Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 79: Tanielu i le Lua o Leona

Tala 79: Tanielu i le Lua o Leona

OI, AUE! E foliga mai ua iai Tanielu i le tele o faalavelave. Ae e lē o afāina o ia mai leona! Pe e te iloa aiseā? O ai na tuuina Tanielu i inei faatasi ma nei leona? Se‘i o tatou su‘eina.

O le tupu nei o Papelonia o se tamāloa e igoa iā Tariu. E fiafia tele o ia iā Tanielu auā e agalelei toe poto Tanielu. Ua filifilia e Tariu Tanielu e fai ma pule sili i lona malo. Ona lotoleaga ai lea o isi tamāloloa iā Tanielu, o le mea la lenei na latou faia.

Tariu

Ona latou fai lea iā Tariu: ‘Ua matou malilie, e tatau ona e fai se tulafono faapea mo le 30 aso e sā se tagata ona tatalo atu i se isi atua, po o se isi tagata ae ua na o oe lava le tupu. O lē e lē usita‘i, e lafoina i le lua o leona.’ E le‘i iloa e Tariu le māfuaaga na manana‘o ai tagata e fai lenei tulafono. Ae na manatu o ia o se mea lelei, o lea na ia tusia loa le tulafono. Ua lē mafai nei ona toe suia.

Ina ua iloa e Tanielu le tulafono, ona ia alu lea i lona fale ma tatalo e pei ona masani ai. Ua iloa e tamāloloa leaga e lē mafai ona taofia Tanielu mai le tatalo atu iā Ieova. Ua fiafia i latou, talu ai e foliga o le a manuia fuafuaga mo le aveeseina o Tanielu.

Ina ua iloa e Tariu le pogai na ala ai ona faia e nei tamāloloa le tulafono, sa faanoanoa tele o ia. Ae ua lē mafai ona ia suia le tulafono, o lea na ia faatonuina ai e lafo Tanielu i le lua o leona. Ae na fai atu le tupu iā Tanielu: ‘Ou te faamoemoe o lou Atua, lē o e auauna iai, o le a ia lavea‘iina oe.’

Na lē fiafia Tariu, ua lē mafai ona moe i le pō. I le isi taeao, na ia tamo‘e atu ai i le lua o leona. E pei ona e vaai atu i ai. Na ia valaau atu: ‘Tanielu, auauna a le Atua soifua! Pe na mafaia ea e le Atua o loo e auauna i ai ona lavea‘i iā te oe mai leona?’

Tanielu i le lua o leona

‘Na auina mai e le Atua lana agelu,’ o le tali lea a Tanielu, ‘ma tapuni i gutu leona, o lea na latou lē aaiina ai a‘u.’

Ua fiafia tele le tupu. Na ia poloa‘i ina ia ave a‘e Tanielu mai le lua o leona. Ona ia lafoina lea o tamāloloa na taumafai e aveesea Tanielu i le lua o leona. A o le‘i oo atu i le ta‘ele o le lua, na saeia i latou e leona ma faamalū o latou ponaivi.

Ona tusi atu lea o le Tupu o Tariu i tagata o lona malo: ‘Ou te poloa‘iina tagata uma ia faaaloalo i le Atua o Tanielu. E faia e ia vavega tetele. Na ia lavea‘ia Tanielu mai le aaiina e leona.

Tanielu 6:1-28.



Fesili

  • O ai Tariu, ma o le ā lana vaai iā Tanielu?
  • O le ā na faia e Tariu ona o isi tamāloloa lotoleaga?
  • O le ā na faia e Tanielu ina ua ia iloa le tulafono fou?
  • Aiseā ua lē fiafia ai Tariu ma lē mafai ai ona moe, ma o le ā na ia faia i le taeao?
  • O le ā le tali a Tanielu iā Tariu?
  • O le ā na tupu i tamāloloa leaga ia na taumafai e fasiotia Tanielu, ma o le ā na tusi atu ai Tariu i tagata o lona malo?

Fesili faaopoopo

  • Faitau le Tanielu 6:1-28.

    E faapefea i faufauga leaga faasaga iā Tanielu ona faamanatu mai ai iā i tatou ia taumafaiga a tagata tetee, ina ia taofia le galuega a Molimau a Ieova i aso nei? (Tani. 6:7; Sala. 94:20; Isa. 10:1; Roma 8:31)

    E faapefea ona faaa‘oa‘o auauna a le Atua i aso nei i a Tanielu i le gaua‘i atu i “faipule silisili”? (Tani. 6:5, 10; Roma 13:1; Galu. 5:29)

    E faapefea ona tatou mulimuli i le faaa‘oa‘oga a Tanielu i le auauna “e lē aunoa” iā Ieova? (Tani. 6:16, 20; Fili. 3:16; Faaa. 7:15)