Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 81: Faalagolago i le Fesoasoani a le Atua

Tala 81: Faalagolago i le Fesoasoani a le Atua

TOEITIITI lava atoa le 50,000 o tagata na malaga mai Papelonia i Ierusalema. Ina ua latou taunuu, sa matuā faaleagaina Ierusalema. E leai lava se tasi na ola ai. Ua tatau iā Isaraelu ona toe fausia nei mea uma.

O le tasi o mea muamua na latou fausia o le fata faitaulaga lea. O le mea e fai ai taulaga iā Ieova. I ni nai masina mulimuli ane ai ona amata lea ona fausia e Isaraelu le malumalu. Ae o fili na ola i laueleele i tafatafa ane, na lē manana‘o ia toe fausia e Isaraelu. O lea na latou taumafai e faafefe i latou ma ia taofia ai. Mulimuli ane, na faaosoina e ia fili le tupu fou o Peresia e fai se tulafono e taofia ai le galuega o le fausiaina.

Ua 17 nei tausaga talu ona toe fo‘i mai Isaraelu mai Papelonia. Na aauina atu e Ieova ana perofeta o Hakai ma Sakaria e ta‘u atu i tagata ia toe amata le galuega. Na faalagolago tagata i le fesoasoani a le Atua, ma latou usiusita‘i i perofeta. Ua toe amata nei le galuega, e ui lava ina faapea mai le tulafono e aua le faia.

O lea na sau ai se tagata ofisa Peresia e igoa iā Tatenai ma fesili iā Isaraelu pe o le ā lo latou aiā ua fausia ai le malumalu. Na ta‘u atu e Isaraelu, a o iai i latou i Papelonia, na faapea atu le Tupu o Kuresa: ‘Ō ia nei, i Ierusalema ma fausia le malumalu o Ieova lo outou Atua.’

Na auina atu e Tatenai le tusi i Papelonia pe moni na fai atu Kuresa lē ua oti, e faia faapea. E le‘i umi ae maua le tusi mai le tupu fou o Peresia. Ua faapea mai e moni lava sa faia faapea e Kuresa. O lea na tusi mai le tupu: ‘Tuu pea Isaraelu e fausia le malumalu o lo latou Atua. Ma ou te poloa‘iina oe ia e fesoasoani iā i latou.’ E tusa ma le fā tausaga ae māe‘a le malumalu, ma ua fiafia tele Isaraelu.

Ua tusa nei e 48 tausaga talu ona mavae le fausiaina o le malumalu. Ua matitiva tagata Isaraelu, ma o le aai ma le malumalu o le Atua ua lē foliga manaia mai. I Papelonia, na iloa ai e Esera le Isaraelu le mana‘oga ia faamatagofie ai le malumalu o le Atua. O lea, pe e te iloa le mea na ia faia?

Na alu Esera e vaai ia Aretaseta le tupu o Peresia, ma o lenei tupu lelei na tuuina atu iā Esera ni meaalofa se tele e avatu i Ierusalema. Na fesili atu Esera i tagata Isaraelu o i Papelonia e fesoasoani iā te ia i le aveina o meaalofa i Ierusalema. Pe tusa e 6,000 tagata na ō. Ma na latou aveina ario, ma auro ma mea tāua e tele.

Na popole Esera auā e iai tagata leaga i le ala. Atonu o le a aveina e nei tagata a latou ario ma auro ma fasiotia i latou. O lea na faapotopoto ai e Esera tagata uma, e pei ona e vaai atu iai i le ata. Ona latou tatalo atu lea iā Ieova e puipui i latou i le malaga umi i Ierusalema.

O loo tatalo Esera ma tagata

Na puipui i latou e Ieova. Sa taunuu ma le saogalemu i Ierusalema ma ua mavae le fā masina. Pe e lē faaalia ai ea e mafai e Ieova ona puipui i latou o ē faalagolago iā te ia mo le fesoasoani?

Esera mataupu e 2 se‘ia oo i le 8.



Fesili

  • E to‘afia tagata na auai i le malaga umi mai Papelonia i Ierusalema, ae o le ā na latou mauaina ina ua taunuu i ina?
  • O le ā na amata ona fausia e tagata Isaraelu ina ua taunuu, ae o le ā na faia e o latou fili?
  • O ai Hakai ma Sakaria, ma o le ā na la ta‘uina atu i tagata?
  • Aiseā na auina atu ai e Tatenai le tusi i Papelonia, ma o le ā le tali na ia mauaina?
  • O le ā na faia e Esera ina ua ia iloa le mana‘oga ia faamatagofie le malumalu o le Atua?
  • O le ā o loo tatalo i ai Esera e pei ona vaaia i le ata, ma na faapefea ona taliina lana tatalo, ma o le ā ua tatou a‘oa‘oina mai lenei mea?

Fesili faaopoopo

  • Faitau le Esera 3:1-13.

    Afai tatou te nonofo i se vaipanoa e lē o iai se faapotopotoga o tagata o le Atua, o le ā e ao ona faaauau ona tatou faia? (Esera 3:3, 6; Galu. 17:16, 17; Epe. 13:15)

  • Faitau le Esera 4:1-7.

    O le ā le faaa‘oa‘oga na faia e Serupapelu mo tagata o le Atua e faatatau i le faifaimea faatasi ma isi tapua‘iga? (Eso. 34:12; 1 Kori. 15:33; 2 Kori. 6:14-17)

  • Faitau le Esera 5:1-5, 17 ma le 6:1-22.

    Aiseā na lē mafai ai e tagata tetee ona vaoia le galuega o le fausiaina o le malumalu? (Esera 5:5; Isa. 54:17)

    E faapefea e gaoioiga a toeaina o Iuta ona faamalosiau i toeaina Kerisiano, e sa‘ili i le ta‘ita‘iga a Ieova pe a feagai ma tagata tetee? (Esera 6:14; Sala. 32:8; Roma 8:31; Iako. 1:5)

  • Faitau le Esera 8:21-23, 28-36.

    A o tatou le‘i amata ona gaoioi e faia se fuafuaga, o le ā le faaa‘oa‘oga a Esera e lelei ona tatou mulimuli i ai? (Esera 8:23; Sala. 127:1; Faata. 10:22; Iako. 4:13-15)