Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 FAAOPOOPOGA

Faʻalo i le Fuʻa, o le Palota, ma Galuega e Sui ai Tiute Faavaegāʻau

Faʻalo i le Fuʻa, o le Palota, ma Galuega e Sui ai Tiute Faavaegāʻau

Faʻalo i le Fuʻa. E talitonu Molimau a Ieova, o le faʻalo i le fuʻa ma le usuina o le vii o le fuʻa, o se gaoioiga faalotu e viiviia ai le atunuu po o ona taʻitaʻi mo le faaolataga, ae lē o le Atua. (Isaia 43:11; 1 Korinito 10:14; 1 Ioane 5:21) O se tasi o na taʻitaʻi o le tupu o Papelonia anamua o Nepukanesa. Ina ia faaofo tagata i lona mamalu ma lona mapolotu, na faatūina ai e lenei pule malosi se faatusa maualuga, ma faatonuina ona tagata e ifo i ai a o tāina se pese, e pei o le vii o le fuʻa. Peitaʻi, e leʻi ifo ni talavou Eperu e toʻatolu o Sataraka, Mesako ma Apeteniko i lenā tupua e ui e faasala i le oti.Tanielu, mataupu e 3.

Na tusi Carlton Hayes, o se alii poto i talafaasolopito: “O le fuʻa, o le faailoga sili lea o le lotonuu, ma o le mea autū lenā ua tapuaʻi i ai tagata [i o tatou aso.] E tō pulou o tagata a o pasi ane le fuʻa; e tusia e fatusolo a latou solo e viiviia ai le fuʻa, ma e faia ai foʻi pesega a tamaiti.” Na taʻua foʻi e lenā alii, e iai “aso paia” o faiga faalotonuu, e pei o Aso o le Sisigā Fuʻa, ma e iai foʻi ona “tagata paia ma tagata totoa” atoa foʻi ma “faailoga o le atunuu ua tapuaʻi i ai.” Na faapea mai se tagata maualuga o le vaegaʻau i se sauniga i le lautele i Pasili: “Ua faatāuaina e tagata le fuʻa ma tapuaʻi i ai . . . e pei lava ona tapuaʻi i le Atunuu.”  Ioe, e pei ona taʻua e se tusi, “e paia le fuʻa e pei lava o le koluse.”The Encyclopedia Americana.

Na faapea mai foʻi le tusi lava lenā, o vii o le fuʻa “o faaupuga e faailoa atu ai lagona o le lotonuu, ma e masani lava ona aofia ai ma se talosaga mo le taʻitaʻiga ma le puipuiga a le Atua i tagata ma o latou taʻitaʻi.” O lea la, e lē faapea ua fiaamiotonu naʻuā auauna a Ieova i lo latou manatu, o faiga faalotu le faʻalo i le fuʻa ma le usuina o le vii o le fuʻa a o faia sauniga faalemalo. O upu nei a se tusi ina ua lē faʻalo fanau a Molimau a Ieova i le fuʻa, pe tautō e faamaoni i le atunuu i aʻoga i Amerika: “Ua faatoʻā ioe nei le Faamasinoga Maualuga ina ua uma le tele o faamasinoga, o nei faiga masani i aso taʻitasi, o ni gaoioiga faalotu.”The American Character.

E ui lava e lē auai tagata o Ieova i ni sauniga e lē ōgatusa ma le Tusi Paia, ae e faaaloalo pea i latou i aiā tatau a isi tagata. E faaaloalo foʻi i latou i fuʻa o le atunuu o loo fai ma tagāvai, ma ua latou amanaʻia e faapea, o malo uma na filifilia i se auala faaletulafono, o i latou na o “faipule silisili” o loo fai ma “auauna a le Atua.” (Roma 13:1-4) O lea la, e utagia e Molimau a Ieova le apoapoaʻiga ina ia tatalo “e faatatau i tupu ma i latou uma i tulaga maualuluga.” Ae o le māfuaaga e tatou te tatalo ai faapena, “ina ia tatou ola i ni olaga toʻafimālie ma le filemu, e faamaoni [atoatoa] i le Atua ma ia faatagata matua.”1 Timoteo 2:2.

O le palota mo ni patī faaupufai. E faaaloalo Kerisiano moni i le aiā tatau a isi e palota ai. E lē tetee i latou i faigāpalota, ma e felagolagomaʻi i latou ma pule ua filifilia. Peitaʻi, e matuā solitū i latou i mataupu faaupufai a atunuu. (Mataio 22:21; 1 Peteru 3:16) O le ā se mea e fai e se Kerisiano pe afai e tāpā e le tulafono a le atunuu tagata uma ina ia palota, pe e matuā inosia foʻi tagata e lē ō i fale palota? Ia manatua foʻi, na ō atu Sataraka, Mesako ma Apeteniko i le fanua laugatasi o Turu. E mafai foʻi la e se Kerisiano o loo iai i se tulaga faapena, ona alu atu i le fale palota pe a tusa ai ma lona lotofuatiaifo. Ae e tatau ona faaeteete o ia ina neʻi aafia ai lona solitū faa-Kerisiano. E ao ona manatunatu o ia i mataupu silisili nei e ono:

  1.   O soo o Iesu “e lē o ni tagata o le lalolagi” i latou.Ioane 15:19.

  2. Ua avea Kerisiano ma sui o Keriso ma lona Malo.Ioane 18:36; 2 Korinito 5:20.

  3. Ua autasia le faapotopotoga Kerisiano i o latou talitonuga, ma ua fusia faatasi ona sui i le alofa e pei o Keriso.1 Korinito 1:10; Kolose 3:14.

  4. O ē na filifilia se tagata i le tulaga pule, e tuuaʻia foʻi i latou i gaoioiga a lenā tagata.—Ia mātau mataupu silisili o loo i le 1 Samuelu 8:5, 10-18 ma le 1 Timoteo 5:22.

  5. Ina ua mananaʻo Isaraelu e filifili se tagata e fai ma o latou tupu, na silasila i ai Ieova e tusa lava ua latou teena o Ia.1 Samuelu 8:7.

  6. E tatau ona iai i Kerisiano le saʻolotoga e talanoa atu ai i tagata uma e uiga i le pulega o le Malo o le Atua, e tusa lava po o ā manatu faapolotiki o na tagata.Mataio 24:14; 28:19, 20; Eperu 10:35.

Galuega e Sui ai Tiute Faavaegāʻau. O tagata e lē auai i tiute faavaegāʻau i nisi o atunuu, e faatonuina i latou e o latou malo ina ia fai nisi galuega mo le malo mo sina taimi. Pe a tatou fetaiaʻi ma se filifiliga faapena, ia tatalo e faatatau i lenā mataupu, ma e mafai foʻi ona talatalanoa i se Kerisiano e matua faaleagaga, ona fai lea o sa tatou filifiliga e faavae i le lotofuatiaifo ua uma ona aʻoaʻoina.Faataoto 2:1-5; Filipi 4:5.

Ua fai mai le Afioga a le Atua ia tatou “usiusitaʻi i malo ma pule, ina ia nofosauni mo galuega lelei uma, . . . ia magafagafa.” (Tito 3:1, 2) Seʻi o tatou fesili ifo iā i tatou lava: ʻAfai ou te taliaina lenei galuega mo le malo, pe e aafia ai loʻu solitū o se Kerisiano, ma po o ou aafia i lotu sesē?’ (Mika 4:3, 5; 2 Korinito 6:16, 17) ʻAfai ou te taliaina lenei galuega, pe e faafaigatā ai ona ou faatinoina oʻu tiute tauave faa-Kerisiano, pe e matuā lē mafai ai lava ona ou faatinoina na tiute tauave?’ (Mataio 28:19, 20; Efeso 6:4; Eperu 10:24, 25) ʻAfai ou te faia lenā galuega, pe e mafai ona faateleina ai aʻu galuega faaleagaga ma atonu ou te auai ai i le faiva faataimi atoa?’Eperu 6:11, 12.

 Afai e filifili se Kerisiano e tusa ai ma lona lotofuatiaifo, e mafai ona ia auai i se galuega faapena nai lo o le alu i le falepuipui, e tatau i uso Kerisiano ona faaaloalo i lana filifiliga. (Roma 14:10) Ae afai e manatu o ia e lē mafai ona ia auai i se galuega faapena, e tatau pea i isi ona faaaloalo i lana filifiliga.1 Korinito 10:29; 2 Korinito 1:24.

 

Faitau Atili

Ia Lagolagoina ma le Faamaoni na o le Malo o le Atua

Ua foloina e se vaega e leʻi faatalitalia le “vaitafe” o sauāga e faasaga i Molimau a Ieova ona o lo latou solitū i mataupu faapolotiki.