Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O ā Aʻoaʻoga Moni a le Tusi Paia?

 MATAUPU E LIMA

O le Togiola o le Meaalofa Sili Lea a le Atua

O le Togiola o le Meaalofa Sili Lea a le Atua
  • O le ā le togiola?

  • Na faapefea ona saunia le togiola?

  • O ā aogā o le togiola mo oe?

  • E faapefea ona e talisapaia le togiola?

1, 2. (a) O le ā le itu e tāua ai se meaalofa iā te oe? (e) Aiseā ua avea ai le togiola ma meaalofa aupito i tāua mo oe?

O LE ā se meaalofa sili na e mauaina? E lē tau tulia i se meaalofa taugatā. E lē fuaina le tāua o se meaalofa i lona tau. E tāua iā te oe se meaalofa pe a e fiafia i ai pe e faamalieina ai foʻi oe.

2 E iai se meaalofa e sili atu na i lo o se mea o e moomoo i ai. O se meaalofa a le Atua mo tagata. E anoanoaʻi mea ua foaʻi mai e Ieova mo i tatou, a o lana meaalofa silisili o le taulaga lea a lona Alo, o Iesu Keriso. (Faitau le Mataio 20:28.) O le a tatou aʻoaʻoina i lenei mataupu, o le togiola o le meaalofa aupito i tāua lea mo oe, auā e matuā faafiafiaina ma faamalieina ai oe. O le togiola o le auala silisili lea ua faaalia ai le alofa o Ieova mo oe.

O LE Ā LE TOGIOLA?

3. O le ā le togiola, ma o le ā e tatau ona tatou malamalama i ai ina ia talisapaia le matuā tāua o le togiola?

3 E ala i le togiola, ua laveaʻi ai pe e faaola ai e  Ieova tagata mai le agasala ma le oti. (Efeso 1:7) Ina ia malamalama i le aʻoaʻoga lenei a le Tusi Paia, seʻi toe tepa i le mea na tupu i le faatoʻaga o Etena. E pau le auala e tatou te talisapaia ai le matuā tāua o le togiola, o lo tatou malamalama lea i le mea na melea e Atamu ina ua agasala.

4. O ā itu na lelei atoatoa ai le ola o Atamu?

4 Ina ua faia Atamu, na foaʻi i ai e Ieova se mea e sili ona tāua, o le ola lelei atoatoa. Ia tomānatu i lenā mea. Ona na lelei atoatoa le tino ma le mafaufau o Atamu, o lona uiga e lē maʻi, pe faasolo ina matua pe oti foʻi. Talu ai o ia o se tagata lelei atoatoa, na iai sa laʻua faiā faapitoa ma Ieova. Ua taʻua i le Tusi Paia o Atamu o se “atalii o le Atua.” (Luka 3:38) Na māfana le faiā a Atamu ma Ieova le Atua, e pei o se atalii ma se tamā alofa. Na fetalai mai Ieova i lona atalii i le lalolagi, ma faatonu Atamu i galuega faamalieloto ma mea e tatau ona ia faia.—Kenese 1:28-30; 2:16, 17.

5. O le ā le uiga o le tala a le Tusi Paia na faia Atamu i le “faatusa o le Atua”?

5 Na faia Atamu i le “faatusa o le Atua.” (Kenese 1:27) E lē o le uiga o lenā mea faapea e tutusa foliga o Atamu ma le Atua. E pei ona tatou iloa mai le Mataupu 1 o le tusi lenei, o Ieova o le Agaga lava ia. (Ioane 4:24) E leai sona tino aano ma ivi. O le faia i le faatusa o le Atua, o lona uiga na faia Atamu ma tuu i ai uiga o le Atua e pei o le alofa, atamai, faamasinotonu ma le malosi. Na pei foʻi Atamu o le Atua talu ai sa tuuina atu iā te ia le saʻolotoga e filifili ai. Sa lē pei Atamu o se masini e fai le mea ua faapolokalameina e fai. Na mafai ona filifili Atamu mo ia lava i le mea e saʻo ma le mea e sesē. Ana usitai Atamu i le Atua, semanū e ola e faavavau i le Parataiso i le lalolagi.

6. O le ā na melea e Atamu ina ua lē usitai i le Atua, ma na faapefea ona aafia ai lana fanau?

 6 Ina ua agasala Atamu i le Atua ma faasalaina i le oti, e ogaoga iʻuga na oo i ai. Ona o lana agasala, na ia melea ai lona ola lelei atoatoa ma faamanuiaga na semanū na te maua. (Kenese 3:17-19) Ae pagā lea, na melea e Atamu lona ola manuia ma soifua manuia o ē na tupuga mai iā te ia. Fai mai le Afioga a le Atua: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Ioe, ua tuufaasolo mai iā i tatou uma le agasala a Atamu. O le pogai lea ua taʻua ai i le Tusi Paia, na “faatauina atu” e Atamu ia lava ma lana fanau e fai ma pologa i le agasala ma le oti. (Roma 7:14) Ua leai se faamoemoe o Atamu ma Eva, ona sa lē usitai ma le loto i ai i le Atua. Ae faapefea a laʻua fanau e aofia ai ma i tatou?

7, 8. O ā mea e lua e aofia ai i se togiola?

7 Ua laveaʻi e Ieova tagata e ala i le togiola. O le ā lenei mea e taʻua o le togiola? E lua mea e aofia ai i se togiola. Muamua, o le togiola o se tau e totogi e faamatuu pe e toe faatau mai ai se mea. E mafai ona faatusa i se tupe e totogi e faasaʻoloto ai se pagota o le taua. Lona lua, o le togiola o se mea e ufiufi ai pe totogi ai le tau o se mea. E pei o se tupe e totogi e taui ai se tasi na lavea po o se mea ua faaleagaina. O se faaaʻoaʻoga, a leaga se mea i se tagata, e tatau ona ia totogia se tupe e talafeagai pe e tutusapau ma le tau o mea ua faaleagaina.

8 E faapefea la ona toe totogi le mea ua melea e Atamu mo i tatou uma, ma faasaʻoloto ai i tatou mai le pologa i le agasala ma le oti? O le a tatou iloiloina  le togiola na saunia e Ieova, ma aogā o le togiola mo oe.

LE AUALA NA SAUNIA AI E IEOVA LE TOGIOLA

9. O le ā le mea na manaʻomia e fai ma togiola?

9 E lē mafai e se ola lē lelei atoatoa, ona totogia le ola lelei atoatoa lea na melea e Atamu. (Salamo 49:7, 8) E manaʻomia se ola e tutusapau ma le ola na melea e Atamu. E talafeagai lenā ma le taʻiala amiotonu i le Afioga a le Atua: “O le ola e sui ai le ola.” (Teuteronome 19:21) O le ā la e mafai ona totogi ai le ola lelei atoatoa lea na melea e Atamu? E manaʻomia le ola lelei atoatoa o se isi tagata, “e fai ma togiola e fetaui lelei.”—1 Timoteo 2:6.

10. Na faapefea ona saunia e Ieova le togiola?

10 Na faapefea ona saunia e Ieova le togiola? Na ia auina mai se tasi o ona atalii agaga lelei atoatoa i le lalolagi. E leʻi auina mai e Ieova so o se atalii. Na ia auina mai lona Alo pele e toʻatasi. (Faitau le 1 Ioane 4:9, 10.) Na finagalo malie lenei Alo e tuua lona afioaga i le lagi. (Filipi 2:7) E pei ona tatou iloa mai le mataupu ua teʻa o lenei tusi, na faia e Ieova se vavega ma tuuina mai le soifua o lona Alo i le manava o Maria. E ala i le agaga paia o le Atua, na fanau mai ai Iesu o se tagata lelei atoatoa e aunoa ma se agasala.—Luka 1:35.

Na foaʻi mai e Ieova lona Alo e toʻatasi e togiola ai i tatou

11. E faapefea i se tagata e toʻatasi ona fai ma togiola mo le faitau miliona o tagata?

11 E faapefea i se tagata e toʻatasi ona fai ma togiola mo tagata e toʻatele, ioe, le faitau miliona o tagata? O le ā foʻi le māfuaaga ua agasala ai le faitau miliona o tagata? Ia manatua, na melea e Atamu le ola lelei atoatoa ina ua agasala. O le pogai lea ua lē lelei atoatoa ai lana fanau. E pau le mea ua maua e tagata mai iā Atamu,  o le agasala ma le oti. O loo taʻua i le Tusi Paia Iesu o “le Atamu mulimuli,” lea e lelei atoatoa e aunoa ma se agasala. (1 Korinito 15:45) A fua i ai, na suitulaga Iesu iā Atamu ina ia faaolaina ai i tatou. O le usiusitai i le Atua, na foaʻi mai ai e Iesu lona soifua lelei atoatoa e totogi ai le agasala a Atamu. Ua maua le faamoemoe o tagata na tupuga mai iā Atamu, ona o Iesu.—Roma 5:19; 1 Korinito 15:21, 22.

12. O le ā na faamaonia i mafatiaga o Iesu?

12 Ua faamatala auʻiliʻili i le Tusi Paia puapuaga na lutia ai Iesu a o leʻi maliu. Na sasa faamoʻamoʻa, tutuʻi i le laau e faapuapuagatia ai, ma maliu tigā ai. (Ioane 19:1, 16-18, 30; Faaopoopoga “Le Pogai e Lē Faaaogā ai e Kerisiano Moni le Koluse i la Latou Tapuaʻiga”) Aiseā na tatau ai ona matuā puapuagatia Iesu? I se isi mataupu o lenei tusi, o le a tatou iloa ai na fesiligia e Satani pe e iai ni auauna a Ieova o le a faamaoni pea iā te ia, e ui i tofotofoga. O le faaauau ona faamaoni o Iesu e ui i le ogaoga o mafatiaga, na ia tuuina atu ai se tali sili ona lelei i luʻi a Satani. Na faamaonia e Iesu e mafai lava ona filifili se tagata lelei atoatoa ia usiusitai i le Atua, po o ā lava faaosoosoga a le Tiapolo. Maʻeu le soisoi fiafia o le finagalo o Ieova ona o le faamaoni o lona Alo pele!—Faataoto 27:11.

13. Na faapefea ona totogi le togiola?

13 Na faapefea ona totogi le togiola? I le 33 T.A. iā Nisani 14 e tusa ai ma le kalena faa-Iutaia, e leʻi taofia e le Atua le fasiotia o lona Alo lelei atoatoa e aunoa ma se agasala. E “na o le faatasi lava” ona faia e Iesu le taulaga i lona tino lelei atoatoa. (Eperu 10:10) I le aso lona tolu talu ona maliu, na toe faatūina ai o ia e Ieova i se tino agaga. Ina ua afio aʻe Iesu i le lagi, na ia tauaao atu loa i le Atua le tāua o lona soifua lelei atoatoa, lea  na fai ma togiola e sui ai le fanau a Atamu. (Eperu 9:24) Na talia e Ieova le tāua o le taulaga a Iesu e fai ma togiola, lea e manaʻomia ina ia laveaʻi ai tagata mai le nofo pologa i le agasala ma le oti.—Faitau le Roma 3:23, 24.

AOGĀ O LE TOGIOLA MO OE

14, 15. Ina ia ʻfaamagaloina a tatou agasala,’ o le ā e tatau ona tatou faia?

14 E ui ina tatou agasala, ae e mafai ona faaʻoaina i tatou i faamanuiaga, ona o le togiola. Seʻi tatou talanoa i aogā o lenei meaalofa mai le Atua i le taimi nei ma i le lumanaʻi.

15 Faamagaloina o agasala. E faigatā ona tatou faia le mea saʻo ona o le tino augavale. Tatou te agasala uma a lē i upu o mea e fai. Peitaʻi, e mafai ona ʻfaamagaloina a tatou agasala’ ona o le taulaga a Iesu. (Kolose 1:13, 14) E tatau ona tatou salamō moni ina ia faamagaloina i tatou. E tatau foʻi ona tatou ole atu ma le lotomaulalo iā Ieova ia faamagalo i tatou, e ala i le faatuatua i le taulaga a lona Alo.—Faitau le 1 Ioane 1:8, 9.

16. Aiseā ua mafai ai ona tatou tapuaʻi i le Atua i se lotofuatiaifo mamā, ma aiseā e tāua ai?

16 Lotofuatiaifo mamā i luma o le Atua. Tatou te lotovaivai pe a lē lelei o tatou lotofuatiaifo, ma lagona ai ua leai so tatou aogā. Ona o le faamagaloina e ala i le togiola, ua tuu mai ai e Ieova le avanoa ina ia tapuaʻi atu iā te ia i se lotofuatiaifo mamā, e ui ina tatou lē lelei atoatoa. (Eperu 9:13, 14) Tatou te maua ai le saʻolotoga e talanoa atu ai iā Ieova. E mafai ona tatou faalatalata atu e lē aunoa iā te ia i le tatalo. (Eperu 4:14-16) O le faaauau ona iai o se lotofuatiaifo mamā, e maua ai le filemu o le mafaufau, lotomalie ma le fiafia.

17. O ā faamanuiaga e mafai ona maua ona na maliu Iesu mo i tatou?

 17 Faamoemoe e ola e faavavau i le parataiso i le lalolagi. Ua faapea mai le Roma 6:23: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.” I le Mataupu e 3 o lenei tusi, na taʻua ai faamanuiaga o le Parataiso o loo fotuaʻi mai i luga o le lalolagi. (Faaaliga 21:3, 4) O le maliu o Iesu, ua mafai ai ona maua na faamanuiaga, e aofia ai le ola e faavavau ma le soifua mālōlōina lelei atoatoa. Ina ia tofo i na faamanuiaga, e tatau ona tatou talisapaia lenei meaalofa o le togiola.

E FAAPEFEA ONA ILOA LOU TALISAPAIA?

18. Aiseā e ao ai ona tatou lotofaafetai iā Ieova mo le meaalofa o le togiola?

18 Aiseā e ao ai ona tatou matuā lotofaafetai iā Ieova mo le togiola? E tāua tele se meaalofa aemaise pe a tele le taimi, taumafaiga po o tupe na alu i le tapenaga o lenā meaalofa. E faagaeetia o tatou loto pe a tatou iloa, o se meaalofa o se faailoaga mai o le alofa  faapelepele o lē na aumai ai le meaalofa iā i tatou. O le togiola o le meaalofa silisili, auā e matuā pele iā Ieova lē na ia auina mai e fai le togiola. Fai mai le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi.” O le togiola o le faamaoniga silisili lea o le alofa o Ieova mo i tatou. E faamaonia ai foʻi le alofa o Iesu, i lona finagalo malie e tuuina mai lona soifua e sui aʻi i tatou. (Faitau le Ioane 15:13.) O le togiola ua tatou mautinoa ai e alolofa Ieova ma lona Alo iā i tatou.—Kalatia 2:20.

O se tasi o auala e te talisapaia ai le meaalofa a Ieova o le togiola, o le taumafai lea ia iloa o ia

19, 20. E faapefea ona e talisapaia le meaalofa a le Atua o le togiola?

19 E faapefea ona e talisapaia le meaalofa a le Atua o le togiola? Muamua lava, ia taumafai ia iloa Ieova, o Lē na foaʻi maia le togiola. (Ioane 17:3) E mafai ona e iloa atili o ia pe a e suʻesuʻeina le Tusi Paia faatasi ma le tusi lenei. A e iloa lelei Ieova, o le a e alofa atili ai iā te ia. Ona o lou alofa mo ia, o le a e manaʻo ai e faafiafia lona finagalo.—1 Ioane 5:3.

20 Ia faatuatua i le taulaga a Iesu. Ua taʻua i le Tusi Paia e uiga iā Iesu: “O lē e faatuatua i le Alo e maua e ia le ola e faavavau.” (Ioane 3:36) E faapefea ona tatou faatuatua iā Iesu? E lē lava le na o upu. Ua taʻua i le Iakopo 2:26: ʻE mate le faatuatua pe a leai ni galuega.’ Ioe, e iloa le faatuatua i “galuega” po o mea e fai. O se tasi o auala e faatuatua ai iā Iesu, o le faaaʻoaʻo lea iā te ia i upu ma mea e fai.—Ioane 13:15.

21, 22. (a) Aiseā e ao ai ona tatou auai i tausaga taʻitasi i le faamanatuina o le Talisuaga Afiafi a le Alii? (e) O le ā le mea o le a faamatalaina i le Mataupu e 6 ma le 7?

21 Auai i le faamanatuina o le Talisuaga Afiafi a le Alii i tausaga taʻitasi. I le afiafi o Nisani 14, 33 T.A., na fai ai e Iesu se faamanatuga faapitoa lea e taʻua i le Tusi Paia, o le “talisuaga afiafi a le Alii.” (1 Korinito  11:20; Mataio 26:26-28) E taʻua foʻi lenei talisuaga o le Faamanatuga o le maliu o Keriso. Na faatulaga e Iesu lenei Faamanatuga ina ia manatua ai e ona aposetolo ma Kerisiano moni uma lava, lana taulaga na fai ma togiola ina ua maliu o se tagata lelei atoatoa. Na poloaʻi Iesu: “Ia faia pea lenei mea e fai ma faamanatuga iā te aʻu.” (Luka 22:19) O le faamanatuina o le Faamanatuga, e tatou te manatua ai le alofa o Ieova ma Iesu e ala i le togiola. Tatou te talisapaia le togiola pe a tatou auai i tausaga taʻitasi i le Faamanatuga o le maliu o Iesu. *

22 O le togiola o se meaalofa tāua mai iā Ieova. (2 Korinito 9:14, 15) O lenei meaalofa lē mafaatusalia e aogā foʻi i ē ua maliliu. O le a faamatalaina lenā mea i le Mataupu e 6 ma le 7.

^ pala. 21 Ina ia maua nisi faamatalaga i le Talisuaga Afiafi a le Alii, tagaʻi i le Faaopoopoga “O le Talisuaga Afiafi a le Alii, o se Aso Faamanatu e Viia ai le Atua.”