Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 108: I Luga o le Ala i Tamaseko

Tala 108: I Luga o le Ala i Tamaseko

PE E te iloaina o ai lenā e taoto mai i le palapala? O Saulo. Manatua o ia lea na leoleoina ofu o tamāloloa na fasiotia Setefano. Vaai atu i lenā malamalama! O le ā le mea o loo tupu?

Ina ua mavae le fasiotia o Setefano, ona ta‘imua lea o Saulo e su‘e soo o Iesu e faatigā iā i latou. E alu o ia i lea fale ma lea fale ma tatoso mai i latou ma lafo i le falepuipui. O le to‘atele o le ‘ausoo ua sosola i isi aai ma folafola ai le “tala lelei” i ina. Ae e alu atu fo‘i Saulo i isi aai e su‘e ai soo o Iesu. O loo alu nei o ia i lona ala i Tamaseko. Ae i le ala, o le mea ofoofogia lenei na tupu:

Na faafuase‘i ona susulu mai se malamalama ma si‘omia ai Saulo. Ona paū lea o ia i lalo, e pei ona e vaai atu iai. Ona faapea mai lea o se leo: ‘Saulo, Saulo e! Aiseā ua e faatigā mai ai iā te au?’ Na iloa e tamāloloa na ō ma Saulo le malamalama ma faalogo i le leo, ae latou te lē malamalama i tala o loo fai mai.

Ua faatauasoina e le malamalama Saulo

‘O ai ea oe, le Alii e? o le fesili lea a Saulo.

‘O a‘u o Iesu o lē o loo e faatigā iai,’ o upu ia a le leo. Ua faia e Iesu nei upu auā a faatigā Saulo i soo o Iesu, ua tusa lava o ia lea ua faia iai.

Ua fesili atu nei Saulo: ‘O le ā sa‘u mea a fai, le Alii e?’

‘Tū i luga ma alu i Tamaseko,’ o le tala lea a Iesu. ‘O i ina o le a ta‘uina atu ai le mea e te faia.’ Ina ua tū i luga Saulo ma pupula ua lē toe mafai ona iloa se mea. Ua tauaso o ia! Ona ta‘ita‘iina lea o ia e tamāloloa i Tamaseko.

Ona tautala atu lea o Iesu i le tasi o ona soo i Tamaseko, ma faapea atu: ‘Anania e, tū ia i luga. Alu atu i le ala e ta‘ua o Sa‘o. Ma i le fale o Iuta fesili iai mo le tagata e igoa iā, Saulo. Ua ou filifilia o ia e fai ma auauna faapitoa mo a‘u.’

Na usiusita‘i Anania. Ina ua la fetaui ma Saulo, ona ia faaee atu lea o ona lima i ona luga ma faapea atu: ‘Ua auina mai a‘u e le Alii ina ia e toe pupula ma faatumulia oe i le agaga paia.’ Ona pa‘u‘ū ese mai ai lea o ni mea e pei ni una mai mata o Saulo, ma ua toe vaai nei o ia.

Ua faaaogāina Saulo i se auala malosi e tala‘i atu ai i tagata o nuu e tele. Ua iloa o ia o le aposetolo o Paulo, o lē o le a tatou a‘oa‘oina mulimuli ane ai. Ae se‘i o tatou vaai po o le a na auina atu i ai e le Atua Peteru e fai.

Galuega 8:1-4; 9:1-20; 22:6-16; 26:8-20.



Fesili

  • O le ā na faia e Saulo ina ua mavae le fasiotia o Setefano?
  • A o alu atu Saulo i Tamaseko, o le ā le mea ofoofogia na tupu?
  • O le ā na ta‘u atu e Iesu iā Saulo e fai?
  • O le ā le faatonuga a Iesu iā Anania, ma na faapefea ona toe vaai Saulo?
  • O le ā le igoa na iloa ai Saulo, ma na faapefea ona faaaogāina o ia?

Fesili faaopoopo

  • Faitau le Galuega 8:1-4.

    Na faapefea ona salalau atu le faatuatuaga faa-Kerisiano ona o sauāga na oo i le faapotopotoga Kerisiano lea na faato‘ā faavaeina, ma o le ā se mea faapena ua tupu i aso nei? (Galu. 8:4; Isa. 54:17)

  • Faitau le Galuega 9:1-20.

    O le ā le tofiga vala tolu na faailoa atu e Iesu iā Saulo? (Galu. 9:15; 13:5; 26:1; 27:24; Roma 11:13)

  • Faitau le Galuega 22:6-16.

    E faapefea ona pei i tatou o Anania, ma aiseā e tāua ai? (Galu. 22:12; 1 Timo. 3:7; 1 Pete. 1:14-16; 2:12)

  • Faitau le Galuega 26:8-20.

    E faapefea i le liulotu o Saulo i le faa-Kerisiano ona avea ma faalaeiauga mo ē e lē talitonu a latou paaga i aso nei? (Galu. 26:11; 1 Timo. 1:14-16; 2 Timo. 4:2; 1 Pete. 3:1-3)