Skip to content

Skip to secondary menu

Skip to table of contents

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 MATAUPU 12

Ia Tautala i “Upu Lelei e Atiaʻe Ai”

Ia Tautala i “Upu Lelei e Atiaʻe Ai”

“Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai.”EFESO 4:29.

1-3. (a) O le ā se meaalofa a Ieova mo i tatou, ma e faapefea ona tatou faaaogā sesē lenā meaalofa? (e) E faapefea ona faaaogā le meaalofa o le tautala ina ia tumau ai i le alofa o Ieova?

O Ā NI ou lagona pe a e aveina se meaalofa i se tagata e pele iā te oe, ae faatalalē i ai? Seʻi faapea na e ave i ai se taavale, a ua e faalogo e avetaavale faatamala, ma ua lavevea ai nisi. E mautinoa lava e te faanoanoa ai.

2 O le tomai e tautala ai ma le poto, o se meaalofa mai iā Ieova, o Lē e foaʻi maia “meaalofa lelei uma ma mea uma e atoatoa ona lelei.” (Iakopo 1:17) O lenei meaalofa ua faaesea ai le fanau a tagata mai i isi meaola, lea ua mafai ai ona tatou faailoa atu o tatou manatu ma faalogona. Ae e pei o le taavale, e mafai foʻi ona faaaogā sesē lenei meaalofa o le tautala. Pagā se faanoanoa o Ieova pe a tatou faatalalē i a tatou tala e fai, lea e iʻu ai ina tigā ma mafatia loto o isi tagata!

3 Ina ia tatou tumau i le alofa o le Atua, e tatau ona tatou faaaogā lenei meaalofa o le tautala e pei ona finagalo i ai Lē na foaʻi maia. E lē o tuua i tatou e Ieova e taumatemate i upu e faafiafia ai o ia. Ua fai mai lana Afioga: “Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” (Efeso 4:29) Seʻi o tatou iloiloina  le māfuaaga e tatou te faaeteete ai i a tatou upu, o upu e tatau ona tatou ʻalofia, ma le auala e tatou te tautatala ai i “upu lelei e atiaʻe ai.”

LE MĀFUAAGA E FAAETEETE AI I A TATOU UPU

4, 5. E faapefea ona faamatala e nisi o faataoto o le Tusi Paia le malolosi o aafiaga o upu?

4 O se tasi o māfuaaga e faaeteete ai i a tatou upu, ona e malolosi aafiaga o upu. Ua faapea mai le Faataoto 15:4: “O le laulaufaiva e pulea lelei, o le laau o le ola lea, a o le laulaufaiva faapiʻopiʻo e momomo ai le agaga.” E pei ona lauolaola i vai se laau ua toetoe a pē, e faapena foʻi ona faafouina agaga o ē e faalogologo i upu mālū o se laulaufaiva toʻafimālie. O le tuufaafeagai o lenā mea, e nutimomoia agaga o tagata i upu faapiʻopiʻo o se laulaufaiva pepelo. O le mea moni, o upu e tatou te tautatala ai e malolosi ona aafiaga, e faamanuʻalia ai pe e faamālōlōina ai.Faataoto 18:21.

5 A o faamatalaina le malosi tele o aafiaga o upu, ua faapea mai se isi faataoto: ʻO le tautala lē mafaufau, ua pei o le tutuʻi o le pelu.’ (Faataoto 12:18) O le tautala lē mafaufau i upu tigā, e matuā nutimomoia ai loto ma faaleagaina ai faigāuō. Po ua tuia ea lou loto i ni upu e pei o  le tutuʻi o le pelu? Ae i se itu lelei, ua faapea mai le faataoto lava lenā: “O le laulaufaiva o ē e atamamai, e mālōlō ai.” O upu alofa mai i se tasi ua faaalia le atamai mai le Atua, e mafai ona faamālōlōina ai se loto ua tigā, ma faaleleia ai faiā ma tagata. Po o e manatua se taimi na faamālōlōina ai ou faalogona tigā i ni upu alofa? (Faitau le Faataoto 16:24.) Ona ua tatou iloa le malolosi o aafiaga o a tatou upu, e tatou te mananaʻo la e faamālōlōina isi i a tatou upu, ae lē o le faatigā iā i latou.

O upu toʻafilemu e faafouina ai

6. Aiseā e faigatā tele ai ona pulea o tatou laulaufaiva?

6 E tusa lava pe tatou te taumafai malosi i ai, ae e lē mafai ona pulea atoatoa o tatou laulaufaiva. O le māfuaaga lona lua lenei e tatau ai ona tatou faaeteete i a tatou upu. Ua tatou māfuli e faaaogā sesē o o tatou laulaufaiva ona o le tino agasala ma le lē lelei atoatoa. O a tatou upu e mapuna mai i o tatou loto, ma “e leaga faanaunauga o le loto.” (Kenese 8:21; Luka 6:45) E faigatā tele le puleaina o o tatou laulaufaiva. (Faitau le Iakopo 3:2-4.) E ui lava e lē mafai ona pulea atoatoa o tatou laulaufaiva, ae e mafai ona tatou galulue e faaleleia a tatou upu. E pei o se tagata aau o loo tauivi e aau i le mea o agaʻi mai ai le āu, e faapena foʻi ona tatou tauivi ma le tuʻinanauga agasala e faaaogā sesē o tatou laulaufaiva.

7, 8. Aiseā e tatou te tali atu ai iā Ieova i upu e tatou te tautatala ai?

7 O le māfuaaga lona tolu e faaeteete ai i a tatou upu, ona e tatou te tali atu iā Ieova i upu e tatou te tautatala ai. O le auala e faaaogā ai o tatou laulaufaiva, e aafia ai e lē na o a tatou faiā ma tagata, ae o la tatou faiā ma Ieova. Ua faapea mai le Iakopo 1:26: “Afai e manatu se tasi iā te ia lava o sē e toʻaga i le tapuaʻiga [e auauna i le Atua] ae lē pulea lona laulaufaiva, ua faasesēina e ia lona lava loto, ua lē aogā la lana tapuaʻiga.” E pei ona tatou mātauina i le mataupu ua teʻa, e tāua tele a tatou upu i la tatou  tapuaʻiga. Afai e lē puleaina o tatou laulaufaiva, ma lafo atu upu tigā ma le oona, e mafai ona lē aogā ai a tatou galuega uma faa-Kerisiano i le silafaga a le Atua. E mataʻutia tele lenā manatu.Iakopo 3:8-10.

8 E manino mai e iai māfuaaga lelei e tatau ai ona tatou faaeteete ina neʻi faaaogā sesē le meaalofa o le tautala. A o tatou leʻi talanoa i upu lelei e atiaʻe ai, seʻi o tatou talanoa muamua i upu e lē tatau lava ona tautala ai se Kerisiano moni.

O UPU E FAAVAIVAIA AI

9, 10. (a) O ā upu ua masani ona tautatala ai tagata o le lalolagi i aso faisoo? (e) Aiseā e tatau ai ona tatou teena upu masoā? (Tagaʻi foʻi i le faamatalaga i le pito i lalo.)

9 O upu masoā. E masani ona tautatala tagata o le lalolagi i upu sā, o upu matagā, ma upu leaga. E faaaogā e le toʻatele o tagata upu masoā e faamamafa ai se manatu, pe ona ua feita. E masani ona faaaogā e le ʻaufaifaleaitu upu masoā ma upu e faauigalua ina ia toē ai tagata. Ae e lē o se mea e toē ai. E pe tusa ma le 2,000 tausaga ua teʻa, na fautuaina ai e le aposetolo o Paulo le faapotopotoga i Kolose ina ia tuu ese “upu masoā.” (Kolose 3:8) Na faapea atu Paulo i le faapotopotoga Efeso e lē tatau ona “taʻua” e Kerisiano moni ni “tausuaga matagā.”Efeso 5:3, 4.

10 E inosia e Ieova upu masoā. E inosia foʻi e tagata e alolofa iā te ia upu masoā. O le mea moni, o lo tatou alofa iā Ieova e uunaʻia ai i tatou e teena upu masoā. Ina ua lisi mai e Paulo “galuega a le tino,” na ia taʻua ai “le amio lē mamā,” lea e ono aofia ai ma upu lē mamā. (Kalatia 5:19-21) O se mataupu e tugā tele. E mafai ona faateʻaeseina se tasi mai i le faapotopotoga, pe afai e fautuaina soo o ia ae e lē salamō lava, ae ua faaauau ona  fai ma ana masani le tautala i mea e lē mamā, o mea e matuā matagā, ma mea e faaleagaina ai se tasi. *

11, 12. (a) Aiseā e leaga ai le faitala? (e) Aiseā e tatau ai i ē e tapuaʻi iā Ieova ona ʻalofia tala taufaaleaga?

11 O le faitala ma tala taufaaleaga. E mafai lava ona tatou talatalanoa e faatatau i isi tagata ma o latou olaga. Ae pe e leaga na talanoaga? E lē leaga pe afai o loo talatalanoa mamā, ma o loo tatou faamatalaina atu ni tala fiafia ma aogā, e pei o se tagata ua faatoʻā papatiso, ma se tagata e manaʻomia se faalaeiauga. E oo foʻi i Kerisiano i le uluaʻi senituri, na matuā naunau i latou mo le lelei o isi, ma na latou fetufaaʻi i tala talafeagai e faatatau i uso talitonu. (Efeso 6:21, 22; Kolose 4:8, 9) Ae peitaʻi, o le faitala o le suia lea o ni tala moni, pe e faailoa atu ai ni mataupu e matuā patino i se tasi. E matuiā tele auā e mafai ona iʻu ai i le faia o tala taufaaleaga, lea e faaleagaina ai se tasi. O tala taufaaleaga e faasino atu “i tuuaʻiga sesē . . . lea e taʻuleagaina ma faaleagaina ai le talaaga o se isi tagata.” O se faaaʻoaʻoga, na faia e le ʻau Faresaio ni tala taufaaleaga matuiā ina ia faalumaina ai Iesu. (Mataio 9:32-34; 12:22-24) O le faia o tala taufaaleaga, e masani ona tupu ai le vevesi.Faataoto 26:20.

12 E lē manatu māmā Ieova i ē e faaaogā le meaalofa o le tautala e faaleaga ai isi, pe ia faatupu ai feeseeseaʻiga. E inosia e ia o ē e “faatupuina maseiga i le va o uso.” (Faataoto 6:16-19) O le upu Eleni ua faaliliuina i “tala taufaaleaga” o le di·aʹbo·los, o le taʻu foʻi lenā e ave iā Satani. O  ia o le “Tiapolo,” o lē e amioleaga e na te faia tala taufaaleaga e uiga i le Atua. (Faaaliga 12:9, 10) O le mea moni, e tatou te mananaʻo e ʻalofia le faia o tala e ono taʻua ai i tatou o tiapolo. E lē taliaina e le faapotopotoga ni tala taufaaleaga e faapogaia ai galuega o le tino, e pei o le “finauvale” ma “fevaevaeaʻiga.” (Kalatia 5:19-21) A o tatou leʻi toe faamatala atu ni tala e uiga i se tasi, ia fesili muamua ifo iā i tatou: ʻPe e moni? Po o se gaoioiga alofa le toe faatamala atu i isi? Pe e talafeagai ona faasalalau atu i isi lenei tala?’Faitau le 1 Tesalonia 4:11.

13, 14. (a) O ā aafiaga o upu faatigā i ē e faalogologo i ai? (e) O le ā le uiga o le fai upu leaga, ma aiseā e matuiā ai le mea e oo i se tasi e fai upu leaga?

13 O upu faatigā. E pei ona taʻua muamua, e iai le malosi o upu e faatigā ai i isi. Ona o le tino lē lelei atoatoa, e iai taimi e tatou te faia ai ni tala e tatou te salamō ai. Peitaʻi, ua lapataʻi mai le Tusi Paia i ni upu masani e matuā lē taliaina i totonu o se aiga Kerisiano, po o le faapotopotoga. Na apoapoaʻi atu Paulo i Kerisiano: “Ia tuu lo outou ita umi, ma le itaitagofie, ma le lotoa, ma le soona ʻeʻē, ma upu masoā.” (Efeso 4:31) O upu faatigā—e aofia ai le valaau o isi i igoa e māsiasi ai, o faitioga lē alofa ma le faitio soo—e aveesea ai le mamalu o isi tagata, ma manatu ai i latou ua leai so latou aogā. O loto maʻaleʻale ma le talitonugofie o le fanauiti, e aafiagofie lava i upu faatigā.Kolose 3:21.

14 Ua matuā taʻusalaina e le Tusi Paia le faia o upu leaga—o le masaniga lea o le faamāsiasi o tagata i upu faalumaluma, po o le taʻufaatauvaaina o isi. E matuiā le mea e oo i se tagata e masani ona fai upu leaga, auā e mafai ona faateʻaeseina ai o ia mai i le faapotopotoga, pe afai e na te lē taliaina le fesoasoani ina ia sui ona uiga. E ono melea foʻi e lenā tagata lona mauaina o faamanuiaga  o le Malo, pe afai e lē suia ona ala. (1 Korinito 5:11-13; 6:9, 10) E manino mai la, e lē mafai ona tatou tumau i le alofa o le Atua, pe afai e masani ona tatou tautatala i upu e lē atiaʻe, o upu e lē moni, ma upu e lē alofa. O na upu e faavaivaia ai.

O “UPU LELEI E ATIAʻE AI”

15. O ā “upu lelei e atiaʻe ai”?

15 E faapefea ona tatou faaaogā le meaalofa o le tautala e pei ona finagalo i ai Lē na foaʻi maia? Ia manatua, ua faalaeiauina i tatou e le Tusi Paia ina ia tautatala i “upu lelei e atiaʻe ai.” (Efeso 4: 29) E fiafia Ieova pe a tatou tautatala i upu e atiaʻe, e faalaeiau ma faamalosiau ai i isi. E tatau ona manatunatu lelei ina ia mafai ai ona tatou tautatala i upu faapena. E lē o iai i le Tusi Paia ni tulafono maʻoti e tatou te mulimuli ai; e lē o iai foʻi se lisi o upu eseese e aofia ai i “faamatalaga mamā.” (Tito 2:8) Ina ia tautatala i “upu lelei e atiaʻe ai,” e lelei ona tatou manatua ni vala tāua se tolu e iloa ai tala e atiaʻe ai: E mamā, e moni, ma e agalelei. A o tatou manatua na vala e tolu, seʻi o tatou iloiloina ni faaaʻoaʻoga maʻoti o upu e atiaʻe ai.—Tagaʻi i le pusa “ Pe e Atiaʻe Aʻu Upu?

16, 17. (a) Aiseā e tatau ai ona tatou faamālō atu i isi? (e) O ā ni avanoa e faamālō atu ai i isi i le faapotopotoga ma le aiga?

16 O le faamālō atu. Ua silafia e Ieova ma Iesu le tāua o le faamālō atu ma le talisapaia o isi. (Mataio 3:17; 25:19-23; Ioane 1:47) E lelei foʻi mo i tatou o Kerisiano, ona faamālō atu i isi. Aiseā? Auā ua faapea mai le Faataoto 15:23: “E maʻeu le matagofie o le upu e fai i le taimi talafeagai!” Ia fesili ifo iā te oe: ʻPo o ā ni oʻu lagona pe a faamālō mai se tagata iā te aʻu? Pe e lē māfanafana ai ea loʻu loto ma faalaeiauina ai aʻu?’ Ioe, afai e faamālō mai se tasi iā te oe, e te iloa ai o loo ia amanaʻia oe, o loo  manatu mamafa iā te oe, ma ua alu aogā au taumafaiga. O manatu lelei faapena, e faatupuina ai lou lototele, ma uunaʻia ai oe ia saga galue malosi i le lumanaʻi. Talu ai e te talisapaia le faamālō mai o se tasi iā te oe, pe e lē tatau ai la ona e finafinau e faamālō atu i isi?Faitau le Mataio 7:12.

17 Ia taumafai malosi e vaai i le itu lelei o tagata, ma faamālō atu iā i latou. Atonu e te faalogologo i se lauga manaia i le faapotopotoga, po ua e mātauina foʻi se talavou o loo aapa atu i ni sini faaleagaga, po ua e mātauina foʻi se tagata matua o loo auai ma le faamaoni i sauniga e ui i lona soifua matua. O le faamālō atu iā i latou, o le a pāʻia ai o latou loto ma faamalosia ai lo latou itu faaleagaga. E tāua foʻi lenei mea i totonu o le aiga, e tatau ona faalogo tane ma avā i upu faamālō ma le talisapaia e le tasi o le isi. (Faataoto 31:10, 28) E ola fiafia le fanauiti pe a amanaʻia ma talisapaia i latou. E tāua tele i le fanauiti le faamālō ma le talisapaia o i latou, e pei o le tāua o le lā ma le vai i se laau. Mātua e, ia saʻili ni avanoa e faamālō atu ai i a outou fanauiti mo o latou uiga ma taumafaiga lelei. O le faamālō atu faapena, e tuputupu aʻe ai le lototele ma le mautinoa o le fanauiti, ma uunaʻia ai i latou ina ia taumafai atili e fai le mea saʻo.

18, 19. Aiseā e tatou te taumafai malosi ai e faalaeiau ma faamāfanafana i uso talitonu, ma e faapefea ona tatou faia faapea?

18 O faalaeiauga ma faamāfanafanaga. O loo manatu mamafa Ieova i “ē ua faatauvaa” ma “ē ua nutimomoia.” (Isaia 57:15) Ua faalaeiauina i tatou e lana Afioga ina ia “fefaamāfanafanaaʻi [pe fefaalaeiauaʻi]” ma “faamāfanafana i ē mafatia.” (1 Tesalonia 5:11, 14) E mafai ona tatou mautinoa o loo silasila alofa mai le Atua, ma e na te talisapaia a tatou taumafaiga e faalaeiau ma faamāfanafana i uso talitonu, o ē ua lotomafatia.

E fiafia Ieova pe a tatou tautatala i upu e atiaʻe ai isi

 19 O le ā sau tala e fai atu e atiaʻe ai se Kerisiano ua lotovaivai, po ua lotomafatia? Aua e te manatu e tatau ona e taumafai e foʻia lona faafitauli. E pau lava le mea e moomia i le tele o taimi, o ni au upu faamāfanafana. Ia faamautinoa atu i le tagata lotovaivai, o loo e manatu alofa iā te ia. Ia fai i le tagata lotovaivai o le a e faia sa oulua tatalo; ia e faatoga atu iā Ieova e fesoasoani mai i le tagata e na te iloa o loo alolofa mai isi iā te ia, ma o loo alofa mai foʻi le Atua iā te ia. (Iakopo 5:14, 15) Ia faamautinoa atu iā te ia, e tāua tele o ia i totonu o le faapotopotoga. (1 Korinito 12:12-26) Ia faitau se mau o le Tusi Paia ina ia faamautinoa atu iā te ia o loo manatu mamafa mai Ieova iā te ia. (Salamo 34:18; Mataio 10:29-31) O le faaalu o se taimi tele e fai atu ai se “tala lelei” i lē ua lotovaivai, ma ia tatou tautatala mai i o tatou loto, e lē taumatea o le a ia lagona ai le alofa ma le talisapaia o ia.Faitau le Faataoto 12:25.

20, 21. O ā vala e fesoasoani ina ia aogā ai fautuaga?

20 O fautuaga aogā. O i tatou uma lava e moomia ni fautuaga mai lea taimi i lea taimi, ona o i tatou o tagata lē lelei atoatoa. Ua faalaeiauina i tatou e le Tusi Paia: “Ia faalogo i le fautuaga ma talia le aʻoaʻiga, ina ia e atamai ai i aso o i luma.” (Faataoto 19:20) E lē na o toeaina  e latou te avatu fautuaga i isi. E fautuaina e mātua le fanau. (Efeso 6:4) Atonu e tatau i tuafāfine matutua ona fautuaina fafine talavou. (Tito 2:3-5) O le alofa e uunaʻia ai i tatou e avatu ni fautuaga e lē nutimomoia ai le loto o le isi tagata. E faapefea ona tatou faia lenā mea? Seʻi manatu i ni vala se tolu o le a atili aogā ai fautuaga: o le vaaiga ma le uunaʻiga o le faufautua, o le faavae o le fautuaga, ma le agaga e avatu ai le fautuaga.

21 Ina ia aogā fautuaga, e tāua le pito laau a le faufautua. Ia fesili ifo iā te oe, ʻPo o le ā le taimi ou te taliagofie ai se fautuaga?’ E te taliagofie se fautuaga pe afai e te iloa e alofa le faufautua iā te oe, e lē fiugofie o ia, ma e lē ʻaluʻalua lona loto. E tatau foʻi la ona e faapena pe a avatu ni fautuaga i isi tagata. O fautuaga lelei e faavae aʻe i le Afioga a le Atua. (2 Timoteo 3:16) Pe e tatou te faitau saʻo mai i le Tusi Paia pe e leai, ae e ao ona faavae a tatou fautuaga uma i le Tusi Paia. E tatau ai la ona faaeteete toeaina i le faamalolosi atu o o latou manatu i isi tagata; e lē mimilo e i latou le Tusi Paia, ona peiseaʻī lea o loo lagolagoina e le Tusi Paia le manatu o se tasi. E sili ona aogā fautuaga pe a saʻo le agaga e avatu ai. E taliagofie fautuaga e faamāi i le masima, ma e tausi ai le mamalu o le tagata o loo avatu i ai le fautuaga.Kolose 4:6.

22. O le ā lou sini i le faaaogāina o le meaalofa o le tautala?

22 O le mea moni, o le tautala o se meaalofa mai i le Atua. O lo tatou alofa iā Ieova e uunaʻia ai i tatou e faaaogā lelei lenei meaalofa, nai lo o le faaaogā sesē. Ia tatou manatua, e malolosi aafiaga o a tatou upu, a lē o le atiaʻe ai o isi, po o le faavaivaia ai o i latou. Seʻi tatou taumafai la e faaaogā lenei meaalofa e pei ona finagalo i ai Lē na foaʻi maia, ina ia “atiaʻe ai.” O le a avea ai a tatou upu o se faamanuiaga i ē o loo siʻomia i tatou, ma e fesoasoani ina ia tatou tumau ai i le alofa o le Atua.

^ pala. 10 O le faaupuga “amio lē mamā” e pei ona taʻua i le Tusi Paia, e faalauaʻitele lona uiga, e mafai ona aofia ai agasala eseese. E lē faapea o amioga lē mamā uma ua tatau i ai se aʻoaʻiga faafaamasinoga, ae e mafai ona faateʻaeseina se tagata mai le faapotopotoga pe afai e na te faatinoina ma le lē salamō amioga lē mamā matuiā.2 Korinito 12:21; Efeso 4:19; tagaʻi foʻi i le “Fesili Mai le ʻAufaitau,” i Le Olomatamata o Iulai 15, 2006.