Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 103: I Totonu o se Potu na Loka

Tala 103: I Totonu o se Potu na Loka

INA ua ō ese mai Peteru ma Ioane mai le tuugamau o Iesu, na tuua ai na o Maria. Ona tagi lea o ia. Ona ia autilo atu lea i totonu o le tuugamau, e pei ona iai i le ata ua te‘a. O i ina na ia vaaia ai agelu e to‘alua! Ona la fesili lea iā te ia: ‘Aiseā ua e tagi ai?’

Ua tali atu Maria: ‘Ua latou aveeseina lo‘u Alii, ma ou te lē iloa po o fea ua latou tuuina ai.’ Ona liliu lea o Maria i tua ma ia vaaia ai se tamāloa. Ua fesili mai o ia: ‘O ai lenā e te su‘eina?’

Ua manatu Maria o lenei tamāloa o se fai togālaau, ma atonu ua ia aveina le tino o Iesu. Ona ia fai atu ai lea: ‘Afai ua e aveina o ia, ia e ta‘u mai po o fea ua e tuuina iai o ia.’ O lenei tamāloa o Iesu. Ua iai sona tino ua lē iloa e Maria. Ae ina ua ia ta‘ua lona igoa, ona iloa ai lea e Maria o ia o Iesu. Ona ia momo‘e lea ma ta‘u i le au soo: ‘Ua ou vaai i le Alii!’

Mulimuli ane i lenā aso, a o savavali soo e to‘alua i le nuu o Emau, na faatasi atu iai se tamāloa. Ua faanoanoa tele le ‘au soo auā ua fasiotia Iesu. Ae a o latou savavali, na faamatala atu e lenei tamāloa le tele o mea mai le Tusi Paia na faafiafia ai la‘ua. Ina ua latou mālōlō mo se mea‘ai, ona iloa ai lea e nei soo o lenei tamāloa o Iesu. Ona mou ai lea o Iesu, ona toe ō faanatinati lea o nei soo i Ierusalema e ta‘u atu i le ‘au aposetolo e uiga iā te ia.

A o tutupu na mea, sa faaali atu fo‘i Iesu iā Peteru. Na ofo isi ina ua latou faalogo i lenei mea. Ona ō lea o nei soo e to‘alua i Ierusalema ma su‘e le ‘au aposetolo. Sa la ta‘uina atu iā i latou le faaali atu o Iesu i a i la‘ua i le auala. Ma a o la faamatalaina lenei mea, pe e te iloa le mea ofoofogia na tupu?

Vaai i le ata. Na faaali Iesu i totonu o le potu, e ui lava sa loka le faitoto‘a. Ua fiafia tele le au soo! Pe e lē o se aso uiga ese lenā aso? Pe e mafai ea ona e faitauina taimi na faaali atu ai Iesu i ona soo? Pe ua e faitauina taimi e lima?

Ua faaali atu Iesu i le ‘au soo

E le‘i iai le aposetolo o Toma ina ua faaali atu Iesu. Ona ta‘u atu lea e le au soo iā te ia: ‘Ua matou vaai i le Alii!’ Ae na fai atu Toma, faato‘a ia talitonu pe a vaai o ia iā Iesu. Ia, e tusa e valu aso mulimuli ane ai ua toe faatasi fo‘i le au soo i se potu na tapunipuni, ma sa iai Toma. Na faafuase‘i lava ona faaali atu Iesu i ina i le potu. Ma ua talitonu nei Toma.

Ioane 20:11-29; Luka 24:13-43.



Fesili

  • O le ā na fai atu ai Maria i se tamāloa na ia manatu o se fai togālaau, ae o le ā na ia iloa ai o Iesu le tamāloa lea?
  • O le ā na tupu a o savavali soo e to‘alua i le nuu o Emau?
  • O le ā le mea ofoofogia na tupu a o faamatala atu e soo e to‘alua i aposetolo e faapea na la vaai iā Iesu?
  • E faafia ona faaali atu Iesu i ona soo?
  • O le ā na fai atu ai Toma ina ua ia faalogo na vaai le ‘au soo i le Alii, ae o le ā na tupu i aso e valu mulimuli ane ai?

Fesili faaopoopo

  • Faitau le Ioane 20:11-29.

    Po o le uiga o fetalaiga a Iesu i le Ioane 20:23 e iai i tagata le pule e faamagalo ai agasala? Ia faamatala. (Sala. 49:2, 7; Isa. 55:7; 1 Timo. 2:5, 6; 1 Ioa. 2:1, 2)

  • Faitau le Luka 24:13-43.

    E faapefea ona tatou saunia o tatou loto ina ia taliaina upu moni o le Tusi Paia? (Luka 24:32, 33; Esera 7:10; Galu. 16:14; Epe. 5:11-14)