Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 104: Toe Fo‘i Iesu i le Lagi

Tala 104: Toe Fo‘i Iesu i le Lagi

A O gasolo atu aso, na faaali atu Iesu i ona soo i le tele o taimi. E faatasi ona vaaia o ia e le toa 500 o soo. A o faaali o ia iā i latou, sa ia talanoa e uiga i le malo o le Atua. Na auina mai e Ieova Iesu i le lalolagi e a‘oa‘o e uiga i le Malo. Ma na faaauauina ona ia faia lea mea e oo lava ina ua mavae le faatūina o ia mai le oti.

O loo toe fo‘i Iesu i le lagi

Pe e te manatua o le ā le malo o le Atua? Ioe, o se pulega moni a le Atua i le lagi, ma o Iesu o Lē na filifilia e le Atua e fai ma tupu. E pei ona tatou a‘oa‘oina, ua faaalia e Iesu o le a avea o ia ma se tupu lelei tele, i lona fafagaina o ē fia aai, faamālōlō ē mama‘i, ma toe faatutūina mai ē ua oti!

O lea, a pule loa Iesu o se tupu i le lagi mo le afe o tausaga, o le a faape‘ī le lalolagi? Ioe, o le lalolagi atoa o le a avea ma parataiso matagofie. O le a leai ni taua, solitulafono, po o faama‘i po o le oti fo‘i. Tatou te iloa e moni, auā na faia e le Atua le lalolagi o se parataiso ia fiafia ai tagata. O le māfuaaga lenā na ia faia ai le faato‘aga o Etena i le amataga. Ma o le a taga‘i iai Iesu o le mea e finagalo iai le Atua e fai, o le a faataunuuina lava.

Ua oo nei le taimi mo Iesu e toe fo‘i ai i le lagi. E 40 aso na faaali atu ai Iesu i ona soo. Ua latou mautinoa ai ua toe ola o ia. A o le‘i tuua e ia ona soo, sa ia faapea atu iā i latou: ‘Ia outou nonofo pea i Ierusalema se‘ia outou mauaina le agaga paia.’ O le agaga paia o le malosi galue o le Atua, e pei o se matagi e agi, e fesoasoani ai i ona soo i le faia o le finagalo o le Atua. Mulimuli ane, ona fai atu lea o Iesu: ‘Tou te tala‘i fo‘i e uiga iā te a‘u i vaega mamao o le lalolagi.’

Ina ua uma ona ta‘u atu e Iesu na mea, ona tupu ai lea o se mea uiga ese. Ua amata ona ia alu a‘e i le lagi, e pei ona e vaai atu iai. Ona ufitia ai lea o ia e se ao ua lē toe vaaia, ma ua lē toe iloa atu e le ‘au soo Iesu. Ua alu atu Iesu i le lagi, ma pule mai o ia i luga o ona soo.

O loo tepa i luga i le lagi le ‘au soo

1 Korinito 15:3-8; Faaaliga 21:3, 4; Galuega 1:1-11.



Fesili

  • E to‘a fia soo na vaai iā Iesu i se tasi aso, ma o le ā na ia talanoa ai iā i latou?
  • O le ā le Malo o le Atua, ma e faape‘ī le olaga i le lalolagi pe a pule Iesu o se Tupu mo le afe tausaga?
  • E fia aso na faaali atu ai Iesu i ona soo, ma ua oo nei i le taimi mo Iesu e faia le ā?
  • A o le‘i tuua ona soo, o le ā na faapea atu ai Iesu ia latou faia?
  • O le ā o loo tupu i le ata, ma e faapefea ona ufitia Iesu ma le toe iloa atu o ia?

Fesili faaopoopo

  • Faitau le 1 Korinito 15:3-8.

    Aiseā na mafai ai e le aposetolo o Paulo ona talanoa ma le mautinoa i le toetū o Iesu, ma o ā mea e mafai ona talanoa ma le mautinoa i ai Kerisiano i aso nei? (1 Kori. 15:4, 7, 8; Isa. 2:2, 3; Mata. 24:14; 2 Timo. 3:1-5)

  • Faitau le Galuega 1:1-11.

    O le ā le mamao na salalau atu ai le galuega tala‘i e pei ona valoia i le Galuega 1:8? (Galu. 6:7; 9:31; 11:19-21; Kolo. 1:23)

Faitau Atili

IESU—LE ALA, LE UPU MONI MA LE OLA

Keriso i le Itu Taumatau o le Atua

O le ā o le a faia e Iesu, a o ia faatalitali i le taimi e faalaa mai ai ma faaumatia ona fili?