Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 FAAOPOOPOGA

Le Auala e Feutagaʻi ai ma se Tagata ua Faateʻaina

Le Auala e Feutagaʻi ai ma se Tagata ua Faateʻaina

O se tasi o mea e sili ona nutimomoia ai o tatou loto, o le faateʻaeseina lea o se tauaiga po o se uō mamae mai i le faapotopotoga, ona o le lē salamō mai i lana agasala. Peitaʻi, o le auala e tatou te tali atu ai i le taʻiala a le Tusi Paia i lenei mataupu, e faaalia ai le malosi o lo tatou alofa i le Atua ma lo tatou faamaoni i lana faatulagaga. * Seʻi manatu foʻi i nisi o fesili ua lāgā e faatatau i lenei mataupu.

E faapefea ona feutagaʻi ma se tagata ua faateʻaina? Ua faapea mai le Tusi Paia: “Aua neʻi outou toe faifaimea faatasi ma sē ua taʻua o se uso ae e faitaaga, pe e matapeʻapeʻa, pe e ifo i tupua, pe e fai upu masoā, pe e onā, pe e taufaavalea, aua foʻi neʻi aai faatasi ma se tagata faapena.” (1 Korinito 5:11) Ua fai mai le Tusi Paia e faatatau i se tagata “e lē tumau i aʻoaʻoga a le Keriso”: “Aua lava tou te taliaina o ia i o outou fale, pe faatalofa atu foʻi iā te ia. Auā o sē e faatalofa atu iā te ia, ua aufaatasi atu o ia i ana galuega leaga.” (2 Ioane 9-11) E tatou te lē faifaimea faasamasamanoa ma se tagata faateʻaina, pe fetufaaʻi foʻi ma i latou i mataupu faaleagaga. Ua faapea mai Le Olomatamata faa-Peretania o Setema 15, 1981, itulau 25: ʻO le “faatalofa” atu i se tagata, o le uluaʻi laasaga lenā e amata ai se talanoaga po o se faigāuō. Pe e tatou te mananaʻo ea e uia lea uluaʻi laasaga ma se tagata faateʻaina?’

Pe e tatau ea ona matuā faamamao ese mai iā te ia? Ioe, ma e iai nisi o māfuaaga. Muamua lava, e faaalia ai lo tatou faamaoni i le Atua ma lana Afioga. E tatou te usiusitaʻi iā Ieova i taimi faigofie, atoa foʻi ma taimi e sili ona faigatā. O le alofa i le Atua, e uunaʻia ai i tatou e usiusitaʻi i ana tulafono uma, auā ua tatou iloa e faamasinotonu o ia, e alofa, ma o ana tulafono e matuā lelei mo i tatou. (Isaia 48:17; 1 Ioane 5:3) Lona lua, o le faamamao mai i se tagata agasala e lē salamō, e puipuia ai i  tatou ma le faapotopotoga ina neʻi faaleagaina lo tatou itu faaleagaga ma amioga lelei, ma puipuia ai foʻi le talaaga lelei o le faapotopotoga. (1 Korinito 5:6, 7) Lona tolu, o lo tatou pipiimau i mataupu silisili o le Tusi Paia, atonu o le a aogā foʻi i le tagata faateʻaina. O lo tatou lagolagoina o le faaiʻuga a le komiti tau faamasinoga, e ono pāʻia ai le loto o le tagata faimea sesē, aemaise ona e leʻi taliaina taumafaiga a toeaina e fesoasoani atu iā te ia. O le motusia la o mafutaga ma ē e pele iā te ia, atonu e fesoasoani ina ia “toe atamai o ia” ma iloa ai le matuiā o lana agasala, ma gaoioi ai e toe foʻi mai iā Ieova.—Luka 15:17.

Ae faapefea pe a faateʻaeseina se tasi o le aiga? Afai o lea, e matuā tofotofoina ai le faamaoni o se tasi aemaise pe a māfana faiā a se aiga. E faapefea ona tatou feutagaʻi ma se tasi ua faateʻaina o le aiga? E lē mafai ona iloiloina tulaga uma e tulaʻi mai i lenei mataupu, ae o le a tatou iloiloina ni tulaga autū se lua.

O nisi taimi o loo nofo pea le tagata faateʻaina faatasi ma lona aiga. E mafai ona faaauau pea feʻau ma galuega a le aiga e pei ona masani ai i aso faisoo, auā e lē faapea o le a motusia sootaga ma lona aiga ona ua faateʻaina o ia. Peitaʻi ane, ona o le mea sesē na ia faia, na filifili ai lenei tagata e motusia la latou sootaga faaleagaga ma lona aiga o loo i le upu moni. O lona uiga la, e lē toe iai se sootaga faaleagaga a tagata faamaoni o le aiga ma le tagata faateʻaina. O se faaaʻoaʻoga, afai o loo iai le tagata faateʻaina, e lē faia sona sao pe a potopoto faatasi le aiga mo le tapuaʻiga a le aiga. Ae afai o le tagata faateʻaina o se talavou o loo tausia pea e ona mātua, e iai pea le tiute tauave a mātua e aʻoaʻo ma avatu ai aʻoaʻiga iā te ia. O lea la, e ono fuafua mātua alolofa ina ia fai se suʻesuʻega faale-Tusi Paia ma le talavou. *Faataoto 6:20-22; 29:17.

E iai isi tagata faateʻaina e lē o nonofo faatasi ma o latou aiga, ae e ese le mea e nonofo ai. E ui lava e iai tulaga e seāseā tulaʻi mai e ono manaʻomia ai ona talanoa ma lenā tagata i ni  mataupu faaleaiga, ae e tatau lava ona faapupuu na talanoaga. O sui faamaoni o se aiga Kerisiano, e lē suʻesuʻe avanoa i latou e faifaimea faatasi ma se tagata ua faateʻaina o le aiga lea e lē o nofo i le aiga. Nai lo o lea, o le faamaoni iā Ieova ma lana faalapotopotoga, e uunaʻia ai i latou e pipii atu i le faatulagaga a le Tusi Paia o le faateʻaeseina o se tagata. O lo latou faamaoni e faaalia ai lo latou alofa moni i le tagata faimea sesē, ma atonu e fesoasoani ai iā te ia ina ia talia le aʻoaʻiga. *Eperu 12:11.

^ pala. 1 O mataupu silisili lava nei o le Tusi Paia e faatatau atu foʻi i ē ua vavaeese i latou mai le faapotopotoga.

^ pala. 2 Mo nisi faamatalaga e faatatau i se talavou ua faateʻaina o loo tausia pea e ona mātua ma o loo nofo pea i le aiga, tagaʻi i Le Olomatamata o Oketopa 1, 2001, itulau 16-17, ma Iuni 1, 1989, itulau 31-32.

^ pala. 3 Mo nisi faamatalaga i le auala e feutagaʻi ai ma tagata faateʻaina o le aiga, tagaʻi i fautuaga a le Tusi Paia o loo i Le Olomatamata o Fepuari 1, 1989, itulau 26-31, ma Iuni 1982, itulau 19-24.