Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Teuteronome 6:1-25

6  “O poloaʻiga, o tulafono ma iʻuga o faamasinoga ia na poloaʻi mai ai Ieova lo outou Atua e aʻoaʻo ai outou,+ ina ia outou usiusitaʻi i ai i le laueleele e tou te ō atu e fai mo outou;  ina ia e mataʻu+ ai iā Ieova lou Atua ma tausia ana tulafono ma ana poloaʻiga uma ia ua ou poloaʻi atu ai iā te oe, o oe ma lou atalii ma le atalii o lou atalii,+ i aso uma o lou olaga, ina ia faaumiumi ai ou aso.+  Isaraelu e, ia e faalogo mai, ia tausia ma faia ia mea,+ ina ia sologa lelei ai mea uma mo oe,+ ina ia matuā faatoʻateleina ai outou, e pei ona folafola mai e Ieova le Atua o ou augātamā iā te oe,+ e faatatau i le laueleele lea e tafe ai le suāsusu ma le meli.  “Isaraelu e, faalogo mai ia: O Ieova lo tatou Atua, o Ieova e toʻatasi lava ia.+  Ia e alofa atu foʻi iā Ieova lou Atua ma lou lotoatoa,+ ma lou ola atoa,+ ma lou malosi atoa.+  Ia teu i lou loto upu ia ua ou poloaʻi atu ai iā te oe i le asō;+  ia e matuā aʻoaʻo soo ai i lau fanau,*+ ia e tautala ai pe a e nofo i lou fale, pe a e savali i le ala, pe a e taoto+ pe a e tulaʻi foʻi.  Ia e fusi ia mea i lou lima e fai ma faailoga,+ ia fai foʻi ma fusi* i lou muaulu;+  ia e tusi foʻi ia mea i pou o le faitotoʻa o lou fale ma i faitotoʻa o le aai.+ 10  “Pe a avatu oe e Ieova lou Atua i le laueleele na ia tautō ai i ou augātamā o Aperaamo, o Isaako, ma Iakopo e tuuina atu iā te oe,+ o le mea ua iai aai tetele ma le matagofie e te leʻi fausiaina,+ 11  ma fale ua tumu i mea lelei uma e te leʻi faatumuina, o vaieli na eliina ae e te leʻi elia, o togāvine ma laau olive e te leʻi totōina, e te ʻai ma e maʻona ai,+ 12  ia e leoleo iā te oe lava neʻi e faagaloina Ieova,+ o lē na aveeseina oe mai i Aikupito, mai i le mea sa nofo pologa ai. 13  E tatau ona e mataʻu iā Ieova lou Atua,+ ia e auauna iā te ia,+ ma o lona suafa foʻi e te tautō i ai.+ 14  Aua neʻi outou mulimuli i isi atua, o so o se atua o tagata o ē o loo siʻomia outou,+ 15  (auā o loo faatasi ma oe Ieova lou Atua, o le Atua lea e finagalo e tapuaʻi atu e tau lava o ia)+ neʻi matuā toʻasā Ieova lou Atua iā te oe,+ ma ia faaumatia ai oe mai i le fogāeleele.+ 16  “Aua tou te faia se mea e tofotofo ai iā Ieova lo outou Atua,+ e pei ona outou tofotofo iā te ia i Mase.+ 17  E ao ona outou tausia poloaʻiga a Ieova lo outou Atua,+ o ana faamanatuga,+ ma ana tuutuuga+ na ia poloaʻi mai ai iā te oe.+ 18  E ao ona e faia le mea ua tonu ma lelei i le silafaga a Ieova, ina ia sologa lelei ai mea uma mo oe,+ ma e ulu atu ma fai mo oe le laueleele lelei lea na tautō ai Ieova i ou augātamā,+ 19  e ala i le aveesea o ou fili uma mai i ou luma e pei ona folafola mai e Ieova.+ 20  “Pe afai e fesili mai lou atalii iā te oe i se aso o i luma+ e faapea, ‘O le ā le uiga o faamanatuga, o tuutuuga, ma iʻuga o faamasinoga na poloaʻi mai ai Ieova lo tatou Atua iā te outou?’ 21  ona e tali atu lea i lou atalii, ‘Na matou nofo pologa iā Farao i Aikupito ae na aumaia i matou e Ieova mai i Aikupito i le aao malosi.+ 22  Na tuuina pea e Ieova iā Farao ma lona aiga uma o faailoga ma vavega+ tetele ma mataʻutia i Aikupito, a o matou vāai i ai.+ 23  Na ia aveesea i matou mai i lea mea ma aumaia i matou i inei, ina ia tuuina mai iā i tatou le laueleele lea na ia tautō ai i o tatou augātamā.+ 24  O le mea lea na poloaʻi mai ai Ieova iā i matou ia tausia nei tulafono uma,+ ia matataʻu foʻi iā Ieova lo tatou Atua mo lo tatou lelei i aso uma,+ ma ola ai pea e pei ona tatou ola i le asō.+ 25  E taʻua i tatou o tagata amiotonu+ pe a tausia ia poloaʻiga uma i luma o Ieova lo tatou Atua e pei ona ia poloaʻi mai ai iā i tatou.’+

Faamatalaga Pito i Lalo

I le gagana Eperu, o “lou atalii.”
I le gagana Eperu, “i le va o mata.”