Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O ā Aʻoaʻoga Moni a le Tusi Paia?

 FAAOPOOPOGA

Le Uiga o le Suafa o le Atua ma le Auala e Taʻu Ai

Le Uiga o le Suafa o le Atua ma le Auala e Taʻu Ai

O FAAPEFEA ona faaliliuina i lau Tusi Paia le Salamo 83:18? O le faaliliuga lenei, O le Tusi Paia—O le Faaliliuga a le Lalolagi Fou: “Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” E faapena foʻi faaliliuga a isi Tusi Paia. Peitaʻi, ua aveesea i le tele o Tusi Paia le suafa o Ieova, ma suia i le “Alii.” Ae o le ā tonu e tatau ona iai i lenei mau, po o se taʻu, faalupega po o le suafa o Ieova?

O le suafa o le Atua i mataʻitusi Eperu

O loo taʻua i lenei mau se suafa. I le uluaʻi gagana Eperu lea na tusia ai le tele o tusi o le Tusi Paia, o loo iai lea suafa mataʻina. O le auala lenei o loo sipela ai i mataʻitusi Eperu יהוה (YHWH). A faa-Samoa o “Ieova.” Pe e na o le tasi lava le mau o le Tusi Paia e iai lenei suafa? E leai. I uluaʻi tusi o le Tusi Paia na tusia i le gagana Eperu, e toetoe lava 7,000 taimi o loo taʻua ai le suafa o Ieova.

O le ā le tāua o le suafa o le Atua? Ia manatu i le tatalo a le Alii na fofogaina e Iesu Keriso. E faapenei lona amataga: “Lo matou Tamā e o i le lagi, ia faapaiaina lou suafa.” (Mataio 6:9) Na tatalo mulimuli ane Iesu i le Atua: “Loʻu Tamā e, ia faamamaluina lou suafa.” Ona tali mai lea o le Atua mai le lagi: “Ua ou faamamaluina loʻu igoa, ma ou toe faamamaluina ai.” (Ioane 12:28) E manino mai la, e tāua tele le suafa o le Atua. Aiseā la ua aveesea ai e nisi tagata faaliliu lenei suafa mai le Tusi Paia ae suia i taʻu po o faalupega?

E aliali mai e lua ni māfuaaga autū. Muamua, ua manatu le toʻatele o tagata e lē tatau ona taʻua lenā suafa, auā e leai se tasi i aso nei e iloa le auala saʻo na faaleo ai muamua. Na tusia le uluaʻi gagana Eperu e aunoa ma ni vaueli. O lea la, e leai se tagata i aso nei e mautinoa atoatoa i le auala na faaleo ai le YHWH e tagata i le taimi na tusia ai le Tusi Paia. Po o lona uiga la, e lē tatau ona tatou taʻua le suafa o le Atua? A o tusia le Tusi Paia, e foliga mai na faaleoina le suafa o Iesu o Yeshua po o  Yehoshua, ae e lē o mautinoa e se tagata. Peitaʻi, e eseese auala ua faaleoina ai e tagata i le lalolagi aoao le suafa o Iesu, e faalagolago i le gagana a le tagata. E lē iloa le auala na faaleo ai i le uluaʻi senituri le suafa o Iesu, peitaʻi ane, e masani lava ona taʻua e tagata le suafa o Iesu i aso nei. E faapena foʻi pe a e faimalaga atu i atunuu mamao, e lē taumatea e ono ese le auala e faaleo ai lou igoa. O lea la, o le lē mautinoa i le faaleoina muamua o le suafa o le Atua, e lē o se māfuaaga lenā e lē taʻua ai lona suafa.

O le māfuaaga lona lua mo le aveeseina o le suafa o le Atua mai le Tusi Paia, ona o se tū ua loa ona iai a tagata Iutaia. Ua talitonu le toʻatele o tagata Iutaia, e lē tatau ona taʻu le suafa o le Atua. Ua iai lenā talitonuga ona o le sesē o le auala na latou faatatauina ai le tulafono lenei a le Tusi Paia: “Aua e te faaaogā ma le lē tatau le suafa o Ieova lou Atua, auā e lē faasaoina e Ieova mai i le faasalaga, o lē e faaaogā ma le lē tatau lona suafa.”—Esoto 20:7.

Ua faasā e lenei tulafono le taʻu fua o le suafa o le Atua. Ae pe e faasā ona taʻua le suafa o le Atua i se auala faaaloalo? E leai. O tane na tusiaina le Tusi Paia Eperu (Feagaiga Tuai), o ni tagata faamaoni na tausia le Tulafono a le Atua lea na tuu atu i le nuu o Isaraelu. Ae na latou taʻua soo le suafa o le Atua. O se faaaʻoaʻoga, na latou faaaofia lenā suafa i le tele o salamo na usuina e tagata tapuaʻi i le Atua. Na faatonuina e Ieova le Atua ona tagata tapuaʻi e valaau atu i lona suafa, ma na usitai i ai ana auauna faamaoni. (Ioelu 2:32; Galuega 2:21) O lea la, e masani Kerisiano i aso nei e taʻu faaaloalo le suafa o le Atua, e pei foʻi ona faia e Iesu.—Ioane 17:26.

Ina ua suia e tagata faaliliu o le Tusi Paia le suafa o le Atua i taʻu, e matuiā le mea sesē ua latou faia. Ua aliali mai ai o le Atua e aunoa o ia ma ni ona uiga māfana, peitaʻi ua timaʻi mai le Tusi Paia ina ia tatou “mafuta vavalalata atu” iā Ieova. (Iakopo 4:8) Seʻi mafaufau i sau uō mamae. Pe e māfana sa oulua mafutaga pe afai e te lē iloa lona igoa? E faapefea ona mafuta vavalalata tagata i le Atua, pe afai e lē iloa le suafa o le Atua, o Ieova? E lē gata i lea, a lē taʻua e tagata le suafa o le Atua, latou te lē iloa le uiga o lona suafa. O le ā le uiga o le suafa o le Atua?

 Na faamalamalama atu e le Atua le uiga o lona suafa i lana auauna faamaoni o Mose. Ina ua fesili atu Mose e uiga i le suafa o le Atua, na tali atu Ieova: “E Avea Aʻu ma Lē Ou te Loto i Ai.” (Esoto 3:14) O le faaliliuga lenei a le Tusi Paia a Rotherham: “E avea aʻu ma mea ou te loto i ai.” O lea la, e mafai ona avea Ieova ma so o se mea e manaʻomia ina ia faataunuu ai ana fuafuaga. E mafai foʻi ona faapogaia e Ieova so o se mea e tupu, e tusa ai o ana foafoaga ma ina ia faataunuuina lona finagalo.

Seʻi faapea la e mafai ona avea oe ma so o se mea lava e te loto i ai. O ā mea o le a e faia mo au uō? Afai e maʻi tigāina se tasi o au uō, e mafai ona avea oe o se fomaʻi agavaa e faamālōlōina o ia. Afai e lē lava le seleni a sau uō, e mafai ona avea oe o se tagata maumea e fesoasoani iā te ia. Peitaʻi ane, e iai le mea e gata ai lou malosi. E faapena i tatou uma lava. A o e suʻesuʻeina le Tusi Paia, o le a e maofa i le auala ua avea ai Ieova ma so o se mea lava e moomia ina ia faataunuu ai lona finagalo. E finagalo malie o ia e faaaogā lona mana e fesoasoani ai i tagata e alolofa iā te ia. (2 Nofoaiga a Tupu 16:9) O tagata e lē iloa le suafa o Ieova, latou te lē iloa ona uiga matagofie.

E manino le mata o le vai, e tatau ona iai le suafa o Ieova i le Tusi Paia. O le iloa o le uiga o lenā suafa ma taʻua lenā suafa i la tatou tapuaʻiga, e fesoasoani ina ia tatou faalatalata atili ai i lo tatou Tamā o i le lagi, o Ieova. *

^ pala. 3 Ina ia maua nisi faamatalaga i le uiga o le suafa o le Atua ma māfuaaga e ao ai ona faaaogā i le tapuaʻiga, tagaʻi i le itulau e 8-11 o le tusi Faalatalata Atu iā Ieova, lomia e Molimau a Ieova. Tagaʻi foʻi i le Faaopoopoga A4 i le lomiga ua toe teuteuina o le New World Translation, ma le Faaopoopoga 1 o le Faaliliuga a le Lalolagi Fou.

 

Faitau Atili

Pe e Iai se Suafa o le Atua?

E tele faalupega e ave i le Atua, e pei o le Silisili Ese, Alii, ma le Tupu o le vavau. Peitaʻi, e pe ā ma le 7,000 taimi o loo faaaogā ai le suafa patino o le Atua i le Tusi Paia.