Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 106: Faasa‘oloto Mai le Falepuipui

Tala 106: Faasa‘oloto Mai le Falepuipui

VAAI i le agelu lenā e taofia le faitoto‘a ua matala o le falepuipui. O loo ia faasa‘olotoina mai aposetolo o Iesu. Se‘i o tatou su‘eina le pogai ua faafalepuipuiina ai i latou.

Ua faasa‘olotoina e se agelu aposetolo

Faato‘a mavae sina taimi puupuu talu ona liligiina ifo le agaga paia i luga o soo o Iesu. Ma o le mea lenei na tupu: O loo ō atu Peteru ma Ioane i le malumalu i Ierusalema i le isi afiafi. I tafatafa o le faitoto‘a, sa iai se tamāloa na pipili i lona olaga atoa. E ave o ia e tagata i ina i aso uma ina ia ‘aisi ai mo ni tupe mai e o loo o atu i le malumalu. Ina ua ia iloa atu Peteru ma Ioane, ona ia ‘aisi lea iai. O le ā le mea o le a faia nei e aposetolo?

Sa la tutū ma tilotilo atu i lenei tamāloa mativa. ‘E leai sa‘u tupe,’ o le tala lea a Peteru; ‘ae o le a ou avatua iā te oe le mea o loo iā te a‘u. I le suafa o Iesu, tū ia i luga ma savali!’ Ona tago atu lea o Peteru i lona lima ona ia oso ai lea i luga ma savali. Ina ua vaai tagata i lenei mea, ona latou ofo lea ma fiafia i lenei vavega uiga ese.

‘O le mana mai le Atua, o le na faatūina Iesu mai le oti, ua ma faia ai lenei vavega,’ o le tala lea a Peteru. A o talatalanoa o ia ma Ioane, ona ō mai lea o isi ta‘ita‘i lotu. Ua feita i latou auā o loo ta‘u atu e Peteru ma Ioane i tagata le toe faatūina mai o Iesu. O lea na latou pu‘eina ai i la‘ua ma tuu i le falepuipui.

I le aso na sosoo ai na fai ai se fono tele a le au ta‘ita‘i lotu. Ona aumaia lea o Peteru ma Ioane ma le tamāloa na la faamālōlōina. ‘O le ā le mana na lua faia ai lenei vavega?’ o le fesili lea a le au failotu.

Na faapea atu Peteru o le mana mai le Atua, o lē na toe faatūina mai Iesu. Ua lē iloa e le au ositaulaga se mea e fai, auā e lē mafai ona latou teteeina lenei vavega moni ua tupu. Ona latou faasāina lea o le au aposetolo e aua ne‘i toe talanoa iā Iesu, ma tuu atu i latou e ō.

A o gasolo pea aso na tala‘ia pea e aposetolo Iesu ma faamālōlō ē mama‘i. Na salalau tala i nei vavega. Ma e oo fo‘i i tagata e to‘atele mai le aai i autafa o Ierusalema ua sii mai a latou ma‘i i aposetolo ina ia faamālōlōina. Na lotoleaga ai le au ta‘ita‘i lotu i lenei mea, ma na latou tuuina loa aposetolo i le falepuipui. Ae le‘i umi se taimi na nonofo ai i ina.

I le pō, na tatala ai e le agelu a le Atua le falepuipui, e pei ona e vaai atu iai. Na fai atu le agelu: ‘Ia ō ma tutū i le malumalu, ma tala‘i atu pea i tagata.’ I le isi taeao, ina ua aauina atu e ta‘ita‘i lotu tagata e o e aumai le au aposetolo, ua leai i latou. Mulimuli ane, na maua i latou o loo a‘oa‘o i le malumalu ma avatu loa i latou i le fale o le au taupulega.

‘Na matou faatonuina malosi outou e aua ne‘i toe a‘oa‘o i le suafa o Iesu,’ o upu ia a le au ta‘ita‘i lotu. ‘Ae ua tou faatumulia Ierusalema iā outou a‘oa‘oga.’ Ona tali atu lea o aposetolo: ‘E tatau ona matou usiusita‘i i le Atua o le pule na i lo tagata.’ Ona latou faaauau pea lea ona a‘oa‘o le “tala lelei.” Pe e lē tatau ea ona tatou mulimuli i nei faaa‘oa‘oga lelei?

Galuega mataupu e 3 se‘ia oo i le 5.



Fesili

  • O le ā na tupu a o ō atu Peteru ma Ioane i le malumalu i le isi afiafi?
  • O le ā le tala a Peteru i se tamāloa pipili, ma o le ā na avatu e Peteru iā te ia lea e sili atu i tupe?
  • Aiseā ua feitai ai le au ta‘ita‘i lotu, ma o le ā na latou faia iā Peteru ma Ioane?
  • O le ā na faapea atu ai Peteru i le au ta‘ita‘i lotu, ma o le ā na faasā ona faia e le au aposetolo?
  • Aiseā ua lotoleaga ai le au ta‘ita‘i lotu, ma o le ā na tupu i le taimi lona lua na falepuipui ai le au aposetolo?
  • O le ā le tali a aposetolo ina ua avatu i latou i le fale o le au taupulega?

Fesili faaopoopo

  • Faitau le Galuega 3:1-10.

    E ui ua lē toe tuuina mai ia i tatou le mana e faia ai vavega i aso nei, ae e faapefea ona fesoasoani upu a Peteru i le Galuega 3:6 ina ia tatou talisapaia le tāua o le fe‘au o le Malo? (Ioa. 17:3; 2 Kori. 5:18-20; Fili. 3:8)

  • Faitau le Galuega 4:1-31.

    Pe a tatou feagai ma teteega i le faiva, o le ā le auala tatou te faaa‘oa‘o atu ai i o tatou uso Kerisiano i le ulua‘i senituri? (Galu. 4:29, 31; Efe. 6:18-20; 1 Tesa. 2:2)

  • Faitau le Galuega 5:17-42.

    E faapefea i nisi tagata e lē o ni Molimau i aso ua te‘a ma i le taimi nei, ona latou faaalia le magafagafa i le galuega tala‘i? (Galu. 5:34-39)