Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 105: Faatalitali i Ierusalema

Tala 105: Faatalitali i Ierusalema

O TAGATA o loo i ina o soo o Iesu. Ua usiusita‘i iā te ia ma latou nonofo i Ierusalema. Ma a o latou faatalitali, na faatumulia ai le fale atoa i se leotele. E pei o se matagi agi malosi. Ma na amata ai ona aliali mai ni laulaufaiva afi i luga a‘e o ulu o soo ta‘itasi uma lava. Pe e mafai ona e iloaina le afi i luga o i latou uma ta‘ito‘atasi? O le a le uiga o lenā mea?

Liligiina ifo o le agaga paia i soo o le ulua‘i senituri

O se vavega! Ua toe fo‘i Iesu i le lagi e faatasi ma lona Tamā, ma ua ia liligiina ifo le agaga paia o le Atua i ona soo. Pe e te iloa le mea ua faia e le agaga paia iā i latou? Ua amata ona latou tautatala i gagana eseese.

E to‘atele tagata i Ierusalema na latou faalogo i le leo e pei o se matagi malosi ma latou o mai ai e vaai po o le a le mea ua tupu. O isi tagata mai isi atunuu na latou ō atu i ina i le tausamiga a Isaraelu o le Penetekoso. O se vaaiga na ofo ai nei mālō! Ua latou faalogo i le au soo ua tautatala mai i a latou gagana i mea uiga ese ua faia e le Atua.

‘O tagata uma nei e mai Kalilaia,’ o le tala lea a tagata asiasi. ‘E faapefea ona mafai ona latou tautatala i nei gagana eseese a atunuu matou te ō mai ai?’

Ua tula‘i nei Peteru ma faamatala atu iā i latou. Ua leotele ma ta‘u atu i tagata pe na faapefea ona fasiotia Iesu ma na toe faatūina mai o ia e Ieova. ‘Ma ua iai nei Iesu i le itu taumatau o le Atua i le lagi,’ o upu ia a Peteru. ‘Ma na ia liligi ifo le agaga paia na folafolaina mai. O le pogai lenā ua tou vaai ma faalogo ai i nei vavega.’

Ina ua ta‘ua e Peteru nei mea, o le to‘atele o tagata ua faanoanoa i mea na faia iā Iesu. ‘O le ā se mea matou te faia?’ o la latou fesili lea. Ona fai atu lea o Peteru: ‘E tatau ona suia nei tou olaga ma papatisoina ma avea ma soo o Iesu.’ I lea aso na papatiso ai e tusa ma le 3,000 soo o Iesu.

Galuega 2:1-47.



Fesili

  • E pei ona faaalia i le ata, o le ā na tupu i soo o Iesu na faatalitali i Ierusalema?
  • O le ā se vaaiga na ofo ai mālō na asiasi atu i Ierusalema?
  • O le ā na faamatala atu e Peteru i tagata?
  • O ā faalogona o tagata ina ua uma ona latou faalogologo iā Peteru, ma o le ā na ia fai atu iā i latou e fai?
  • E toa fia tagata na papatiso i le Penetekoso e 33 T.A.?

Fesili faaopoopo

  • Faitau le Galuega 2:1-47.

    Na faapefea ona faaalia e upu a Peteru i le Galuega 2:23, 36, e tuua‘ia le nuu atoa o Iuta i le maliu o Iesu? (1 Tesa. 2:14, 15)

    Na faapefea ona faia e Peteru se faata‘ita‘iga lelei i le faaaogāina lelei o le Tusi Paia? (Galu. 2:16, 17, 29, 31, 36, 39; Kolo. 4:6)

    Na faapefea ona faaaogā e Peteru le ulua‘i “ki o le malo o le lagi” lea na folafola atu e Iesu e avatu iā te ia? (Galu. 2:14, 22-24, 37, 38; Mata. 16:19)

Faitau Atili

Ua Vāai le Faitau Selau iā Iesu a o Leʻi Oo i le Penetekoso

Talu mai le taimi na toetū aʻe ai Iesu ma le taimi na afio aʻe ai o ia i le lagi, sa tele taimi na ia faamamafa atu ai i ona soo le mea o le a latou mauaina, ma le auala e tatau ona latou faaaogāina ai.