Skip to content

Skip to secondary menu

Skip to table of contents

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 MATAUPU 7

Pe e Tāua iā te Oe le Ola e Pei Ona Tāua i le Atua?

Pe e Tāua iā te Oe le Ola e Pei Ona Tāua i le Atua?

“O loo iā te oe le puna o le ola.”SALAMO 36:9.

1, 2. O le ā le meaalofa mai le Atua e tāua tele i aso nei, ma aiseā?

UA FOAʻI mai e lo tatou Tamā o i le lagi se mea tautele—o le meaalofa o le ola o ni tagata atamamai o ē e mafai ona faaatagia atu ona uiga. (Kenese 1:27) Ona o lenā meaalofa tautele, ua mafai ai ona tatou manatunatu i mataupu silisili o le Tusi Paia. O le faatatauina o na taʻiala, ua mafai ai ona tatou tuputupu aʻe o ni tagata e matutua faaleagaga, o ē e alolofa iā Ieova ma “ua faaaogā o [tatou] mafaufau e iloa le mea saʻo ma le mea sesē ina ua aʻoaʻoina.”Eperu 5:14.

2 E matuā tāua lava i aso nei le tomai e manatunatu ai i mataupu silisili o le Tusi Paia, auā ua matuā lavelave le olaga nei, ma e lē taitai ona lava tulafono e foʻia ai mataupu uma e tulaʻi mai. Ua faamaonia le moni o lenā manatu i faiga faafomaʻi, aemaise o vailaau ma togafitiga e aofia ai le toto. O nei mataupu e naunau i ai i latou uma e fia usiusitaʻi iā Ieova. Afai e tatou te malamalama i mataupu silisili o le Tusi Paia e uiga i nei mataupu, e mafai ona tatou faia ni filifiliga poto e faamalieina ai o tatou lotofuatiaifo, ma faatumau ai i tatou i le alofa o le Atua. (Faataoto 2:6-11) Seʻi manatu i nisi o nei mataupu silisili.

E PAIA LE OLA MA LE TOTO

3, 4. O anafea na taʻua muamua ai e le Tusi Paia le paia o le toto, ma o ā mataupu silisili o loo faavae ai?

3 Na faailoa muamua mai lava e Ieova le sootaga vavalalata o le ola ma le toto, o ni mea e paia, ina ua uma ona fasiotia e Kaino Apelu. Na fetalai atu le Atua iā Kaino: “Faalogo  mai oe! O loo alaga mai iā te aʻu le toto o lou uso mai i le eleele.” (Kenese 4:10) I le silafaga a Ieova, o le toto o Apelu na fai ma sui o lona ola, lea na faamutaina ma le sauā. O lea la, na alaga atu le toto o Apelu i le Atua mo le tauimasui.Eperu 12:24.

4 Ina ua mavae le Lolo i aso o Noa, na faataga ai e le Atua tagata e aai i aano o manu, ae lē o le toto. Na fetalai le Atua: “O le aano o le manu ma lona toto; o lona ola lea, aua tou te aai ai. Ou te taui atu lo outou toto, o lo outou ola lea.” (Kenese 9:4, 5) Na faatatau atu lenei faatonuga i ē na tupuga mai iā Noa ma e faaauau e oo mai lava i o tatou aso. Na toe faamamafa ai fetalaiga a le Atua iā Kaino, o le toto o le ola lea o mea uma o iai le ola. O lenā faatonuga e faamaonia ai o Ieova o le Puna o le ola, e faasalaina e ia tagata uma lava e lē faatāuaina le ola ma le toto.Salamo 36:9.

5, 6. Na faapefea ona faailoa mai e le Tulafono a Mose le paia ma le tāua o le toto? (Tagaʻi i le pusa “ Ia Faatāua Ola o Manu.”)

5 O loo faailoa mai e le Tulafono a Mose na upu moni faavae e lua. O loo taʻua i le Levitiko 17:10, 11: “O so o se tasi . . . na te ʻaina so o se toto, ou te teena lea tagata ua ʻai i le toto, ma ou te fasiotia o ia. Auā o le ola o le meaola ua iai i lona toto, ma ua ou tuuina le toto i luga o le fata faitaulaga mo outou e fai ai le togisala mo o outou ola, auā o le toto e fai ai le togisala ona ua iai le ola i le toto.” *—Tagaʻi i le pusa “ O le Toto e Fai ma Togisala.”

6 Na tatau ona sasaa i le eleele le toto o se manu fasi, pe afai e lē faaaogāina le toto i le fata faitaulaga. I se gagana faafaatusa, na toe faafoʻi atu ai le ola i Lē na foaʻi maia. (Teuteronome 12:16; Esekielu 18:4) Ae ia mātau mai, e leʻi faapea na matuā faatoʻaga ona aveesea atoatoa e le tagata Isaraelu le toto mai aano o manu, ina neʻi meaanē e iai sina toto e  totoe. Afai na tapē ma faaalu lelei le toto o se manu, e mafai e se tagata Isaraelu ona ʻai ma se lotofuatiaifo lelei, ona na faaalia ai lona faaaloalo i Lē na foaʻi mai le ola.

7. Na faapefea ona faatāua e Tavita le paia o le toto?

7 Na malamalama Tavita i mataupu silisili o le tulafono a le Atua i le toto, auā o ia “o se tagata ua malie i ai” le finagalo  o le Atua. (Galuega 13:22) Ina ua fiainu Tavita i se tasi aso, na ō atu faamalosi ai ona tagata e toʻatolu i le togālauapi a le fili, ma latou asu aʻe ai vai mai se vaieli ma avatu iā te ia. O le ā le tali a Tavita? Na fesili atu o ia: “Po ou te inu ea i le toto o tagata na lamatia o latou ola?” O le manatu o Tavita, o lenā vai o le toto lava lenā e ola ai ona tagata. E ui lava la i lona fiainu, “a ua ia sasaa atu iā Ieova.”2 Samuelu 23:15-17.

8, 9. Pe na sui le silafaga a le Atua i le ola ma le toto ina ua faavaeina le faapotopotoga Kerisiano? Ia faamatala.

8 E pe tusa ma le 2,400 tausaga talu ona tuuina atu le tulafono iā Noa, ma pe tusa ma le 1,500 tausaga talu ona faavaeina le feagaiga o le Tulafono, na faagaee ai e Ieova le vaega pule a le uluaʻi faapotopotoga Kerisiano ina ia tusi e faapea: “Ua tonu i le agaga paia ma i matou nei, ia lē faaopoopo atu nisi avega iā te outou, ae e na o nei mea e tatau, ia faaauau ona taumamao mai i mea ua faataulaga mo tupua, ma le toto, ma mea ua titina, ma le faitaaga.”Galuega 15:28, 29.

9 E manino mai la, na iloa e le uluaʻi vaega pule e paia le toto, ma o se agasala le faaaogā sesē o le toto, e pei foʻi o le ifo i tupua po o le faia o le faitaaga. E talia foʻi e Kerisiano moni lenā aʻoaʻoga i aso nei. Talu ai e manatunatu i latou i mataupu silisili o le Tusi Paia, ua mafai ai ona latou faafiafia Ieova i a latou filifiliga e fai e faatatau i le toto.

LE FAAAOGĀINA O LE TOTO I TOGAFITIGA FAAFOMAʻI

E faapefea ona ou faamatala atu i se fomaʻi laʻu filifiliga i le faaaogāina o vaega ninii o le toto?

10, 11. (a) O le ā le manatu o Molimau a Ieova i le tuiina o le toto atoa ma vaega autū e fā o le toto? (e) O ā ni mataupu e uiga i le toto atonu e eseese ai manatu o Kerisiano?

10 Ua iloa e Molimau a Ieova, o le “taumamao . . . ma le toto” o lona uiga e lē taliaina tuigātoto, ma e lē ofoina atu pe teuina o latou lava toto ina ia fai ai ni tuigātoto. Ona o lo latou faaaloalo i tulafono a le Atua, e latou te lē taliaina foʻi vaega autū e fā o le toto: o sela mūmū, o sela papaʻe, o le vaega faatoʻa toto, ma le vaega faasuavai o le toto.

 11 Ae ona o le poto faasaienisi i aso nei, ua mafai ai ona toe vaevaeina nei vaega autū e fā i ni vaega matuā ninii, e faaaogā e fai ai togafitiga eseese. Pe e mafai ona talia e se Kerisiano na vaega ninii? Pe e manatu o le “toto” lava lenā? E tatau i tagata taʻitoʻatasi ona fai lana lava filifiliga i lenei mataupu. E aofia ai foʻi ma togafitiga faafomaʻi e pei o le vaimamā ma le faamamāina o le toto, o le faaalu o le toto i taga ae faaaogā se vai e sui ai le toto, o le toe faaaogā o le toto o loo alu ese mai le tino o le maʻi i le taimi o le taotoga, pe afai e leʻi teuina le toto.—Tagaʻi i le mataupu o loo i le Faaopoopoga “Vaega Ninii o le Toto ma Taotoga.”

12. O le ā so tatou manatu ma gaoioiga e fai i mataupu o le lotofuatiaifo?

12 Pe faamata e tāua iā Ieova mataupu e tuu i le filifiliga a le tagata lava ia? Ioe, auā e manatu mamafa o ia i o tatou mafaufauga  ma uunaʻiga e fai ai mea. (Faitau le Faataoto 17:3; 24:12.) Pe a uma ona tatalo ma suʻesuʻe ina ia malamalama i se vailaau po o se togafitiga faafomaʻi, e tatau ona tatou faalogo i o tatou lotofuatiaifo ua aʻoaʻoina i le Tusi Paia. (Roma 14:2, 22, 23) E lē tatau i isi ona faamalosia i tatou e tusa ma o latou lotofuatiaifo, ma e lē tatau foʻi ona tatou fesili “O le ā sau mea e fai pe afai o oe lea e tupu ai lenei mea?” O mataupu faapena, e tatau ai i Kerisiano taʻitoʻatasi ona ʻtauave lana lava avega.’ *Kalatia 6:5; Roma 14:12; tagaʻi i le pusa “ Pe e Paia le Toto iā te Aʻu?

O TULAFONO A IEOVA E ATAGIA AI LONA ALOFA FAATAMĀ

13. O le ā ua faaalia mai i tulafono ma mataupu silisili a Ieova e faatatau iā te ia? Ia faataʻitaʻi.

13 Ua faaalia i tulafono ma mataupu silisili o le Tusi Paia, o Ieova o le Faitulafono poto ma o le Tamā alofa e manatu mamafa i mea e lelei ai lana fanau. (Salamo 19:7-11) E ui lava e lē o se tulafono tau soifua mālōlōina le “taumamao . . . ma le toto,” ae e puipuia ai i tatou mai i faafitauli e fesootaʻi atu i tuigātoto. (Galuega 15:20) O le mea moni, e toʻatele fomaʻi ua latou manatu “e aupito i lelei” taotoga ua faia e aunoa ma le toto i tausiga faafomaʻi i aso nei. O na mea ua faamausalī ai i Kerisiano moni le poto e lē masuʻesuʻeina o Ieova ma lona alofa faatamā.Faitau le Isaia 55:9; Ioane 14:21, 23.

14, 15. (a) O ā tulafono na atagia ai le alofa o le Atua i lona nuu? (e) E faapefea ona e faatatauina mataupu silisili o loo iai i nei tulafono o le saogalemu?

14 Ua atagia mai i le tele o tulafono a le Atua, lona manatu mamafa i le lelei o lona nuu o Isaraelu anamua. O se faaaʻoaʻoga, na ia faatonuina tagata Isaraelu ina ia fai se puipui e siʻo ai le taualuga o le fale ina neʻi tupu se faalavelave, auā na  tele mea e fai i luga o taualuga. (Teuteronome 22:8; 1 Samuelu 9:25, 26; Neemia 8:16; Galuega 10:9) Na faatonuina foʻi e le Atua e leoleoina povi poʻa e taufesua. (Esoto 21:28, 29) O le lē amanaʻia o nei faatonuga, na faaalia ai le lē manatu mamafa i le lelei o isi, ma e ono nofosala ai i le faamasaatoto.

15 E faapefea ona e faatatauina mataupu silisili o loo iai i nei tulafono? Ia manatu ifo i lau taavale, o le auala e ave ai le taavale, o au manu, o lou fale, o lou falefaigaluega, ma faafiafiaga e te filifilia. Ua feoti le toʻatele o talavou i isi atunuu i faalavelave faafuaseʻi, ona o le fiafia e fai mea e lamatia ai le ola. Peitaʻi, o talavou o ē e naunau e faatumauina i latou i le alofa o le Atua, e latou te faatāuaina le ola ma e lē fiafia i gaoioiga e lamatia ai le ola. E lē vālea i latou ma manatu e sao mai i lamatiaga, ona o loo talavou pea o latou ola. Nai lo o lea, ua latou olioli i lo latou talavou e ala i le ʻalofia o mala.Failauga 11:9, 10.

16. O le ā le mataupu silisili o le Tusi Paia e faatatau i le faapaʻū tama? (Tagaʻi i le faamatalaga i le pito i lalo.)

16 E tāua foʻi i le silafaga a le Atua le ola o se pepe e leʻi fanau mai. I aso anamua i Isaraelu, afai na lavea se fafine tō i se tagata ma oti ai le fafine po o lana pepe, na nofosala lenā tagata i le fasioti tagata i le silafaga a le Atua, ma na “avatu [lona] ola e sui ai le ola.” * (Faitau le Esoto 21:22, 23.) Seʻi manatu la i faalogona o Ieova a o silasila mai i le anoanoaʻi o pepe ua faapaʻūina i tausaga taʻitasi, ma ua fasiotia le tele o nei pepe ona o le manatu faapito o tagata, ma o latou tuʻinanauga i feusuaʻiga.

17. E faapefea ona e faamāfanafanaina se tasi na faapaʻū lana tama a o leʻi ia aʻoaʻoina tapulaa a le Atua?

17 Ae e faapefea la pe afai na faapaʻū se tama a se fafine a o leʻi aʻoaʻoina e ia upu moni o le Tusi Paia? Po o le a  alofa mutimutivale Ieova iā te ia? Ioe! E mafai ona mautinoa e le tagata ua salamō moni, e faamagaloina o ia e Ieova e faavae i le toto ua faamaligiina o Iesu. (Salamo 103:8-14; Efeso 1:7) Na fetalai foʻi Keriso: “Ua ou sau e valaau  i ē agasala ina ia salamō, ae lē o ē amiotonu.”Luka 5:32.

IA ʻALOFIA LE LOTO ITA!

18. E faapefea ona faamatilatila e le Tusi Paia le pogai autū o le faamasaatoto?

18 E lē lava lo tatou ʻalofia o le faia o mea e afāina ai isi. Ae e finagalo Ieova ina ia tatou liaʻiesea mai i o tatou loto le pogai autū o le faamasaatoto—o le ita lea. Na tusi le aposetolo o Ioane: “O lē e ʻinoʻino i lona uso o le fasioti tagata o ia.” (1 Ioane 3:15) O se tagata faapena, e lē gata e ʻinoʻino i lona uso, ae e manatu foʻi e lelei pe ana oti lona uso. E ono iloa lona ʻinoʻino i lona faia o tala taufaaleaga po o ni tuuaʻiga sesē, ma afai e moni na tuuaʻiga e faamasinoina e Ieova lona uso. (Levitiko 19:16; Teuteronome 19:18-21; Mataio 5:22) E tāua tele la ona tatou taumafai malosi e liaʻiesea mai i o tatou loto ni faalogona ita o loo iai!Iakopo 1:14, 15; 4:1-3.

19. O le ā se manatu o se tagata e manatunatu i mataupu silisili o le Tusi Paia e faatatau i le Salamo 11:5 ma le Filipi 4:8, 9?

19 O i latou uma e faatāuaina le ola e pei o Ieova ma e mananaʻo e tumau i lona alofa, e latou te ʻalofia foʻi faiga sauā uma lava. Ua faapea mai le Salamo 11:5: “E inosia lava e Ia le tagata e fiafia i le faasauā.” O lenā mau, e lē gata o loo faaalia ai le uiga o Ieova; ae o loo iai se mataupu silisili e taʻitaʻia ai o tatou ola. E uunaʻia ai ē e alolofa i le Atua ina ia ʻalofia so o se faafiafiaga e ono faatupuina ai le naunau i faiga sauā. O le faaupuga o Ieova “o le Atua o le filemu,” e uunaʻia ai ana auauna ina ia faatumu o latou mafaufau ma loto i mea e mamā, o mea lelei, ma mea e taʻuleleia, lea e maua ai le filemu.Faitau le Filipi 4:8, 9.

IA FAAMAMAO MAI I FAALAPOTOPOTOGA E NOFOSALA I LE TOTO

20-22. E faapefea ona feutagaʻi Kerisiano ma le lalolagi, ma aiseā?

20 Ua nofosala i le toto le lalolagi atoa a Satani i le silafaga a le Atua. Ua faaata mai e le Tusi Paia faalapotopotoga faapolotiki  a le lalolagi o ni manufeʻai, o ē na fasiotia le faitau miliona o tagata, e aofia ai le toʻatele o auauna a Ieova. (Tanielu 8:3, 4, 20-22; Faaaliga 13:1, 2, 7, 8) O le pulupululima faatasi o nei pulega e pei o ni manufeʻai ma pisinisi ma faiga faasaienisi, ua latou gaosia ai nisi o auupega e sili ona mataʻutia, ma maua ai le tele o le polofiti. Ua moni ai “o le lalolagi atoa o loo nofo toʻilalo i le pule a lē o loo leaga”!1 Ioane 5:19.

21 Ua solitū soo o Iesu mai i faiga faapolotiki ma taua ona “e lē o ni tagata o le lalolagi” i latou, ma ua lē nofosala i latou i le toto, e pei ona nofosala ai tagata taʻitoʻatasi ma le atunuu atoa. * (Ioane 15:19; 17:16) E latou te lē tali atu ma le inainā i ē o sauāina i latou, ona e latou te faaaʻoaʻo iā Keriso. Nai lo o lea, e latou te alolofa i o latou fili ma tatalo foʻi mo i latou.Mataio 5:44; Roma 12:17-21.

22 O le mea e sili ona tāua, e lē aafia Kerisiano moni iā “Papelonia le Aai Tele,” o tapuaʻiga sesē uma lava a le lalolagi, o ē ua sili ona nofosala i le faamasaatoto. Ua faapea mai le  Afioga a le Atua: “Ua maua i lenei aai le toto o le ʻauperofeta, ma le ʻaupaia, ma tagata uma ua fasiotia i le lalolagi.” O le mea lea ua lapataʻia ai i tatou e faapea: “Loʻu nuu e, ia outou ō ese mai iā te ia.”Faaaliga 17:6; 18:2, 4, 24.

23. O le ā le uiga o le ō ese mai iā Papelonia le Aai Tele?

23 O le lafoaʻia o Papelonia le Aai Tele, e lē lava le tau ina aveesea o le suafa o se tasi mai i se ʻaulotu. E aofia ai foʻi ma le ʻinoʻino i amioga leaga o loo talia ma faatagaina e lotu sesē—o mea e pei o amioga lē mamā, o le aiā i faiga faapolotiki, ma le matapeʻapeʻa. (Faitau le Salamo 97:10; Faaaliga 18:7, 9, 11-17) O amioga uma na e masani ona iʻu i le faamasaatoto!

24, 25. (a) O le ā le faavae e faaalia ai e le Atua le alofa mutimutivale i le tagata salamō ua nofosala i le toto? (e) O le ā le faatulagaga i taimi o le Tusi Paia ua faamanatu mai e lenei mea iā i tatou?

24 O i tatou uma lava na pisipisia i le faamasaatoto, ona o le lagolagoina o le lalolagi a Satani a o tatou leʻi auai i le tapuaʻiga moni. Ae ona ua suia o tatou ala, ma faatuatua i le taulaga togiola a Keriso, ma tuuina atu o tatou ola i le Atua, ua tatou maua ai le alofa mutimutivale o le Atua ma le puipuiga faaleagaga. (Galuega 3:19) O lenā puipuiga ua faamanatu mai ai iā i tatou aai o sulufaʻiga i taimi o le Tusi Paia.Numera 35:11-15; Teuteronome 21:1-9.

25 O le ā lenā faatulagaga? Afai na oti faafuaseʻi se tasi i se tagata Isaraelu, na tatau ona sola atu le tagata Isaraelu i se tasi o aai o sulufaʻiga. Ina ua uma ona taulimaina e faamasino agavaa le mataupu, na tatau ona nofo pea le fasioti tagata paʻivalea i le aai o sulufaʻiga seʻia maliu le ositaulaga. Ona saʻoloto lea o ia e nofo i se isi mea. Maʻeu se faaaʻoaʻoga lelei o le alofa mutimutivale o le Atua, aemaise le matuā tāua iā te ia o le ola o le tagata! I le pei o na aai o sulufaʻiga i aso anamua, o le sauniuniga a le Atua lea e faavae aʻe i le taulaga togiola a Keriso, e puipuia ai i tatou mai le oti ona o le solia ma le lē iloa o tulafono a le Atua i le paia o le ola ma  le toto. Pe e tāua iā te oe lenā sauniuniga? E faapefea ona e faaalia e tāua iā te oe? O se tasi o auala, o le valaaulia lea o isi ina ia talia le sauniuniga a le Atua o le puipuiga, aemaise ua faaloloʻi mai “le puapuaga tele.”Mataio 24:21; 2 Korinito 6:1, 2.

IA FAATĀUA LE OLA E ALA I LE TALAʻIA O LE FEʻAU O LE MALO

26-28. E faapefea ona pei lo tatou tulaga o le tulaga o le perofeta o Esekielu, ma e faapefea ona faatumauina i tatou i le alofa o le Atua?

26 O le tulaga o tagata o le Atua i aso nei, ua manatua ai le perofeta o Esekielu i aso anamua, o lē na faatonuina e Ieova e fai ma tagata vāai faaleagaga mo le aiga o Isaraelu. Na fetalai atu le Atua iā te ia: ʻPe a e faalogo mai i upu a loʻu gutu, e ao foʻi ona e avatu lapataʻiga iā i latou mai iā te aʻu.’ Ana faapea na faatamala Esekielu i lona tofiga, semanū e tuuaʻia o ia i le toto o ē na faaumatia ina ua faasalaina Ierusalema. (Esekielu 33:7-9) Peitaʻi, na usiusitaʻi Esekielu ma lē nofosala ai o ia i le toto.

27 Ua tatou fesagaʻi nei ma le iʻuga o le lalolagi atoa a Satani. O le mea lea, ua manatu ai Molimau a Ieova, o lo latou tiute tauave ma le faaeaga le folafola atu o “le aso [o le] tauimasui” a le Atua, ma le feʻau o le Malo. (Isaia 61:2; Mataio 24:14) Po o e maelega i lenei galuega tāua? Na manatu mamafa le aposetolo o Paulo i lona tofiga e talaʻi. Ona o lea, na faapea mai ai o ia: “Ua mamā aʻu mai i le toto o tagata uma, auā ou te leʻi taofia le taʻuina atu iā te outou o le finagalo uma o le Atua.” (Galuega 20:26, 27) O se faaaʻoaʻoga lelei lea e tatou te mulimuli ai!

28 Ina ia faatumauina i tatou i le māfana o le alofa faatamā o Ieova, e iai isi mea e tatau ona tatou faia e ese mai i le faatāuaina o le ola ma le toto, e pei ona faia e Ieova. E tatau ona tumau ona tatou mamā pe e paia i lana silafaga, e pei o le a tatou mātauina i le mataupu o sosoo mai.

^ pala. 5 Ua faapea mai se tusi e faatatau i le fetalaiga a le Atua “o le ola o le meaola ua iai i lona toto”: “E manaʻomia sela taʻitasi o le toto ina ia ola ai.” (Scientific American)

^ pala. 12 Tagaʻi i le Ala Mai! o Ianuari-Mati 2007, i le itulau 16-20, ua lomia e Molimau a Ieova.

^ pala. 16 Na faapea mai se tagata poto i upu o le Tusi Paia, o lenei faaupuga Eperu “e lē mafai ona faasino atu na o le fafine ua lavea.” Ia mātau foʻi, e lē o taʻua i le Tusi Paia e faapea e fua le faamasinoga a Ieova i le matua o le pepe o loo afuafua i le manava.

^ pala. 21 Tagaʻi i le Mataupu e 5 “Le Auala e Vavaeese ai Mai le Lalolagi.”

^ pala. 70 Tagaʻi i le mataupu o loo i le Faaopoopoga “Vaega Ninii o le Toto ma Taotoga” mo nisi faamatalaga.