Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O ā Aʻoaʻoga Moni a le Tusi Paia?

 MATAUPU E LUA

O le Tusi Paia, o se Tusi Mai le Atua

O le Tusi Paia, o se Tusi Mai le Atua
  • Aiseā e ese ai le Tusi Paia mai isi tusi?

  • E faapefea ona fesoasoani le Tusi Paia i ou faafitauli?

  • Aiseā e mafai ai ona e talitonuina valoaga o le Tusi Paia?

1, 2. Aiseā ua avea ai le Tusi Paia ma meaalofa matagofie mai le Atua?

PE E te manatua se taimi na e maua ai se meaalofa mai sau uō mamae? E lē taumatea na matuā faafiafiaina ai lou loto. O lenā meaalofa, ua faaalia ai e tāua i lau uō la oulua mafutaga. E mautinoa na e faailoa i lau uō lou talisapaia o le meaalofa.

2 O le Tusi Paia o se meaalofa mai le Atua, lea e tatau ona tatou matuā talisapaia. Ua faailoa mai ai mea e semanū e lē mafai ona tatou iloa. O se faaaʻoaʻoga, o loo taʻu mai ai le faia o le lagi, le lalolagi, ma le uluaʻi tane ma le fafine. E maua i le Tusi Paia taʻiala maufaatuatuaina e fesoasoani i o tatou faafitauli ma popolega. Ua taʻu mai ai le auala o le a faataunuu ai e le Atua lona finagalo, ma aumaia tulaga sili ona lelei i le lalolagi. Ioe, o le Tusi Paia o se meaalofa matagofie!

3. O le ā le mea ua tatou iloa e uiga iā Ieova ona o le Tusi Paia, ma aiseā ua faafiafiaina ai i tatou i lenei mea?

3 O le Tusi Paia o se meaalofa e faafiafiaina ai i tatou, auā o loo faaalia mai ai se mea e uiga i Lē na aumai ai le meaalofa, o Ieova le Atua. Talu ai ua saunia mai e Ieova  le Tusi Paia, ua faamaonia ai o lona finagalo ia tatou iloa lelei o ia. E fesoasoani le Tusi Paia ina ia e mafuta vavalalata atu ai iā Ieova.

4. Aiseā e te ofo ai i le telē o le avanoa e maua ai e tagata le Tusi Paia?

4 E lē taumatea e iai sau Tusi Paia faapei o le toʻatele o tagata. Ua lomia le Tusi Paia atoa po o se vaega i gagana e pe ā ma le 2,600 ma e silia i le 90 pasene o tagata i le lalolagi e mafai ona maua a latou Tusi Paia. A fua i ai, e silia i le miliona Tusi Paia e mafai ona maua e tagata i vaiaso taʻitasi! Ua lomia le faitau piliona o vaega o le Tusi Paia, po o le Tusi Paia atoa. E mautinoa lava e leai se isi tusi e sōsō i le Tusi Paia.

“O le Tusi Paia—O le Faaliliuga a le Lalolagi Fou” e maua i le tele o gagana

5. E moni faapefea “e mai i le agaga o le Atua” le Tusi Paia?

5 E lē gata i lea, o le Tusi Paia “e mai i le agaga o le Atua.” (Faitau le 2 Timoteo 3:16.) E faapefea? Ua maua le tali i le Tusi Paia: “Na tautatala tagata i mea na faailoa mai e le Atua e ala i le taʻitaʻiga a le agaga paia.” (2 Peteru 1:21) O se faataʻitaʻiga: E mafai ona faatonu e se alii faipisinisi lana failautusi ia tusia se tusi. O lenā tusi o loo iai manatu  ma faatonuga a le alii faipisinisi. O ia la e ana le tusi ae lē o le failautusi. E faapena foʻi ona iai i le Tusi Paia le feʻau a le Atua, ae lē o se feʻau mai tane na tusia. Ioe, e moni o le Tusi Paia “o le afioga a le Atua.”—1 Tesalonia 2:13.

E SAʻO MA E LĒ FETEENAʻI

6, 7. Aiseā o se mea mataʻina ai le lē feteenaʻi o faamatalaga o loo i le Tusi Paia?

6 E silia i le 1,600 tausaga na tusia ai le Tusi Paia. E eseese talaaga ma taimi na soifua ai ē na tusia. O isi o faifaatoʻaga, o faifaiva ma leoleo mamoe. O isi o perofeta, o faamasino ma tupu. O le tusitala o Luka o se fomaʻi. E ui e eseese talaaga o tusitala, ae e lē feteenaʻi faamatalaga o loo i le Tusi Paia mai le amataga e oo i le faaiʻuga. *

7 Ua faailoa mai e le tusi o Kenese le amataga o puapuaga o tagata. Ua faaalia i le tusi o Faaaliga o le a avea le lalolagi atoa ma parataiso. O loo faamatalaina i le Tusi Paia le faitau afe o tausaga o le talafaasolopito, lea e fesootaʻi atu i le faataunuuga o le finagalo o le Atua. E mataʻina le lē feteenaʻi o faamatalaga o loo i le Tusi Paia, ma o le mea lenā tatou te faatalitalia i se tusi mai le Atua.

8. Ia fai ni faaaʻoaʻoga e faaalia ai e saʻo mataupu faasaienisi o loo i le Tusi Paia.

8 E saʻo faamatalaga faasaienisi o loo i le Tusi Paia. O loo iai faamatalaga e leʻi taitai ona malamalama i ai tagata i na ona pō. O se faaaʻoaʻoga, o loo maua i le tusi o Levitiko tulafono i le tū mamā ma le puipuia o Isaraelu mai faamaʻi, ae e leʻi iloa e isi nuu na tulafono. A o sesē manatu o tagata i foliga o le lalolagi, a ua fai mai le Tusi Paia e faataaliʻoliʻo le lalolagi. (Isaia 40:22) Ua tusia ma le saʻo i le Tusi Paia ua “tautau le lalolagi ae e leai se mea o  tautau ai.” (Iopu 26:7) E moni, e lē o se tusi faasaienisi le Tusi Paia. Ae e saʻo mataupu faasaienisi o loo iai. O le mea lenā tatou te faatalitalia i se tusi mai le Atua!

9. (a) O le ā le itu ua saʻo ai ma maufaatuatuaina le talafaasolopito o le Tusi Paia? (e) O ā mea ua e iloa e uiga i le Tusi Paia ona o le faamaoni o ona tusitala?

9 E saʻo ma maufaatuatuaina le talafaasolopito o le Tusi Paia. O loo iai tala auʻiliʻili, e aofia ai suafa ma gafa o tagata. * E lē o taʻua e tusitala o le talafaasolopito o le lalolagi, le faatoʻilaloina o o latou tagata. Peitaʻi, e lē faapena tusitala o le Tusi Paia, auā latou te tusia o latou masei ma masei o o latou tagata. O se faaaʻoaʻoga i le tusi o Numera, sa taʻutino ai e le tusitala o Mose le mea sesē na ia faia, lea na matuā aʻoaʻia ai o ia e le Atua. (Numera 20:2-12) E seāseā faamaoni tusitala o le talafaasolopito o le lalolagi, ae e faamaoni tusitala o le Tusi Paia auā o se tusi mai le Atua.

O SE TUSI E AOGĀ TELE

10. Aiseā e aogā tele ai le Tusi Paia?

10 Ona o le Tusi Paia e mai le agaga o le Atua, ʻe aogā la e aʻoaʻo ai, e aʻoaʻi ai, e faasaʻo ai mea.’ (2 Timoteo 3:16) Ioe, e aogā tele le Tusi Paia. E loloto le malamalamaga o le Tusi Paia e faatatau i tagata, auā o Lē e ana le Tusi Paia o Ieova le Atua, o ia foʻi na faia mea uma lava! E sili lona silafia o o tatou manatunatuga ma faalogona na i lo i tatou lava. E silafia foʻi e Ieova mea tatou te moomia ina ia tatou fiafia ai. E na te silafia gaoioiga e ao ona tatou ʻalofia.

11, 12. (a) O ā mataupu na fetalai ai Iesu i lana lauga i le Mauga? (e) O ā isi mataupu aogā o loo taʻua i le Tusi Paia, ma aiseā e faaauau ai pea ona aogā fautuaga a le Tusi Paia?

11 Seʻi manatu i le lauga a Iesu i le Mauga, o loo i le  Mataio mataupu e 5 e oo i le 7. O se lauga mataʻina lea na fetalai ai Iesu i le auala e maua ai le fiafiaga moni, foʻia ai finauga, faia ai tatalo, ma maua ai le vaaiga saʻo i meafaitino. E malolosi ma aogā fetalaiga a Iesu i aso nei e pei foʻi ona aogā i tuā i inā.

12 E iai taʻiala a le Tusi Paia mo aiga, le auala e faatino ai galuega ma faiā ma isi. E aogā i taimi uma taʻiala  a le Tusi Paia mo tagata uma. Ua taaofaʻi i fetalaiga a le Atua aogā o le Tusi Paia e ala iā Isaia: “O aʻu o Ieova, lou Atua, o Lē o loo aʻoaʻo oe i mea e aogā iā te oe.”—Isaia 48:17.

O SE TUSI O VALOAGA

Na valoia e le perofeta o Isaia le paʻū o Papelonia

13. O ā faamatalaga na faailoa atu e Ieova iā Isaia e faatatau iā Papelonia?

13 E tele valoaga o le Tusi Paia ua taunuu. Seʻi fai se faaaʻoaʻoga. E ala i le perofeta o Isaia, o lē na soifua i le senituri lona valu T.L.M., na valoia ai e Ieova o le a faaumatia le aai o Papelonia. (Isaia 13:19; 14:22, 23) Na faailoa atu le auala tonu lava o le a faatoʻilaloina ai le aai. O le a faapaʻumātūina e ʻautau o le fili le vaitafe o Papelonia, ma ō atu ai i le aai e aunoa ma le faia o se taua. E lē na o le pau lenā. Na taʻua e le valoaga a Isaia o le tupu e suafa iā Kuresa, o le a ia faatoʻilaloina Papelonia.—Faitau le Isaia 44:27–45:2.

14, 15. Na faapefea ona faataunuuina nisi o faamatalaga o le valoaga a Isaia e faatatau iā Papelonia?

14 I le 200 tausaga mulimuli ane, i le pō o Oketopa 5/6 i le 539 T.L.M., na tolauapi ai se ʻautau e lata ane i Papelonia. O ai lo latou taʻitaʻi? O le tupu o Peresia e suafa iā Kuresa. Ioe, ua sauniuni e faataunuu se valoaga ofoofogia. Ae e pei ona valoia, po o le a osofaʻia ea e Kuresa Papelonia e aunoa ma le faia o se taua?

15 O le pō lenā na fai ai le tausamiga a tagata Papelonia, ma na latou manatu o loo saogalemu ona o le malolosi o pa o le aai. Na eli e Kuresa se alāvai i uta o le aai ma faatafe ese atu le vai lea na alu atu i totonu o le aai. E leʻi umi ae papaʻu le vaitafe, ona āsa atu lea o le ʻautau agaʻi i pa o le aai. Ae e faapefea ona sao atu ʻautau a Kuresa i pa o Papelonia? E lē iloa le māfuaaga, ae e leʻi tapunia faitotoʻa o le aai i lenā pō.

16. (a) O le ā na valoia e Isaia o le a iʻu i ai Papelonia? (e) Na faapefea ona faataunuuina le valoaga a Isaia i le faagaogaoina o Papelonia?

 16 O le valoaga lenei e faatatau iā Papelonia: “O le a lē toe ʻainā lenā aai, pe tumau ai i lea tupulaga ma lea tupulaga. O le a lē faatūina ai e se Arapi lona faleʻie i inā, e lē avatua ai foʻi e se leoleo mamoe lana lafu e taooto ai i lea mea.” (Isaia 13:20) Na valoia foʻi e Isaia le mea o le a tupu pe a uma ona faatoʻilaloina le aai. Ua faaalia ai, o le a gaogao e faavavau Papelonia. O loo iai faamaoniga o le faataunuuga o upu nei. Ua iai le nofoaga tuufua o Papelonia anamua, pe ā ma le 50 maila (80 kilomita) i saute o Baghdad i Iraq, ma ua faamaonia ai le faataunuuga o le fetalaiga a Ieova e ala iā Isaia: “Ou te saluina [tafiesea] o ia i le salu o le faaumatiaga.”—Isaia 14:22, 23. *

O toēga o le aai o Papelonia

17. E faapefea ona faamalosia le faatuatua i le faataunuuga o valoaga o le Tusi Paia?

17 E faamalosia lo tatou faatuatua i le iloiloina o valoaga maufaatuatuaina o le Tusi Paia. Afai na faataunuuina  e Ieova le Atua ana folafolaga i aso ua mavae, e mafai la ona tatou matuā mautinoa o le a ia faataunuu lana folafolaga i se parataiso i le lalolagi. (Faitau le Numera 23:19.) Ioe, tatou te maua le “faamoemoe o le ola e faavavau lea na folafola mai i aso anamua e le Atua, e lē mafai ona tala pepelo.”—Tito 1:2. *

“O LOO OLA LE AFIOGA A LE ATUA”

18. O le ā le faamatalaga mataʻina a le aposetolo o Paulo e faatatau i “le afioga a le Atua”?

18 O manatu ua tatou tilofaʻia i lenei mataupu, ua manino ai le lē mafaatusalia o le Tusi Paia. Ae e sili atu le tāua o le Tusi Paia na i lo o mataupu e pei o le lē feteenaʻi o faamatalaga, le saʻo o mataupu faasaienisi ma le  talafaasolopito, e aogā tele ma e maufaatuatuaina valoaga o loo iai. Na tusi le aposetolo o Paulo: “O loo ola le afioga a le Atua ma e matuā malosi foʻi, e sili atu lona maʻai i lo o le pelu e faatau maʻai ona itu, ma e ati e oo lava i le vaevaeina o le tino ma le agaga, o gaugātino ma aano o ivi, e mafai foʻi ona faamasino i manatu ma faanaunauga o le loto.”—Eperu 4:12.

19, 20. (a) E faapefea ona fesoasoani le Tusi Paia ina ia tatou suʻesuʻe ifo ai iā i tatou lava? (e) E faapefea ona e talisapaia le meaalofa matagofie a le Atua o le Tusi Paia?

19 E mafai ona suia o tatou olaga pe a tatou faitau i le “afioga” a le Atua po o lana feʻau. E fesoasoani ina ia tatou suʻesuʻe ifo ai iā i tatou lava. Atonu tatou te manatu o loo tatou alolofa i le Atua, ae o la tatou tali atu i aʻoaʻoga o i lana Afioga le Tusi Paia, o le a faaalia ai o tatou manatu moni ma filifiliga o o tatou loto.

20 Ioe, o le Tusi Paia o le tusi mai le Atua. E tatau ona faitau, suʻesuʻe ma tausi faapelepele i ai. Ia talisapaia lenei meaalofa mai le Atua e ala i le faaauau ona matuā suʻesuʻe i ai. O le faia faapea, o le a e malamalama atili ai i le finagalo o le Atua mo tagata. O le a iloiloina i le mataupu o sosoo mai lona finagalo ma le auala e faatino ai.

^ pala. 6 E ui e fai mai isi tagata e feteenaʻi isi vaega o le Tusi Paia, ae e lē faavaea na manatu. Tagaʻi i le mataupu e 7 o le tusi na lomia e Molimau a Ieova, The Bible—God’s Word or Man’s?

^ pala. 9 O se faaaʻoaʻoga, ia mātau le gafa umī o Iesu i le Luka 3:23-38.

^ pala. 16 Tagaʻi i le itulau e 27-29 o le polosiua A Book for All People, ua lomia e Molimau a Ieova mo nisi faamatalaga i valoaga o le Tusi Paia.

^ pala. 17 O le faaumatiaga o Papelonia, o se tasi lenā o faaaʻoaʻoga o valoaga o le Tusi Paia ua taunuu. O isi faaaʻoaʻoga, o le faaumatiaga o Turo ma Nineva. (Esekielu 26:1-5; Sefanaia 2:13-15) Na valoia foʻi e Tanielu le faasologa o pulega a le lalolagi pe a mavae Papelonia. O nei pulega e aofia ai le malo o Metai ma Peresia, ma Eleni. (Tanielu 8:5-7, 20-22) Tagaʻi i le Faaopoopoga “O Iesu Keriso, le Mesia na Folafolaina Mai,” mo le tele o valoaga i le Mesia na faataunuuina iā Iesu Keriso.

Faitau Atili

Aiseā e Su‘esu‘e ai le Tusi Paia?

Ua fesoasoani le Tusi Paia i le faitau miliona o tagata i le lalolagi aoao, ina ia maua tali o fesili tāua e faatatau i le olaga. Pe e te fia iloa tali o na fesili?