Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Teuteronome 28:1-68

28  “Afai foʻi e te matuā faalogo i le siʻufofoga o Ieova lou Atua, e ala i le toʻaga e tausia ana poloaʻiga uma ua ou poloaʻi atu ai iā te oe i le asō,+ e faasilisilia lava oe e Ieova lou Atua i nuu uma o le lalolagi.+  E oo foʻi iā te oe nei faamanuiaga uma, ma maua oe,+ pe afai e te faalogo pea i le siʻufofoga o Ieova lou Atua:  “O le a faamanuia oe i le aai,+ o le a faamanuia foʻi oe i le fanua.+  “O le a faamanuia oe i le fanaua mai o ni fanau,+ i fua o lou fanua ma fanau o au manu lalata,+ o fanau foʻi o lau lafu povi atoa ma fanau o lau lafu mamoe.+  “O le a faamanuia lau ato+ ma lau mea e palu ai falaoa.+  “O le a faamanuia oe pe a e sau i totonu, o le a faamanuia foʻi oe pe a e alu i fafo.+  “O le a faapogaia e Ieova le faatoʻilaloina i ou luma o ou fili o ē e siitaua iā te oe.+ E tasi le auala e latou te siitaua mai ai iā te oe, ae e fitu auala e latou te sosola ese ai mai i ou luma.+  O le a faatonuina e Ieova mo oe le faamanuiaina o au mea uma e te faaputuina,+ ma galuega uma e te faia,+ e na te faamanuia foʻi oe i le laueleele e tuuina mai e Ieova lou Atua iā te oe.  O le a faia oe e Ieova o se nuu paia mo ia lava,+ e pei ona ia tautō ai iā te oe,+ pe a faaauau ona e tausia poloaʻiga+ a Ieova lou Atua, ma savali i ona ala. 10  O le a iloa ai e nuu uma o le lalolagi ua taʻua oe i le suafa o Ieova,+ e latou te fefefe foʻi iā te oe.+ 11  “O le a matuā faateleina e Ieova le manuia i le fanaua o lau fanau+ ma le fanau a au manu lalata, ma fua o lou fanua,+ i le laueleele na tautō ai Ieova i ou augātamā e tuuina mai iā te oe.+ 12  O le a tatala atu e Ieova iā te oe ana fale teuoloa lelei, o le lagi lea, e na te faatotō ifo le timu i lou fanua i ona tau,+ e na te faamanuia foʻi i galuega uma a ou lima;+ e te nonō atu mea i le tele o atunuu, a o oe e te lē nonō mai.+ 13  O le a tuuina e Ieova oe i le ulu ae lē i le siʻusiʻu; ma e na o le pito i luga o le a e iai,+ ae e te lē alu ifo i le pito i lalo, auā ua e usitaʻi pea i poloaʻiga+ a Ieova lou Atua, lea ua ou poloaʻi atu ai iā te oe i le asō e tausia ma fai. 14  Aua neʻi e liliuese i le itu taumatau po o le itu tauagavale+ mai i upu uma ua ou poloaʻi atu ai iā te outou i le asō, ina neʻi outou mulimuli atu i isi atua ma auauna iā i latou.+ 15  “Afai e te lē faalogo i le siʻufofoga o Ieova lou Atua e ala i le toʻaga e tausia ana poloaʻiga ma ana tulafono ua ou poloaʻi atu ai iā te oe i le asō, e oo iā te oe ia malaia uma ma maua ai oe:+ 16  “O le a malaia oe i le aai,+ ma o le a malaia foʻi oe i le fanua.+ 17  “O le a malaia lau ato+ ma lau mea e palu ai falaoa.+ 18  “O le a malaia lou fanaua mai o fanau,+ ma le fua o lou fanua+ ma fanau o lau lafu povi atoa ma fanau o lau lafu mamoe.+ 19  “O le a malaia oe pe a e sau i totonu, o le a malaia foʻi oe pe a e alu i fafo.+ 20  “O le a auina mai e Ieova iā te oe le malaia,+ o le fenuminumiaʻi+ ma le aʻoaʻiga+ i mea uma e te taumafai e fai, seʻia faaumatia ma vave ona faafanoina oe, ona o le leaga o au gaoioiga ma ua e lafoaʻia ai aʻu.+ 21  O le a faapogaia e Ieova le faamaʻi e pipii iā te oe seʻia uma ona ia faaumatia oe mai i le laueleele, lea e te alu i ai e fai mo oe.+ 22  O le a taia oe e Ieova i le māmāpala,+ o le maualuga o le fiva, mūmū o le tino ona o le siama, vevela o le tino ona o le fiva, o le pelu,+ o le lāmala+ ma le polopologā,+ e tuliloa oe e ia mea seʻia faaumatia ai oe. 23  O le a avea foʻi le lagi i luga aʻe o lou ulu ma ʻapamemea ma le lalolagi i ou lalo ifo ma uʻamea.+ 24  O le a faatotō ifo e Ieova i lou laueleele le pauta ma le pefu e fai ma timu. E alu ifo i ou luga mai i le lagi seʻia faaumatia ai oe. 25  “O le a faapogaia e Ieova lou faatoʻilaloina i luma o ou fili.+ E tasi le auala e te alu atu ai e siitaua iā i latou ae e fitu auala e te sola ese ai i o latou luma; ma o le a matuā fefefe malo uma o le lalolagi pe a latou iloa mea leaga ua oo iā te oe.+ 26  E fai lou tino oti ma meaʻai a manufelelei uma o le lagi atoa foʻi ma manu o le fanua, e leai se tasi e faamataʻu i ai.+ 27  “O le a taia oe e Ieova i le maʻi sua o Aikupito,+ o le fula,* o le mūmū mageso ma poʻu, ia o le a e lē toe malosi ai. 28  O le a taia oe e Ieova i le faalētonu o le mafaufau,+ o le leaga o le vaai+ ma le fenuminumiaʻi o le loto.+ 29  O le a avea oe ma sē e tautagotago i le tutonu o le lā, e pei o le tagata tauaso o loo tautagotago i le pōuliuli,+ ma e lē sologa lelei ou ala; o le mea e oo iā te oe o le ave faagaoi lea o au mea ma faoa foʻi i aso uma, ae e leai se tasi e laveaʻi iā te oe.+ 30  E te faamau i se fafine, ae e toso o ia e se isi tamāloa.+ E te fausia se fale ae e te lē nofo ai.+ E te totō ni togāvine ae e lē taitai ona e faaaogāina.+ 31  E fasia lau povi poʻa a o e vaai i ai, ae e te lē ʻai ai. E gaoia lau asini mai i ou luma, ae e te lē toe mauaina. E avatu foʻi au mamoe i ou fili ae e leai se faaola mo oe.+ 32  E avatu ou atalii ma ou afafine i nisi tagata,+ e te iloa atu foʻi ma e te naunau e toe aumaia i latou, ae o le a leai se malosi i ou lima.+ 33  O fua o lou laueleele ma au faaeleeleaga uma o le a aai ai tagata e te lē iloa;+ ma e pau le mea e oo iā te oe o le ave faagaoi pea o au mea ma sauāina oe i aso uma.+ 34  E oo ina faalētonu lou mafaufau i mea e vaai i ai ou mata.+ 35  “O le a taia e Ieova oe i le papala leaga i ou tuli ma ou vae, lea e mafai ona e oti ai, o le maʻi e te lē toe malosi ai, mai i ou alofivae e oo i le tumuaʻi o lou ulu.+ 36  O le a faasavali e Ieova oe+ ma lou tupu,+ o lē o le a e tofia e pule iā te oe i se atunuu e te lē iloa, o oe po o ou augātamā; o le a e auauna i inā i isi atua, o atua ua faia i laau ma maa.+ 37  E fai oe ma mea e faateʻia ai tagata,+ o se faaupuga masani+ ma faifaiga i nuu uma, o le a taʻitaʻiina i ai oe e Ieova. 38  “E tele fatu e te totōina i le fanua, ae laʻitiiti mea e te aoaoina+ auā o le a ʻai e sē akerise.+ 39  E te totōina togāvine ma galueaʻiina, ae e te lē inu i se uaina ma e te lē aoaoina foʻi se mea,+ auā e ʻaina uma e anufe.+ 40  O le a iai laau o le olive iā te oe i lou fanua uma, ae e lē uuina lou tino i se suāuu, auā o le a toʻulu ou olive.+ 41  E te fanaua ou atalii ma afafine, ae e lē fai pea i latou ma au fanau, auā e ave faapagota i latou.+ 42  O le a ʻai e iniseti e feoaʻi ou laau uma ma fua o lou fanua. 43  O le a atili maualuga iā te oe le tagata ese e aumau iā te oe, a o oe, e atili maulalo ai.+ 44  O ia lea na te nonō atu iā te oe, a o oe, e te lē nonō atu iā te ia.+ E fai o ia ma ulu, a o oe, e fai ma siʻusiʻu.+ 45  “E oo iā te oe nei malaia+ uma ma tuliloa iā te oe, ma maua ai oe seʻia oo ina faaumatia oe,+ auā ua e lē faalogo i le siʻufofoga o Ieova lou Atua, e ala i lou lē tausia o ana poloaʻiga ma ana tulafono na ia poloaʻi atu ai iā te oe.+ 46  E ao ona iai pea ia mea iā te oe ma lau fanau e fai ma faailoga ma lapataʻiga i aso uma,+ 47  talu ai e te leʻi auauna iā Ieova lou Atua ma le loto olioli ma le fiafia,+ ona o le anoanoaʻi o mea.+ 48  E te auauna i ou fili+ o ē o le a aauina atu e Ieova e faasagatau iā te oe faatasi ma le fia ʻai+ ma le fia inu, o le lē lavalavā ma le mativa i mea uma; e na te tuu foʻi le amo uʻamea i ou tauʻau seʻia oo ina faaumatia oe e ia.+ 49  “E faatulaʻi e Ieova se nuu mai i se mea mamao+ e faasagatau iā te oe, mai i le isi pito o le lalolagi, e pei ona puʻe faafuaseʻi e se aeto ana meaʻai,+ o se nuu e te lē malamalama i lana gagana,+ 50  o se nuu foliga pāū,+ e lē agalelei i se toeaina pe alofa foʻi i se tauleʻaleʻa.+ 51  E latou te aai i fanau o au manu lalata ma fua o lou fanua seʻia faaumatia oe,+ e latou te lē faatotoeina mo oe ni fatu, o uaina fou po o suāuu, po o fanau a au povi, po o fanau foʻi a au mamoe, seʻia latou faaumatia oe.+ 52  E latou te siʻomia oe i totonu o ou aai seʻia solofa i lalo ou pā maualuluga ma malupuipuia, ia e te faatuatuaina i ou laueleele uma, e moni, e latou te siʻomia oe i totonu o ou aai i lou laueleele uma, lea ua tuuina mai e Ieova lou Atua iā te oe.+ 53  Ona e ʻaia lea o au fanau, o tino o ou atalii ma ou afafine,+ o ē ua tuuina mai e Ieova lou Atua iā te oe, auā o le a matuā omia ma faapuapuagatia ai oe talu ai o le a siʻomia oe e ou fili. 54  “A o se tane ua iā te oe e agamalu ma na tausi aʻe ma le faapelepele, o le a ʻinoʻino+ o ia i lona uso ma lana avā faapelepele, ma ona atalii o loo totoe, 55  ma na te lē avatu i se tasi o i latou na se fasi tino o ona atalii o le a ia ʻai ai, auā e leai se mea o totoe iā te ia, ona e matuā omia ma faapuapuagatia oe, auā e siʻomia oe e ou fili i totonu o ou aai.+ 56  A o le fafine ua iā te oe e agavaivai ma na tausi aʻe ma le faapelepele, o lē e lē taitai ona tū ona alofivae i le palapala ona na tausi faapelepele o ia ma ona o lona agavaivai,+ o le a ʻinoʻino o ia i lana tane faapelepele, i lana tama tama ma lana tama teine, 57  ma le fanua e paʻū mai i le va o ona vae, ma i ana tama tama foʻi ua ia fanaua,+ auā e na te ʻai faalilolilo ia mea ona o le leai o se mea, ona e matuā omia ma faapuapuagatia oe auā e siʻomia oe e ou fili i totonu o ou aai.+ 58  “Afai e te lē toʻaga e tausia upu uma o lenei tulafono o loo tusia i lenei tusi,+ ma mataʻu i lenei suafa mamalu+ ma le mataʻutia,+ o Ieova+ o lou Atua, 59  o le a faapogaia e Ieova ou mala ma mala o au fanau ia matuā mataʻutia, e telē ma e umi lava ia mala,+ o maʻi leaga ma e faaumiumi.+ 60  O le a ia toe aumaia iā te oe o faamaʻi uma o Aikupito na e fefe ai, ma e pipii lava ia mea iā te oe.+ 61  E lē gata i lea, o so o se maʻi po o se mala e leʻi tusia i le tusi o lenei tulafono, o le a faaoo mai e Ieova iā te oe seʻia oo ina faaumatia oe. 62  E toʻalaiti foʻi outou o le a totoe,+ e ui ua toʻatele outou e pei o fetu o le lagi,+ talu ai e te leʻi faalogo i le siʻufofoga o Ieova lou Atua. 63  “E pei ona sa finagalo malie Ieova iā te outou ma faia mea lelei iā te outou ma faatoʻateleina outou,+ e faapea foʻi ona finagalo malie o ia iā te outou, e fasiotia ma faaumatia outou;+ e aveesea foʻi outou mai i le laueleele lea e te alu atu e fai mo oe.+ 64  “E faataapeapeina e Ieova oe i nuu uma mai i le tasi pito o le lalolagi e oo i le isi pito o le lalolagi,+ ma o i inā e te auauna ai i isi atua e te leʻi iloa muamua, o oe po o ou augātamā, o atua e faia i laau ma maa.+ 65  E te lē maua se mapusaga i na nuu,+ pe maua foʻi se mea tumau e tū ai ou alofivae; e foaʻi atu e Ieova iā te oe le lotofefe+ ma le leaga o le vaai+ ma le lotofaanoanoa. 66  E matuā lamatia lou ola ma e te matuā fefe i le pō ma le ao, e te lē mautinoa foʻi pe e te ola pe leai.+ 67  E te faapea mai i le taeao, ‘Maʻimau pe ana o le afiafi!,’ ma e te faapea mai i le afiafi, ‘Maʻimau pe ana o le taeao!’ ona o le popolevale tele o lou loto lea e te atugalu ai, ma ona o mea e vaai i ai ou mata.+ 68  O le a toe auina atu oe e Ieova i Aikupito i vaa, i le auala na ou fai atu ai iā te oe, ‘E te lē toe vaai i ai,’+ ma e ao ona outou faatauina atu outou lava i o outou fili e fai ma tane pologa ma auauna teine,+ ae e leai se tagata e na te faatauina mai outou.”

Faamatalaga Pito i Lalo

O nei fula na tulioso i o latou ala feʻau.