Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 80: Tuua e Tagata o le Atua Papelonia

Tala 80: Tuua e Tagata o le Atua Papelonia

TOEITIITI lava lua tausaga talu ona mavae le pu‘eina o Papelonia e Metai ma Peresia. Ma vaai atu i le mea ua tupu! Ioe, ua tuua e Isaraelu Papelonia. Na faapefea ona faasa‘olotoina i latou? O ai na faatagaina i latou e ō?

O Kuresa le tupu o Peresia. I tuā lava a o le‘i fanau mai Kuresa na faapogaia e Ieova lana perofeta o Isaia e tusi e uiga iā te ia. ‘O le a e faia le mea ou te mana‘o ia e faia. O le a tatalaina le faitoto‘a mo oe e toe osofa‘ia ai le aai.’ Ma na ta‘ita‘i o ia i le pu‘eina o Papelonia. Na ō atu Metai ma Peresia i le aai i le pō e auala atu i puipui na le‘i tapunia.

Ae na tulei mai Ieova e ala i le perofeta o Isaia o le a tuuina atu e Kuresa le poloa‘iga mo le toe fausia o Ierusalema ma lona malumalu. Pe na tuuina atu ea e Kuresa lenā poloa‘iga? Ioe, na ia faia. O le mea lenei na ta‘u atu e Kuresa iā Isaraelu: ‘O nei, i Ierusalema ma fausia le malumalu o Ieova, lo outou Atua.’ Ma o le mea tonu lenā o loo ō Isaraelu e fai.

O loo tuua e tagata Isaraelu Papelonia

Ae e lē o Isaraelu uma o le a toe fo‘i atu mai i Papelonia i Ierusalema. O se malaga umi, e tusa e 500 maila (800 kilomita) ma o le to‘atele ua fai si matutua ma mama‘i e o i lenā mamao. Ma e iai isi māfuaaga na ala ai ona lē manana‘o isi e ō. Ae na fai atu Kuresa i ē na lē ō: ‘Avatu ario ma auro ma meaalofa mo tagata o ē o le a fo‘i atu e toe fausia Ierusalema ma lona malumalu.’

O lea, e tele ni meaalofa na tuuina atu ma na Isaraelu o loo i le ala aga‘i i Ierusalema. E lē gata i lea na tuuina atu fo‘i e Kuresa iā i latou ipu ma pesini na aumaia e le Tupu o Nepukanesa mai le malumalu o Ieova ina ua ia faaumatiaina Ierusalema. O le tele ia o a latou mea sa ave.

Ina ua uma le fā masina o malaga, ona taunuu ai lea o Isaraelu i le taimi tonu e tatau ai. Ua 70 tonu tausaga talu le faaumatiaga o le aai, ma na leai ma se tasi na iai i le laueleele. E ui lava ina ua toe fo‘i mai Isaraelu i lo latou lava atunuu ae o le a feagai i latou ma ni mea faigatā, o le a tatou a‘oa‘oina nei e sosoo mai ai.

Isaia 44:28; 45:1-4; Esera 1:1-11.



Fesili

  • E pei ona faaalia i le ata, o le ā ua faia e tagata Isaraelu?
  • Na faapefea ona faataunuu e Kuresa le valoaga na tulei mai ai Ieova e ala iā Isaia?
  • O le ā na fai atu ai Kuresa i tagata Isaraelu o ē na lē mafai ona toe fo‘i i Ierusalema?
  • O le ā na tuuina atu e Kuresa i tagata e ave i Ierusalema?
  • O le ā le umi o le malaga a tagata Isaraelu ona taunuu lea i Ierusalema?
  • E fia tausaga talu ona leai ma se tasi na i ai i le laueleele?

Fesili faaopoopo

  • Faitau le Isaia 44:28 ma le 45:1-4.

    Na faapefea ona faamatilatila e Ieova le mautinoa ona faataunuu o le valoaga e faatatau iā Kuresa? (Isa. 55:10, 11; Roma 4:17)

    O le ā ua faaalia e le valoaga a Isaia i a Kuresa e faatatau i le mafai e le Atua ona valoia le lumana‘i? (Isa. 42:9; 45:21; 46:10, 11; 2 Pete. 1:20)

  • Faitau le Esera 1:1-11.

    I le mulimuli i le faaa‘oa‘oga a ē na lē mafai ona toe fo‘i i Ierusalema, e mafai faapefea i a i tatou i aso nei ona “fesoasoani” i ē ua mafai ona auai i le auaunaga faataimi atoa? (Esera 1:4, 6; Roma 12:13; Kolo. 4:12)