Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 107: Fetogi Setefano i Maa

Tala 107: Fetogi Setefano i Maa

O LE tamāloa o loo tootuli o Setefano. O ia o se soo faamaoni o Iesu. Ae vaai atu i le mea ua tupu nei iā te ia! O nei tamāloloa o loo fetogi ni maa lapopo‘a iā te ia. Aiseā ua latou inoino ai iā Setefano ua latou faia ai lenei mea leaga? Se‘i o tatou vaai iai.

Ua fetogi e Setefano i maa

Na fesoasoani le Atua iā Setefano i le faia o vavega uiga ese. E le‘i mananao iai nei tamāloloa, ma na latou faia se finauga ma ia ona o lona a‘oa‘o atu o tagata i le upu moni. Ae na tuuina atu e le Atua iā Setefano le poto, ma ua ia faaalia i nei tamāloloa ua latou a‘oa‘oina mataupu sesē. Ona feita ai lea o i latou. Na latou pu‘ea o ia ma aumai ni tagata e fai ni pepelo e uiga iā te ia.

Na fesili le ositaulaga sili iā Setefano: ‘Pe e sa‘o ea nei mea?’ Na tali atu Setefano i lona faia o se lauga lelei mai le Tusi Paia. I le faai‘uga, na ia ta‘ua le leaga o tagata na ‘ino‘ino i perofeta a Ieova anamua. Ona ia fai atu lea: ‘Ua pei lava outou o nei tagata. Ua outou fasiotia le auauna a le Atua o Iesu, ma ua outou le usiusita‘i i ana tulafono.’

Na avea lea ma mea na atili feita ai le au ta‘ita‘i lotu ma ū o latou nifo! Ae na ea a‘e le ulu o Setefano, ma faapea atu: ‘Vaai! Ua ou iloa atu Iesu o loo tū i le itu taumatau o le Atua i le lagi.’ I le taimi lea na tapuni ai taliga o nei tagata ma latou feoso mai iā Setefano. Na latou pu‘e ma toso o ia i tua o le aai.

O i ina na latou aveeseina ai o latou ofu talaloa ma avatu iā Saulo na te vaavaaia. Pe o e iloaina atu Saulo? Ona amata lea ona fetogi e isi tamāloloa Setefano. Na tatalo Setefano i le Atua: ‘Ieova e, aua e te faasalaina i latou ona o lenei mea leaga.’ Ua ia iloa o isi o i latou ia ua faavaleaina e le au ta‘ita‘i lotu. Ona oti ai lea o Setefano.

Afai e fai e se tasi se mea leaga iā te oe, pe o le a e taui ma sui iai, po o lou fai atu fo‘i i le Atua ia faatigā iā i latou? E le‘i faapena Setefano ma Iesu. Na la agalelei i ē na lē alolofa iā i la‘ua. Se‘i o tatou faaa‘oa‘o iā i la‘ua.

Galuega 6:8-15; 7:1-60.



Fesili

  • O ai Setefano, ma o le ā na fesoasoani le Atua iā te ia e fai?
  • O le ā le tala a Setefano na atili ai ona feita‘i le au ta‘ita‘i lotu?
  • Ina ua tosoina e tagata ia Setefano i tua o le aai, o le ā na latou faia iā te ia?
  • O ai le tamāloa o loo tū i tafatafa o ofu talaloa i totonu o le ata?
  • O le ā na tatalo atu ai Setefano iā Ieova a o le‘i oti o ia?
  • I le faaa‘oa‘o atu iā Setefano, o le ā e ao ona tatou faia pe a faia e se tasi se mea leaga iā i tatou?

Fesili faaopoopo

  • Faitau le Galuega 6:8-15.

    O ā faiga taufaa‘ole‘ole ua faaaogā e ta‘ita‘i lotu ina ia taumafai e taofia ai le galuega tala‘i a Molimau a Ieova? (Galu. 6:9, 11, 13)

  • Faitau le Galuega 7:1-60.

    O le ā na fesoasoani iā Setefano e molimau atu ai ma le uigā i le tala lelei i luma o le au taupulega, ma o le ā ua tatou a‘oa‘oina mai lana faaa‘oa‘oga? (Galu. 7:51-53; Roma 15:4; 2 Timo. 3:14-17; 1 Pete. 3:15)

    O le ā le vaaiga e ao ona iā i tatou e faatatau i ē e tetee i la tatou galuega? (Galu. 7:58-60; Mata. 5:44; Luka 23:33, 34)