Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O ā Aʻoaʻoga Moni a le Tusi Paia?

 MATAUPU E SEFULU LIMA

Le Tapuaʻiga e Talia e le Atua

Le Tapuaʻiga e Talia e le Atua
  • Pe e talia e le Atua tapuaʻiga uma?

  • E faapefea ona tatou iloa le tapuaʻiga moni?

  • O ai tagata o loo tapuaʻi moni i le Atua i aso nei?

1. O ā aogā tatou te mauaina pe a saʻo le auala e tapuaʻi ai i le Atua?

E ALOFA Ieova iā i tatou ma e finagalo ina ia tatou maua aogā mai lana taʻitaʻiga alofa. Pe a saʻo le auala tatou te tapuaʻi ai i le Atua, o le a tatou fiafia ai ma ʻalofia le mau faafitauli. O le a tatou maua foʻi lana faamanuiaga ma lana fesoasoani. (Isaia 48:17) E talitonu le tele o tapuaʻiga o loo latou aʻoaʻo atu le upu moni e uiga i le Atua. Ae e matuā eseese a latou aʻoaʻoga e uiga i le Atua, ma mea ua ia faafinagaloina mai iā i tatou.

2. E faapefea ona iloa le auala saʻo e tapuaʻi ai i le Atua, ma o le ā se faaaʻoaʻoga e fesoasoani iā i tatou?

2 E faapefea ona e iloa le auala saʻo e tapuaʻi ai i le Atua? E lē manaʻomia ona e suʻesuʻe ma faatusatusa aʻoaʻoga a lotu. E pau le mea e tatau ona e iloa, o aʻoaʻoga moni a le Tusi Paia e uiga i le tapuaʻiga moni. O se faaaʻoaʻoga: O le tele o atunuu e iai faafitauli e faatatau i tupe pepelo. E faapefea ona e iloa tupe pepelo? Pe e manaʻomia ona e iloa foliga o tupe pepelo uma lava? E leai. E sili atu pe a e tilofaʻia foliga o tupe moʻi. A e iloa foliga o tupe moʻi, o le a e mātauina ai tupe pepelo. A tatou iloa le tapuaʻiga moni, e mafai foʻi ona tatou mātauina tapuaʻiga pepelo.

3. E tusa ai ma le fetalaiga a Iesu, o le ā le mea e tatau ona tatou faia ina ia talia ai i tatou e le Atua?

3 E tāua tele ona talia e Ieova la tatou tapuaʻiga. E talitonu  le toʻatele o tagata, o tapuaʻiga uma e tau i le Atua. Ae e lē o le aʻoaʻoga lenā a le Tusi Paia. E lē lava foʻi le faapea atu o i tatou o ni Kerisiano. Na fetalai Iesu: “E lē ulu atu i le malo o le lagi i latou uma o ē fai mai iā te aʻu, ʻLe Alii e, le Alii e,’ ae e na o lē na te faia le finagalo o loʻu Tamā o i le lagi.” Ina ia talia i tatou e le Atua, e tatau ona tatou iloa ma fai lona finagalo. Na taʻua e Iesu tagata na lē faia le finagalo o le Atua, “o ē faia mea leaga.” (Mataio 7:21-23) E lē aogā tapuaʻiga sesē e pei o tupe pepelo. E lē gata i lea, o tapuaʻiga sesē e lamatia ai soifua o tagata.

4. O le ā le uiga o le fetalaiga a Iesu e faatatau i ala e lua, ma o fea e tau i ai na ala?

4 Ua tuu mai e Ieova le avanoa i tagata uma lava ina ia ola ai e faavavau. Ae ina ia ola e faavavau i le Parataiso, e tatau ona saʻo le auala e tatou te tapuaʻi ai i le Atua, ma ia faafiafia o ia i o tatou olaga i le taimi nei. E faanoanoa ona e lē o faia e le toʻatele o tagata lenā mea. O le pogai lea na fetalai ai Iesu: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.” (Mataio 7:13, 14) O le tapuaʻiga moni, e tau atu i le ola e faavavau. A o tapuaʻiga sesē, e tau atu i le faaumatiaga. E lē finagalo Ieova ia faaumatia se tagata, o le ala lea ua ia tuuina mai ai le avanoa i tagata uma lava, ina ia latou iloa o ia. (2 Peteru 3:9) A tuusaʻo le manatu, o le auala e tatou te tapuaʻi ai i le Atua e mafai ona iʻu ai i le ola po o le oti.

LE AUALA E ILOA AI LE TAPUAʻIGA MONI

5. E faapefea ona tatou iloa tagata o le tapuaʻiga moni?

5 E faapefea ona maua “le auala e tau atu i le ola”? Na fetalai Iesu, e iloa le tapuaʻiga moni i olaga o tagata o loo auai ai: ʻTou te iloa i latou i o latou fua. O laau lelei uma  e fua mai ai fua lelei.’ (Mataio 7:16, 17) I se isi faaupuga, e iloa le tapuaʻiga moni i talitonuga ma amioga a tagata o loo iai. E ui lava e lē lelei atoatoa ma e iai taimi e sesē ai, ae e taumafai tagata o le tapuaʻiga moni e fai le finagalo o le Atua. Seʻi o tatou tilofaʻia ni vala se ono e iloa ai tagata o le tapuaʻiga moni.

6, 7. O le ā le manatu o auauna a le Atua e uiga i le Tusi Paia, ma o le ā le faaaʻoaʻoga na faia e Iesu?

6 O auauna a le Atua e faavae i le Tusi Paia a latou aʻoaʻoga. Fai mai le Tusi Paia: “O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.” (2 Timoteo 3:16, 17) Na tusi atu Paulo i ona uso Kerisiano: “Ina ua outou maua le afioga a le Atua, na outou faalogo ai mai iā i matou, ona outou talia lea, e lē o le upu a tagata, a o le mea moni, o le afioga a le Atua.” (1 Tesalonia 2:13) O lea la, o aʻoaʻoga ma mea e fai i le tapuaʻiga moni, e lē faavaeina i manatu ma agaifanua a tagata. E faavae i le Afioga a le Atua, le Tusi Paia.

7 Na faia e Iesu Keriso se faaaʻoaʻoga lelei, e ala i le faavae o ana aʻoaʻoga i le Tusi Paia. Na fetalai Iesu i lana tatalo i lona Tamā i le lagi: “O lau afioga o le upu moni lea.” (Ioane 17:17) Na talitonu Iesu i le Afioga a le Atua, ma o ana aʻoaʻoga uma na ōgatusa ma le Tusi Paia. Na masani ona fetalai Iesu: “Ua tusia.” (Mataio 4:4, 7, 10) A uma lenā, ona ia taʻua lea o se mau mai le Tusi Paia. E faapena foʻi aso nei, e lē aʻoaʻo atu e tagata o le Atua o latou manatu. Latou te talitonu o le Tusi Paia o le Afioga a le Atua, lea ua fai ma faavae mausalī o a latou aʻoaʻoga.

8. O le ā le mea e aofia ai i le tapuaʻi atu iā Ieova?

8 O tagata o le tapuaʻiga moni, e na o Ieova e tapuaʻi i ai ma faalauiloa atu lona suafa. Na fetalai Iesu: “E tatau  ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Mataio 4:10) O lea la, ua na o Ieova lava e tapuaʻi i ai auauna a le Atua. O le tapuaʻi i le Atua, e aofia ai le taʻutaʻu atu i tagata o le suafa o le Atua moni ma ona uiga. O upu nei o le Salamo 83:18: “O oe e ou le suafa o Ieova, e na o oe lava o Lē e Silisili Ese i le lalolagi uma.” Na faia e Iesu le faaaʻoaʻoga i le fesoasoani lea i tagata ina ia latou iloa le Atua. Na tatalo Iesu: “Ua ou faailoa atu lou suafa i tagata ua e foaʻi mai iā te aʻu i le lalolagi.” (Ioane 17:6) O ē e auai i le tapuaʻiga moni, latou te aʻoaʻoina foʻi tagata e faatatau i le suafa, finagalo ma uiga o le Atua.

9, 10. O ā auala e fealofani ai Kerisiano moni?

9 E fealofani tagata o le Atua, ma e lē alofa faapito. Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) Na fealofani uluaʻi Kerisiano. O le alofa ua finagalo i ai le Atua, e faatoʻilalo ai feeseeseaʻiga i le va o tagata e lē tutusa tulaga, ituaiga ma atunuu. O lea alofa ua fusia faatasi ai tagata uma i se fusi e lē motusia, ona o i latou o se ʻauuso fealofani. (Faitau le Kolose 3:14.) E lē faapena le fealofani o tagata o tapuaʻiga sesē. E faapefea ona tatou iloa? E fefasiotiaʻi lava i latou, ona o feeseeseaʻiga i le va o atunuu ma ituaiga. E lē fetagofi Kerisiano moni i auupega e fasioti ai o latou uso Kerisiano po o isi tagata. Fai mai le Tusi Paia: ʻE iloa le fanau a le Atua ma le fanau a le Tiapolo i le mea moni lenei: O lē ua lē faaauau ona faia le amiotonu e lē mai i le Atua o ia, e faapena foʻi le tagata ua lē alofa i lona uso. E tatau ona tatou alolofa o le tasi i le isi; e lē pei o Kaino o lē e mai i lē o loo leaga, lea na ia fasiotia lona uso.’—1 Ioane 3:10-12; 4:20, 21.

10 O le alofa moni, e lē na o le ʻalofia o le fasioti tagata. E aaomafola Kerisiano moni i a latou meafaitino, taimi  ma lo latou malosi e fesoasoani ai i o latou uso ma fefaalaeiauaʻi. (Eperu 10:24, 25) E fesoasoani le tasi i le isi i o latou mafatiaga, ma e faamaoni foʻi. Latou te mulimuli i le fautuaga a le Tusi Paia, ia “faia mea lelei i tagata uma.”—Kalatia 6:10.

11. Aiseā e tāua ai ona talia Iesu Keriso o lē ua ala mai ai le faaolataga mai le Atua?

11 E talia e Kerisiano moni Iesu Keriso o lē ua ala mai ai le faaolataga mai le Atua. Ua taʻua i le Tusi Paia: ʻE leai se isi e mafai ona maua ai le faaolataga, auā e leai se isi igoa i lalo o le lagi ua tuuina mai e le Atua i tagata, e tatau ona faaolaina ai i tatou.’ (Galuega 4:12) E pei ona taʻua i le Mataupu e 5, na foaʻi mai e Iesu lona soifua e fai ma togiola mo tagata usiusitai. (Mataio 20:28) E lē gata i lea, o Iesu o le Tupu na tofia e le Atua i le Malo o le lagi, lea o le a pulea le lalolagi atoa. E finagalo le Atua ia tatou usiusitai iā Iesu, ma mulimuli i ana aʻoaʻoga pe a tatou fia maua le ola e faavavau. O le pogai lea ua faapea mai ai le Tusi Paia: “O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola.”—Ioane 3:36.

12. O ā mea e aofia ai i le lē ni o le lalolagi?

12 E lē ni o le lalolagi tagata o le tapuaʻiga moni. A o tulaʻi i le faamasinoga i luma o le pule o Roma o Pilato, na fetalai atu Iesu: “O loʻu malo e lē mai le lalolagi lenei.” (Ioane 18:36) Po o fea lava e alaala ai soo moni o Iesu, ae o i latou o tagatānuu o lona Malo i le lagi, o le ala lea latou te matuā solitū ai i mataupu faapolotiki. Latou te lē aafia i fevaevaeaʻiga po o ni taua e tulaʻi mai ai. Peitaʻi, e lē aiā tagata e tapuaʻi iā Ieova i filifiliga a isi tagata e auai i vaega faaupufai, pe e tauvā i faigāpalota po o le palota foʻi. E ui e solitū tagata tapuaʻi o Ieova i mataupu faapolotiki, ae e usiusitai i tulafono a le atunuu. Aiseā? Auā ua faatonuina i latou e le Afioga a le Atua “ia gauaʻi” i “faipule silisili” po o  taʻitaʻi o malo. (Roma 13:1) A iai se feeseeseaʻiga i tulafono a le Atua ma tulafono a malo o tagata, e mulimuli tagata o le tapuaʻiga moni i le faaaʻoaʻoga a le ʻauaposetolo, ina ua latou faapea atu: “E tatau ona matou usiusitaʻi i le Atua o le pule, nai lo o tagata.”—Galuega 5:29; Mareko 12:17.

13. O le ā le manatu o soo moni o Iesu e uiga i le Malo o le Atua, ma o le ā la latou gaoioiga e fai?

13 E talaʻia e soo moni o Iesu le Malo o le Atua, ona  pau lea o le faamoemoe mo tagata. Na valoia e Iesu: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) Na i lo le fai i tagata ia faamoemoe atu i taʻitaʻi o le lalolagi mo se vaifofō mo o latou faafitauli, ua faalauiloa atu e soo moni o Iesu, e na o le pau le faamoemoe mo tagata, o le Malo lea o le Atua. (Salamo 146:3) Na aʻoaʻo i tatou e Iesu ia tatalo mo lenā pulega lelei, ina ua ia fetalai: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) Ua valoia i le Tusi Paia, o le Malo lenei i le lagi o le a “tuʻimomomoina ma faaumatia malo uma [o loo iai nei], ae e tumau lea malo e faavavau.”—Tanielu 2:44; Faaaliga 16:14; 19:19-21.

14. O lē fea tapuaʻiga e te talitonu o loo faia mea e tatau ona fai e le tapuaʻiga moni?

14 E tusa ai o manatu na tatou iloiloina, ia fesili ifo iā te oe lava: ʻO lē fea tapuaʻiga e faavae ana aʻoaʻoga i le Tusi Paia, ma faalauiloa atu le suafa o Ieova? O lē fea tapuaʻiga e alolofa ona tagata e pei ona finagalo i ai le Atua, e faatuatua iā Iesu, e lē ni o le lalolagi, ma e taʻutaʻu atu i tagata e faapea, o le Malo o le Atua ona pau lea o le faamoemoe mo tagata? Pe a fua atu i tapuaʻiga uma lava i le lalolagi, o lē fea tapuaʻiga o loo faia nei mea?’ E manino le mata o le vai, o Molimau a Ieova.—Faitau le Isaia 43:10-12.

O LE GAOIOIGA E AO ONA E FAI

15. O ā mea ua faafinagaloina e le Atua, e ese mai i le talitonu o loo soifua o ia?

15 E lē lava le tau ina talitonu o loo soifua le Atua. Ua taʻua i le Tusi Paia, e talitonu foʻi temoni o loo soifua le Atua. (Iakopo 2:19) E mautinoa lava, e lē faia e temoni le finagalo o le Atua ma e lē talia i latou e le Atua. Ina ia talia i tatou e le Atua, e tatau ona tatou talitonu o loo soifua o  ia, ma ia fai lona finagalo. E tatau foʻi ona tatou ō ese mai tapuaʻiga sesē ma auai atu i le tapuaʻiga moni.

16. O le ā le mea e tatau ona fai pe a aafia se tagata i tapuaʻiga sesē?

16 Na faapea mai Paulo e lē tatau ona tatou aafia i tapuaʻiga sesē. Na tusi o ia: “ʻIa ō ese ai mai iā i latou, ma ia outou vavaeese,’ ua fetalai mai ai Ieova, ʻma aua tou te toe papaʻi atu i se mea e lē mamā’, ʻona ou talia ai lea o outou.’” (2 Korinito 6:17; Isaia 52:11) E ʻalofia e Kerisiano moni mea uma e fesootaʻi atu i tapuaʻiga sesē.

17, 18. O le ā ua faasino i ai “Papelonia le Aai Tele,” ma aiseā ua faanatinati ai ona “ō ese” mai ai?

17 Ua faaalia i le Tusi Paia, o lotu sesē uma lava o loo aofia ai iā “Papelonia le Aai Tele.” * (Faaaliga 17:5) O lenā igoa ua tatou manatua ai le aai anamua o Papelonia, lea na tupuga mai ai lotu sesē ina ua uma le Lolo i ona pō o Noa. O le tele o aʻoaʻoga ma mea e fai e tapuaʻiga sesē, na tupuga mai i tuā i inā i Papelonia. O se faaaʻoaʻoga, na tapuaʻi tagata Papelonia i atua e tolutasi. O le aʻoaʻoga autū a le tele o lotu i aso nei, o le Tolutasi. Peitaʻi ane, e manino lava le aʻoaʻoga a le Tusi Paia, o Ieova o le Atua moni e toʻatasi, ma o lona Alo o Iesu Keriso lea. (Ioane 17:3) Na talitonu foʻi tagata Papelonia, e faaauau ona ola le agaga o le tagata pe a oti, ma e mafai ona faapuapuagatia i le afi. I aso nei, ua aʻoaʻoina foʻi e le tele o lotu e faaauau ona ola le agaga o le tagata, ma e mafai ona faapuapuagatia i le afi.

18 Talu ai na salalau atu tapuaʻiga a Papelonia i le lalolagi aoao, o le ala lea ua faaigoa ai lotu sesē uma lava o le lalolagi, o Papelonia le Aai Tele. Na valoia e le Atua, o le a faafuaseʻi ona faaumatia lotu sesē uma lava o le lalolagi.  Po ua e silafia le tāua ona e vavae ese mai iā Papelonia le Aai Tele? E finagalo Ieova ina ia tatou vave “ō ese” mai ai manū o lava le taimi.—Faitau le Faaaliga 18:4, 8.

E tele atu faamanuiaga o le a e tofo i ai, pe a e auauna iā Ieova faatasi ma ona tagata

19. O ā faamanuiaga o le a e mauaina pe a e auauna iā Ieova?

19 Ona o lau filifiliga e lē toe auai i tapuaʻiga sesē, e ono lē toe faauō atu ai isi tagata iā te oe. Ae ona o loo e auauna iā Ieova faatasi ma ona tagata, e tele atu faamanuiaga o le a e tofo i ai. E pei o uluaʻi soo o Iesu o ē na tuua aiga ina ia mulimuli atu iā te ia, o le a tele foʻi ou uso ma tuafāfine faaleagaga. O le a e iai i le ʻauaiga o Kerisiano moni e faitau miliona lo latou aofaʻi i le lalolagi aoao, o ē alolofa moni iā te oe. O le a e mauaina le faamoemoe matagofie o le ola e faavavau i le lumanaʻi. (Faitau le Mareko 10:28-30.) O ē na tuulafoaʻia oe ona o ou talitonuga, atonu e sau se aso latou te suʻesuʻeina le Tusi Paia, ma tapuaʻi iā Ieova.

20. O le ā le lumanaʻi mo tagata o le tapuaʻiga moni?

20 Ua aʻoaʻoina i le Tusi Paia, ua toeitiiti ona faaumatia lea e le Atua lenei lalolagi amioleaga, ma suia i se lalolagi fou amiotonu e pulea e lona Malo. (2 Peteru 3:9, 13) Maʻeu se lalolagi matagofie! E na o le tasi lava le tapuaʻiga o le a iai i lenā lalolagi fou, o le tapuaʻiga moni lea. Ioe, o se gaoioiga poto le gaoioi loa i le taimi nei, ina ia auaufaatasi atu i tagata o le tapuaʻiga moni.

^ pala. 17 Tagaʻi i le Faaopoopoga “Le Auala e Iloa ai “Papelonia le Aai Tele”” mo nisi faamatalaga e uiga i le māfuaaga ua faatatau atu ai Papelonia le Aai Tele, i lotu sesē uma lava o le lalolagi.