Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O ā Aʻoaʻoga Moni a le Tusi Paia?

 MATAUPU E FITU

Le Faamoemoe mo Ē Pele ua Maliliu

Le Faamoemoe mo Ē Pele ua Maliliu
  • Pe faapefea ona tatou iloa o le a toe tutū mai ē ua maliliu?

  • O le ā le finagalo o Ieova i le toe tutū mai o ē ua maliliu?

  • O ai o le a toe tutū mai?

1-3. O le ā le fili o loo tuliloaina i tatou uma, ma aiseā tatou te lē toe popole ai pe a iloa le aʻoaʻoga a le Tusi Paia?

SEʻI faapea o loo e sola ese mai se fili leaga. E sili atu lona malosi ma lona saosaoa i lo oe. Ua e iloa le lē alofa o lenei fili, auā na e vaaitino a o ia fasiotia nisi o au uō. Ua e fiu e tamoʻe ae o loo latalata mai pea iā te oe. Ua foliga mai ua leai se mea e mafai ona fai. Peitaʻi, ua tulaʻi faafuaseʻi ane se tagata i ou autafa e laveaʻi iā te oe. E sili atu lona malosi na i lo lou fili, ma ua fai mai e fesoasoani iā te oe. Ioe, ua teʻa lou popole!

2 I se uiga talitutusa, e iai se fili o loo tuliloaina oe. O loo ia tuliloaina foʻi i tatou uma lava. E pei ona tatou aʻoaʻoina i le mataupu ua mavae, ua taʻua e le Tusi Paia le oti o le fili. E leai se isi e mafai ona sao mai i lenei fili. Ua tatou vāai a o aveesea e lenei fili ola o ē pele iā i tatou. Ae e sili atu le malosi o Ieova i lo le oti. O ia o le Atua alofa o Lē laveaʻi iā te i tatou, ma ua iai faamaoniga e mafai ona ia manumalo i lenei fili. Ua ia folafola mai o le a ia faaumatia e faavavau le oti. Ua aʻoaʻo e le Tusi Paia: ʻO le a faaumatia le fili mulimuli, o le oti lea.’ (1 Korinito 15:26) Maʻeu se tala fiafia!

 3 Seʻi o tatou tilofaʻia aafiaga e oo mai pe a maliu sē e pele iā i tatou. O le faia faapea, o le a tatou malamalama ai i se mea tāua e faafiafia loto. Na folafola e Ieova e toe soifua mai ē ua maliliu. (Isaia 26:19) O le a toe tutū mai i latou. O le faamoemoe lenā o le toe tū.

PE A MALIU SĒ E PELE

4. (a) E ala iā Iesu, e faapefea ona tatou iloa le silafaga a Ieova pe a maliu se tagata? (e) O ai na māfana la latou mafutaga ma Iesu?

4 Po ua maliu se tagata e te alofa i ai? E lē mafaamatalaina le tigā ma le ootia o o tatou faalogona. O taimi faapena e ao ai ona tatou saʻili i le Tusi Paia mo se faamāfanafanaga. (Faitau le 2 Korinito 1:3, 4.) Ua faailoa mai i le Tusi Paia le silafaga a Ieova ma Iesu e uiga i le oti. O Iesu lea na faailoaina mai lona Tamā, na malamalama lelei i tigā o le oti. (Ioane 14:9) A o iai i Ierusalema, na masani ona asiasi atu Iesu iā Lasalo ma ona tuafāfine o Maria ma Mareta, i le aai na lata ane o Petania. Na māfana la latou mafutaga. Fai mai le Tusi Paia: “E alofa Iesu iā Mareta, ma lona uso, ma Lasalo.” (Ioane 11:5) Ae na maliu Lasalo e pei ona tatou iloa i le mataupu ua teʻa.

5, 6. (a) O ā lagona o Iesu a o faatasi atu i aiga ma uō faavauvau o Lasalo? (e) Aiseā e lelei ai mo i tatou le faavauvau o Iesu?

5 O ā lagona o Iesu ina ua maliu lana uō? Fai mai le tala, na faatasi atu Iesu i aiga ma uō faavauvau o Lasalo. Na matuā ootia Iesu ina ua silasila atu iā i latou. “Ona ōi ai lea ma ua ootia lona finagalo.” E lē gata i lea, fai mai le tala na ʻtagi Iesu.’ (Ioane 11:33, 35) Pe na faanoanoa Iesu ona e leai sona faamoemoe? E leai. Na silafia e Iesu e iai le mea mataʻina o le a tupu. (Ioane 11:3, 4) Ae ui i lea, na ootia lava Iesu i faanoanoaga e māfua i le maliu o se tasi.

6 E iai le itu e lelei ai le faavauvau o Iesu. Ua tatou iloa  ai, e lē fiafia Iesu ma lona Tamā o Ieova i le oti. E mafai ona faatoʻilaloina e Ieova le Atua le fili lenei! Seʻi tatou vaai i le mea na faia e Iesu e ala i le mana o le Atua.

“LASALO E, INĀ SAU IA I FAFO!”

7, 8. Aiseā atonu na manatu ai tagata ua leai se isi mea e mafai ona fai iā Lasalo, a o le ā le mea na faia e Iesu?

7 Na teu Lasalo i se ana, ma na fetalai atu Iesu e aveese le maa na pupuni ai le gutu o le ana. E leʻi manaʻo i ai Mareta auā ua atoa aso e fā talu ona maliu Lasalo, ma e lē taumatea ua amata ona manogi lona tino. (Ioane 11:39) I le manatu o tagata, ua leai se isi mea e mafai ona fai.

Na matuā olioli tagata ina ua toe tū Lasalo.—Ioane 11:38-44

8 Ona fuli ese lea o le maa ma ua alaga atu Iesu: “Lasalo e, inā sau ia i fafo!” Ona ā lea? “Ona sau ai lea i fafo o le tagata na oti.” (Ioane 11:43, 44) Maʻeu le olioli o tagata! Na iloa e tuafāfine, tauaiga, uō ma tuaoi o Lasalo ua oti o ia. Ae faauta, ua toe soifua mai Lasalo o lē e pele iā i latou! Atonu na faigatā ona latou talitonu i le mea ua tupu. Peitaʻi, e lē taumatea na latou feasogi fiafia iā Lasalo. Ioe, ua toʻilalo le oti!

Na toe faatūina e Elia se tama a se fafine ua oti lana tane.—1 Tupu 17:17-24

9, 10. (a) Na faapefea ona faailoa mai e Iesu Lē e ana le mana lea na ia toe faatūina ai Lasalo? (e) O ā aogā o le faitau i tala a le Tusi Paia i le toe tū?

9 E leʻi fetalai Iesu na ia faia lenei vavega ofoofogia i sona lava malosi. I lana tatalo a o leʻi valaau atu iā Lasalo, na taʻua manino ai e Iesu o le mana o Ieova na māfua ai ona toe tutū mai tagata. (Faitau le Ioane 11:41, 42.) E lē na o Lasalo na toe faatūina e ala i le mana o Ieova. O loo taʻua i le Tusi Paia isi tagata e toʻavalu na toe tutū e ala i vavega. * O se mea faagaeeloto le faitau ma suʻesuʻe i nei tala. Ua tatou iloa ai e lē faailogatagata le Atua auā na ia  faatutūina ē matutua ma ē iti, o tane ma fafine, o tagata Isaraelu ma tagata o nuu ese. Maʻeu le fiafia o tagata, e pei ona taʻua i nei tala! O se faaaʻoaʻoga, na “matuā olioli” mātua o se teineitiiti ina ua toe faatūina o ia e Iesu. (Mareko 5:42) Ioe, e lē galo iā i latou le mea lelei ua faia e Ieova mo i latou.

Na toe faatūina e Peteru se fafine Kerisiano e suafa iā Toreka.—Galuega 9:36-42

10 Ae na toe maliliu ē na faatutūina e Iesu. Po o lona uiga la, e leai se aogā na toe faatutūina ai i latou? E leai. O tala nei a le Tusi Paia ua faamaonia ai upu moni tāua, ma tatou maua ai le faamoemoe.

MEA E ILOA MAI TALA O LE TOE TŪ

11. Ua faapefea ona faamaonia e le tala i le toe tū o Lasalo le moni o le aʻoaʻoga i le Failauga 9:5?

11 Ua aʻoaʻo mai e le Tusi Paia “o ē ua oti, latou te lē iloa se mea.” (Failauga 9:5) E lē o ola i latou i se isi nofoaga, ma e lē malamalama foʻi i se mea. Ua faamaonia lenei mea i le tala iā Lasalo. Ina ua toe soifua mai Lasalo, pe na fai mai ea na alu i le lagi? Pe na ia taʻua le alu i se afi e faapuapuagatia ai? E leai. E lē o taʻua i le Tusi Paia ni tala faapena a Lasalo. Na “lē iloa se mea” e Lasalo i aso e fā na oti ai. Na moe o ia i le oti.—Ioane 11:11.

12. Aiseā ua tatou mautinoa ai na toe tū Lasalo?

12 O le tala iā Lasalo tatou te iloa ai le moni o le toe tū, e lē o se talafatu. Na toe faatūina e Iesu Lasalo a o vaavaai ane le vao o tagata. E ui ina ʻinoʻino iā Iesu, ae e leʻi faafitia e taʻitaʻi lotu lenei vavega. Na latou fai mai: “O le ā sa tatou mea a fai, auā ua faia e lenei tagata [Iesu] le tele o faailoga?” (Ioane 11:47) E toʻatele tagata na ō atu e vaai iā Lasalo ina ua toe soifua mai. Na iʻu ina faatuatua le toʻatele o tagata iā Iesu. Na latou iloa i le mea na tupu iā Lasalo faamaoniga e iloa ai, na auina mai e le Atua Iesu. Ona o lea, na taupulepule ai nisi taʻitaʻi lotu  faauamaaa ina ia fasiotia Iesu ma Lasalo.—Ioane 11:53; 12:9-11.

13. Aiseā ua tatou talitonu ai e mafai e Ieova ona toe faatutūina ē ua maliliu?

13 Pe e mafai moni lava ona toe tutū mai ē ua maliliu? Ioe, auā na fetalai Iesu e iai le aso o le a toe tutū mai ai “i latou uma o loo i tuugamau.” (Ioane 5:28) O Ieova na faia mea uma lava. Pe e faigatā ona tatou talitonu e mafai ona toe faia e Ieova le tagata? Manatua e faalagolago i le manatuaina e Ieova o ē ua maliliu. Pe e mafai ona ia manatuaina ē pele iā i tatou? Ua faatumulia le vateatea i le anoanoaʻi o fetu, ae ua silafia e Ieova igoa o fetu taʻitasi! (Isaia 40:26) O lea, e mafai ona manatua e Ieova le Atua mea uma lava e uiga i ē pele ua maliliu, ma e mafai ona ia toe faaolaina i latou.

14, 15. O le ā le finagalo o Ieova i le faatutūina o ē ua maliliu, e pei ona taʻua e Iopu?

14 O le ā le silasila a Ieova i le toe tutū mai o ē ua maliliu? Ua taʻua i le Tusi Paia, e naunau o ia e toe faatutū ē ua feoti. Na fesili Iopu: “Pe a oti le tagata, pe e toe ola mai ea o ia?” O le uiga o le tala a Iopu, e faatalitali o ia i le tuugamau seʻi oo ina manatua o ia e le Atua. Na ia faapea atu iā Ieova: “E te valaau mai, ona ou tali atu ai lea iā te oe. Auā ua e matuā naunau i le galuega a ou aao.”—Iopu 14:13-15.

15 Ioe, e matuā naunau Ieova i le taimi e toe faatutūina mai ai ē ua maliliu. E faamāfanafanaloto lo tatou iloa o le finagalo lenā o Ieova. Ae faapefea le toe tū i le lumanaʻi? O ai o le a toe tutū mai, ma o fea e toe tutū ai?

“I LATOU UMA O LOO I TUUGAMAU”

16. O ā tulaga o le a soifua ai i latou e toe tutū mai?

16 E tele mea ua tatou iloa e uiga i le toe tū i le lumanaʻi, e ala i tala a le Tusi Paia. O tagata na toe tutū mai, na  toe faatasia ma ē pele iā i latou i le lalolagi. E faapena foʻi le toe tū i le lumanaʻi, ae e sili atu ona lelei. E pei ona tatou iloa mai le Mataupu e 3, e finagalo le Atua ia avea lenei lalolagi ma parataiso. O lea la, e lē toe tutū mai ē ua maliliu i se lalolagi e tumu i taua, solitulafono ma maʻi. O le a latou maua le avanoa e soifua ai e faavavau i se lalolagi filemu ma le fiafia.

17. O ai o le a toe tutū mai?

17 O ai o le a toe tutū mai? Na fetalai Iesu ʻe faalogo i latou uma o loo i tuugamau i lona leo, ma latou ō mai ai.’ (Ioane 5:28, 29) Ua faapea mai foʻi le Faaaliga 20:13: “Ua ave aʻe e le sami i latou na oti o iai, ua ave aʻe foʻi e le oti ma Tuugamau i latou na oti o iai.” (Tagaʻi i le Faaopoopoga “O le ā Lenei Mea e Taʻua o Seoli?”) O le a faagaogaoina tuugamau uma lava. O le a toe soifua mai le faitau piliona o tagata o loo tofafā i tuugamau. Na taʻua e Paulo: “E toetutū mai tagata amiotonu ma tagata amiolētonu.” (Galuega 24:15) O le ā le uiga o lenā mea?

E toe tutū mai ē ua maliliu ma aufaatasi atu i ē pele iā i latou i le Parataiso

18. O ai e aofia ai i “tagata amiotonu” o le a toe tutū mai, ma e faapefea ona aafia ai oe?

18 O “tagata amiotonu” e aofia ai le toʻatele o tagata o loo taʻua i le Tusi Paia, o ē na soifua a o leʻi afio mai Iesu i le lalolagi. E aofia ai Noa, Aperaamo, Sara, Mose, Ruta, Eseta ma le toʻatele o isi tagata. O loo taʻua nisi o nei tamā ma tinā faatuatua, i le Eperu mataupu e 11. Peitaʻi o “tagata amiotonu,” e aofia ai foʻi auauna a Ieova o loo maliliu i ona pō nei. Ona o le faamoemoe o le toe tū, ua tatou lē fefefe ai i le oti.—Eperu 2:15.

19. O ai “tagata amiolētonu,” ma o le ā le avanoa ua tuu atu i ai e Ieova?

19 Ae faapefea tagata e leʻi auauna pe e leʻi usiusitai iā Ieova ona latou te leʻi iloa o ia? O le a lē faagaloina le faitau piliona o ē “amiolētonu.” O le a toe tutū mai i latou  ma maua le avanoa e iloa ai le Atua moni, ma auauna iā te ia. A o faagasolo le afe tausaga, o le a toe faatutūina ai ē ua maliliu. O le a latou maua le avanoa e faatasi ai ma tagata faamaoni i le lalolagi e auauna atu iā Ieova. O se taimi matagofie o le a iai. E taʻua e le Tusi Paia lenā taimi o le Aso Faamasino. *

20. O le ā e faasino i ai le taʻu Kena, ma o ai e ō i ai?

20 Po o lona uiga ea e toe tutū mai tagata uma lava na soifua i le lalolagi? E leai. Ua taʻua i le Tusi Paia o loo i “Kena” isi tagata ua feoti. (Luka 12:5) O le taʻu Kena, na maua mai i se nofoaga na lafo i ai otaota i tuā pa o Ierusalema i aso anamua. O i inā na susunu ai tino oti ma otaota. Na lafo i ai tino oti o tagata na manatu i ai tagata Iutaia e lē tatau i ai se falelauasiga po o le toe tū. O lea la, ua talafeagai ona avea Kena ma faailoga o le faaumatiaga e faavavau. E ui lava e fai se vaega a Iesu i le faamasinoina o ē ola ma ē oti, a o Ieova o le Faamasino Sili. (Galuega 10:42) E lē toe faatūina e Ieova tagata ua ia silafia e amioleaga ma lē mananaʻo e sui a latou amio.

LE TOE TŪ I LE LAGI

21, 22. (a) O le ā le isi toe tū? (e) O ai na muamua lava toe tū mai o se agaga?

21 O loo faamatalaina foʻi i le Tusi Paia se isi toe tū, o le toe tū lea i le lagi i se tino agaga. E na o le tasi lava le faaaʻoaʻoga o lenei toe tū o loo tusia i le Tusi Paia, o Iesu Keriso lea.

22 Ina ua fasiotia e tagata Iesu, e leʻi tuua ai e Ieova Lona Alo faamaoni i le Tuugamau. (Salamo 16:10; Galuega 13:34, 35) Na toe faatūina e le Atua Iesu, ae e lē i se tino aano ma ivi. Na faamatala e Peteru ʻna fasiotia Iesu  i le tino, ae na toe faaola mai i le agaga.’ (1 Peteru 3:18) O se vavega ofoofogia. Na toe soifua mai Iesu o se agaga malosi! (Faitau le 1 Korinito 15:3-6.) O Iesu na muamua lava toe tū mai i lenei toe tū mamalu, ae e lē na o ia e faamanuiaina i lenei toe tū.—Ioane 3:13.

23, 24. O ai le “lafu mamoe itiiti” a Iesu, ma e toʻafia i latou?

23 Talu ai na silafia e Iesu ua toeitiiti ona toe afio lea i le lagi, na ia fetalai ai i ona soo faamaoni o le a “alu e sauni se nofoaga” mo i latou. (Ioane 14:2) Na taʻua e Iesu i latou e ō i le lagi, o lana “lafu mamoe itiiti.” (Luka 12:32) E toʻafia e iai i lenei vaega toʻaitiiti o Kerisiano faamaoni? Fai mai le aposetolo o Ioane i le Faaaliga 14:1: “Ona ou iloa lea, faauta foʻi! o loo tū mai le Tamaʻi Mamoe [Iesu Keriso] i le Mauga o Siona, o loo faatasi ma ia le selau fā sefulu fā afe, o ē ua tusia lona suafa ma le suafa o lona Tamā i o latou muāulu.”

24 O le a toe faatutūina aʻe i le lagi nei Kerisiano e 144,000 e aofia ai aposetolo faamaoni o Iesu. O afea e toe tutū mai ai? Na tusi le aposetolo o Paulo, o le a toetutū mai i latou i le taimi o le faatasi mai o Iesu, o lona uiga a o faagasolo lana pulega i le lagi. (1 Korinito 15:23) O le a tatou aʻoaʻoina i le Mataupu e 9, o loo tatou ola nei i le taimi lenā. O ē uma o loo totoe o le 144,000 e maliliu i o tatou aso, e faafuaseʻi lava ona toe faatutūina i le lagi. (1 Korinito 15:51-55) Peitaʻi ane, o le toʻatele o tagata, o loo iai le faamoemoe e toe tutū i le Parataiso i le lalolagi i le lumanaʻi.

25. O le ā le mea o le a talanoaina i le mataupu o sosoo mai?

25 Ioe, o le a faaumatia e faavavau e Ieova lo tatou fili o le oti! (Faitau le Isaia 25:8.) Ae atonu e te fesili, ʻO ā mea o le a faia e i latou e toe faatutūina i le lagi?’ O le a avea i latou o se vaega o le Malo matagofie i le lagi. O le a talanoaina atili lenei manatu i le mataupu o sosoo mai.

^ pala. 19 Mo nisi faamatalaga i le Aso Faamasino ma mea e faavae aʻe ai le faamasinoga, tagaʻi i le Faaopoopoga “O le ā Lenei Aso e Taʻua o le Aso Faamasino?