Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Sakaria 9:1-17

9  O le feʻau:+ “O le afioga a Ieova e faasaga i le atunuu o Hataraka, aemaise lava iā Tamaseko;+ auā o fofoga o Ieova o loo silasila i tagata+ ma ituaiga uma o Isaraelu.  E faasaga foʻi iā Amato+ o loo tuaoi ai; atoa ma Turo+ ma Saitonu+ auā ua sili lona atamai.+  Ua fausia e Turo se papuipui malosi mo ia, ma faaputu siliva e pei o le pefu ma auro e pei o palapala o le auala.+  Faauta! o le a faatoʻilaloina o ia e Ieova, e na te faaumatia foʻi ana ʻautau i le sami;+ ma o le a faatamaʻia o ia i le afi.+  E vaai atu i ai Asekelona ona fefe ai lea; a o Kasa e na te lagonaina le matuā tigā; atoa ma Ekerona+ auā o le a māsiasi lē na ia faamoemoe i ai.+ E faaumatia le tupu o Kasa, e lē ʻaināina Asekelona.+  E nofo le tagata ese+ i Asetota,+ ma ou te aveesea le faamaualuga o Filisitia.+  Ou te aveesea lona toto mai i lona gutu, ou te aveesea foʻi ana mea inosia mai i le va o ona nifo,+ ona totoe ai lea na o ia lava mo lo tatou Atua; e avea o ia e pei o se alii pule+ i Iuta,+ ma e pei Ekerona o le tagata Iepusē.+  Ou te nofo i loʻu faleʻie e leoleo ai i loʻu fale,+ ina ia leai se isi e ui ane pe e toe foʻi mai; ma o le a lē toe ui ane ai o lē e pule sauā iā i latou,+ auā o lenei ua vaai i ai oʻu mata.+  “Ia e matuā olioli oe le tama fafine a Siona.+ Ia e alaga i le manumalo+ oe le tama fafine a Ierusalema. Faauta! ua afio mai lou tupu+ iā te oe.+ E amiotonu o ia ma ua faaolaina;+ e lotomaulalo o ia,+ ma o loo tiʻetiʻe i le asini, i luga o se manu ua matua, o le tama foʻi a le asini fafine.+ 10  Ou te aveesea kariota tau mai iā Efaraima ma solofanua mai iā Ierusalema.+ E aveesea foʻi ʻaufana o le taua.+ O le a ia folafola atu le filemu i atunuu;+ ma o lana pulega e mai i le tasi sami e oo i le isi sami, e mai foʻi i le Vaitafe e oo atu i tuluʻiga o le lalolagi.+ 11  “O oe foʻi le fafine e, e ala i le toto o le feagaiga+ i le va o oe ma aʻu, ou te auina ese atu ai ou pagota+ mai i le lua e lē o iai se vai. 12  “O outou o pagota ua iai le faamoemoe,+ inā toe foʻi ia i le lafitaga malosi.+ “O le asō foʻi, ou te taʻu atu ai iā te oe, ‘Le fafine e, o le a ou faamanuia faalua+ iā te oe. 13  Auā ou te loloʻu Iuta e fai ma aʻu ʻaufana.* Ou te ave Efaraima e fai ma aū mo le ʻaufana, Siona e, ou te fafagu i ou atalii,+ Eleni e,+ e faasagatau foʻi i ou atalii, ma ou te faia oe Siona e pei o le pelu a le toa.’+ 14  E faailoa atu e Ieova ua faatasi o ia ma i latou,+ ma e alu atu lana aū e pei o le uila.+ E ili le pū+ e le Alii Pule Silisili Ese o Ieova, ma e afio atu o ia faatasi ma matagi malolosi o saute.+ 15  E puipuia i latou e Ieova o ʻau, e latou te faaumatia+ ma faatoʻilalo maa o le maatā. E latou te feinu+ lava ma pisapisaō e pei ua latou feinu i se uaina; e faatumuina i latou e pei o le ipu faaofuofu, e pei foʻi o tulimanu e fā o le fata faitaulaga.+ 16  “E faaolaina e Ieova lo latou Atua o i latou+ i lenā aso, e pei lona nuu o le lafu mamoe;+ auā o le a pei i latou o maa o le palealii o loo ʻilaʻila mai i luga o lona laueleele.+ 17  Auā maʻeu le tele naʻuā o lona lelei,+ e maʻeu foʻi le tele naʻuā o lona matagofie!+ E faamalolosia tauleleʻa i meaʻai, a o teine muli i le uaina fou.”+

Faamatalaga Pito i Lalo

I le gagana Eperu “ou te solia Iuta mo aʻu.” E faatatau atu le upu “solia” i le gagana Eperu i le solia po o le tuu o le vae i se ʻaufana ina ia faamau ai le manoa.