Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 FAAOPOOPOGA

O le ā le Taimi e Fai ai le Ufiulu, ma Aiseā e Fai Ai?

O le ā le Taimi e Fai ai le Ufiulu, ma Aiseā e Fai Ai?

O le ā le taimi e tatau ai ona ufiufi le ulu o se fafine Kerisiano i lana tapuaʻiga, ma aiseā e fai ai lenā ufiulu? Seʻi o tatou tilofaʻia upu a le aposetolo o Paulo e uiga i lenei mataupu. Na ia saunia ni taʻiala e tatou te manaʻomia e faia ai ni faaiʻuga lelei e faamamalu ai le Atua. (1 Korinito 11:3-16) Na faailoa mai e Paulo ni vala se tolu e mafaufau i ai: (1) o gaoioiga e manaʻomia ai ona fai se ufiulu o se fafine, (2) o faatulagaga e tatau ai ona fai se ufiulu o se fafine (3) ma o māfuaaga e ala ai ona fai lona ufiulu.

O gaoioiga. E lua gaoioiga na taʻua e Paulo: o le tatalo ma le faia o valoaga. (Fuaiupu 4, 5) O le tatalo, o le talanoa atu lea iā Ieova, ma o se vaega lea o la tatou tapuaʻiga. O le faia o valoaga i aso nei, e faatatau atu i aʻoaʻoga uma faale-Tusi Paia e aʻoaʻoina atu e se auauna Kerisiano. Po o le uiga la o le tala a Paulo, e tatau i se fafine ona ufiufi lona ulu i so o se taimi e tatalo ai ma aʻoaʻo atu upu moni o le Tusi Paia? E leai. E fua i le faatulagaga o loo tatalo ma aʻoaʻo atu ai se fafine.

O faatulagaga. E lua faatulagaga na taʻua e Paulo, o le aiga ma le faapotopotoga. Na fai mai o ia: “O le ulu o le fafine o le  tane; . . . o se fafine e tatalo pe na te faia valoaga ae e lē ufiufia lona ulu, ua faamāina e ia lona ulu.” (Fuaiupu 35) Ua tofia e Ieova le tane e fai ma ulu o le avā i le faatulagaga o le aiga. E tatau ona ia amanaʻia le pule a lana tane, auā e faamāina e le avā lana tane pe a faatino e le avā ni tiute tauave ua tofia e Ieova i le tane. O se faaaʻoaʻoga, afai e tatau ona fai e le avā se suʻesuʻega faale-Tusi Paia a o iai lana tane, e tatau ona fai se ufiulu o le avā e faaalia ai lona amanaʻiaina o le pule a le tane. E ufiufi le ulu o le avā e tusa lava pe e papatiso lana tane pe e leai, auā o le tane o le ulu lea o le aiga. * Afai e tatalo pe e aʻoaʻo atu se fafine a o iai sana tama tama talavou ua papatiso, e tatau pea ona fai le ufiulu o le fafine, e lē ona o le tama tama o le ulu lea o le aiga, ae ona o le pule ua tuuina mai i tane papatiso o le faapotopotoga Kerisiano.

Na taʻua e Paulo le faatulagaga o le faapotopotoga e faapea: “Afai e finau mai se tasi i se isi tū, e leai se tū faapea o iā i matou, atoa ma faapotopotoga uma a le Atua.” (Fuaiupu 16) Ua tuuina atu i tane papatiso le matafaioi e taʻimua i le faapotopotoga Kerisiano. (1 Timoteo 2:11-14; Eperu 13:17) E na o tane ua tofia e fai ma toeaina ma auauna o le faiva, e gafa ma le tiute tauave mai le Atua o le leoleoina o le lafu mamoe a le Atua. (Galuega 20:28) Ae ona o ni tulaga lē maʻalofia, e iai taimi e tāpā ai le fesoasoani a se fafine Kerisiano, ina ia taulima ni tiute tauave e masani ona gafa ma se uso agavaa ua papatisoina. O se faaaʻoaʻoga, atonu e manaʻomia ona taʻitaʻia e se tuafafine se feiloaʻiga mo le galuega talaʻi, ona ua lē avanoa atu pe e lē o faatasi atu se uso agavaa ua papatiso. Pe e faia foʻi e le tuafafine se suʻesuʻega faale-Tusi Paia na muaʻi faatulagaina, ma o loo auai se uso papatiso i le suʻesuʻega. * Talu ai e aofia ai i na gaoioiga le galuega o le aʻoaʻo atu, lea e masani ona fai i le faapotopotoga Kerisiano, e tatau ona fai se ufiulu o le tuafafine e faailoa  ai o loo ia faatinoina ni tiute tauave e masani ona tofia i uso.

Ae e tele vala o le tapuaʻiga e lē manaʻomia ai ona fai se ufiulu o se tuafafine. O se faaaʻoaʻoga, e lē manaʻomia se ufiulu pe a tali se tuafafine i sauniga a le faapotopotoga, pe a o talaʻi mai i lea fale i lea fale faatasi ma lana tane po o se isi uso papatiso, pe a o suʻesuʻe foʻi ma tatalo ma lana fanau e leʻi papatiso. Atonu e iai nisi tulaga e tulaʻi mai ma e lē mautinoa le tuafafine i le mea e fai, e lelei pe a suʻesuʻe atili o ia. * Pe a faaauau ona lē mautinoa o ia, pe o loo uunaʻia o ia e lona lotofuatiaifo e fai sona ufiulu, e lē sesē la pe afai e fai pea se ufiulu o se tuafafine, e pei ona faaalia i le ata o i luga.

O māfuaaga. E lua ni māfuaaga o loo taʻua i le fuaiupu e 10, e ala ai ona manaʻo se fafine Kerisiano e fai lona ufiulu: “E tatau . . . i le fafine ona ufiufi lona ulu e fai ma faailoga o lona gauaʻi i lana tane, ona o agelu.” Muamua lava, ia mātau le faaupuga “e fai ma faailoga o lona gauaʻi.” O le ufiufi o le ulu o se fafine, o se tasi lenā o auala e faailoa ai o loo ia amanaʻia le pule ua tuuina mai e Ieova i tane papatiso o le faapotopotoga. O lea la, ua faaalia ai lona alofa ma lona faamaoni iā Ieova le Atua. Lona lua, e maua i le faaupuga “ona o agelu.” E faapefea ona aafia nei foafoaga agaga malolosi pe a ufiufi le ulu o se fafine?

E naunau agelu e vaavaai mai o loo amanaʻia e le faalapotopotoga a Ieova i le lagi ma le lalolagi le pule a le Atua. E aogā foʻi iā i latou le faaaʻoaʻoga a tagata lē lelei atoatoa. Auā e tatau foʻi iā i latou ona gauaʻi i faatulagaga a Ieova, o se tofotofoga na paʻuʻū ai isi agelu i le taimi ua mavae. (Iuta 6) E ono mātauina e agelu se fafine Kerisiano o lē e sili atu lona poto masani, o lona iloa, ma lona atamai nai lo o se uso papatiso i le faapotopotoga,  ae o loo nofosauni pea lenā tuafafine e gauaʻi i le pule a le uso. I nisi o tulaga, o se fafine Kerisiano faauuina, lea o le a avea mulimuli ane ma se tasi e pule faatasi ma Keriso. E iai le taimi o le a pule faatasi ai lenā tuafafine ma Keriso i le lagi, ma auauna ai i se tulaga e sili atu ona maualuga nai lo o agelu. Maʻeu se faaaʻoaʻoga lelei e mātauina e agelu i le taimi nei! Ioe, maʻeu se faaeaga mo tuafāfine uma lava e faaali ai lo latou usiusitaʻi ma le lotomaulalo e ala i lo latou faamaoni ma gauaʻi, a o vaavaai mai le faitau miliona o agelu faamaoni!

^ pala. 3 E masani lava ona lē tatalo leotele se avā Kerisiano a o iai faatasi ma lana tane talitonu, seʻi vaganā ai ni tulaga lē maʻalofia, e pei o le lē mafai ona toe tautala o le tane ona o se maʻi.

^ pala. 1 E lē manaʻomia ona fai se ufiulu o se tuafafine pe afai o loo ia faia se suʻesuʻega faale-Tusi Paia na muaʻi faatulagaina, ae o loo auai ai se uso ua talaʻi e leʻi papatiso ma e lē o lana tane.

^ pala. 2 Mo nisi faamatalaga, tagaʻi i Le Olomatamata o Iulai 15, 2002, itulau e 26-27, po o le Watchtower o Fepuari 15, 1977, itulau 125-128.