Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Teuteronome 32:1-52

32  “Le lagi e, faalogo mai ia, ae seʻi oʻu tautala atu; Ia faalogo mai le lalolagi i upu a loʻu gutu.+   O aʻu faatonuga e māʻuluʻulu e pei o le timu,+ O aʻu upu e sinasina e pei o le sau,+ E pei o le timu maamaa i luga o le mutia+ E pei foʻi o timuga tetele i luga o vao.+   Auā e ao ona ou folafola atu le suafa o Ieova.+ Ia outou viviia le silisili ese o lo tatou Atua!+   O le Papa, e atoatoa ona lelei ana gaoioiga,+ Auā e tonu ona ala uma.+ O le Atua faamaoni,+ e lē o iā te ia se faiga lē tonu;+ E amiotonu ma amio saʻo o ia.+   O i latou lava, ua latou faia ni gaoioiga e leaga ai;+ E lē o i latou o lana fanau, o lo latou ila o i latou na māfua ai.+ O se tupulaga faapiʻopiʻo ma le faaʻoleʻole!+   Aiseā ua faaauau ai ona outou faia faapea iā Ieova,+ O tagata vālea ma le lē atamamai?+ Pe e lē o ia ea o lo outou Tamā o lē na faia oe,+ O Ia o lē na faia oe ma faatumauina oe?+   Ia manatua aso ua mavae,+ Ia manatunatu i tausaga ua tuanaʻi mai i lea tupulaga i lea tupulaga; Ia fesili i lou tamā, ma e na te taʻuina mai iā te oe;+ I o outou toeaina foʻi, ma e latou te taʻuina mai iā te oe.+   Na tuuina mai e le Silisili ese se tofi i nuu,+ Na ia faataapeapeina foʻi atalii o Atamu, o le tasi mai i le isi,+ Ona ia faatulagaina lea o tuaoi o le nuu+ E tusa ma le aofaʻiga o le fanauga a Isaraelu.+   Auā o le vaega a Ieova o lona nuu lea;+ O Iakopo o le tofi lea ua ia maua.+ 10  Ua ia maua o ia i se fanua valevalenoa,+ I se toafa+ tuufua e fetagisi ai manu tataa. Na ia siʻomia+ o ia ma tausia o ia,+ Ua puipui iā te ia, e pei o ia o le ʻiʻoimata o lona mata.+ 11  E pei ona aʻoaʻo e le aeto o lana toloaʻi ina ia iloa felelei, E faapepepepe i luga o lana toloaʻi,+ E na te faaloloa ona apaʻau ma ave lana toloaʻi, E na te ave lana toloaʻi i luga o ona apaʻau,+ 12  Sa faapea foʻi iā Ieova e toʻatasi ona taʻitaʻia pea o Iakopo,+ Na leai foʻi se atua ese na faatasi ma ia.+ 13  Na ia faatiʻetiʻe iā te ia i mea maualuluga o le lalolagi,+ Ina ia ʻai i fua o le laueleele.+ Na ia fafaga iā te ia i le meli mai i le papa,+ Ma le suāuu mai i le papa malō;+ 14  Na ia avatu le pata o le lafu povi ma le suāsusu o le lafu mamoe+ Faatasi ma mamoe e sili ona pepeti, O le mamoe poʻa, o le ituaiga o Vasana, ma ʻoti poʻa+ Faatasi ma le saito e sili ona lelei;+ Ma le toto o le vine na e inu ai o le uaina lea.+ 15  Ina ua oo ina lapoʻa Iesuruna,*+ ona ia aa atu lea.+ Iesuruna e, ua e lapoʻa, ua telē lou tino, ua e ʻai faaloloto.+ Ona ia tuulafoaʻiina lea o le Atua, o lē na faia o ia,+ Ua ʻinoʻino foʻi o ia i le Papa+ o lona olataga. 16  Na amata ona latou faatupu iā te ia le fuā+ ona o atua ese;+ Na latou faatigā pea i lona finagalo i mea inosia.+ 17  Na latou faia taulaga i temoni, ae e lē o le Atua,+ O atua e latou te lē iloa,+ O atua fou faatoʻā aʻe mai,+ O atua e leʻi masani ai o outou augātamā. 18  Ua e faagaloina le Papa o lē na fai ma ou tamā,+ Ua amata ona e faagaloina foʻi le Atua, o Lē na fanaua mai oe ma le tigā a fanau.+ 19  Ina ua silasila mai i ai Ieova, ona ia lē faaaloalo lea iā i latou,+ Ona o le faaonoono o ona atalii ma ona afafine iā te ia. 20  Ua fetalai mai o ia, ‘Ou te natia oʻu mata mai iā i latou,+ Seʻi oʻu vaai po o ā mea o le a latou iʻu i ai. Auā o i latou o se tupulaga ulu malō,+ O atalii e lē o iai le faamaoni.+ 21  O i latou, ua latou faaoso aʻe loʻu fuā ona o atua e lē aogā;+ Ua latou faaonoono mai iā te aʻu i o latou tupua e lē aogā;+ O aʻu, ou te faaoso lo latou fuā ona o tagata e lē aogā;+ Ou te faatigā o latou loto i se nuu vālea.+ 22  Auā ua tafu mai le afi i loʻu ita+ E mū ifo foʻi e oo lava i le Tuugamau,* o le nofoaga e sili ona maulalo,+ E faatamaʻia ai le lalolagi ma ona fua+ E mū ai foʻi faavae o mauga.+ 23  Ou te faateleina mala iā i latou;+ Ou te faauma aʻu aū iā i latou.+ 24  E vaivai i latou i le fia aai+ ma o le a ʻaina i latou e le maualuga o le fiva+ Ma le faaumatiaga mataʻutia.+ Ou te auina atu foʻi iā i latou o manufeʻai e sisili nifo,+ Faatasi ma gata uogo o le efuefu.+ 25  O le a faanoanoa i latou i fafo ona o le pelu,+ Ma le fefe i totonu,+ O le tauleʻaleʻa atoa ma le teine muli,+ O le tamaitiiti faatasi ma le tamāloa ulusinā.+ 26  Sa tatau ona ou faapea atu: “Ou te faataapeapeina i latou,+ Ou te faia ina ia lē toe taʻua i latou e tagata,”+ 27  Ae ou te leʻi manaʻo e tauemu mai loʻu fili iā te aʻu,+ Ina neʻi faauiga sesē e o latou fili lea mea,+ Ma latou faapea ane: “E sili lo tatou lima malosi,+ Ma e lē o Ieova na faia ia mea uma.”+ 28  Auā o i latou o se nuu e aunoa ma se faautaga poto,+ E leai lava se malamalama iā i latou.+ 29  Maʻimau pe ana latou atamamai!+ Ona latou mafaufau loloto ai lea i lenei mea.+ E latou te manatunatu i lo latou iʻuga.+ 30  E faapefea i se tasi ona ia tuliloa le toʻaafe, Ma e tutuli e le toʻalua le sefulu afe?+ E lē mafai seʻia vaganā ua faatauina atu i latou e lo latou Papa+ Ma e tuuina atu i latou e Ieova i o latou fili. 31  Auā o lo latou papa, e lē pei o lo tatou Papa,+ O le faaiʻuga foʻi lenā a o tatou fili.+ 32  Auā o o latou vine, e mai i le vine o Sotoma Ma e mai foʻi i fanua malifa o Komoro.+ O o latou fuifui vine o vine oona, O o latou fuifui e magiagia ai nifo.+ 33  O a latou uaina, o mea oona ia o gata lapopoʻa Ma le ʻona mataʻutia o asipi.*+ 34  Pe e lē o teua ea ia mea iā te aʻu, Ma ua faamaufaailogaina ia mea i loʻu fale teuoloa?+ 35  O aʻu e faia le tauimasui ma taui atu.+ E tautevateva o latou vae i le taimi atofaina,+ Auā ua latalata le aso o lo latou malaia,+ Ma ua vave ona faaloloʻi mai mea e oo iā i latou.’+ 36  Auā o le a faamasinoina e Ieova lona nuu+ Ma o le a faanoanoa o ia ona o ana auauna,+ Auā o le a silafia e ia ua mavae atu lo latou malosi Ae e na o lē e leai sona puipuiga ma ua lē aogā o le a iai. 37  O le a fetalai mai lava o ia, ‘O fea o iai o latou atua,+ O le papa na latou sulufaʻi i ai,+ 38  O ai sa masani ona aai i le gaʻo o a latou taulaga,+ O ai foʻi na inuina le uaina o a latou taulaga i meainu?+ Ia ō atu i latou ma fesoasoani iā te outou.+ Ia avea i latou ma lafitaga mo outou.+ 39  Ia outou iloa nei, o aʻu, o aʻu lava o le Atua+ E leai ni atua e faatasi ma aʻu.+ Ou te fasiotia, ma ou te faaolaina.+ Ou te matuā faamanuʻalia,+ ma ou faamālōlōina,+ E leai foʻi se tasi na te laveaʻi mai i loʻu lima.+ 40  Auā ou te sii loʻu lima i le lagi i se tautoga,+ Ma ou fai ane: “Talu ai o loo ola aʻu e faavavau,”+ 41  Pe a ou faamaʻai lau pelu iila,+ Ma tago atu loʻu lima i le faamasinoga,+ Ou te tauimasui atu i ē e tetee mai+ Ma ou te taui atu i ē ua matuā ʻinoʻino mai iā te aʻu.+ 42  Ou te faaonā aʻu aū i le toto,+ Ae o le a ʻaina tino e laʻu pelu,+ Ma le toto o ē ua fasiotia ma ē ua ave faapagota, Ma ulu o taʻitaʻi o fili.’+ 43  Ia olioli outou nuu uma faatasi ma lona nuu,+ Auā na te tauimasui i le toto o ana auauna,+ Ma e na te tauimasui atu i ē e tetee mai+ E na te faia foʻi le togisala o le laueleele o lona nuu.” 44  Ona sau ai lea o Mose ma fai atu upu uma o lenei pese a o faalogo mai i ai le nuu,+ o ia ma Hosea* le atalii o Nuno.+ 45  Ua māeʻa ona taʻu atu e Mose nei upu uma iā Isaraelu uma, 46  ona ia toe fai atu lea iā i latou: “Ia outou manatua i o outou loto upu uma ia ua ou tautala atu ai e fai ma lapataʻiga iā te outou i le asō,+ ma ia faatonuina a outou fanau ia tōʻaaga e tausia upu uma o lenei tulafono.+ 47  Auā e lē o se upu faatauvaa ia mo outou,+ ae e faalagolago i ai lo outou ola,+ ma o upu foʻi ia, e faaumiumi ai o outou aso i le laueleele lea tou te sopoʻia ai Ioritana e fai mo outou.”+ 48  Ua toe fetalai mai Ieova iā Mose i lea lava aso e faapea: 49  “Ia e alu atu i le mauga o Aperima,+ le Mauga o Nepo+ lea e iai i le laueleele o Moapi, o loo fesagaʻi ma Ieriko, ma vaai atu ai i le laueleele o Kanana, lea ou te tuuina atu i le fanauga a Isaraelu e fai mo latou.+ 50  Ona e maliu ai lea i le mauga lea e te alu aʻe ai, ma faatasia ma ou tagata,+ e pei ona maliu lou uso o Arona i le Mauga o Horo,+ ma ua faatasia ma ona tagata; 51  auā na oulua lē faia o oulua tiute tauave iā te aʻu+ i totonu o le fanauga a Isaraelu i vai o Meripa+ i Katesa, i le toafa o Tisina; talu ai na oulua lē faapaiaina aʻu i luma o le fanauga a Isaraelu.+ 52  E te vaai mamao atu foʻi i le laueleele, ae e te lē alu i ai i lenā laueleele lea ou te tuuina atu i le fanauga a Isaraelu.”+

Faamatalaga Pito i Lalo

O lona uiga, “o lē ua amio saʻo.” O se igoa faapitoa o Isaraelu.
Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
O se ituaiga o gata uogo e maua i Asia ma Aferika.
O lona uiga, “o le faaolataga po o le laveaʻiina.” O le igoa muamua lenā o Iosua.