Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 78: Tusi Lima i le Puipui

Tala 78: Tusi Lima i le Puipui
O se tusi lima i le puipui

O LE ā o tupu i inei? O loo fai se faiga‘ai a tagata. Ua valaaulia e le tupu o Papelonia le afe o tagata tāua e fai ma ana mālō. O loo faaaogāina ipu auro ma ipu ario ma pesini na aumaia mai le malumalu o Ieova i Ierusalema. Ae, na faafuase‘i lava, ona iloa se lima o le tamāloa ua tu mai i le ‘ea ma amata ona tusi i le puipui. Ua fefefe uma tagata.

O Pelesara ma ana mālō

Ua tupu nei Pelesara le atalii o le atalii o Nepukanesa. Na ia valaau ia ō mai ona tagata popoto. ‘So o se tasi na te mafai ona faitauina lenei tusitusiga ma ta‘u mai lona uiga,’ o upu ia a le tupu, ‘o le a tuuina atu i ai meaalofa e tele ma tofia o ia e fai ma tagata tāua lona tolu o le malo.’ Ae sa leai se isi na te mafai ona faitauina pe iloa fo‘i lona uiga.

Na faalogo le tinā o le tupu i le pisa ma sau loa o ia i le potu ‘ai. ‘Faamolemole aua e te fefe,’ o lana tala lea i le tupu. ‘O loo iai se tamāloa i lou malo na te iloaina atua paia. A o tupu le tamā o lou tamā o Nepukanesa na ia tofia o ia e fai ma ta‘ita‘i o ou tagata popoto. O lona igoa o Tanielu. Aami atu iā te ia, ma o le a ia ta‘uina atu iā te oe lona uiga.’

Ona aumaia lea o Tanielu. Ina ua uma ona ia teea meaalofa, ona ta‘u atu lea e Tanielu le māfuaaga na aveesea ai e Ieova Nepukanesa, le tamā o lona tamā, mai i lona tulaga tupu. ‘Sa faamaualuga tele o ia,’ o le tala lea a Tanielu. ‘Ma na faasalaina o ia e Ieova.’

‘Ae o oe,’ o le tala lea a Tanielu i a Pelesara, ‘ua e iloa mea uma na tutupu iā te ia ae o loo e faamaualuga lava e pei ona sa iai Nepukanesa. Ua e aumaia ipu ma pesini mai le malumalu o Ieova ma e inu ai. Ua e vivii atu i atua na faia i laau ma maa, ae ua e lē vivii i Lē na Foafoaina i tatou. O le māfuaaga lea ua auina mai ai e le Atua le lima e tusia upu nei.’

‘O le mea lenei ua tusia,’ o le tala lea a Tanielu: ‘MENE, MENE, TEKELE, UPERESA.’

‘MENE o lona uiga ua faitaulia e le Atua aso o lou malo ma aumaia ai i le i‘uga. TEKELE o lona uiga ua fuaina oe i le fua faatautau ma iloa ai ua e le aogā. UPERESA o lona uiga ua tuuina atu lou malo i a Metai ma Peresia.’

A o tautala Tanielu, sa amata ona osofa‘ia e Metai ma Peresia Papelonia. Na latou pu‘eina le aai ma fasiotia Pelesara. Na taunuu moni lava le tusi lima i le puipui i lenā lava pō! Ae o le ā o le a tupu nei iā Isaraelu? E toeitiiti ona tatou iloaina lea, ae muamua se‘i tatou vaai po o le a na tupu iā Tanielu.

Tanielu 5:1-31.



Fesili

  • O le ā na tupu a o faia se faiga‘ai e le tupu o Papelonia ma faaaogāina ipu ma pesini na aumai mai le malumalu o Ieova i Ierusalema?
  • O le ā na fai atu ai Pelesara i ona tagata popoto, ae o le ā na lē mafai ona latou faia?
  • O le ā na fai atu ai le tinā o le tupu ia faia e le tupu?
  • E tusa ma le mea na ta‘u atu e Tanielu i le tupu, aiseā na auina mai ai e le Atua le lima e tusiaina upu i le puipui?
  • Na faapefea ona faamalamalama e Tanielu le uiga o upu i le puipui?
  • O le ā na tupu a o tautala Tanielu?

Fesili faaopoopo

  • Faitau le Tanielu 5:1-31.

    Ia faamatala le eseesega o le mata‘u faale-Atua ma le mata‘u o Pelesara ina ua ia vaaia le tusi lima i le puipui. (Tani. 5:6, 7; Sala. 19:9; Roma 8:35-39)

    Na faapefea ona faaalia e Tanielu le lototele a o tautala atu iā Pelesara ma ona tagata aloa‘ia? (Tani. 5:17, 18, 22, 26-28; Galu. 4:29)

    O le ā le auala ua faamatilatila ai e le mataupu e 5 o le Tanielu, le pule silisili ese a Ieova i le aoao o mea? (Tani. 4:17, 25; 5:21)