Skip to content

Skip to secondary menu

Skip to table of contents

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 MATAUPU 15

Ia Fiafia i Au Galuega Mamafa

Ia Fiafia i Au Galuega Mamafa

“Ia taʻitasi le tagata . . . ma fiafia i mea lelei ona o ana galuega mamafa uma.”FAILAUGA 3:13.

1-3. (a) O le ā le lagona o le toʻatele o tagata e tusa ai ma a latou galuega? (e) O le ā le manatu i galuega ua faalaeiau e le Tusi Paia, ma o ā ni fesili o le a tatou iloiloina i lenei mataupu?

E LĒ fiafia le toʻatele o tagata i aso nei i a latou galuega. E fāʻatu i latou e ō e faigaluega i aso taʻitasi, ma galulue mo le tele o itula i se galuega e lē fiafia ai. E faapefea ona uunaʻia i latou ina ia naunau i a latou galuega, ma faamalieina ai i latou?

2 Ua faalaeiauina e le Tusi Paia tagata ina ia saʻo la latou vaai i galuega mamafa, ma o loo taʻua ai o se faamanuiaga galuega ma fua o galuega. Na tusi Solomona: “Ia taʻitasi le tagata ma ʻai ma inu ma fiafia i mea lelei ona o ana galuega mamafa uma. O le meaalofa lea mai i le Atua.” (Failauga 3:13) E naunau Ieova ina ia tatou lelei ona e alofa o ia iā i tatou, ma e finagalo o ia ina ia faamalieina i tatou i galuega, ma tatou olioli i fua o a tatou galuega. Ina ia tatou tumau i lona alofa, e tatau ona faaōgatusa o tatou manatu ma lana silafaga ma ana mataupu silisili e uiga i galuega.Faitau le Failauga 2:24; 5:18.

3 E fā ni fesili o le a tatou iloiloina i lenei mataupu: E faapefea ona tatou fiafia i a tatou galuega mamafa? O ā galuega e lē talafeagai mo Kerisiano moni? E faapefea ona faapaleni a tatou galuega totogi ma a tatou galuega faaleagaga? O le ā le galuega e sili ona tāua e mafai ona tatou faia? Muamua lava, seʻi o tatou iloiloina le  faaaʻoaʻoga a ē e toʻalua e sili ona galulue mamafa i le aoao o mea, o Ieova le Atua ma Iesu Keriso.

O LE MATAISAU SILISILI, MA LE TUFUGA POTO

4, 5. E faapefea ona faailoa mai e le Tusi Paia o Ieova o sē e fua tele mai ana galuega?

4 O Ieova o le Mataisau Silisili. Ua faapea mai le Kenese 1:1: “Na foafoaina e le Atua le lagi ma le lalolagi i le amataga.” Ina ua māeʻa galuega a le Atua o le foafoaina o le lalolagi ma mea o iai, ona fetalai lea o ia “ua matuā lelei lava.” (Kenese 1:31) O se isi faaupuga, na faamalieina atoatoa o ia i ana galuega uma i le faia o le lalolagi ma mea o iai. E lē taumatea na olioli Ieova “le Atua fiafia” i le fua tele mai o ana galuega.1 Timoteo 1:11.

5 E lē mālōlō lo tatou Atua galue malosi. E ui ua leva ona māeʻa le foafoaina o le lalolagi ma mea uma o iai, ae na fetalai Iesu: “O loo galue loʻu Tamā e oo mai i le aso nei.” (Ioane 5:17) O ā galuega ua faia e le Tamā talu mai lenā taimi? E galue malosi o ia mai i lona afioaga i le lagi e taʻitaʻia ma tausia le fanau a tagata. Ua ia faia “le foafoaga fou,” o Kerisiano ua faauuina i le agaga paia, o ē o le a pule faatasi ma Iesu i le lagi. (2 Korinito 5:17) O loo galue o ia e faataunuu lona finagalo mo tagata o ē e alolofa iā te ia ina ia ola e faavavau i le lalolagi fou. (Roma 6:23) E mautinoa lava ua matuā faafiafiaina Ieova i iʻuga o lenā galuega. Ua talia e le faitau miliona o tagata le feʻau o le Malo, o ē na tosina mai e le Atua ma ua suia o latou olaga ina ia tumau ai i lona alofa.Ioane 6:44.

6, 7. O le ā le talaaga umi o Iesu o sē e galue malosi?

6 E iai se talaaga umi o Iesu o sē e galue malosi. A o leʻi afio mai o ia i le lalolagi, na avea o ia ma “tufuga poto” a le Atua i le foafoaina o mea uma “i le lagi ma le lalolagi.” (Faataoto 8:22-31; Kolose 1:15-17) Na faaauau ona galue malosi Iesu a o soifua i le lalolagi. A o laʻitiiti o ia, na aʻoaʻoina  e ia le matātā o le faufale, ma taʻua ai o ia “o le kamuta.” * (Mareko 6:3) E tele galuega fitā ma tomai eseese na aofia ai i lenā matātā, aemaise e leʻi maua i na aso fale e ʻili ai laupapa, o faleoloa, ma meafaigaluega faaonapōnei. Ia manatu i le taimi na savali atu ai Iesu e aumai ni laupapa, atonu na tipi i lalo ni laau ma tosoina ogālaau i le nofoaga o loo galue ai. Seʻi mafaufau foʻi a o ia fauina ni fale—na ia saunia ma faapipii amopou o le fale, ma faia faitotoʻa atoa foʻi ma ni meafale. Na tofo Iesu i faalogona o le faamalieina i galuega mamafa na faia ma le tomai.

7 Na matilatila le galue malosi o Iesu i lana faiva. Na matuā pisi o ia mo le tolu ma le ʻafa tausaga i lenei galuega e sili ona tāua. Ona o lona manaʻo e oo atu i le toʻatele o tagata, na galue ai Iesu i le aso atoa i lona usupō i le taeao ma galue seʻia oo i le pō. (Luka 21:37, 38; Ioane 3:2) Na malaga atu o ia “mai i lea aai i lea aai, ma mai i lea nuu i lea nuu, ua talaʻi ma folafola atu le tala lelei o le malo o le Atua.” (Luka 8:1) Na malaga Iesu i le faitau selau o maila, e ala i le savali i auala pefu ina ia faaoo atu i tagata le feʻau o le tala lelei.

8, 9. Na faapefea ona fiafia Iesu i ana galuega mamafa?

8 Pe na fiafia Iesu i ana galuega mamafa i le faiva? Ioe! Na ia lūlūina fatu o le upu moni o le Malo, ma tuua ai fanua ua sinasina mo le seleselega. Na maua e Iesu le malosi mai le faia o le galuega a le Atua, ma i nisi taimi e leʻi taumafa ai o ia ina ia faamāeʻaina lenā galuega. (Ioane 4:31-38) Seʻi manatu i le faamalieina o ia i le faaiʻuga o lana faiva i le lalolagi, ina ua ia faapea atu ma le faamaoni i lona Tamā: “Ua ou faamamaluina oe i le lalolagi,  ma ua ou faamāeʻaina le galuega na e tuuina mai iā te aʻu e fai.”Ioane 17:4.

9 O Ieova ma Iesu o faaaʻoaʻoga silisili o ē na fiafia i a laʻua galuega mamafa. O lo tatou alofa iā Ieova ua uunaʻia ai i tatou ina “ia faaaʻoaʻo i le Atua.” (Efeso 5:1) O lo tatou alofa iā Iesu ua uunaʻia ai foʻi i tatou e “mulimulituʻi . . . i ona tulaga aao.” (1 Peteru 2:21) Seʻi o tatou iloiloina le auala e tatou te fiafia ai i galuega mamafa.

LE AUALA E FIAFIA AI I A TATOU GALUEGA MAMAFA

E mafai ona e fiafia i au galuega mamafa pe a faatatau mataupu silisili o le Tusi Paia

10, 11. O le ā e fesoasoani iā i tatou ina ia manatu ai i itu lelei o a tatou galuega?

10 E toʻatele Kerisiano moni e faigaluega i galuega totogi. E tatou te mananaʻo e maua le lotomalie ma le olioli i a tatou galuega, ae o se luʻitau lenā mea pe afai e tatou te lē o fiafia i a tatou galuega totogi. E faapefea ona tatou fiafia i a tatou galuega e ui i na luʻitau?

11 Ia manatu i le itu lelei. Atonu e lē mafai ona sui o tatou tulaga, ae e mafai ona sui o tatou manatu. E mafai ona taulaʻi atu o tatou manatu i itu lelei o a tatou galuega, pe a tatou manatunatu loloto i le silafaga a le Atua. O se faaaʻoaʻoga, afai o oe o le ulu o se aiga, ia mafaufau po o le ā lava le faatauvaa o lau galuega, ae ua mafai ona e tausia ai manaʻoga faaletino o lou aiga. E lē manatu māmā le Atua i lau tausiga i ē e pele iā te oe. Ua faapea mai lana Afioga, o se tasi e lē tausia lona aiga “e sili lona leaga i lo le tagata e lē faatuatua.” (1 Timoteo 5:8) O lou iloa ua mafai ona e faataunuuina le tiute tauave mai le Atua e ala i lau galuega, e fesoasoani iā te oe ina ia e maua le lotomalie ma le fiafia i lau galuega, lea e lē o maua e ē tou te faigaluega faatasi.

12. O ā taui o le sogasogā ma le faamaoni i a tatou galuega?

12 Ia sogasogā ma faamaoni. E mafai ona faamanuiaina  i tatou pe a tatou galulue malosi ma ia iloa ona fai lelei a tatou galuega. E tāua tele i pule o galuega ni tagata faigaluega e sogasogā toe tomai. (Faataoto 12:24; 22:29) Ona o i tatou o Kerisiano moni, e tatau ona tatou faamaoni i galuega, e tatou te lē gaoia tupe, o meafaigaluega, po o le taimi mai i o tatou pule. (Efeso 4:28) E pei ona tatou iloa i le mataupu ua teʻa, e tele taui o le faamaoni. E maufaatuatuaina se tagata faigaluega e iai sona talaaga faamaoni. Pe e mātauina e lo tatou pule lo tatou galulue mamafa pe e leai, ae e mafai ona faamalieina i tatou i le iai o “se lotofuatiaifo lelei,” aemaise le iloa o loo tatou  faafiafiaina lo tatou Atua pele.Eperu 13:18; Kolose 3:22-24.

13. O ā ni iʻuga o la tatou faaaʻoaʻoga lelei i falefaigaluega?

13 Ia iloa e mafai ona faamamaluina le Atua i la tatou amio. Afai e lelei a tatou amioga faa-Kerisiano i falefaigaluega, e lē taumatea o loo mātauina e tagata. O le ā le iʻuga? Tatou te “faamamaluina [ai] aʻoaʻoga a le Atua lo tatou Faaola.” (Tito 2:9, 10) Ioe, o la tatou amio lelei, o le a iloa ai e isi e lelei la tatou tapuaʻiga, ma atili fiafia mai ai i latou. Maʻeu ni ou faalogona fiafia pe afai e talia e se tasi e lua te faigaluega faatasi le upu moni, ona o lau faaaʻoaʻoga lelei i le galuega! Seʻi manatu i le mea e sili ona tāua: O le ā se isi faamanuiaga e sili atu nai lo o le iloaina, o loo faamamaluina Ieova ma faafiafiaina lona finagalo ona o lau amio lelei?Faitau le Faataoto 27:11; 1 Peteru 2:12.

IA IAI LE TOFĀ MAMAO PE A FILIFILI GALUEGA TOTOGI

14-16. O ā ni fesili tāua e tatou te mafaufau i ai a o filifili ni a tatou galuega?

14 E leai ni faatonuga auʻiliʻili a le Tusi Paia e fitoitonu i galuega totogi e tatau ona talia pe e lē talia. E lē faapea ai la e mafai ona tatou taliaina so o se ituaiga lava o galuega. E mafai ona fesoasoani le Tusi Paia ina ia tatou filifilia ai ni galuega lelei ma aogā e faafiafia ai le Atua, ae ia tatou ʻalofia galuega e lē fiafia i ai o ia. (Faataoto 2:6) E lua ni fesili tāua e tatou te manatunatu i ai pe a filifili ni galuega.

15 Pe e taʻusalaina e le Tusi Paia gaoioiga e aofia ai i lenei galuega? O loo taʻusalaina ma le manino e le Afioga a le Atua le pepelo, gaoi, ma le ifo i tupua. (Esoto 20:4; Galuega 15:29; Efeso 4:28; Faaaliga 21:8) E tatou te teena so o se galuega e manaʻomia ai ona tatou faia ni  mea faapena. O lo tatou alofa iā Ieova, o le a tatou lē taliaina ai se galuega e aofia ai mea e soli ai tulafono a le Atua.Faitau le 1 Ioane 5:3.

16 Po o fai so tatou sao i se gaoioiga sesē, po o tatou faaauilumaina na gaoioiga pe a talia lenei galuega? Ia mafaufau i se faaaʻoaʻoga. E lē leaga le faigaluega e avea o se talitelefoni. Ae faapefea pe a maua e se Kerisiano se avanoa talitelefoni i se fale e faatau ai pepa Lotto?  E moni e na te lē o faatauina atu ni pepa Lotto, e na o le talitelefoni lana mea e fai. Ae ui i lea, pe e lē o lagolagoina ea e lana galuega talitelefoni lenei fale e faatau ai pepa Lotto, o se faiga e lē ōgatusa ma le Tusi Paia? (Efeso 5:3-5) Talu ai e tatou te alolofa iā Ieova, e tatou te lē fia aafia i faiga e taʻusala e le Tusi Paia.

17. (a) O ā ni vala e tatou te mafaufau i ai a o filifili ni a tatou galuega? (Tagaʻi i le pusa “ Po Ou Te Taliaina Lenei Galuega?) (e) E faapefea ona fesoasoani o tatou lotofuatiaifo ina ia faia ni faaiʻuga e faafiafia ai le Atua?

17 E mafai ona iloa pe e talia se galuega pe leai, pe a iloilo totoʻa tali o fesili tāua e lua o loo i le palakalafa e 15 ma le 16. E lē gata i lea, e iai foʻi nisi mea e ao ona tatou mafaufau i ai a o filifili ni a tatou galuega. * E tatou te lē faatalitalia le pologa faamaoni e saunia ni tulafono e fetaui  i so o se tulaga e tulaʻi mai. O le itu lenei e tāua ai le tofā mamao. E pei ona tatou aʻoaʻoina i le Mataupu 2, e tatau ona aʻoaʻo o tatou lotofuatiaifo e ala i le suʻesuʻe pe e faapefea ona faatatau le Afioga a le Atua i le olaga i aso faisoo. Pe afai e “faaaogā” o tatou “mafaufau” ua aʻoaʻoina, e mafai ona fesoasoani mai o tatou lotofuatiaifo ina ia faia ni faaiʻuga e faafiafia ai le Atua, ma tatou tumau ai i lona alofa.Eperu 5:14.

IA PALENI LE VAAI I GALUEGA

18. Aiseā e lē faigofie ai ona faapaleni lo tatou itu faaleagaga?

18 E lē faigofie le faapaleni o le itu faaleagaga i nei “aso e gata ai” o “aso e sili ona faigatā.” (2 Timoteo 3:1) O se luʻitau le saʻilia o se galuega ma tumau ai. Ona o i tatou o Kerisiano moni, ua tatou iloa ai le tāua o le galue mamafa e tausia o tatou aiga. Ae afai e tatou te lē faaeteete, e mafai ona afāina ai lo tatou itu faaleagaga i omiga mai galuega totogi po o uiga matapeʻapeʻa o lenei lalolagi. (1 Timoteo 6:9, 10) Seʻi o tatou iloiloina pe e faapefea ona faapaleni o tatou olaga, ma faamautinoa ai “mea e sili ona tāua.”Filipi 1:10.

19. Aiseā ua ono ma tatau ai iā Ieova lo tatou faatuatuaga atoatoa, ma o le ā le mea o le a tatou ʻalofia ona o lenā faatuatuaga?

19 Ia tuu lou faatuatuaga atoa iā Ieova. (Faitau le Faataoto 3:5, 6.) Ua ono ma tatau le tuu atu o lo tatou faatuatuaga iā te ia, auā e manatu mamafa mai o ia iā i tatou. (1 Peteru 5:7) E sili atu lona silafia o o tatou manaʻoga nai lo o i tatou, ma e lē puupuu lona aao. (Salamo 37:25) O lea la, e lelei ona tatou faalogo a o faamanatu mai e lana Afioga e faapea: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai [le Atua]: ʻOu te lē tuua lava oe, ma ou te lē tuulafoaʻia lava oe.’” (Eperu 13:5)  Ua molimauina e le toʻatele o ē e auauna faataimi atoa le saunia e le Atua o mea e ola ai. Afai e tatou te faatuatua atoatoa o le a tausia e Ieova i tatou, o le a tatou lē soona popolevale ai i le tausiga o o tatou aiga. (Mataio 6:25-32) Tatou te lē lafoaʻia a tatou gaoioiga faaleagaga e pei o le talaʻia o le tala lelei ma auai i sauniga, ona o a tatou galuega totogi.Mataio 24:14; Eperu 10:24, 25.

20. O le ā le uiga o le faafaigofie o le vaai, ma e faapea ona e faia faapea?

 20 Ia faafaigofie lau vaai. (Faitau le Mataio 6:22, 23, fpl.) O le faafaigofie o le vaai, o lona uiga e lē lavelave o tatou olaga. A faafaigofie le vaai a se Kerisiano, e tasi le mea e taulaʻi i ai o ia, o le faia lea o le finagalo o le Atua. Afai e taulaʻi saʻo la tatou vaai, tatou te lē tuliaupūina se galuega e lelei le totogi, ma se olaga mauʻoa. E lē maileia foʻi i tatou i le tuliloaina o meafaitino fou ma meafaitino e sili ona anagatā, lea e taumafai le ʻaufaifaasalalauga e faatalitonu i tatou e maua le fiafia i mea na. E faapefea ona faafaigofie lau vaai? Aua neʻi faia se aitalafu ona o le fia maua o se mea e te lē o manaʻomia, lea e atili ai ona mamafa lau avega. Aua neʻi faalavelavea lou olaga i meafaitino e alu uma ai le taimi ma le malosi. Ia utagia le faatonuga a le Tusi Paia ina ia lotomalie i ʻmeaʻai ma mea e oofu ai.’ (1 Timoteo 6:8) Ia taumafai malosi e faafaigofie lou olaga.

21. Aiseā e tatau ai ona faatulaga mea e ave i ai le faamuamua, ma o le ā e tatau ona faamuamua i o tatou olaga?

21 Ia faatulaga muamua mea faaleagaga, ma ia pipii i ai. Talu ai e tele mea e fai ae e utiuti le taimi e fai ai, e tatau ai ona faatulaga mea e ave i ai le faamuamua. Auā a leai, o le a alu uma le taimi i mea e faalētāua, ae tuu i tua mea e sili ona tāua. O le ā e tatau ona tatou faamuamua i le olaga? Ua faamuamua e le toʻatele o le lalolagi aʻoaʻoga e maualuluga atu, ina ia maua ai ni galuega lelei i lenei lalolagi. Ae na faalaeiauina e Iesu ona soo ina ia “faaauau pea ona . . . saʻili muamua le malo.” (Mataio 6:33) Ona o i tatou o Kerisiano moni, e tatou te faamuamuaina le Malo i o tatou olaga. O o tatou olaga atoa, o a tatou filifiliga, o sini ma a tatou gaoioiga, e tatau ona faaalia ai e tāua tele iā i tatou mea uma lava e fesootaʻi i le  Malo ma le finagalo o le Atua, nai lo o manaʻoga faaletino ma sini faalelalolagi.

GALUE MALOSI I LE FAIVA

E mafai ona faaalia lo tatou alolofa iā Ieova i le faamuamua o le galuega talaʻi i o tatou olaga

22, 23. (a) O le ā le galuega autū a Kerisiano moni, ma e faapefea ona faaalia e tāua lenā galuega iā i tatou? (Tagaʻi i le pusa “ “Ua Ou Maua le Olioli ma le Lotomalie Ona o Laʻu Filifiliga”.”) (e) O le ā se faanaunauga o iā te oe e tusa ai ma galuega totogi?

22 Ua tatou iloa o loo tatou ola i siʻui o aso e gata ai, o lea la ua tatou taulaʻi atu ai i le galuega autū a Kerisiano moni, o le galuega talaʻi ma le faia o soo. (Mataio 24:14; 28:19, 20) Tatou te mananaʻo e pisi i lenei galuega faasaoola, i le pei o lo tatou Faaaʻoaʻo o Iesu. E faapefea ona faaalia e tāua lenei galuega iā i tatou? O le toʻatele o tagata o le Atua, e auai ma le lotoatoa i le galuega talaʻi o ni tagata talaʻi o le faapotopotoga. Ua toe fetuunaʻi e isi o latou olaga ina ia auauna ai o ni paeonia po o ni misionare. O le iloaina o le tāua o sini faaleagaga, ua faalaeiau ai e le toʻatele o mātua a latou fanau, ina ia tausinio e auai i le auaunaga faataimi atoa. Po o fiafia ē e maelega e faalauiloa le Malo i a latou galuega mamafa i le faiva? Ioe! O le auauna iā Ieova ma le lotoatoa e mautinoa lava e maua ai le olioli, o le lotomalie ma le sosia o faamanuiaga.Faitau le Faataoto 10:22.

23 O le toʻatele o i tatou, e galulue mo le tele o itula i galuega totogi auā le tausiga faaletino o o tatou aiga. Ia manatua, e finagalo Ieova ina ia tatou fiafia i a tatou galuega mamafa. E faamalieina i tatou i galuega, pe a faaōgatusa o tatou manatu ma gaoioiga ma lana silafaga ma mataupu silisili. Peitaʻi, e ao ona tatou maumauaʻi e aua neʻi faalavelave mai a tatou galuega totogi i la tatou galuega autū, o le faalauiloa lea o le tala lelei o le Malo o le Atua. O le faamuamuaina o lenā galuega i o tatou olaga, e faaalia ai lo tatou alofa iā Ieova, ma tatou tumau ai i lona alofa.

^ pala. 6 O le upu Eleni ua faaliliuina i le “kamuta,” o se “upu e lautele lona uiga mo se tagata e galue i laau e tusa lava pe e galue i le fauina o fale po o meafale, po o isi mea e fai mai i laau.”

^ pala. 17 Mo nisi faamatalaga e faatatau i galuega, tagaʻi i Le Olomatamata o Aperila 15, 1999, itulau 28-30, ma Me 1, 1983, itulau 23.