Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Moni a le Tusi Paia?

 MATAUPU E SEFULU LUA

Ia Faafiafia le Atua i o Tatou Olaga

Ia Faafiafia le Atua i o Tatou Olaga
  • E faapefea ona fai oe ma uō a le Atua?

  • E faapefea ona aafia oe i tuuaʻiga a Satani?

  • O ā amioga e lē fiafia i ai le Atua?

  • E faapefea ona fiafia mai le Atua i lou olaga?

1, 2. Ia taʻu mai ni faaaʻoaʻoga o tagata na silasila i ai Ieova o ana uō mamae.

O AI e te fia uō i ai? E lē taumatea e te fia uō i se tagata e tutusa o oulua manatu, mea e fiafia i ai aemaise o mea e tāua iā te oulua. E te fia faauō foʻi i se tagata amio lelei, e faamaoni ma agalelei.

2 I aso ua tuanaʻi, e iai tagata na filifilia e le Atua e fai ma ana uō mamae. O se faaaʻoaʻoga, na taʻua Aperaamo o le uō a Ieova. (Faitau le Isaia 41:8; Iakopo 2:23.) Na fetalai le Atua e uiga iā Tavita ʻo se tagata ua malie i ai lona loto’ auā na alofa i ai Ieova. (Galuega 13:22) Na silasila foʻi Ieova i le perofeta o Tanielu “o sē ua faapelepeleina.”—Tanielu 9:23.

3. Aiseā ua filifilia ai e Ieova isi tagata e fai ma ana uō?

3 Aiseā na silasila ai Ieova iā Aperaamo, Tavita ma Tanielu o ni ana uō? Na ia fetalai atu iā Aperaamo: “Ua e faalogo i loʻu leo.” (Kenese 22:18) E faalatalata Ieova i tagata lotomaulalo o ē fai mea ua ia faafinagaloina. Na ia fetalai atu i tagata Isaraelu: “Ia outou faalogo mai i loʻu leo, ona avea ai lea o aʻu ma o outou Atua, ma avea foʻi outou ma oʻu nuu.” (Ieremia 7:23) E mafai foʻi ona avea oe ma uō a Ieova pe a e faalogo iā te ia!

 E FAAMALOSIA E IEOVA ANA UŌ

4, 5. E faapefea ona fesoasoani Ieova i ona tagata?

4 Ia mafaufau i aogā o le faauō atu i le Atua. Ua taʻua i le Tusi Paia, o loo saʻilia e Ieova ni avanoa ina ia “faaali atu lona malosi iā i latou e atoatoa o latou loto iā te ia.” (2 Nofoaiga a Tupu 16:9) E faapefea ona fesoasoani atu Ieova iā te oe? O loo taʻua se tasi o auala i le Salamo 32:8: “Ou te [Ieova] foaʻi atu iā te oe le tofā mamao, ma faatonu oe i le ala e ao ona e savali ai. Ou te fautua atu foʻi ma ou vaai iā te oe.”

5 Maʻeu ni upu alofa o le tausiga faapelepele a Ieova! O le a ia saunia faatonuga e te moomia ma vaavaaia oe a o e faatatauina na faatonuga. E finagalo le Atua e fesoasoani atu iā te oe i ou puapuaga ma tofotofoga. (Faitau le Salamo 55:22.) A e auauna ma le loto atoa iā Ieova, e mafai ona e talitonu e pei o le faisalamo: “Ua ou tuu Ieova i oʻu luma e lē aunoa. Ou te lē tautevateva foʻi auā o loo iai o ia i loʻu itu taumatau.” (Salamo 16:8; 63:8) E mafai ona fesoasoani atu Ieova ina ia e faafiafiaina o ia. Ae e pei ona e silafia, e iai le fili o le Atua e lē manaʻo e te faafiafia Ieova.

LUʻI A SATANI

6. O le ā le tuuaʻiga a Satani e uiga i tagata?

6 Ua faamatalaina i le Mataupu e 11 o lenei tusi, luʻi na fai e Satani faasaga i le pule silisili ese a le Atua. Na faapea mai le tuuaʻiga a Satani, e pepelo le Atua ma sa tatau ona tuu pea le avanoa iā Atamu ma Eva e filifili ai i le mea e saʻo ma le mea e sesē. Ina ua agasala Atamu ma Eva ma ua amata ona tumu le lalolagi i a laʻua fanau, na fesiligia ai e Satani māfuaaga ua auauna ai tagata i le Atua. Fai mai le tuuaʻiga a Satani e lē auauna tagata i le Atua ona o le alofa iā te ia. Fai mai o ia e mafai ona ia faaliliuina ese tagata uma lava mai le Atua pe a tuu atu se avanoa iā te ia.  O manatu na o Satani, e pei ona faaalia i le tala iā Iopu. O ai Iopu, ma e faapefea ona aafia Iopu i tuuaʻiga a Satani?

7, 8. (a) Aiseā na tumatilatila ai Iopu mai isi tagata i na ona pō? (e) Na faapefea ona fesiligia e Satani le māfuaaga na auauna ai Iopu?

7 O Iopu na soifua pe tusa o le 3,600 tausaga ua mavae. O ia o se tagata amio lelei auā na fetalai Ieova: “E leai se tasi e pei o ia i le lalolagi, o le tagata e lē taʻuleagaina ma amio saʻo, e mataʻu i le Atua ma ʻaloʻalo ese i mea leaga.” (Iopu 1:8) Na faafiafia e Iopu le Atua.

8 Na fesiligia e Satani le māfuaaga na auauna ai Iopu i le Atua. Na fai atu le Tiapolo iā Ieova e uiga iā Iopu: “Po ua e lē siʻosiʻomia ea o ia i le pā, ma lona fale [aiga], atoa ma ana mea uma? Ua e faamanuia foʻi galuega a ona lima, ma ua faateleina ana manu i le laueleele. Ae peitaʻi, ia aapa atu lou aao faamolemole, ma tago i mea uma ua iā te ia, pe e lē faifai ai o ia i ou lava luma.”—Iopu 1:10, 11.

9. O le ā le tali a Ieova i tuuaʻiga a Satani, ma aiseā?

9 Na fai mai Satani e pau le māfuaaga na auauna ai Iopu i le Atua, ona o mea lelei na ia maua mai ai. Na finau atu foʻi Satani, o le a fulitua Iopu i le Atua pe a tofotofoina o ia. O le ā le tali a Ieova i tuuaʻiga a Satani? Na tuu e Ieova Satani e tofotofo Iopu, talu ai sa fesiligia e Satani le māfuaaga na auauna ai Iopu i le Atua. O le faia faapea, o le a manino ai pe e alofa moni Iopu i le Atua pe e leai.

UA TOFOTOFOINA IOPU

10. O ā puapuaga na feagai ma Iopu, ma o le ā lana tali?

10 E leʻi umi ae tofotofoina loa e Satani Iopu. Na faoa nisi o lafumanu a Iopu ma faaumatia isi. Na fasiotia le toʻatele o ana auauna. Na aveesea le tamaoaiga o Iopu. E faaopoopo atu i lenā, na maliliu lana fanau e toʻasefulu i se matagi malosi. E ui i nei mea leaga, ae ʻe leʻi agasala Iopu pe taʻuleagaina foʻi le Atua i se mea.’—Iopu 1:22.

11. (a) O le ā le tuuaʻiga lona lua a Satani e uiga iā Iopu, ma o le ā le tali a Ieova? (e) O le ā le tali a Iopu i lona maʻi tigā?

 11 E leʻi fiugofie Satani. Atonu na manatu Satani, e ui lava na lavātia e Iopu le aveesea o ana meafaitino ma toesea ana auauna ma fanau, ae a maʻi Iopu, o le a ia fulitua loa i le Atua. Na tuu e Ieova Satani e taia Iopu i se maʻi tigā matuā leaga. Ae e leʻi faavaatuʻia ai le faatuatua o Iopu i le Atua. Na i lo lea, na fai atu ma le maumauaʻi Iopu: “Seʻia oo lava i loʻu oti, ou te lē aveesea loʻu faamaoni.”—Iopu 27:5.

Na tauia Iopu ona o lona faamaoni

12. O le ā le tali a Iopu i tuuaʻiga a le Tiapolo?

12 E leʻi iloa e Iopu o Satani na faapogaia ona puapuaga. Ona e leʻi iloa e Iopu na luʻia e le Tiapolo le Pule silisili ese a Ieova, na manatu ai Iopu o le Atua na māfua ai ona puapuagatia o ia. (Iopu 6:4; 16:11-14) Peitaʻi, na faaauau pea ona faamaoni o ia iā Ieova. O le faamaoni o Iopu, na faamaonia ai le sesē o tuuaʻiga a Satani e faapea, e lē moni le alofa o Iopu i le Atua!

13. O le ā le iʻuga o le faamaoni o Iopu i le Atua?

13 O le faamaoni o Iopu, na mautali ai Ieova i fāifaiga taufaaleaga a Satani. O Iopu o le uō a le Atua, ma na tauia o ia e Ieova ona o lona faamaoni.—Iopu 42:12-17.

O LOO E AAFIA AI

14, 15. Aiseā tatou te faapea atu ai o tuuaʻiga a Satani e uiga iā Iopu e faasino atu i tagata uma?

14 E lē na o Iopu na taulaʻi i ai tuuaʻiga a Satani e uiga i le faamaoni i le Atua. O loo e aafia ai foʻi. E manino lenā manatu i le Faataoto 27:11: “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.” Na tusia lenā mau ina ua leva ona maliu Iopu, lea e faaalia ai na faaauau pea ona tau fāifai Satani i le Atua ma Ana auauna. Afai e tatou te faafiafia Ieova i o tatou olaga, ua faia la so tatou sao e tali atu ai i tuuaʻiga  sesē a Satani, ma faafiafia ai le finagalo o le Atua. O le ā sou taofi i lenā mea? O se mea matagofie le faia o so tatou sao i le tali atu i tuuaʻiga pepelo a le Tiapolo, tusa lava pe e manaʻomia ai ona faia ni suiga i o tatou olaga!

15 Ia mātau foʻi, na fai mai Satani: “O mea uma foʻi ua iai i le tagata e avatu e ia e sui ai lona ola.” (Iopu 2:4) Ina ua ia taʻua “le tagata,” na manino mai ai o le tuuaʻiga a Satani na taulaʻi atu i tagata uma ae lē na o Iopu. E tāua le manatu lenei. Ua fesiligia foʻi e Satani lou faamaoni i le Atua. E manaʻo Satani e aua neʻi e usitai i le Atua ma e tuua le ala faamaoni pe a lutia oe i faafitauli. E faapefea ona faia e Satani lenā mea?

16. (a) O ā auala ua taumafai ai Satani e tataʻi ese tagata mai le Atua? (e) E faapefea ona faaaogā e le Tiapolo nei auala e taumafai e tataʻi ese ai oe?

16 E pei ona taʻua i le Mataupu e 10, e eseese auala ua taumafai ai Satani e tataʻi ese tagata mai le Atua. O se tasi o auala, e osofaʻi ʻSatani e pei o se leona o loo tagi leotele, e saʻili se tasi e na te ʻaina.’ (1 Peteru 5:8) E mafai ona mātaulia taaʻiga a Satani pe a tetee atu au uō, aiga po o isi tagata a o e suʻesuʻeina le Tusi Paia, ma faatatau mea ua e aʻoaʻoina. * (Ioane 15:19, 20) E lē gata i lea, “e fai ma liua e Satani o ia lava e avea ma agelu o le malamalama.” (2 Korinito 11:14) Ua fai e le Tiapolo ni togafiti faaʻoleʻole e faasesē ai oe ma tataʻi ese oe mai se olaga e fiafia i ai le Atua. Ua faaaogā foʻi e Satani le lotovaivai, lea e te ono manatu ai e lē mafai ona e faafiafiaina le Atua. (Faataoto 24:10) Pe e gaoioi Satani o “se leona o loo tagi leotele” po o se “agelu o le malamalama,” e lē suia lava  lana tuuaʻiga lenei: E te lē toe auauna i le Atua pe a lutia oe i puapuaga po o tofotofoga. E faapefea ona e tali atu i lana tuuaʻiga, ma tumau i le faamaoni i le Atua e pei o Iopu?

USITAI I POLOAʻIGA A IEOVA

17. O le ā le māfuaaga autū e usitai ai i poloaʻiga a Ieova?

17 E mafai ona e tali atu i tuuaʻiga a Satani, pe a e faafiafiaina le Atua i lou olaga. O le ā e aofia ai? Ua tali mai le Tusi Paia: ʻIa e alofa atu iā Ieova lou Atua ma lou lotoatoa, ma lou ola atoa, ma lou malosi atoa.’ (Teuteronome 6:5) A o faasolosolo ina malosi lou alofa i le Atua, o le a e manaʻo ai e fai le mea ua ia faafinagaloina. Na tusi le aposetolo o Ioane: “Auā o le alofa lenei i le Atua, ia tatou tausi i ana poloaʻiga.” Afai e te alofa iā Ieova ma lou loto atoa, “e lē mamafa ana poloaʻiga” iā te oe.—1 Ioane 5:3.

18, 19. (a) O ā nisi o poloaʻiga a Ieova? (Tagaʻi i le pusa “ Ia Faamamao Mai Amioga e Inosia e Ieova.”) (e) E faapefea ona tatou iloa e lē faigatā tele mea ua faafinagaloina e le Atua?

18 O ā poloaʻiga a Ieova? E aofia ai amioga e tatau ona tatou ʻaloʻalo ese mai ai. O se faaaʻoaʻoga, ia mātau le pusa i le itulau e 122, “ Ia Faamamao Mai Amioga e Inosia e Ieova.” O loo taʻua ai amioga ua faasā e le Tusi Paia. Afai e faatoʻā e vaavaai i ai, atonu la e lē leaga tele nisi o na amioga. Ae a e manatunatu i mau o loo iai, e lē taumatea o le a e mātauina ai le poto o tulafono a Ieova. O le suia o lau amio, atonu o se mea e sili ona faigatā. Peitaʻi, a faafiafiaina le Atua i o tatou olaga, e maua ai le lotomalie ma le olioli. (Isaia 48:17, 18) E mafai ona e soifua i se olaga faapena. E faapefea ona tatou iloa?

19 E lē faafinagaloina e Ieova ni mea e faigatā tele mai iā i tatou. (Faitau le Teuteronome 30:11-14.) Ua silafia e le Atua mea tatou te mafaia ma mea e gata mai ai lo tatou malosi. (Salamo 103:14) Ua foaʻi mai foʻi e Ieova le  malosi e usiusitai ai iā te ia. Na tusi le aposetolo o Paulo: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.” (1 Korinito 10:13) Ua foaʻi mai e Ieova le “mana lea e sili atu i le malosi o tagata” ina ia tatou lavā onosai. (2 Korinito 4:7) Ina ua onosaia e Paulo le mau puapuaga, na fai mai o ia: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.

 IA FAAALIA UIGA E FIAFIA I AI LE ATUA

20. O ā uiga e fiafia i ai le Atua e ao ona e faaalia, ma aiseā e tāua ai?

20 E tele mea e aofia ai i le faafiafiaina o Ieova, na i lo o le faamamao mai mea e inosia e le Atua. E tatau ona e fiafia i mea e fiafia i ai le Atua. (Roma 12:9) Pe e te fia uō i tagata e tutusa o outou manatu, mea e fiafia i ai ma mea e tāua iā te outou? Ioe, e faapena foʻi Ieova. O lea la, ia e fiafia i mea e fiafia i ai Ieova. O nisi o na mea, o loo taʻua i le Salamo 15, lea e maua ai faamatalaga i tagata e  faauō i ai le Atua. (Faitau le Salamo 15:1-5.) E faaalia e uō a Ieova uiga o loo taʻua i le Tusi Paia o “le fua o le agaga.” E aofia ai le “alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.”—Kalatia 5:22, 23.

21. O ā mea e fesoasoani iā te oe e faaalia ai uiga e fiafia i ai le Atua?

21 O le toʻaga e faitau ma suʻesuʻe i le Tusi Paia, e fesoasoani iā te oe e faaalia ai uiga e fiafia i ai le Atua. O le iloa o mea ua faafinagaloina e le Atua, e fesoasoani ia faaōgatusa ou manatu ma le finagalo o le Atua. (Isaia 30:20, 21) O le malosi o lou alofa mo Ieova, o le a atili ai ona e manaʻo e faafiafia le Atua i lou olaga.

22. O le ā le iʻuga pe a e faafiafia le Atua i lou olaga?

22 E tatau ona e finafinau ina ia faafiafia Ieova i lou olaga. Ua faatusaina i le Tusi Paia le suia o lou olaga i le toese o le tagata tuai ae ofu i le tagata fou. (Kolose 3:9, 10) Na tusi le faisalamo e uiga i poloaʻiga a Ieova: “E tele foʻi le taui pe a tausi i ai.” (Salamo 19:11) E tauia foʻi oe i faamanuiaga pe a e faafiafia le Atua i lou olaga. O le faia faapea, o le a e tuuina atu ai se tali i le tuuaʻiga a Satani, ma faafiafia ai le finagalo o Ieova!

^ pala. 16 E lē faapea e pulea e Satani tagata uma lava o loo tetee atu iā te oe. Peitaʻi, o Satani o le atua o lenei lalolagi, ma ua nofo toʻilalo le lalolagi atoa iā te ia. (2 Korinito 4:4; 1 Ioane 5:19) O lea la, e tatau ona tatou iloa e lē fiafia le toʻatele o tagata pe a e usiusitai i le Atua, ma e tetee atu isi tagata iā te oe.