Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 109: Asiasi Peteru iā Konelio

Tala 109: Asiasi Peteru iā Konelio

O LE aposetolo o Peteru lenā e tū mai, ma o isi na o ana uō o loo i ona tua. Ae aiseā o loo ifo atu ai lenā tamāloa iā Peteru? Pe e tatau ea ona ia faia? Pe e te iloa o ai o ia?

Ua feiloa‘i Peteru ma Konelio

O Konelio. O ia o se ofisa o le vaega‘au a Roma. E lē iloa e Konelio Peteru, ae na ta‘uina atu iā te ia e valaaulia mai Peteru i lona fale. Se‘i o tatou sa‘ilia pe na faapefea ona tupu.

O ē na muamua mulimuli iā Iesu o Iutaia, ae o Konelio e lē o se Iutaia. E ui i lea e alofa o ia i le Atua, e tatalo iai, ma na te faia mea lelei mo tagata. O le isi aoauli, na faaali atu ai le agelu a Ieova iā te ia ma faapea atu: ‘Ua fiafia le Atua iā te oe, ma o le a tali mai o ia i au tatalo. Ia aauina atu ni tagata e aami iā Peteru. O loo nofo ia i Iopa i le fale o Simona, e latalata i le sami.’

Ona aauina lea e Konelio ni tagata e sa‘ilia Peteru. I le aso na sosoo ai ina ua latalata nei tagata i Iopa, sa iai Peteru i luga o le fale o Simona. O i ina na faamafaufauina ai e le Atua Peteru ua ia vaaia ai se ie tele ua sau mai le lagi. O loo iai i le ie ituaiga eseese o mea ola uma. E tusa ai ma le tulafono a le Atua, o mea ola na e le mamā mo mea‘ai, ae na faapea mai loa le leo: ‘Tū ia i luga, Peteru. Fafasi mate ma ai.’

‘Leai!’ o le tali lea a Peteru. ‘Ou te le‘i ‘aina lava se mea e lē mamā.’ Ae na toe fai mai le leo iā Peteru: ‘Aua e te toe ta‘ua mea e lē mamā ua faamamāina nei e le Atua.’ E faatolu ona tupu lenei mea. A o mafaufau Peteru po o le ā le uiga o nei mea, ae taunuu atu loa tagata na aauina atu e Konelio ma fesili atu mo Peteru.

Ona alu ifo lea o Peteru i lalo ma faapea atu: ‘O a‘u lea tou te manana‘o iai. Aiseā ua tou o mai ai?’ Ina ua faamatala atu e tagata na faaali se agelu iā Konelio ma fai atu na te valaaulia Peteru i lona fale, ona malie lea o Peteru latou te ō ma ana uō e asiasi iā Konelio i Kaisareia.

Ua faapotopotoina e Konelio lona au aiga ma ana uō e alofa tele iai. Ina ua taunuu atu Peteru, ona faafeiloa‘i atu lea o Konelio iai. Na ia faapa‘ū i lalo ma ifo atu i vae o Peteru, e pei ona e vaai atu iai. Ae na faapea atu Peteru: ‘Tū i luga; ua na o a‘u o se tagata.’ E faasā e le Tusi Paia le ifo i se tagata ma tapua‘i atu iai tau lava o Ieova.

Ona tala‘i lea o Peteru i e uma ua faapotopotoina. ‘Ua ou iloa e talia e le Atua tagata uma o e manana‘o e auauna atu iā te ia,’ o upu ia a Peteru. A o tautala o ia, ua auina mai e le Atua lona agaga paia, ma na tautatala ai tagata i gagana eseese. Sa ofo tele le ‘ausoo Iutaia na o mai ma Peteru, auā ua latou manatu e fiafia le Atua i na o tagata Iutaia. Ua a‘oa‘oina ai i latou e lē silasila le Atua i tagata faapea ua sili se tasi ituaiga i lo se isi ituaiga o tagata. Pe e lē o se mea lelei lea mo i tatou e ao ona manatua?

Galuega 10:1-48; 11:1-18; Faaaliga 19:10.



Fesili

  • O ai le tamāloa o loo tootuli ma ifo e pei ona vaaia i le ata?
  • O le ā na faapea atu ai le agelu iā Konelio?
  • O le ā na faaali atu e le Atua iā Peteru a o iai i luga o le fale o Simona i Iopa?
  • Aiseā na fai atu ai Peteru iā Konelio e aua le ifo ma tapua‘i atu iā te ia?
  • Aiseā sa ofo tele ai le ‘ausoo Iutaia na o mai ma Peteru?
  • O le ā le lesona tāua e ao ona tatou a‘oa‘oina mai le asiasiga a Peteru iā Konelio?

Fesili faaopoopo

  • Faitau le Galuega 10:1-48.

    O le ā ua faaalia e upu a Peteru i le Galuega 10:42 e faatatau i le galuega o le tala‘ia o le tala lelei o le Malo? (Mata. 28:19; Mare. 13:10; Galu. 1:8)

  • Faitau le Galuega 11:1-18.

    O le ā le manatu o Peteru ina ua manino faatonuga a Ieova e faatatau i tagata o Nuu Ese, ma e mafai faapefea ona tatou mulimuli i lana faata‘ita‘iga? (Galu. 11:17, 18; 2 Kori. 10:5; Efe. 5:17)