Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 102: Ua Toe Soifua Iesu

Tala 102: Ua Toe Soifua Iesu

PE E te iloa o ai lenā fafine ma na tamāloloa e to‘alua? O Maria le Makatala, o se uō a Iesu. Ma o tamāloloa o loo oofu papa‘e o agelu. O le tama‘i potu lenei o loo tilotilo iai Maria i totonu o le tuugamau lea na tuu atu iai le tino o Iesu ina ua maliu. Ae ua leai nei se tino! O ai na aveina? Se‘i o tatou vaai iai.

O loo tautala agelu iā Maria le Makatala

Ina ua uma le maliu o Iesu, ona fai atu lea o ositaulaga iā Pilato: ‘A o ola Iesu na ia faapea mai, o le a toe faatūina o ia pe a mavae aso e tolu. Ia e poloa‘i atu e leoleoina le tuugamau. Ona lē gaoia lea e ona soo lona tino ma faapea mai ua toe faatūina mai o ia!’ Ona fai atu lea o Pilato i le au ositaulaga e aauina atu ni fitafita e leoleo le tuugamau.

Ae i le taeao pō o le aso lona tolu talu ona maliu Iesu, na sau faafuase‘i ai le agelu a Ieova. Na ia fulieseina le maa i le gutu o le tuugamau. Ua fefefe fitafita. Ona latou tilotilo ai lea i totonu, ua leai se tino! Ona o ai lea o isi fitafita i le aai ma ta‘u atu i ositaulaga. Pe e te iloa le mea na faia e ositaulaga leaga? Na latou totogia fitafita ia pepelo. ‘Ia outou fai atu na ō mai ona soo i le pō, a o matou momoe, ma gaoi le tino,’ o le tala lea a ositaulaga i fitafita.

Ua asiasi atu ni isi uō fafine a Iesu i le tuugamau. Na latou tete‘i ina ua oo atu ua gaogao! Ona tutū faafuase‘i mai lea o agelu e to‘alua ma o la ofu pupula. ‘Aiseā ua tou sa‘ili ai mo Iesu i inei?’ o la la fesili lea. ‘Ua toe faatūina o ia. Faavave atu nei ma ta‘u atu i ona soo.’ Na tamomo‘e nei fafine, ae na taofia i latou e se tamāloa i le ala! O ai ia? O Iesu! ‘Ō atu e ta‘u atu i o‘u soo,’ o lana tala lea.

Ina ua ta‘u atu e fafine i soo ua toe ola mai Iesu, ma na latou vaai iā te ia, na faigatā ona talitonu iai le ‘au soo. Na tamomo‘e atu Peteru ma Ioane i le tuugamau e vaai iai, ae na gaogao le tuugamau! Ina ua ō ese Peteru ma Ioane, sa nofo pea Maria le Makatala. Ina ua ia tilotilo na iloa atu agelu e to‘alua.

Pe e te iloa le mea na tupu i le tino o Iesu? Ua faamou e le Atua. E le‘i toe faaolaina mai e le Atua Iesu i se tino faaletino. Na ia tuuina atu iā Iesu se tino fou faaleagaga, e pei o agelu. Ae ina ia faaalia atu i ona soo ua toe ola mai o ia, e mafai e Iesu ona faia se tino e mafai e tagata ona iloa, e pei ona o le a tatou a‘oa‘oina mulimuli ane ai.

Mataio 27:62-66; 28:1-15; Luka 24:1-12; Ioane 20:1-12.



Fesili

  • O ai le fafine ma tamāloloa e to‘alua o i le ata, ma o fea o loo iai i latou?
  • Aiseā na fai atu ai Pilato i le au ositaulaga e aauina atu ni fitafita e leoleo le tuugamau o Iesu?
  • O le ā na faia e se agelu i le taeao pō o le aso lona tolu talu ona maliu Iesu, ae o le ā na faia e ositaulaga?
  • Aiseā ua tete‘i ai nisi fafine ina ua asiasi atu i le tuugamau o Iesu?
  • Aiseā na tamomo‘e atu ai Peteru ma Ioane i le tuugamau o Iesu, ma o le ā na la mauaina?
  • O le ā na tupu i le tino o Iesu, ae o le ā na ia faia e faaali atu ai i ona soo ua toe ola mai o ia?

Fesili faaopoopo

  • Faitau le Mataio 27:62-66 ma le 28:1-15.

    Ina ua toetū mai Iesu, na faapefea ona agasala i le agaga paia le ‘auositaulaga sili, le ‘au Faresaio ma le ‘autoeaina? (Mata. 12:24, 31, 32; 28:11-15)

  • Faitau le Luka 24:1-12.

    E faapefea i le tala o le toetū o Iesu ona faaalia ai e silasila Ieova i fafine o ni molimau maufaatuatuaina? (Luka 24:4, 9, 10; Mata. 28:1-7)

  • Faitau le Ioane 20:1-12.

    E faapefea ona fesoasoani le Ioane 20:8, 9, ina ia tatou iloa ai le mana‘oga ia onosa‘i pe a tatou lē malamalama atoatoa i le faataunuuga o se valoaga o le Tusi Paia? (Faata. 4:18; Mata. 17:22, 23; Luka 24:5-8; Ioa. 16:12)

Faitau Atili

Ua Faaali Atu Iesu o Lē ua Toe Faatūina i le Toʻatele

Ua faapefea ona faamaonia atu e Iesu i ona soo o lea ua toe faatūina o ia?