Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 77: Latou te Lē Ifo i Lalo

Tala 77: Latou te Lē Ifo i Lalo

PE E te manatua na e faalogo e uiga i nei taulele‘a e to‘atolu? Ioe, o i latou o uō a Tanielu ia na le‘i aai i mea sa lē lelei mo i latou. O i latou o Sataraka, Mesako ma Apeteniko. Ae se‘i vaai iā i latou. Aiseā ua latou lē ifo ai i lenā faatusa telē e pei o isi tagata uma? Se‘i o tatou su‘eina.

Pe e te manatua tulafono na tusia e Ieova e ta‘ua o Tulafono e Sefulu? O le tulafono muamua e faapea: ‘Aua e te tapua‘i i se isi atua ese ae na o a‘u.’ O nei taulele‘a ua usiusita‘i atu i lenā tulafono, e ui lava e lē o se mea faigofie ona fai.

O Nepukanesa, le tupu o Papelonia, na ia valaaulia le tele o tagata tāua ia faamamalu i lenei tupua ua faatūina. Faato‘a uma lava lana tala i tagata: ‘Afai tou te faalogo i le leo o le pū, kitara ma isi laau pese, ia ifo loa i lalo i le tupua auro. Soo se tasi e lē faapa‘ū ma ifo i lalo e tapua‘i o le a lafoina i le ogaumu aasa i lea lava taimi.’

Ina ua iloa e Nepukanesa sa le‘i ifo Sataraka, Mesako ma Apeteniko, ona ita ai lea o ia. Ona aumaia lea o i latou i ona luma ma tuuina atu i ai se isi avanoa e ifo ai. Ae sa faalagolago taulele‘a iā Ieova. ‘O le Atua o lē matou te tapua‘i i ai e mafai ona ia faaola mai i matou,’ o la latou tala lea iā Nepukanesa. ‘Ae tusa lava pe na te lē faaolaina i matou, matou te lē ifo lava i lau tupua auro.’

Sataraka, Mesako ma Apeteniko

Ina ua faalogo i ai Nepukanesa ua atili ai lona ita. Ona ia poloa‘i lea: ‘Ia faavevela le ogaumu ia faafitu ona sili atu lona aasa!’ Ona ia fai atu lea i tamāloloa e sili ona malolosi o lana ‘autau ia saisai Sataraka, Mesako ma Apeteniko ma lafo i le ogaumu. Na matua‘i aasa tele le ogaumu na feoti ai tamāloloa malolosi i le sasao o le afi. Ae faapefea taulele‘a e to‘atolu na na latou lafoina i totonu?

Na taga‘i atu le tupu i totonu o le ogaumu, ma sa fefe tele o ia.‘Pe na tatou le‘i saisaia ea nei taulele‘a e to‘atolu ma togi i latou i le ogaumu mumū aasa?’ o lana fesili lea.

‘Ioe, sa faia faapea,’ o le tali lea a ana auauna.

‘Ae ua ou iloa atu ni tamāloloa se to‘afā o savavali solo i le afi. Ma o lona fā o i latou e foliga mai o se atua.’ Ona tu lea o le tupu i le faitoto‘a o le ogaumu ma valaau atu: ‘Sataraka! Mesako! Apeteniko! Ō mai i fafo, o outou o auauna a le Atua Silisili ese!’

Ina ua latou ō mai i fafo, ua iloa e tagata e lē o afāina i latou. Ona faapea atu lea o le tupu: ‘Ia viia le Atua o Sataraka, Mesako ma Apeteniko! O Lē na auina mai lana agelu e lavea‘i iā i latou ona e lē ifo ma tapua‘i atu i se isi lava atua vaganā ai lo latou lava Atua.’

Pe e lē o se faata‘ita‘iga lelei ea lenei o le faamaoni iā Ieova mo i tatou e mulimuli ai?

Esoto 20:3; Tanielu 3:1-30.



Fesili

  • O le ā le faatonuga a Nepukanesa le tupu o Papelonia na fai atu i tagata?
  • Aiseā ua lē ifo ai uō e to‘atolu a Tanielu i le tupua auro?
  • Ina ua tuuina atu e Nepukanesa se isi avanoa e ifo ai taulele‘a Eperu e to‘atolu, na faapefea ona faaalia lo latou faalagolago iā Ieova?
  • O le ā na poloa‘i atu ai Nepukanesa i ana tamāloloa e faia iā Sataraka, Mesako ma Apeteniko?
  • O le ā na vaaia e Nepukanesa ina ua taga‘i i totonu o le ogaumu?
  • Aiseā ua viia ai e le tupu le Atua o Sataraka, Mesako ma Apeteniko, ma o le ā le faata‘ita‘iga ua latou faia mo i tatou?

Fesili faaopoopo

  • Faitau le Tanielu 3:1-30.

    O le ā le uiga na faaalia e taulele‘a Eperu e to‘atolu e ao ona faaa‘oa‘o i ai auauna uma a le Atua, pe a feagai ma tofotofoga o le faamaoni? (Tani. 3:17, 18; Mata. 10:28; Roma 14:7, 8)

    O le ā le lesona tāua na a‘oa‘o atu e Ieova le Atua iā Nepukanesa? (Tani. 3:28, 29; 4:34, 35)