Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Moni a le Tusi Paia?

 FAAOPOOPOGA

O le Talisuaga Afiafi a le Alii, o se Aso Faamanatu e Viia ai le Atua

O le Talisuaga Afiafi a le Alii, o se Aso Faamanatu e Viia ai le Atua

UA FAATONUINA Kerisiano e faamanatu le maliu o Keriso. Ua taʻua foʻi lenā faamanatuga o “le talisuaga afiafi a le Alii.” (1 Korinito 11:20) O le ā le tāua o lenā faamanatuga? O afea ma e faapefea ona faamanatuina?

Na faavaeina e Iesu Keriso lenei faamanatuga i le pō o le Paseka a Iutaia i le 33 T.A. E faatasi i le tausaga ona faamanatuina le Paseka, lea na paʻū i le aso 14 o le masina Iutaia o Nisani. Ina ia iloa lenā aso, e aliali mai na faatalitali tagata Iutaia i le aso e taʻua o le spring equinox. O le aso lenā pe tusa e 12 itula o le malamalama ma e 12 itula o le pogisa. O le masina faatoʻā vaaia e latalata i le aso lenā, na faailogaina ai le aso muamua o Nisani. Na paʻū le Paseka i le aso lona 13 mulimuli ane ai.

 Na faamanatuina e Iesu ma ona aposetolo le Paseka, ona tuu atu lea o Iuta le Sekara e alu, ma faavaeina ai loa e Iesu le Talisuaga Afiafi a le Alii. Na suia e lenei talisuaga le Paseka faa-Iutaia, ma e ao ona faatasi ona faamanatuina i le tausaga.

Ua taʻua i le Mataio: “Ona tago lea o Iesu i le areto, ua faia le faafetai, ona ia vaevae lea ma avatu i ona soo, ma faapea atu: ʻIa outou aai. Auā o le faatusa lenei o loʻu tino.’ Ua ia tago foʻi i le ipu, ua faia le faafetai, ma avatu iā i latou, ua faapea atu: ʻInā inu ia outou uma i ai; auā o le faatusa lenei o loʻu toto o le “toto o le feagaiga,” e faamaligiina mo tagata e toʻatele e faamagalo ai agasala.’”—Mataio 26:26-28.

Ua talitonu isi tagata na liua e Iesu le areto ma le uaina i lona tino ma lona toto. Peitaʻi, sa iai lava lona tino atoa a o ia tauaaoina atu le areto i ona soo. Pe faamata na aai ma feinu moni lava aposetolo i le tino ma le toto o Iesu? E leai, auā ana fai o lea, o lona uiga ua latou ʻaina le tino o le tagata ma solia ai le tulafono a le Atua. (Kenese 9:3, 4; Levitiko 17:10) E tusa ai o le Luka 22:20, na fetalai atu Iesu: “O lenei ipu, o le faatusa lea o le feagaiga fou e ala i loʻu toto lea o le a faamaligiina mo outou.” Pe na avea moni lava lenā ipu ma “feagaiga fou”? E lē mafai auā o le feagaiga o se maliega, o se mea e leai se tino.

O lea la, o le areto ma le uaina o ni mea faafaatusa. O le areto ua fai ma faatusa o le tino lelei atoatoa o Keriso. Na faaaogā e Iesu se areto na totoe mai le tausamiga o le Paseka. E leai se mea faafefete na tuu i ai. (Esoto 12:8) I le Tusi Paia, o mea faafefete e masani ona fai ma faatusa o le agasala po o se mea leaga. O lea la, o le areto ua fai ma faatusa o le tino lelei atoatoa o Iesu lea na fai ai le togiola. E leʻi aafia i le agasala.—Mataio 16:11, 12; 1 Korinito 5:6, 7; 1 Peteru 2:22; 1 Ioane 2:1, 2.

O le uaina mūmū ua fai ma faatusa o le toto o Iesu. O le toto lenā na faavae aʻe ai le feagaiga fou. Na fetalai Iesu, na faamaligiina lona toto ina ia “faamagalo ai agasala.” O le ala lea ua mafai ai ona mamā tagata i le silafaga a le Atua, ma auai ai i le feagaiga fou ma Ieova. (Eperu 9:14; 10:16, 17)  Ona o lenei feagaiga, ua mafai ai e Kerisiano faamaoni e 144,000 ona ō atu i le lagi. O le a latou auauna ai o ni tupu ma ositaulaga, ina ia manuia ai tagata uma lava.—Kenese 22:18; Ieremia 31:31-33; 1 Peteru 2:9; Faaaliga 5:9, 10; 14:1-3.

O ai e ao ona taumamafa i le areto ma le uaina o le Faamanatuga? E na o i latou lava e iai i le feagaiga fou, o ē e faamoemoe e ō i le lagi. Ua faamautinoa atu iā te i latou e le agaga paia o le Atua, ua filifilia i latou e fai ma tupu i le lagi. (Roma 8:16) Ua latou iai foʻi faatasi ma Iesu i le feagaiga o le Malo.—Luka 22:29.

Ae faapefea tagata e faamoemoe e ola e faavavau i le Parataiso i le lalolagi? Latou te usiusitai i le poloaʻiga a Iesu ma auai foʻi i le Talisuaga Afiafi a le Alii, ae e na ona maimoa ae lē taumamafa ai. E faatasi i le tausaga ona faamanatuina e Molimau a Ieova le Talisuaga Afiafi a le Alii, pe a goto le lā iā Nisani 14. E ui lava e toʻaitiiti tagata i le lalolagi e iai le faamoemoe e ō i le lagi, ae e tāua lenei faamanatuga i Kerisiano uma. O le avanoa lenā e tomānatu ai i le alofa silisili o Ieova le Atua ma Iesu Keriso.—Ioane 3:16.

 

Faitau Atili

FAAMANATUGA

Faamanatuga o le Maliu o Iesu

E matou te valaaulia ma le māfana oe ina ia e auai faatasi ma i matou i lenei sauniga faapitoa. O le a e aʻoaʻoina ai pe e faapefea i le soifuaga ma le maliu o Iesu ona e maua ai aogā.

FESILI E MASANI ONA LĀGĀ

Aiseā e Ese ai le Auala e Faamanatu ai e Molimau a Ieova le Talisuaga a le Alii Mai i Isi Lotu?

Ua taʻua foʻi o le Talisuaga Mulimuli po o le Faamanatuga o le Maliu o Keriso, ma o le sauniga e sili ona tāua mo Molimau a Ieova. Seʻi iloilo le faamatalaga a le Tusi Paia e faatatau i lea sauniga.