Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

‘Ia Faatumau iā te Outou i le Alofa o le Atua’

 MATAUPU 17

‘Ia Atiaʻe lo Outou Faatuatua e Sili Ona Paia’

‘Ia Atiaʻe lo Outou Faatuatua e Sili Ona Paia’

“Ia atiaʻe iā te outou i lo outou faatuatua e sili ona paia . . . Ia outou faatumau iā te outou i le alofa o le Atua.”IUTA 20, 21.

1, 2. O le ā le galuega tauatiaʻe o loo e faia, ma aiseā e tāua ai le lelei o lenā galuega?

O LOO e galue malosi e atiaʻe se fale. Ua fai si umi o tauatiaʻe le fale, ma o le a tele ni tausaga e faamāeʻa ai. O loo faamalieina oe i le galuega, e ui lava i le tele o luʻitau. Po o ā lava ni mea e ono tulaʻi mai, ae ua fai lau faaiʻuga e te lē faavaivai pe fiu foʻi, auā e aafia ai lou ola ma lou lumanaʻi i le lelei o le galuega. Aiseā? Auā o oe lea e faasino i ai lenei galuega tauatiaʻe!

2 Na faamatilatila e le soo o Iuta le galuega o loo tatou galulue ai, o le atiaʻe lea o i tatou lava. Ina ua ia pulunaunauina Kerisiano e “faatumau iā te outou i le alofa o le Atua,” na ia faaalia i le fuaiupu lava lenā le auala e faia ai faapea: “Ia atiaʻe iā te outou i lo outou faatuatua e sili ona paia.” (Iuta 20, 21) O ā ni auala e te atiaʻe ai iā te oe lava ina ia faamausalī ai lou faatuatua, ma e tumau ai i le alofa o le Atua? O le a tatou uaʻi totoʻa i ni auala se tolu e te atiaʻe ai lou itu faaleagaga.

IA ATIAʻE PEA LE FAATUATUA I POLOAʻIGA AMIOTONU A IEOVA

3-5. (a) O le ā le manatu e manaʻo Satani e faasesē ai oe e faatatau i poloaʻiga a Ieova? (e) O le ā so tatou manatu e tatau ona iai i tulafono a le Atua, ma e faapefea ona aafia ai i tatou? Ia fai se faataʻitaʻiga.

3 Muamua lava, e tāua tele ona faamalosia lo tatou faatuatua i tulafono a le Atua. A o e suʻesuʻeina lenei tusi, na e iloiloina  nisi o poloaʻiga amiotonu a Ieova e faatatau i amioga. O le ā sou manatu i na poloaʻiga? E manaʻo Satani e faasesē oe ina ia e manatu e faasāsā naʻuā ma e mamafa tulafono a Ieova, atoa foʻi ma ana mataupu silisili ma tapulaa. O lana togafiti lava lenā ua leva ona faaaogā, aemaise talu ai na taulau manuia i le faatoʻaga i Etena. (Kenese 3:1-6) Po o le a taulau manuia lenā togafiti iā te oe? E faalagolago lava i ou manatu.

4 Seʻi fai se faataʻitaʻiga: Seʻi faapea o loo e savalivali i se togālaau matagofie, ona e mātauina lea o loo puipui se tasi itu o le togālaau i se pā maualuga. Peitaʻi, e manaia tele le tilotilo atu i le isi itu o le pā. Atonu e te mafaufau ua matuā faalavelave tele lenei pā iā te oe. Ae peitaʻi, a o e tilotilo atu i le isi itu o le pā, ua e vaaia ai se leona feʻai o loo saʻili sana meaʻai! Ona e faatoʻā iloa ai lea o le māfuaaga na fai ai le pā, ina ia puipuia ai tagata! Po o iai ea se manufeʻai o loo tuliloaina oe i le taimi nei? Ua lapataʻi mai le Afioga a le Atua: “Ia faaauau ona outou mafaufau lelei ma ia mataala. O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.”1 Peteru 5:8.

5 O Satani o se manufeʻai. Ona e finagalo Ieova ina ia lē ʻaina i tatou e Satani, ua Ia faataatia ai ana tulafono ina ia puipuia i tatou mai le tele o “togafiti” taufaaʻoleʻole a lē o loo leaga. (Efeso 6:11) O lea la, o taimi uma lava e tatou te mafaufau loloto ai i tulafono a le Atua, e ao ona tatou iloa ua faaatagia mai ai le alofa o lo tatou Tamā o i lagi. Afai e tatou te manatu faapena, o le a avea tulafono a le Atua ma puipuiga ma fiafiaga iā i tatou. Na tusi le soo o Iakopo o lē e vaavaai totoʻa i le tulafono lelei atoatoa o le saʻolotoga, ma tausisi i ai, o le a fiafia o ia i mea o loo ia faia.Iakopo 1:25.

6. O le ā le auala silisili e atiaʻe ai le faatuatua i tulafono ma taʻiala amiotonu a le Atua? Ia fai se faataʻitaʻiga.

6 O le usiusitaʻi i poloaʻiga a le Atua, o le auala silisili lea e atiaʻe ai lo tatou faatuatua i Lē e Faitulafono, ma le atamai o ana tulafono. O se faaaʻoaʻoga, o “le tulafono a le Keriso” e  aofia ai le poloaʻiga a Iesu ina ia aʻoaʻoina isi i “mea uma ua [ia] poloaʻi atu ai.” (Kalatia 6:2; Mataio 28:19, 20) E manatu mamafa foʻi Kerisiano i le faatonuga e faaauau ona faapotopoto faatasi mo le tapuaʻiga, ma ia fefaalaeiauaʻi. (Eperu 10:24, 25) O se isi poloaʻiga a le Atua, e aofia ai le apoapoaʻiga ina ia tatalo e lē aunoa iā Ieova mai i le loto. (Mataio 6:5-8; 1 Tesalonia 5:17) A o tatou faatatauina na poloaʻiga, e atili manino ai i o tatou mafaufau o loo iai i na poloaʻiga ni taʻiala alofa. O le usiusitaʻi i na taʻiala, e tatou te maua ai le olioli ma le lotomalie lea e lē mafai ona tatou maua i lenei lalolagi malapagā. A o e mafaufau loloto i aogā ua e mauaina mai le faatatauina o tulafono a le Atua, pe e lē faamalosia ai ea lou faatuatua?

7, 8. O le ā le faamautinoaga a le Afioga a le Atua i ē e popole neʻi lē mafai ona tausisi i se ala amiotonu a o faagasolo tausaga?

7 E popole nisi tagata, o le a iai taimi e faigatā ai ona latou pipii i tulafono a Ieova a o faagasolo tausaga. E matataʻu i latou ina neʻi lē taulau a latou taumafaiga. Afai e faapena ou lagona, ia manatua upu nei: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei  o galu o le sami.” (Isaia 48:17, 18) Pe na e manatunatu ea i na upu faalaeiau?

8 Ua faamanatu mai e Ieova iā i tatou, e aogā iā i tatou le usiusitaʻi iā te ia. Ua ia folafola mai ni faamanuiaga se lua pe a tatou usiusitaʻi. Muamua, o le a pei lo tatou filemu o se vaitafe—o lona uiga o lo tatou filemu e toʻafimālie, e tele ma e faaauau pea. Lona lua, o la tatou amiotonu o le a pei o galu o le sami. Afai e te tū i se matafaga ma e vaavaai atu i le fafati mai pea o galu, e oso aʻe ai i lou mafaufau e lē taitai muta le fafati mai o galu. E te iloa ai o le a faaauau pea ona fafati mai galu i le matafaga e oo i le faavavau. Ua fetalai Ieova e mafai foʻi ona faapena lau amiotonu. Afai e te taumafai e faamaoni iā te ia, e na te lē tuua lava oe ia tautevateva! (Faitau le Salamo 55:22.) Pe e lē faamalosia ai ea lou faatuatua iā Ieova ma ana poloaʻiga amiotonu ona o na folafolaga faamāfanafanaloto?

“FINAFINAU IA INA IA AVEA MA TAGATA MATUTUA”

9, 10. (a) Aiseā e avea ai le matua faaleagaga ma sini lelei mo Kerisiano? (e) E faapefea ona maua le olioli pe a faaleagaga mafaufauga o se tasi?

9 O le vala lona lua o lau galuega tauatiaʻe, ua faailoa mai i le mau lenei: “Inā tatou finafinau ia ina ia avea ma tagata matutua.” (Eperu 6:1) O le avea ma tagata matua faaleagaga o se sini lelei lenā mo se Kerisiano. E mafai ona tatou ausia lenā sini o le matua faaleagaga, e lē pei o le tulaga lelei atoatoa, lea e lē mafai ona ausia e tagata. E lē gata i lea, e sili atu le olioli o Kerisiano i le auauna iā Ieova a o tuputupu aʻe faaleagaga i latou. Aiseā?

10 O se Kerisiano e taʻumatuaina, o se tagata faaleagaga o ia. E vaai o ia i mea e pei ona silasila i ai Ieova. (Ioane 4:23) Na tusi Paulo: “O i latou e naunau i le tino, e taulaʻi atu o latou manatu i mea a le tino, a o ē e naunau i le agaga, e taulaʻi atu i mea a le agaga.” (Roma 8:5) E itiiti le olioli e maua e se tasi e faaletino ona mafaufauga, auā e manatu o ia i lona  lava lelei, e leai se tofā mamao, ma e taulaʻi i mea faaletino. Ae o le tagata e faaleagaga ona mafaufauga, e olioli o ia auā e taulaʻi lana vaai iā Ieova “le Atua fiafia.” (1 Timoteo 1:11) O le tagata faaleagaga e naunau o ia e faafiafia Ieova, ma e olioli pea o ia e ui i tofotofoga. Aiseā? Auā foʻi o tofotofoga e maua ai le avanoa e faamaonia ai le pepelo o Satani ma atiaʻe ai le faamaoni, lea e olioli ai lo tatou Tamā o i le lagi.Faataoto 27:11; faitau le Iakopo 1:2, 3.

11, 12. (a) O le ā le tala a Paulo i le “mafaufau” o se Kerisiano, ma o le ā le uiga o le upu ua faaliliuina i le “toleni”? (e) O le ā le toleniga e fai ina ia tuputupu aʻe ai se tasi ma ia lelei ona faaaogāina lona tino?

11 E mafai ona ausia le malosi ma le matua faaleagaga pe a toleni e atiaʻe. Seʻi manatu i lenei mau: “O meaʻai aano e mo tagata matutua ia, o ē ua faaaogā o latou mafaufau e iloa le mea saʻo ma le mea sesē ina ua toleni.” (Eperu 5:14, fpl) Ina ua fai mai Paulo e “toleni” o tatou mafaufau, na ia faaaogāina se upu Eleni na taatele i fale faamalositino i le uluaʻi senituri i Eleni, auā e mafai ona faaliliuina i le ʻtoleni e pei o se tagata tāfiti.’ Seʻi manatu la i mea e aofia ai i na toleniga.

E toleni le tino o le tagata tāfiti e ala i le faagaoioi soo

12 Ina ua tatou fananau mai, e leʻi toleniina o tatou tino. O se faaaʻoaʻoga, e lē mafai e se pepe ona faatonutonuina ona vae ma lima. O le mea lea e felafoaʻi solo ai ona lima, ma i nisi taimi e lavea ai ona lava mata, ma teʻi ai o ia. Ae e faasolosolo ona toleni le tino e ala i le faagaoioi o itutino. E tolotolo le pepe, e savali le tamaitiiti, ae e tamoʻe le tama. * Ae faapefea le tagata tāfiti? Afai e te matamata i se tagata tāfiti o loo suigi ma feminoiaʻi i luga o le ʻea, e te mātauina foʻi le vavai o lona tino ma le saʻo aʻiaʻi o ana gaoioiga, e lē taumatea e oso aʻe i lou mafaufau ua leva ona toleni lenei  tagata. Ioe, e leʻi faafuaseʻi ona maua e le tagata tāfiti lenei tomai, ae na manaʻomia ona toleni mo le tele o itula. Peitaʻi, ua faapea mai le Tusi Paia “e itiiti le aogā” o toleniga faaletino. E sili atu le tāua o le toleni o o tatou mafaufau i le itu faaleagaga!1 Timoteo 4:8.

13. E faapefea ona toleni o tatou mafaufau?

13 E tele ni manatu na tatou iloiloina i lenei tusi e fesoasoani iā te oe e toleni ai lou mafaufau o se tagata faaleagaga, ina ia e tutumau ai i le faamaoni iā Ieova. Ia e tatalo ma manatunatu loloto i mataupu silisili ma tulafono a le Atua a o fai au filifiliga i lou olaga i aso faisoo. Ia fesili ifo iā te oe lava i filifiliga uma e tatau ona e faia: ʻO ā ni tulafono po o mataupu silisili a le Tusi Paia e fesootaʻi i lenei mataupu? E faapefea ona ou faatatauina? O le ā le gaoioiga e faafiafia ai loʻu Tamā o i le lagi?’ (Faitau le Faataoto 3:5, 6; Iakopo 1:5.) Afai e faia faapena au filifiliga uma, o le a toleni atili ai lou mafaufau. O toleniga faapena, e fesoasoani ina ia faaauau ai ona avea oe o se tagata faaleagaga.

14. O ā mea e tatau ona tatou matuā fia aai ai ina ia tuputupu aʻe ai faaleagaga, ae o le ā se mea e tatau ona tatou faaeteete i ai?

14 E ui lava e mafai ona ausia le matua faaleagaga, ae e iai pea le avanoa e tuputupu aʻe ai faaleagaga. E faalagolago le tuputupu aʻe o se tasi i meaʻai. O le mea lea na taʻua ai e Paulo: “O meaʻai aano e mo tagata matutua ia.” O se auala tāua e atiaʻe ai lou faatuatua, o le faaauau lea ona taumafa i meaʻai aano faaleagaga. O le atamai, o le faatatauina lea o mea ua e aʻoaʻoina, ma ua faapea mai le Tusi Paia: “O le atamai o le mea sili lea.” O lea la, e tatau ona tatou matuā fia  aai i upu moni tautele ua foaʻi mai e lo tatou Tamā. (Faataoto 4:5-7; 1 Peteru 2:2) Ae peitaʻi, o le mauaina o le poto ma le atamai mai le Atua, e lē o se māfuaaga lenā e tatou te faamaualuluga ma mitamitavale ai. E tāua tele ona iloilo e lē aunoa i tatou ina neʻi mauaa ma tuputupu aʻe i o tatou loto le faamaualuga po o se isi vaivaiga. Na tusi Paulo: “Ia tofotofo pea iā te outou po o outou iai i le faatuatua, ia suʻesuʻe ifo pea iā te outou po o faapeʻī outou.”2 Korinito 13:5.

15. Aiseā e tāua ai le alofa i le tuputupu aʻe faaleagaga?

15 E ui lava ua māeʻa le fauina o se fale, ae e iai pea galuega e fai. E tāua ona toe faalelei ma lipea le fale, ma atonu e manaʻomia ni faaopoopoga ona o ni suiga e tulaʻi mai. O ā mea e tatou te manaʻomia ina ia faaauau ai ona tatou matutua faaleagaga? O le mea e sili ona tāua, o le alofa. E tāua tele ona faaauau ona tuputupu aʻe lo tatou alofa iā Ieova ma o tatou uso talitonu. Afai e leai so tatou alofa, e lē aogā uma lo tatou poto ma a tatou galuega, e pei o se paʻō leotele e faatigā taliga. (1 Korinito 13:1-3) A iā i tatou le alofa, e mafai ona avea i tatou ma Kerisiano matutua faaleagaga, ma faaauau ona tatou tuputupu aʻe faaleagaga.

IA TAULAʻI LOU MAFAUFAU I LE FAAMOEMOE MAI IĀ IEOVA

16. O ā mafaufauga ua faatupuina e Satani, ma o le ā le puipuiga ua saunia e Ieova?

16 Seʻi o tatou tilofaʻia le vala mulimuli o lau galuega tauatiaʻe. Ina ia atiaʻe oe lava e avea ma soo faamaoni o Keriso, e tatau ona e puipuimalu ou mafaufauga. O Satani lea o loo pule i lenei lalolagi, e matuā tomai tele o ia i le faatupuina i tagata o mafaufauga lē atiaʻe, o le lē maufaatuatuaina o isi, ma manatu e faalotovaivai ai. (Efeso 2:2) O mafaufauga faapena e mataʻutia tele mo se Kerisiano, e pei o le mataʻutia o ni laau ua pala i se fale na fausia i laupapa. O le mea e fiafia ai, ona ua saunia e Ieova le faamoemoe lea e tāua tele mo lo tatou puipuiga.

17. Ua faapefea ona faataʻitaʻi mai e le Afioga a le Atua le tāua o le faamoemoe?

 17 O loo lisi mai i le Tusi Paia vaega eseese o le ofutau faaleagaga, lea e tatou te manaʻomia ina ia faasagatau ai iā Satani ma lana lalolagi. O se vaega tāua o le ofutau, o le puloutau “o le faamoemoe i le faaolataga.” (1 Tesalonia 5:8) Na iloa e se fitafita i vaitaimi o le Tusi Paia e lē faaolaina o ia i le taua e aunoa ma lona puloutau. Na masani ona fai i uʻamea na puloutau, ae na pito i totonu se ʻie na fai mai i fulufulu mamoe po o paʻu o manu, ma na puipuia e le puloutau le ulu o se fitafita ina neʻi afāina i se mea. E pei ona puipuia e le puloutau le ulu, e mafai foʻi e le faamoemoe ona puipuia lou mafaufau ma ou manatunatuga.

18, 19. O le ā le faaaʻoaʻoga na faataatia e Iesu i le tausisia o le faamoemoe, ma e faapefea ona tatou faaaʻoaʻo iā te ia?

18 Na faataatia e Iesu le faaaʻoaʻoga sili o le tausisia o le faamoemoe. Manatua foʻi tofotofoga na ia onosaia i le pō mulimuli a o soifua o ia i le lalolagi. Na faalataina o ia i tupe e se tasi o ana uō mamae. Na faafiti le isi ana uō e na te lē iloa o ia. Na tuulafoaʻia o ia e isi ana uō ae sosola ese. Na teena o ia e tagata o lona lava atunuu, ma alalaga atu e fasiotia o ia e ala i le faapuapuagatia i lima o fitafita Roma. E mautinoa lava la, e sili atu le ogaoga o tofotofoga na oo iā Iesu nai lo o tofotofoga o le a tatou fetaiaʻi. Ae o le ā na fesoasoani iā te ia? E maua le tali i le Eperu 12:2: “Ona o le olioli sa i ona luma, na tumau ai o ia e ui ina faapuapuagatia i le laau, na lē amanaʻia e ia le mā, ma nofo o ia i le itu taumatau o le nofoālii o le Atua.” Sa taulaʻi atu pea Iesu i “le olioli sa i ona luma.”

19 O le ā le olioli sa i luma o Iesu? Na iloa e Iesu, o lona tumau ma le faamaoni, e saosaolaumea ai o ia i le faapaiaina o le suafa paia o Ieova. E na te saunia ai foʻi le faamaoniga silisili o Satani o le pepelo ia. O le faamoemoe sili lenā na olioli ai Iesu! Na iloa foʻi e Iesu, o le a matuā faamanuia e Ieova lona faamaoni, ma ua lata mai le taimi e toe faatasi atu ai i lona Tamā, ioe, o se taimi inā matagofie! Na tāmau i le mafaufau o Iesu lenā faamoemoe matagofie, a o luluti ona  puapuaga. E tatau foʻi ona tatou faapena. Ua i o tatou luma foʻi le olioli. Ua faamamaluina e Ieova i tatou taʻitoʻatasi i le faaeaga o le fesoasoani lea e faapaia lona suafa sili. E mafai foʻi ona tatou faamaonia le pepelo a Satani pe a tatou filifilia Ieova e fai ma o tatou Pule Silisili Ese, ma tatou tumau ma le saogalemu i le alofa o lo tatou Tamā e ui ina lutia i tatou i puapuaga ma tofotofoga.

20. O le ā e fesoasoani iā te oe ina ia saʻo ma lelei ai pea ou mafaufauga?

20 E lē gata e nofosauni Ieova e faamanuia mai i ana auauna faamaoni, ae e naunau foʻi o ia e faia faapea. (Isaia 30:18; faitau le Malaki 3:10.) E fiafia o ia e foaʻi mai manaʻoga talafeagai o o latou loto. (Salamo 37:4) O lea la, ia taulaʻi atu lou mafaufau i le faamoemoe o loo taatia mai i ou luma. Aua lava neʻi pei ou mafaufauga o mafaufauga leaga ma le faapiʻopiʻo o lenei lalolagi tuai a Satani. Afai ua e iloa ua tau ofi mai le agaga o lenei lalolagi i lou mafaufau ma lou loto, ia tatalo faatauanau atu iā Ieova mo “le filemu mai i le Atua, e silisili i mea uma lava e manatu i ai.” O lenā filemu mai le Atua, e leoleoina ai lou loto ma lou mafaufau.Filipi 4:6, 7.

21, 22. (a) O le ā se faamoemoe matagofie ua faatāuaina e le “motu o tagata e toʻatele”? (e) O le ā se vala o le faamoemoe faa-Kerisiano e sili ona tāua iā te oe, ma o le ā sau filifiliga e fai?

21 Ioe, o se faamoemoe matagofie e te mafaufau loloto i  ai. Afai o oe o se tasi o le “motu o tagata e toʻatele” o ē o le a “sao mai i le puapuaga tele,” ia manatu i le olaga ofoofogia ua toeitiiti e mauaina. (Faaaliga 7:9, 14) Talu ai o le a lē toe iai Satani ma ana temoni i lenā taimi, o le a e maua ai le mapusaga lea e faigatā ona e malamalama i ai i le taimi nei. O le mea moni, e leai se tasi o i tatou ua ola i se olaga e aunoa ma ni omiga mai i taaʻiga leaga a Satani! Maʻeu le olioli pe a aveesea na omiga, aemaise o le galuega o le suia o le lalolagi e avea ma parataiso, i le taʻitaʻiga a Iesu ma i latou e toʻa 144,000 o le a pule faatasi ma ia i le lagi! E tatou te maofa i le faamoemoe o le aveesea o maʻi eseese uma, ma faafeiloaʻia ē e pele iā i tatou na i le tuugamau, ma tatou ola e pei ona finagalo i ai le Atua! A o faasolosolo ina tatou maua le tino lelei atoatoa, o le a toeitiiti ona maua lea o se isi taui e sili atu, o le tulaga lea ua folafolaina mai i le Roma 8:21—o “le saʻolotoga mamalu o le fanau a le Atua.”

22 E finagalo Ieova ina ia e maua le saʻolotoga lea e sili atu i lo o le mea o e mafaufau i ai. Peitaʻi, ina ia e maua lenā saʻolotoga, e tāua tele le usiusitaʻi. Ioe, e matuā alu aogā au taumafaiga uma i le taimi nei ina ia usiusitaʻi ai iā Ieova i aso taʻitasi! O lea la, ia faaauau ona e atiaʻe lou faatuatua e sili ona paia, ina ia e tumau ai i le alofa o le Atua e oo i le faavavau!

^ pala. 12 Ua fai mai saienitisi e faasolosolo ona atiaʻe e le tino se lagona faapitoa e faatonutonu ai ona itutino, ma faagaoioi ai lima ma vae. O se faaaʻoaʻoga, o lenei lagona faapitoa ua mafai ai ona patipati ou lima a o moeiini ou mata. Na mou ese atu lenā lagona i se tagata maʻi, ma o le iʻuga e leʻi mafai ona toe tū i luga, pe savali, pe nofo foʻi i luga.

Faitau Atili

Faaa‘oa‘o i lo Latou Faatuatua

E faapefea ona tatou maua aogā i le taimi lenei, mai i le a‘oa‘oina e faatatau i tane ma fafine o le Tusi Paia na faaalia le faatuatua?