Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Numera 6:1-27

6  Ua fetalai mai foʻi Ieova iā Mose e faapea:  “Ia e fai atu i le fanauga a Isaraelu ma faapea atu iā i latou, ‘Afai e faia e se tane po o se fafine se tautoga faapitoa e avea ma se Naseri*+ iā Ieova,  e lē tatau ona ia inu i le uaina po o se isi ʻava malosi. E lē tatau ona ia inu i le vineta o le uaina po o le vineta o se isi ʻava malosi,+ po o se sua ua faia mai i le vine, pe ʻai foʻi i ni vine mata pe mago.  O aso uma e avea ai o ia o se Naseri, e lē tatau ona ʻai i so o se mea e faia mai i le laau o le vine, e aofia ai fua moto atoa foʻi ma paʻu.  “ ‘O aso uma ua faia ai lana tautoga o se Naseri, aua neʻi oo se tafi i lona ulu+ seʻia oo ina atoa aso ua vavaeese ai o ia mo Ieova, e ao ona paia o ia e ala i le faauumi o lona lauulu.+  O aso uma ua vavaeese ai o ia lava mo Ieova, e lē tatau ona faalatalata atu i se tino oti.+  Aua neʻi lē mamā o ia ona o lona tamā po o lona tinā, po o lona uso, po o lona tuafafine pe a maliliu i latou,+ auā ua avea lona lauulu ma faailoga o lona avea ma Naseri i lona Atua.  “ ‘O aso uma e avea ai o ia ma Naseri, e paia lava o ia iā Ieova.  Ae afai e oti faafuaseʻi se tasi i ona autafa+ ma lē mamā ai lona ulu lea ua iai le faailoga o lona avea ma Naseri, e ao ona ia tafi+ lona ulu i le aso e faamamāina ai o ia. O le aso lona fitu e ao ona ia tafi ai lona ulu. 10  O le aso lona valu, e ao ona ia aumaia ai ni manutagi se lua po o ni tamaʻi lupe se lua i le ositaulaga i le faitotoʻa o le faleʻie o le feiloaʻiga.+ 11  E ao i le ositaulaga ona fai le tasi ma taulaga o agasala,+ a o le isi e fai ma taulaga mū+ ma faia ai le togisala mo ia, auā ua ia agasala ona o le tino oti. E ao ona ia faapaia lona lava ulu i lea aso. 12  E ao ona toe amata ona fai o ia ma Naseri+ iā Ieova i aso uma e avea ai o se Naseri, e ao foʻi ona ia aumaia se tamaʻi mamoe poʻa faatoʻā atoa le tausaga e fai ma taulaga o le nofosala;+ ma ua lē toe faitaulia aso ua mavae auā ua ia faaleagaina lona avea ma Naseri. 13  “ ‘O le tulafono lenei e faatatau i le Naseri: I le aso e atoa ai ona aso e fai ai ma Naseri,+ e aumaia o ia i le faitotoʻa o le faleʻie o le feiloaʻiga. 14  O manu ia e na te aumaia e fai ai ana taulaga iā Ieova, o se tamaʻi mamoe poʻa faatoʻā atoa le tausaga e matuā lelei lava e fai ma taulaga mū,+ ma se tamaʻi mamoe fafine faatoʻā atoa le tausaga e matuā lelei lava e fai ma taulaga o agasala,+ o se mamoe poʻa e matuā lelei lava e fai ai le taulaga faifaatasi,+ 15  o le ato o falaoa lapotopoto e lē faafefeteina ua fai i le falaoamata lelei+ ua iai sina suāuu,+ o falaoa manifinifi e lē faafefeteina ua nini i le suāuu,+ faatasi ma taulaga i meaʻai+ ma taulaga i meainu.+ 16  E ao i le ositaulaga ona aumaia na mea i luma o Ieova, ma faia ai lana taulaga o agasala ma lana taulaga mū.+ 17  E na te avatu iā Ieova le mamoe poʻa o le taulaga faifaatasi+ atoa ma le ato o falaoa e lē faafefeteina; e avatu e le ositaulaga le taulaga i meaʻai+ ma taulaga i meainu faatasi ma le mamoe poʻa. 18  “ ‘E ao i le Naseri ona tafi+ lona ulu o le faailoga lea o lona avea ma Naseri i le faitotoʻa o le faleʻie o le feiloaʻiga, e ao foʻi ona ia ave lauulu ia ua fai ma faailoga o lona avea ma Naseri, ma tuu i luga o le afi lea ua i lalo o le taulaga faifaatasi. 19  E aumaia e le ositaulaga le alagalima o le mamoe poʻa ua uma ona saka,+ o le falaoa lapotopoto e lē faafefeteina e tasi mai i le ato, o le falaoa manifinifi e lē faafefeteina e tasi,+ ma tuu i alofilima o le Naseri ina ua uma ona tafiese le faailoga o lona avea ma Naseri. 20  E ao i le ositaulaga ona lūlū ia mea mai i le isi itu i le isi itu e fai ma taulaga lūlū iā Ieova.+ O se mea lea e paia i le ositaulaga, faatasi ma le fatafata+ o le taulaga lūlū, ma le vae ua tuu ese e fai ma foaʻi.+ Mulimuli ane e mafai ona inu i le uaina+ le Naseri. 21  “ ‘Afai e tautō se Naseri e faia ni taulaga na te gafatia e faaopoopo i taulaga e ao ona ia faia, ona ia faia lea e tusa ai ma lana tautoga. O le tulafono lea e faatatau i le Naseri.’ ”+ 22  Ona fetalai mai lea o Ieova iā Mose e faapea: 23  “Ia e fai atu iā Arona ma ona atalii e faapea, ‘O le auala lenei e tou te faamanuia+ ai i le fanauga a Isaraelu, ia faapea atu iā i latou: 24  “Tau ina ia faamanuia oe+ e Ieova ma tausia oe.+ 25  Tau ina ia susulu atu le malamalama o fofoga o Ieova iā te oe+ ma ia finagalo malie iā te oe.+ 26  Tau ina ia silasila atu fofoga o Ieova iā te oe+ ma tuuina atu le filemu iā te oe.” ’+ 27  E latou te taʻu atu foʻi loʻu igoa+ i luga o le fanauga a Isaraelu, ina ia ou faamanuia atu ai iā i latou.”+

Faamatalaga Pito i Lalo

O lona uiga, o “lē ua filifilia” po o “lē ua tuuina atu” po o “lē ua vavaeese.”