Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 82: Moretekai ma Eseta

Tala 82: Moretekai ma Eseta

SE‘I o tatou toe fo‘i atu i ni nai tausaga a o le‘i tuua e Esera Ierusalema. O Moretekai ma Eseta o ni Isaraelu tāua i le malo o Peresia. O Eseta o le masiofo ae o le atalii o le uso o lona tamā o Moretekai e lona lua lona tulaga i le tupu. Se‘i o tatou vaai pe na tupu faapefea lea mea.

Na feoti mātua o Eseta a o la‘itiiti o ia, o lea na tausia ai o ia e Moretekai. O Asueru, le tupu o Peresia, e iai lona maota i le aai o Susana, ma o Moretekai o se tasi o ana auauna. I le tasi aso na lē usita‘i ai le avā a le tupu o Vasati, o lea na filifilia ai loa e le tupu se masiofo fou. Pe e te iloa le fafine na ia filifilia? Ioe, o le talavou aulelei o Eseta.

Ua ita Hamanu iā Moretekai

Pe e te iloa atu lenā tamāloa faamaualuga o loo ifo atu i ai tagata? O Hamanu lenā. O ia o se tagata tāua i Peresia. Na mana‘o Hamanu e ifo atu fo‘i Moretekai lenā e nofo mai i ina iā te ia. Ae e le‘i faia e Moretekai. E le‘i manatu o ia o se mea sa‘o le ifo atu i se tagata leaga faapena. Ma na ita tele Hamanu i lenei mea. O le mea la lea na ia faia.

Ona ta‘u atu lea e Hamanu i le tupu ni pepelo e uiga iā Isaraelu. ‘O tagata leaga i latou e lē usiusita‘i i au tulafono,’ o lana tala lea. ‘Ua tatau ona fasiotia i latou.’ E le‘i iloa e Asueru o lana avā o Eseta o se Isaraelu. O lea sa ia faalogo ai iā Hamanu, ma na ia faia ai se tulafono o le a iai se aso faapitoa e fasiotia ai Isaraelu uma.

Ina ua faalogo Moretekai i le tulafono, sa lē fiafia o ia. Ona ia avatu lea o se fe‘au iā Eseta: ‘E tatau ona e ole atu i le tupu ina ia faaolaina i tatou.’ E sā i le tulafono a Peresia ona e alu e vaai le tupu sei vaganā ua valaaulia oe. Ae na alu i ai Eseta e aunoa ma le valaaulia o ia. Na sii mai e le tupu lona tootoo auro iā te ia, o lona uiga e lē fasiotia o ia. Na valaaulia e Eseta le tupu ma Hamanu i se faiga‘ai tele. Na fesili le tupu ia Eseta po o le ā se mea e mana‘o na te faia mo ia. Ona fai atu lea o Eseta pe e mafai ona la ō mai ma Hamanu mo se faiga‘ai i le isi aso.

I lenā faiga‘ai na ta‘u atu e Eseta i le tupu: ‘O o‘u tagata ma a‘u o le a fasiotia.’ Ua ita le tupu. ‘O ai na te mafai ona faia lenā mea?’ o lana fesili lea.

‘O le fili, o lenei Hamanu leaga!’ o upu ia a Eseta.

O loo tuua‘i e le Masiofo o Eseta Hamanu

Ua ita tele le tupu. Na ia poloa‘iina ai e fasiotia Hamanu. Ina ua mavae lenā, ona tofia lea e le tupu Moretekai e sosoo atu lana pule iā te ia. Ona vaai lea o Moretekai ua iai se tulafono fou e faia e faataga ai Isaraelu e tau mo o latou ola i le aso o le a fasiotia ai i latou. Ona ua tāua nei Moretekai, o le to‘atele o tagata sa fesoasoani iā Isaraelu, ma na faasaoina ai i latou mai i o latou fili.

Tusi o le Tusi Paia o Eseta.



Fesili

  • O ai Moretekai ma Eseta?
  • Aiseā na mana‘o ai le tupu o Asueru i sana masiofo fou, ma o ai na ia filifilia?
  • O ai Hamanu, ma aiseā na ita tele ai o ia?
  • O le ā le tulafono na faia, ma o le ā na faia e Eseta ina ua ia mauaina se fe‘au mai iā Moretekai?
  • O le ā na tupu i a Hamanu, ae o le ā na tupu iā Moretekai?
  • Na faapefea ona faasaoina tagata Isaraelu mai o latou fili?

Fesili faaopoopo

  • Faitau le Eseta 2:12-18.

    Na faapefea ona faaalia e Eseta le tāua o le atiina a‘e “o le loto agamalu ma le filemu”? (Eseta 2:15; 1 Pete. 3:1-5)

  • Faitau le Eseta 4:1-17.

    E pei ona maua e Eseta le avanoa e gaoioi ai mo le tapua‘iga moni, o le ā le avanoa ua tatou maua i aso nei e faailoa ai lo tatou tapua‘i ma le faamaoni iā Ieova? (Eseta 4:13, 14; Mata. 5:14-16; 24:14)

  • Faitau le Eseta 7:1-6.

    E faapefea e le to‘atele o tagata o le Atua i aso nei ona tuu i latou lava i se tulaga semanū e sauāina ai, e pei lava o Eseta? (Eseta 7:4; Mata. 10:16-22; 1 Pete. 2:12)