Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Moni a le Tusi Paia?

 FAAOPOOPOGA

O le ā Lenei Aso e Taʻua o le Aso Faamasino?

O le ā Lenei Aso e Taʻua o le Aso Faamasino?

O LE ā e te mafaufau i ai pe a taʻua le Aso Faamasino? Ua manatu le toʻatele o tagata, o le aso lea e auauaʻi ai i luma o le nofoālii o le Atua le faitau piliona o tagata. O i inā o le a fai ai le faamasinoga o tagata taʻitoʻatasi. E tauia isi i le parataiso i lugā i le lagi, ae faasalaina isi i le puapuaga e faavavau. Ae e matuā ese lava le faamatalaga a le Tusi Paia e uiga i le Aso Faamasino. Ua faamatalaina lenā aso i le Tusi Paia o se taimi e toe faaleleia ai mea ma e tumu i le faamoemoe, ae lē o se taimi e matataʻu ai.

Tatou te faitau i le faamatalaga a le aposetolo o Ioane i le Aso Faamasino, e pei ona taʻua i le Faaaliga 20:11, 12: “Ua ou iloa foʻi se nofoālii tele paʻepaʻe ma lē o loo afio ai. Ua sosola ese mai i ona luma o le lalolagi ma le lagi, ua lē toe maua foʻi se mea e nonofo ai. Ona ou iloa lea o ē na oti, o ē e sili ma ē e faatauvaa, o loo tutū i luma o le nofoālii, ona tatala lea o tusi tāʻai. Ae ua tatala foʻi se isi tusi tāʻai; o le tusi tāʻai lea o le ola. Ona faamasinoina lea o ē ua oti i mea na tusia i tusi tāʻai, e tusa ma a latou galuega.” O ai o le Faamasino o loo faamatalaina i inei?

O Ieova le Atua o ia o le Faamasino sili o tagata uma. Peitaʻi, e iai lē ua ia tofia e tauaaoina le faamasinoga. E tusa ai o le Galuega 17:31, na taʻua e le aposetolo o Paulo “ua ia [le Atua] tofia le aso e faamasinoina ai le lalolagi uma i le amiotonu, e le tagata  ua ia tofia.” Ua tofia Iesu Keriso, o lē ua toe tū mai, e fai ma Faamasino. (Ioane 5:22) O afea la e amata ai le Aso Faamasino? O le ā le umi o lea aso?

Ua faaalia i le tusi o Faaaliga, e amata le Aso Faamasino pe a māeʻa le taua o Amaketo, lea o le a faaumatia ai le faiga o mea a Satani i le lalolagi. * (Faaaliga 16:14, 16; 19:19–20:3) A māeʻa Amaketo, ona taofiofia lea o Satani ma ana temoni i se to mo le afe tausaga. O le taimi lenā o le a avea ai le 144,000 ma faamasino ma pule “o ni tupu faatasi ma Keriso mo le afe tausaga” i le lagi. (Faaaliga 14:1-3; 20:1-4; Roma 8:17) O le Aso Faamasino e lē o se faamasinoga e faatopelau ona fai i le 24 itula. E afe tausaga le umi.

A o faagasolo le afe tausaga, o le a “faamasino” e Iesu Keriso “ē e ola ma ē ua oti.” (2 Timoteo 4:1) O “ē e ola” e faasino atu i “se motu o tagata e toʻatele” o le a faasaoina iā Amaketo. (Faaaliga 7:9-17) Na vaaia foʻi e Ioane ʻo ē na oti o loo tutū i luma o le nofoālii’ mo le faamasinoga. E pei ona folafolaina e Iesu, ʻe faalogo i latou uma o loo i tuugamau i lona leo ma latou ō mai ai e ala i le toe tū.’ (Ioane 5:28, 29; Galuega 24:15) Ae o le ā le faavae o lenā faamasinoga?

E tusa ai o le faaaliga na vaaia e Ioane, na ʻtatala tusi tāʻai, ona faamasinoina lea o ē ua oti i mea na tusia i tusi tāʻai, e tusa ma a latou galuega.’ (Faaaliga 20:12) Po o tusia i nei tusi galuega na fai e tagata i aso ua tuanaʻi? E leai, e lē taulaʻi atu le faamasinoga i mea na fai e tagata a o leʻi maliliu. E faapefea ona tatou iloa? Ua taʻua e le Tusi Paia: “O lē ua oti ua magalo o ia mai i lana agasala.” (Roma 6:7) O lona uiga o le a faamagaloina agasala uma lava a tagata o le a toe tutū mai. O lea la, e lē taumatea e faasino atu nei tusi i nisi poloaʻiga a le Atua. Ina ia ola e faavavau, e tatau i tagata uma lava e sao atu iā Amaketo ma ē o le a toe faatutūina mai, ona usiusitai i tulafono a le Atua e aofia ai ni poloaʻiga fou a Ieova, lea e lē taumatea o le a faailoa mai i le afe tausaga. O lea la, o le a faamasinoina tagata i a latou galuega e fai a o faagasolo le Aso Faamasino.

 O le a faatoʻā maua e le faitau piliona o tagata le avanoa e aʻoaʻoina ma gauaʻi ai i le finagalo o le Atua a o faagasolo le Aso Faamasino. O lona uiga, e telē se polokalame tau aʻoaʻoga o le a fai i lenā taimi. Ioe, “o le a aʻoaʻoina le amiotonu e ē o loo nonofo i le laueleele.” (Isaia 26:9) Peitaʻi, e lē o tagata uma o le a gauaʻi atu i le finagalo o le Atua. Ua taʻua i le Isaia 26:10: “E ui lava ina faaalia i lē e amioleaga le agalelei, ae e lē aʻoaʻo lava e ia le amiotonu. O le a ia faia lava mea lē tonu i le laueleele amiotonu, ma o le a lē vaai foʻi i le mamalu o Ieova.” O le a faaumatia e faavavau na tagata amio leaga a o faagasolo le Aso Faamasino.—Isaia 65:20.

Pe a oo i le faaiʻuga o le Aso Faamasino, fai mai le Tusi Paia o le a “ola” tagata o loo soifua pea, auā o le a atoatoa ona lelei i latou uma. (Faaaliga 20:5) O lea la, a o faagasolo le Aso Faamasino, o le a toe foʻi tagata i lo latou tulaga lelei atoatoa na amata mai ai i Etena. (1 Korinito 15:24-28) Ona faia lea o se tofotofoga faaiʻu. O le a tatalaina mai Satani ma o lona toe taimi lenā e taumafai ai e faasesē tagata. (Faaaliga 20:3, 7-10) O tagata uma lava e tetee atu iā Satani, o le a olioli i le faataunuuga atoatoa o le folafolaga a le Tusi Paia: “E fai lava le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Ioe, o le a avea le Aso Faamasino o se faamanuiaga mo tagata usiusitai uma lava!

^ pala. 1 Mo nisi faamatalaga e uiga iā Amaketo, tagaʻi i le Insight on the Scriptures, Tusi 1, itulau e 594-595, 1037-1038, ma le mataupu e 20 o le tusi Ia Tapuaʻi i le Atua Moni e Toʻatasi, ua lomia e Molimau a Ieova.