Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Teuteronome 5:1-33

5  Ona aami lea e Mose o Isaraelu+ uma ma faapea atu iā i latou: “Isaraelu e, ia faalogo mai i tulafono ma iʻuga o faamasinoga+ ou te fai atu ai iā te outou i le asō, ma e ao ona outou aʻoaʻo i ai ma ia toʻaʻaga e fai ia mea.+  Na osia e Ieova lo tatou Atua se feagaiga ma i tatou i Horepa.+  E lē o o tatou augātamā na osia ai e Ieova lenei feagaiga, a o tatou lava, o i tatou uma o loo ola mai nei i le asō.  Na faafesagaʻi Ieova ma outou ma fetalai mai i le mauga mai i totonu o le afi.+  Na ou tū i le va o Ieova ma outou i lenā taimi+ ina ia taʻu atu le afioga a Ieova iā te outou, (auā na outou fefefe ona o le afi ma lē ō aʻe ai i le mauga,)+ e faapea,  “ ‘O aʻu o Ieova lou Atua+ o lē na aumaia oe mai i Aikupito, mai i le mea sa nofo pologa ai.+  Aua lava neʻi fai mo oe ni atua ese e faatavā mai iā te aʻu.+  “ ‘Ia aua neʻi e faia se tupua ua tā,+ o se faatusa+ o so o se mea o i le lagi i lugā, po o se mea i lalo nei i le laueleele po o se mea i le vai i lalo o le laueleele.  Aua e te ifo i ai pe auauna i ai,+ auā o aʻu o Ieova lou Atua, o le Atua e manaʻo e tapuaʻi mai e tau lava o aʻu,+ o lē na te aumaia le faasalaga i atalii ona o mea sesē a o latou tamā, e oo i le tupulaga lona tolu ma le fā, o i latou o ē e ʻinoʻino mai iā te aʻu;+ 10  ae ou te alofa faamaoni i le afe o tupulaga ona o ē e alolofa mai iā te aʻu ma tausi i aʻu poloaʻiga.+ 11  “ ‘Aua e te faaaogā ma le lē tatau le suafa o Ieova lou Atua,+ auā e lē faasaoina e Ieova mai i le faasalaga o so o se tasi e faaaogā ma le lē tatau lona suafa.+ 12  “ ‘Ia tausia le aso sapati ma faapaiaina, e pei ona poloaʻi mai ai o Ieova lou Atua iā te oe,+ 13  ae e tatau ona e galue i aso e ono ma faia ai au galuega uma.+ 14  Ae o le aso lona fitu, o le sapati lea iā Ieova lou Atua.+ Aua e te faia ai se galuega,+ o oe po o lou atalii, po o lou afafine, po o lau tane pologa, po o lau teine pologa, po o lau povi poʻa, po o lau asini, po o se tasi o au manu lalata, po o se tagata ese o loo aumau i totonu o faitotoʻa o le aai,+ ina ia mālōlō ai lau tane pologa ma lau teine pologa e pei lava o oe.+ 15  E ao ona e manatua na fai foʻi oe ma pologa i Aikupito,+ ma na aumaia oe e Ieova lou Atua mai i lea mea i lona aao malosi ma lona aao faaloaloa.+ O le mea lea na poloaʻiina ai oe e Ieova lou Atua ia tausia le aso sapati.+ 16  “ ‘Ia e āva i lou tamā ma lou tinā+ e pei ona poloaʻi mai ai Ieova lou Atua iā te oe; ina ia faaumiumi ai ou aso, ina ia manuia ai foʻi oe+ i le laueleele o le a foaʻiina mai e Ieova lou Atua iā te oe. 17  “ ‘Aua e te fasioti tagata.+ 18  “ ‘Aua foʻi e te mulilua.+ 19  “ ‘Aua foʻi e te gaoi.+ 20  “ ‘Aua foʻi e te molimau i ni mea pepelo faasaga i lou tuaoi.+ 21  “ ‘Aua e te manaʻo i le avā a lou tuaoi.+ Aua foʻi e te manaʻonaʻo fua i le fale o lou tuaoi, po o lona fanua, po o lana tane pologa, po o lana teine pologa, po o lana povi poʻa, po o lana asini, po o se isi lava mea a lou tuaoi.’+ 22  “O tulafono ia na fetalai mai ai Ieova i lo outou faapotopotoga atoa a o iai o ia i le mauga mai i totonu o le afi,+ o le ao ma le pogisa tele, ma se siʻufofoga leotele, ma e na te leʻi faaopoopo atu i ai nisi mea; mulimuli ane ona ia tusia lea o ia mea i papamaa e lua ma tuuina mai iā te aʻu.+ 23  “Ina ua outou faalogo i le siʻufofoga mai i totonu o le pōuliuli, a o mū le mauga i le afi,+ na outou faalatalata mai iā te aʻu, o ulu uma o o outou ituaiga ma o outou toeaina. 24  Ona outou faapea mai lea, ‘Ua faaali mai e Ieova lo tatou Atua lona mamalu ma lona silisili ese, ua matou faalogo foʻi i lona siʻufofoga mai i totonu o le afi.+ O le asō ua matou vāai ai ua fetalai le Atua i le tagata ma ua ola pea o ia.+ 25  Aiseā o le a matou feoti ai, auā atonu e faaumatia i matou e lenei afi?+ Afai matou te toe faalogo i le siʻufofoga o Ieova lo tatou Atua, e mautinoa matou te feoti.+ 26  Auā o ai se tasi mai i tagata uma o lē na faalogo i le siʻufofoga o le Atua+ soifua o fetalai mai i totonu o le afi e pei ona sa matou faalogo ai ma ola pea? 27  Ia e faalatalata atu ma faalogo i mea uma ua fetalai mai ai Ieova lo tatou Atua; ma ia e faamatala mai iā i matou o mea uma ua fetalai mai ai Ieova lo tatou Atua iā te oe,+ ma e matou te faalogo i ai ma faia.’ 28  “Na faafofoga Ieova i a outou upu ina ua outou talanoa mai iā te aʻu, ma ua toe fetalai mai Ieova iā te aʻu, ‘Ua ou faalogo i faamatalaga a lenei nuu ua fai atu iā te oe. E lelei upu ua latou fai atu ai.+ 29  Maʻimau! pe ana iā i latou le loto e matataʻu mai ai iā te aʻu,+ ma tausia pea aʻu poloaʻiga,+ ona sologa lelei ai pea lea o mea mo i latou ma o latou atalii.+ 30  Ia e fai atu iā i latou: “Ia toe foʻi atu i o outou faleʻie.” 31  A o oe ia e tū faatasi ma aʻu i inei, ma ou te taʻu atu iā te oe o poloaʻiga, o tulafono ma iʻuga o faamasinoga uma e ao ona e aʻoaʻo atu ai iā i latou,+ e ao foʻi ona latou faia i le laueleele ou te avatu e fai mo latou.’ 32  E ao iā te outou ona tausia ia mea e pei ona poloaʻi mai ai Ieova lo outou Atua iā te outou.+ Aua tou te liliu i le itu taumatau po o le itu tauagavale.+ 33  Ia outou savavali i le ala ua poloaʻi mai ai Ieova lo outou Atua iā te outou,+ ina ia outou ola ai ma sologa lelei ai mea uma iā te outou,+ ma faaumiumi ai o outou aso i le laueleele lea o le a fai mo outou.

Faamatalaga Pito i Lalo