Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 83: Pā o Ierusalema

Tala 83: Pā o Ierusalema
O loo toe fausiaina e le ‘aufaigaluega pā o Ierusalema

VAAI atu i galuega e tele na e fai mai. O loo tele galuega a Isaraelu i le toe fausiaina o pā o Ierusalema. Ina ua faaumatia e le Tupu o Nepukanesa Ierusalema i le 152 tausaga muamua, na ia talepeina i lalo pā ma susunu faitoto‘a o le aai. E le‘i toe fausia e Isaraelu pā ina ua faato‘a taunuu atu mai Papelonia.

Pe o le ā sou manatu i faalogona o tagata a o ola i latou e aunoa ma ni pā? Sa latou faalogoina le fefe. E faigofie e fili ona osofa‘i i latou. Ae o Neemia lenā ua fesoasoani i tagata mo le toe fausiaina o pā. Pe e te iloa o ai Neemia?

O Neemia o se Isaraelu mai le aai o Susana, o le mea e nonofo ai Eseta ma Moretekai. Sa galue Neemia i le maota o le tupu, o lea atonu o ia o se uō lelei a Moretekai ma le Masiofo o Eseta. Ae e lē o ta‘ua e le Tusi Paia faapea na galue Neemia mo le tane a Eseta, o Asueru le Tupu. Na ia galue mo le tupu na sosoo ai, le tupu o Aretaseta.

Manatua, o Aretaseta o se tupu lelei na ia tuuina atu iā Esera ni tupe e ave i Ierusalema mo le toe faia o le malumalu o Ieova. Ae na le‘i fausiaina e Esera pā o le aai na solo i lalo. Se‘i o tatou vaai pe na faapefea ona faia e Neemia lenei galuega.

Ua tusa ma le 13 tausaga talu ona tuuina atu e Aretaseta le tupe iā Esera mo le toe faia o le malumalu. Ua avea nei Neemia ma tautū uaina sili mo le Tupu o Aretaseta. O ia e tuuina atu uaina a le tupu, ma ia ona faamautinoa lelei e leai se tasi e taumafai e faaonāina le tupu. O se galuega tāua tele.

O le tasi aso na ō mai ai le uso o Neemia o Hanani ma isi tamāloloa mai Isaraelu e asiasi iā Neemia. Sa latou ta‘u atu iā te ia faafitauli o loo feagai ma Isaraelu, ma pā o Ierusalema o loo solo pea. Sa faanoanoa tele Neemia, ma sa tatalo o ia iā Ieova e uiga i lenā mea.

I le tasi aso na vaaia ai e le tupu ua faanoanoa Neemia, ma na fesili atu ai: ‘Aiseā ua e foliga faanoanoa ai?’ Na ta‘u atu e Neemia talu ai ona ua leaga tele Ierusalema ma o loo solo pea pā. ‘O le ā la le mea e te mana‘o i ai?’ o le fesili lea a le tupu.

Faatonuina e Neemia le galuega

‘Tuu mai a‘u ou te alu i Ierusalema,’ o le tala lea a Neemia, ‘ina ia ou toe fausia pā.’ E agalelei tele le Tupu o Aretaseta. Na ia ta‘u atu e alu Neemia ma fesoasoani iai mo ni laau mo le faia o le galuega. Ina ua taunuu mai Neemia i Ierusalema, ona ia ta‘u atu lea i tagata ana fuafuaga. Sa latou manana‘o iai, ma faapea mai: ‘Se‘i o tatou amata loa le galuega.’

Ina ua iloa atu e fili o Isaraelu ua alu a‘e i luga le pā, ona latou faapea lea: ‘O le a tatou ō ma fasioti i latou, ma taofi le galuega.’ Ae na faalogo i ai Neemia, ma na ia tuuina atu i le ‘aufaigaluega ni pelu ma ni tao. Ma fai atu: ‘Aua tou te fefefe i o outou fili. Tau mo o outou uso, fanau, ma a outou avā ma mo o outou fale.

Ua totoa tagata. Na sauniuni a latou auupega i ao ma pō, ma faaauau pea le galuega. O lea na o le 52 lava aso ae uma le pā. Ma ua mauaina e tagata se faalogona malu puipuia i totonu o le aai. Na a‘oa‘o e Neemia ma Esera tagata e uiga i tulafono a le Atua, ma ua fiafia ai tagata.

Ae ua lē tutusa lava mea pei ona iai a o le‘i aveina faapagota Isaraelu i Papelonia. Ua pulea Isaraelu e le tupu o Peresia ma e tatau ona latou auauna i ai. Ae na folafola e Ieova o le a na aumaia se tupu fou, ma o lenā tupu fou o le a ia aumaia le filemu i tagata. O ai lenei tupu? E faapefea ona ia aumaia le filemu i le lalolagi? E tusa ma le 450 tausaga na mavae, ae e le‘i toe iloa lava se isi tala e uiga i lenei mea. Ona iai lea o se fanauga tāua o se pepe. Ae o se isi tala ese lenā.

Neemia mataupu 1 se‘ia oo i le 6.



Fesili

  • O ā ni faalogona o tagata Isaraelu talu ai e le‘i iai se pā e si‘o ai lo latou aai o Ierusalema?
  • O ai Neemia?
  • O le ā le galuega a Neemia, ma aiseā e tāua ai?
  • O le ā le tala na faanoanoa tele ai Neemia, ma o le ā na ia faia?
  • Na faapefea ona agalelei atu le tupu o Aretaseta iā Neemia?
  • Na faapefea ona fuafuaina e Neemia le galuega ina ia lē mafai ona taofia e fili o Isaraelu?

Fesili faaopoopo

  • Faitau le Neemia 1:4-6 ma le 2:1-20.

    Na faapefea ona sa‘ilia e Neemia le ta‘ita‘iga a Ieova? (Nee. 2:4, 5; Roma 12:12; 1 Pete. 4:7)

  • Faitau le Neemia 3:3-5.

    O le ā e mafai ona a‘oa‘oina e toeaina ma auauna o le faiva i le eseesega o tagata o Tikoa ma o latou “alii”? (Nee. 3:5, 27; 2 Tesa. 3:7-10; 1 Pete. 5:5)

  • Faitau le Neemia 4:1-23.

    O le ā na uuna‘ia tagata Isaraelu ina ia faaauau pea ona faia le galuega e ui i teteega ogaoga? (Nee. 4:6, 8, 9; Sala. 50:15; Isa. 65:13, 14)

    E faapefea ona faalaeiauina i tatou i aso nei ona o le faaa‘oa‘oga a tagata Isaraelu?

  • Faitau le Neemia 6:15.

    O le ā ua faaalia e faatatau i le malosi o le faatuatua i le mea moni e faapea, na māe‘a le fauina o pā o Ierusalema a o le‘i atoa masina e lua? (Sala. 56:3, 4; Mata. 17:20; 19:26)