Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Tanielu 4:1-37

4  “O le feʻau lenei mai i le tupu o Nepukanesa, i tagata, o nuu ma gagana uma, o i latou uma o loo nonofo i le lalolagi:+ Ia faateleina pea lo outou filemu.+  Sa ou manatu e tatau ona ou faailoa atu faailoga ma mea ofoofogia na faia e le Atua Silisili ese iā te aʻu.+  Maʻeu le matagofie o ana faailoga ma le mamana o ana galuega ofoofogia!+ O lona malo o le malo e faavavau,+ ma o lana pule e oo i lea tupulaga ma lea tupulaga.+  “O aʻu o Nepukanesa, sa ou nofo lelei+ i loʻu fale ma sa ou manuia foʻi i loʻu maota.+  Na ou iloa se miti, ma na ou fefe ai.+ Na ou vaai i ni ata ma ni faaaliga i loʻu mafaufau, ona ou fefe ai lea a o oʻu taoto i loʻu moega.+  Ona ou faia lea o se faatonuga, ia aami mai i oʻu luma o tagata atamamai uma o Papelonia, ina ia latou faamatala mai iā te aʻu le uiga o le miti.+  “Ona ō mai ai lea o ositaulaga e faia faiga faaagaga, o ē e valaau i ē ua oti, o le ʻau Kaletaia,+ ma ē e saʻiliʻili i fetu;+ na ou faailoa atu iā i latou le miti, ae e latou te leʻi mafai ona faamatalaina le uiga iā te aʻu.+  Mulimuli ane, ona sau ai lea o Tanielu i oʻu luma, o lē ua faaigoa o Peletisara+ ina ia viiviia ai le igoa o loʻu atua,+ o lē foʻi o loo iai le agaga o atua paia;+ na ou faailoa atu iā te ia le miti:  “ ‘Peletisara e, o le pule o ositaulaga e faia faiga faaagaga,+ ua ou iloa ua iā te oe le agaga o atua paia,+ ma e leai se mea lilo e faigatā iā te oe,+ ia e taʻu mai iā te aʻu le faaaliga o laʻu miti na ou vaai i ai ma lona uiga.+ 10  “ ‘O faaaliga ia na ou iloa+ i loʻu moega, faauta foʻi! o se laau+ i le ogatotonu o le lalolagi, e matuā maualuga lava.+ 11  Ua tupu tele ma malosi le laau, ma ua oo lona maualuga i luga o le lagi, ua iloa foʻi i le tuluʻiga o le lalolagi.+ 12  Ua mananaia ona lau, ua anoanoaʻi ona fua, ma ua lava ma totoe meaʻai mo foafoaga uma. E ō mai i ai manu+ o le fanua i lona paolo,+ e ofaga mai i ai manulele+ o le lagi i ona lālā, ma e aai uma ai foafoaga uma. 13  “ ‘Na ou vaai pea i faaaliga i loʻu mafaufau i luga o loʻu moega, faauta foʻi! o se leoleo,+ o sē e paia,+ ua sau mai i le lagi. 14  Ua ia alaga mai ma le leotele, ua faapea mai lana tala: “Ia tātuu i lalo le laau,+ ia tipi ese ona lālā. Ia lūlū ona lau, ma faasalalau solo ona fua. Ia sosola manu o le fanua mai i ona lalo, ma manulele mai i ona lālā.+ 15  A ia tuu pea i le eleele le tagutugutu o le pogati, ia fusi i se fusi uʻamea ma le ʻapamemea, i le mutia o le fanua; ia faasūsūina i le sau o le lagi, ma ia iai pea ma manu o le fanua i vao o le lalolagi.+ 16  Ia liua lona loto mai i le loto o le tagata i le loto o se manu,+ ia tuu ai pea seʻia mavae atu taimi e fitu.+ 17  Ua folafola atu lenei mea e le ʻauleoleo,+ ma ua faatonuina e le ʻaupaia, ina ia iloa ai e tagata soifua o le Silisili Ese o ia o le Pule i malo o tagata,+ ma o lē ua ia finagalo i ai, e na te avatu iā te ia,+ na te tofia foʻi o ia e pule i ai e oo lava i le tagata e aupito i faatauvaa.”+ 18  “ ‘O aʻu o Nepukanesa le tupu, o le miti lenei na ou vaaia; o oe lava Peletisara e, ia e faamatala mai po o le ā le uiga, auā e lē mafai e isi tagata atamamai uma o loʻu malo ona faamatalaina mai iā te aʻu le uiga.+ Ae ua e mafaia, auā ua iā te oe le agaga o atua paia.’+ 19  “I lenā taimi, na matuā faateʻia ai Tanielu o lē ua faaigoa foʻi iā Peletisara,+ mo sina taimi, ma na fefe o ia ona o ona mafaufauga.+ “Na faapea atu le tupu, ‘Peletisara e, aua e te fefe ona o le miti ma lona uiga.’+ “Na tali atu Peletisara e faapea, ‘Loʻu alii e, tau ina ia faatatau atu le miti i ē ua ʻinoʻino iā te oe, ma lona uiga i ou fili.+ 20  “ ‘O le laau na e silasila i ai, na tupu tele ma ua malosi, ua oo lona maualuga i le lagi, ua iloa mai foʻi i tuluʻiga uma o le lalolagi,+ 21  ua mananaia ona lau, ua anoanoaʻi ona fua, ma ua lava ma totoe meaʻai mo foafoaga uma; e nonofo i ona lalo manu o le fanua, e ofaga i ai manulele o le lagi i ona lālā,+ 22  le tupu e,+ o oe lava lea, auā ua e tupu tele ma malosi, ua tupu tele foʻi lou mamalu ma ua oo i le lagi,+ ua oo foʻi lau pule i tuluʻiga o le lalolagi.+ 23  “ ‘Auā na silafia e le tupu se leoleo, o sē e paia,+ ua sau mai i le lagi, o lē na faapea mai: “Ia tātuu i lalo le laau, ma ia faatamaʻia. Peitaʻi, ia tuu pea i le eleele le tagutugutu o le pogati, a ia fusi i le fusi uʻamea ma le ʻapamemea i le mutia o le fanua, ia faasūsūina i le sau o le lagi, ma ia iai pea ma manu o le fanua seʻia mavae atu taimi e fitu,”+ 24  le tupu e, o le uiga lenei ma le poloaʻiga+ a le Silisili Ese+ e ao ona oo atu i loʻu alii le tupu.+ 25  A o oe, e latou te tuliesea oe mai i tagata, ma e te nofo faatasi ma manu o le fanua,+ e te ʻai i le vao e pei o povi poʻa;+ e te susū i le sau o le lagi, e mavae atu taimi e fitu,+ seʻia oo ina e iloa o le Silisili Ese o ia o le Pule i malo o tagata,+ ma e na te avatu i lē ua ia finagalo i ai.+ 26  “ ‘Talu ai na latou faapea mai ia tuu ai pea le tagutugutu o le laau,+ e te toe maua lou malo pe a e iloa o loo pule le Atua i le lagi.+ 27  O lea, le tupu e, faamolemole ia talia mai laʻu fautuaga,+ ma aveese au agasala e ala i le faia o le amiotonu,+ ma au amio faapiʻopiʻo i le faaalia o le alofa mutimutivale i ē e matitiva.+ Atonu o le a faaumiumi ai lou manuia.’ ”+ 28  Na oo nei mea uma lava iā Nepukanesa le tupu.+ 29  I le faaiʻuga o le sefulu lua masina talu ona fai lana miti, na ia savali i le taualuga o le maota o le tupu o Papelonia. 30  Na faapea ane le tupu:+ “Pe e lē o Papelonia tele ea lenei na ou fausia i loʻu malosi tele+ e fai ma fale o le tupu ina ia viia ai loʻu mamalu?”+ 31  A o iai pea le upu i le fofoga o le tupu, na tulei mai se siʻufofoga mai i le lagi: “Nepukanesa e le tupu, ua faapenei le tala ua fai atu iā te oe, ‘Ua aveesea lou malo mai iā te oe,+ 32  ma ua latou tuliesea oe, e te nofo faatasi ma manu o le fanua.+ E te ʻai i le vao e pei o povi poʻa; e mavae atu taimi e fitu, seʻia oo ina e iloa o le Silisili Ese o ia o le Pule i malo o tagata, ma e na te avatu i lē ua ia finagalo i ai.’ ”+ 33  Na faataunuuina i lenā lava taimi+ le upu iā Nepukanesa, ma na tuliesea o ia mai i tagata, na ʻai o ia i le vao e pei o povi poʻa, na susū lona tino i le sau mai i le lagi, seʻia oo ina uumi lona lauulu e pei o fulufulu o aeto, ma ona atigivae ma atigilima e pei o matiuu o le manulele.+ 34  “Ina ua oo i le faaiʻuga o aso,+ o aʻu o Nepukanesa, na tepa aʻe oʻu mata i le lagi,+ ma ua toe lelei loʻu mafaufau; na ou faamanū atu i le Silisili Ese,+ o Lē o loo soifua e faavavau, na ou vivii ma faamamaluina+ o ia, auā o lana pule o le pulega e faavavau, ma o lona malo e oo i lea tupulaga ma lea tupulaga.+ 35  E faatauvaa foʻi tagata uma lava i le lalolagi,+ ma o loo ia faia mea e tusa ma lona finagalo i ʻau o le lagi ma tagata o le lalolagi.+ E leai lava se tasi e mafai ona taofia lona aao+ pe fai atu iā te ia, ‘O le ā le mea ua e faia?’+ 36  “I lenā lava taimi ua toe lelei loʻu mafaufau, ma ua ou toe maua le matagofie o loʻu malo ma loʻu mamalu, o loʻu malosi;+ ma ua matuā saʻili mai iā te aʻu oʻu tagata maualuluga ma oʻu alii, ua toe faaea aʻu i loʻu malo, ma ua faaopoopo iā te aʻu le mamalu tele.+ 37  “O lea, o aʻu o Nepukanesa, ua ou vivii ma faaeaina ma faamamaluina le Tupu o le lagi,+ auā e moni ana galuega uma, ma e tonu ona ala,+ e na te mafai ona faamaulaloina o ē o loo savavali ma le faamaualuga.”+

Faamatalaga Pito i Lalo