po o a mea na tutupu iā Paulo. Ua tusa e 17 tausaga talu ona faaali atu Iesu iā te ia i le ala i Tamaseko.

Manatua, na alu atu Paulo i Tamaseko e sauā i soo o Iesu, ae o lenei ua avea ia ma soo! Mulimuli ane ua fia fasioti e ni fili Paulo talu ai lana a‘oa‘oga e uiga iā Iesu. Ae na fesoasoani le ‘ausoo ia faasola o ia. Na latou tuuina o ia i totonu o se ato ma tuutuu ifo o ia i lalo i le pā o le aai.

Mulimuli ane ona alu lea o Paulo e tala‘i i Anetioka. O i ina na ta‘ua muamua ai lava soo o Iesu o Kerisiano. Ona aauina atu lea o Paulo ma Panapa mai Anetioka i se malaga tala‘i i atunuu mamao lava. O se tasi o aai na ia asiasi atu iai o Lusa, le nuu o Timoteo.

E tusa nei ua mavae se tausaga ma ua toe fo‘i mai Paulo i Lusa i lana malaga lona lua. Ina ua o Timoteo ma Paulo ma Sila, pe e te iloa o fea na ō iai? Vaai atu i le faafanua, ma se‘i tatou a‘oa‘oina ni isi o nofoaga.

Muamua, na latou ō i Ikonio, lona lua o le aai o Anetioka. Mavae lenā ona latou ō lea i luga i Teroa, ma Filipi, Tesalonia ma Perea. Pe o e iloa atu Atenai i le faafanua? Na tala‘i Paulo i ina. Ina ua uma lenā na latou faaaluina se tausaga ma le afa e tala‘i ai i Korinito. Mulimuli lava, ona latou malaga puupuu lea i Efeso. Ona latou toe fo‘i mai lea i le vaa i Kaisareia, ma malaga atu i Anetioka, i le mea o nofo ai Paulo.

O lea la, na malaga Timoteo i le selau ma selau o maila e fesoasoani iā Paulo e tala‘i le “tala lelei” ma amata faapotopotoga Kerisiano e tele. A e matua, pe o le a avea ea oe ma se auauna faamaoni a le Atua e pei o Timoteo?

Galuega 9:19-30; 11:19-26; mataupu e 13 seia oo i le 17; 18:1-22.

Se faafanua

1. Roma; 2. Melita; 3. Perea; 4. Tesalonia; 5. Korinito; 6. Filipi; 7. Atenai; 8. Kereta; 9. Teroa; 10. Efeso; 11. Meleto; 12. Kolose; 13. Anetioka; 14. Ikonio; 15. Lusa; 16. Kuperu; 17. Anetioka; 18. Kaisareia; 19. Iopa; 20. Tamaseko; 21. Ierusalema; 22. Le Sami Tele (Metitirani)



Fesili

  • O ai le tama talavou o loo i le ata, o fea e nofo ai, ma o ai igoa o lona tinā ma le tinā o lona tinā?
  • O le ā le tala a Timoteo ina ua fesili i ai Paulo pe e mana‘o e latou te ō faatasi ma Sila e tala‘i i tagata i nuu mamao?
  • O fea na ta‘ua muamua ai lava soo o Iesu o Kerisiano?
  • Ina ua tuua e Paulo ma Panapa ia Anetioka, o ā isi aai na asiasi iai?
  • Na faapefea ona fesoasoani Timoteo iā Paulo, ma o le ā le fesili e ao i talavou i aso nei ona fesili ifo iā i latou lava?

Fesili faaopoopo

  • Faitau le Galuega 9:19-30.

    Na faapefea ona faaalia e le aposetolo o Paulo le faautauta ina ua fetaia‘i ma teteega i le tala lelei? (Galu. 9:22-25, 29, 30; Mata. 10:16)

  • Faitau le Galuega 11:19-26.

    E faapefea ona faaalia e le tala i le Galuega 11:19-21, 26, o loo faatonutonuina e le agaga o Ieova le galuega tala‘i?

  • Faitau le Galuega 13:13-16, 42-52.

    E faapefea ona faaalia i le Galuega 13:51, 52 e le‘i faavaivai le ‘ausoo ona o teteega? (Mata. 10:14; Galu. 18:6; 1 Pete. 4:14)

  • Faitau le Galuega 14:1-6, 19-28.

    E faapefea ona fesoasoani le faaupuga “ona la tuuina atu lea o i latou i le Alii” e aveesea ai le soona popole a o tatou fesoasoani atu i tagata fou? (Galu. 14:21-23; 20:32; Ioa. 6:44)

  • Faitau le Galuega 16:1-5.

    E faapefea i le lotomalie o Timoteo e peritomeina o ia ona faamatilatila ai le tāua o le faia o mea uma lava “ona o le tala lelei”? (Galu. 16:3; 1 Kori. 9:23; 1 Tesa. 2:8)

  • Faitau le Galuega 18:1-11, 18-22.

    O le ā ua faaalia e le Galuega 18:9, 10 e faatatau i le vaega o faia e Iesu i le faatonutonuina o le galuega tala‘i, ma o le ā ua tatou mautinoa ai ona o lenā mea? (Mata. 28:20)

Faitau Atili

Sa Naunau Timoteo e Fesoasoani i Tagata

E faapefea ona e maua se olaga fiafia e pei o Timoteo?