Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Tanielu 2:1-49

2  O le tausaga lona lua o le nofoaiga a le tupu o Nepukanesa, na fai ai miti+ a Nepukanesa; ua atuatuvale+ ai o ia, ma ua lē lelei ai lana moe.  Ona fai atu lea o le tupu e aami i ositaulaga e faia faiga faaagaga,+ o ē e valaau i ē ua oti, o taulāitu ma le ʻau Kaletaia ina ia taʻu mai i le tupu ana miti.+ Ua latou ō mai ma tutū i luma o le tupu.  Ua fai atu le tupu iā i latou: “Ua fai laʻu miti, ma ua atuatuvale loʻu loto e fia iloa lea miti.”  Ua faapea mai le ʻau Kaletaia i le tupu i le gagana Arama:*+ “Le tupu e, ia soifua pea oe.+ Ia e saunoa mai i au auauna po o le ā le faalepō, ae seʻi o matou faamatala atu le uiga.”+  Ua faapea atu le tupu i le ʻau Kaletaia: “O aʻu upu nei ma laʻu poloaʻiga: Afai e tou te lē faailoa mai le miti iā te aʻu ma lona uiga, e vaevaeniniiina+ outou, o le a avea o outou fale ma falelētaʻua mo le lautele.+  Afai e tou te faailoa mai le miti ma lona uiga, e tou te maua mai iā te aʻu o meaalofa, o le taui ma le mamalu tele.+ O lea, seʻi faamatala mai iā te aʻu le miti ma lona uiga.”  Ua latou tali faalua mai e faapea: “Ia saunoa mai ia le tupu i ana auauna po o le ā lana miti, ae e matou te faamatala atu lona uiga.”  Ae ua faapea atu le tupu: “Ua ou iloa lelei lava ua outou faatuatuai ona o loo fia maua o so outou taimi e faamatala ai, auā ua outou iloa ua uma ona ou faailoa atu laʻu poloaʻiga.  Auā a outou lē faamatala mai iā te aʻu le miti, o le a oo iā te outou le faasalaga lea e tasi.+ Ae ua pepelo ma sesē le upu ua outou ioe e taʻu mai iā te aʻu,+ seʻi iai se isi taimi lelei. O lea, ia taʻu mai iā te aʻu le miti, ona ou iloa ai lea e mafai ona outou faamatala mai iā te aʻu le uiga o le miti.” 10  Ua tali mai le ʻau Kaletaia i luma o le tupu e faapea: “Ua leai se tagata i lenei lalolagi e na te mafai ona faamatala atu lenei mataupu a le tupu, auā foʻi e leʻi fesili mai se tupu lauiloa po o se kovana i se mea faapena i so o se tasi o ositaulaga e faia faiga faaagaga, po o sē e valaau i ē ua oti po o se tasi o le ʻau Kaletaia. 11  E faigatā le mea ua fesili mai ai le tupu, ma e leai se tasi o iai e mafai ona faamatala le miti i luma o le tupu seʻi vaganā ai atua,+ o ē e lē o nonofo faatasi ma tagata.”+ 12  Ona o lenei mea ua ita ai le tupu ma ua matuā maʻemaʻeā ai,+ ua ia faatonu atu ia faaumatia tagata atamamai uma i Papelonia.+ 13  Ua oo atu le poloaʻiga, ma ua toetoe lava a fasiotia tagata atamamai; ua latou saʻili foʻi iā Tanielu ma ana uō ina ia fasiotia i latou. 14  Ona talanoa atu lea o Tanielu ma le faautauta ma le mafaufau lelei+ iā Arioka le taʻitaʻi o le ʻauleoleo a le tupu, o lē ua alu atu e fasiotia tagata atamamai o Papelonia. 15  Ua faapea mai Tanielu iā Arioka le tagata aloaʻia a le tupu: “Aiseā ua faia ai e le tupu lea faatonuga sauā?” Ona faailoa atu lea e Arioka o le mataupu iā Tanielu.+ 16  Ua ulufale atu Tanielu ma talosaga i le tupu mo se taimi ina ia mafai ona ia faamatala atu ai le uiga o le miti i le tupu.+ 17  Ona alu lea o Tanielu i lona fale; ua ia faailoa atu le mataupu i ana uō, o Hanania, o Mesaelu, ma Asaraia, 18  ina ia latou ōle atu i le Atua o le lagi+ ia alofa mutimutivale+ mai e tusa ma lenei mea lilo,+ neʻi latou faaumatia Tanielu ma ana uō atoa ai ma isi vaega o tagata atamamai o Papelonia.+ 19  Ua faailoa+ atu iā Tanielu i se faaaliga i le pō le mea lilo. Ona faamanū+ atu lea o Tanielu i le Atua o le lagi. 20  Ua tali atu Tanielu e faapea: “Ia faamamaluina+ le suafa o le Atua e mai i le faavavau, e oo atu i le vavau, auā o ia e ona le atamai ma le mana.+ 21  O ia e suia taimi ma tau,+ e na te aveesea tupu ma faatūina tupu,+ e na te avatu le atamai i ē e atamamai, ma le poto iā i latou ua iai le faautaga loloto.+ 22  Ua ia faaali mai mea loloto ma mea ua lilo,+ ua ia silafia le mea o loo i le pōuliuli;+ ua siʻomia foʻi o ia e le malamalama.+ 23  Le Atua e o oʻu augātamā, ou te avatu iā te oe le faamanū ma le faafetai+ ona o le atamai+ ma le malosi ua e foaʻiina mai iā te aʻu. O lenei ua e faailoa mai iā te aʻu le mea na matou talosaga atu ai iā te oe, auā ua e faailoa mai iā i matou le mataupu a le tupu.”+ 24  Ona o lea mea ua alu atu ai Tanielu iā Arioka,+ o lē ua tofia e le tupu e fasiotia tagata atamamai uma o Papelonia.+ Ua ia alu atu, ma faapea atu iā te ia: “Aua neʻi fasiotia tagata atamamai o Papelonia. Ia avatu aʻu i luma o le tupu,+ ina ia ou faamatala le uiga o le miti i le tupu.” 25  Ona faavave lea ona ave e Arioka o Tanielu i luma o le tupu, ma fai atu iā te ia: “Ua ou maua se tagata mai i tagata na aumai faapagota+ mai i Iuta, o lē e na te mafai ona faamatalaina le uiga o le faalepō i le tupu.” 26  Ua faapea atu le tupu iā Tanielu, lea ua faaigoa o Peletisara:+ “Po ua e agavaa lelei e faailoa mai iā te aʻu le miti na ou vaaia ma lona uiga?”+ 27  Ua tali atu Tanielu i le tupu e faapea: “O le mea lilo ua fesili mai ai le tupu, ua lē mafai ona faamatala atu i le tupu e tagata atamamai, o ē e fesili i ē ua oti, o ositaulaga e faia faiga faaagaga, ma ē e saʻiliʻili i fetu.+ 28  Ae peitaʻi, o loo soifua le Atua i le lagi o Lē e na te faaali maia mea lilo,+ ma ua ia faaali mai foʻi i le tupu o Nepukanesa le mea e tupu i le faaiʻuga o aso.+ Ua faapenei lau miti ma faaaliga na e vaaia i lou tofaga: 29  “A o oe le tupu e, na oso aʻe ou mafaufauga i luga o lou moega+ e tusa ma mea o le a tutupu i le lumanaʻi, ua faailoa mai iā te oe e Lē na te faaali mai mea lilo mea o le a tutupu.+ 30  A o aʻu, e leʻi faaalia mai iā te aʻu lenei mea lilo, ona o se atamai ua iā te aʻu e sili atu i se isi tagata ola,+ ae ina ia faamatala atu i le tupu le uiga o le miti, ma e silafia ai manatunatuga o lou loto.+ 31  “O oe le tupu e, na e silafia, faauta, o se faatagata telē lava. O lenā faatagata telē ma e maʻeu lona feʻilafi na tū i ou luma, na mataʻutia foʻi lona foliga mai. 32  E tusa ai ma lenā faatagata, o lona ulu ua faia i le auro lelei,+ o lona fatafata ma ona lima o siliva,+ o lona manava ma ona ogāvae o le ʻapamemea,+ 33  o ona vae e uʻamea,+ o ona tapuvae e faia isi vaega i le uʻamea a o isi vaega o le omea.+ 34  A o e silasila atu pea i le faatagata, na e silafia se maa ua tofia, ae e leʻi tofia i ni lima,+ ma taia ai le faatagata i ona vae uʻamea ma le omea ma nutililii ai.+ 35  I lea taimi, ua nutililii faatasi ai le uʻamea, o le omea, o le ʻapamemea, o le siliva ma le auro, ma ua pei o vao mamago i le mea e soli ai saito+ i le tau vevela, ma ua lelea i le matagi ma ua leai ma se mea ua totoe.+ A o le maa na taia ai le faatagata, ua avea ma mauga telē ma ua tumu ai le lalolagi atoa.+ 36  “O le faalepō lenei ma lona uiga e matou te taʻu atu i luma o le tupu.+ 37  O oe le tupu e, le tupu o tupu, ua tuuina mai iā te oe e le Atua o le lagi le malo,+ le mana, le malosi ma le mamalu, 38  ma ua ia tuuina atu i lona lima,+ o so o se mea ua nonofo ai le fanau a tagata, o manu o le fanua ma manufelelei o le lagi, ma ua ia faia o ia ma pule i ia mea uma, o oe o le ulu auro lava lea.+ 39  “A mavae atu oe ona tulaʻi mai lea o se isi malo+ e maulalo ifo iā te oe;+ e tulaʻi mai foʻi se isi malo, o le malo lona tolu, o le ʻapamemea lea, e pule foʻi i le lalolagi atoa.+ 40  “A o le malo lona fā,+ o le a malosi o ia e pei o le uʻamea.+ E tuʻimomomoina ma olopalaina e le uʻamea o mea uma, o lea e pei ona nutililiia e le uʻamea, o le a ia tuʻimomomoina ma nutililiia o ia malo uma.+ 41  “E pei ona e silafia o vae ma tamatamaʻivae na faia isi vaega i omea a le fai ipu omea a o isi vaega o uʻamea,+ o le a vaevaeina lea malo,+ ae o le a iai le malosi o le uʻamea i lea malo, auā na e silafia ua fefiloi faatasi le uʻamea ma le omea ua susū.+ 42  Talu ai o tamatamaʻivae ua faia isi vaega i le uʻamea a o isi vaega o le omea, o le a faapena ona iai le vaega malosi o lea malo ma e iai foʻi le vaega e vaivai. 43  E pei ona e silafia, na fefiloi le uʻamea ma le omea ua susū, o le a fefiloi faatasi i latou* ma le fanau a tagata; ae e lē mafai ona pipii faatasi o le tasi i le isi, e pei ona lē mafai ona filogia o le uʻamea ma le omea. 44  “O aso o ia tupu,+ o le a faatūina ai e le Atua o le lagi+ o le malo+ e lē faaumatia lava.+ O lea malo foʻi e lē tuuina atu i se isi nuu.+ O le a ia tuʻimomomoina ma faaumatia malo uma,+ ae e tumau lea malo e faavavau;+ 45  auā e pei ona e silafia na tofia se maa mai i se mauga ae e leʻi tofia i lima,+ ma na tuʻimomomoina ai le uʻamea, o le ʻapamemea, o le omea, o le siliva ma le auro.+ Ua faailoa atu e le Atua Silisili+ i le tupu o mea o le a tutupu.+ E moni le miti ma e maufaatuatuaina lona faamatalaina.”+ 46  I lenā taimi ua faapaʻū faō ai Nepukanesa ma avatu le faaaloaloga iā Tanielu, ma ia faapea atu e avatu iā te ia se meaalofa ma mea manogi e mū.+ 47  Ua tali atu le tupu iā Tanielu e faapea: “E moni lava o lo outou Atua, o le Atua o atua o ia,+ ma le Alii o tupu,+ o Lē na te faaali mai mea lilo, auā ua mafai ona e faaali mai lenei mea lilo.”+ 48  Ona avatu ai lea e le tupu o le mamalu tele iā Tanielu,+ ma ua ia avatu foʻi le anoanoaʻi o meaalofa tetele iā te ia, ua ia faia o ia ma pule i le itumalo o Papelonia,+ e sili foʻi o ia i ē e pule i tagata atamamai uma o Papelonia. 49  A o Tanielu ua ia talosaga atu i le tupu, ona tofia lea e le tupu o Sataraka, o Mesako ma Apeteniko+ e pule i mataupufai a le itumalo o Papelonia, a ua iai pea Tanielu i le maota+ o le tupu.

Faamatalaga Pito i Lalo

Ua amata atu i inei ona tusia le tusi o Tanielu i le gagana Arama seʻia oo i le iʻuga o mataupu e 7.
O le  upu “latou” e faasino atu i mea ua faaataina e le uʻamea.