Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Numera 5:1-31

5  Ua toe fetalai mai pea Ieova iā Mose e faapea:  “Ia e fai atu i le fanauga a Isaraelu ia aauina ese mai i le mea ua faatutū ai faleʻie i latou uma e lepela,+ ma so o se tasi e sau se mea mai i lona tino,+ ma so o se tasi e lē mamā ona na paʻi i se tagata oti.+  E tusa lava po o se tane po o se fafine e ao ona outou aauina ese atu i latou. E ao ona outou aauina ese i latou i tua o le togālauapi,+ ina neʻi pisia+ i latou o loo i faleʻie auā ou te nofo faatasi ma i latou.”+  Ona faia lea faapea e le fanauga a Isaraelu, ua aauina ese i latou i tua o le togālauapi. Ua faia e le fanauga a Isaraelu e pei ona fetalai mai ai Ieova iā Mose.  Ua fetalai atili mai Ieova iā Mose e faapea:  “Ia e fai atu i le fanauga a Isaraelu, ‘Afai e faia e se tane po o se fafine se tasi o agasala e masani ona faia e tagata, o le faia lea o se gaoioiga lē faamaoni iā Ieova, e nofosala lenā tagata.+  E ao ona latou taʻutino+ atu a latou agasala na faia, ma e toe faafoʻi atu e ia le taui atoa mo lana agasala, ma faaopoopo i ai le tasi vaelima i lea taui,+ ma e ao ona ia avatu i lē na ia agasala i ai.  Afai ua oti lē na ia agasala i ai ae e leai ni ona aiga e avatu i ai le taui o lana agasala, ona fai lea mo le ositaulaga le taui o lana agasala, lea e avatu iā Ieova, e ese mai i le tamaʻi mamoe poʻa lea e faia ai e ia le togisala mo ia.+  “ ‘O foaʻi+ uma mai i mea paia+ uma lava a le fanauga a Isaraelu e aveina atu e i latou i le ositaulaga, e fai mo ia.+ 10  E tumau pea ona fai mo ia mea paia uma ua avatu e tagata taʻitoʻatasi. Po o ā lava mea ua avatu e tagata taʻitoʻatasi i le ositaulaga, o ana mea na.’ ” 11  Ua toe fetalai mai Ieova iā Mose e faapea: 12  “Ia e fai atu i le fanauga a Isaraelu, ma faapea atu iā i latou, ‘Afai e liliuese se avā a se tane e ala i le faia o se gaoioiga lē faamaoni iā te ia,+ 13  ma momoe ma se isi tamāloa ma ua alu atu lona sua iā te ia,+ ae ua natia lenei mea mai i lana tane+ ma ua lilo pea, ua ia faia se mea e leaga ai o ia ae ua leai se molimau faasaga iā te ia, ma e leʻi maua foʻi o ia; 14  ae ua oo ina maua le tane i le loto fuā+ ma ua ia masalomia le faamaoni o lana avā, ma ua faia e le avā se mea e leaga ai o ia, po ua oo ina maua o ia i le loto fuā, ma ua ia masalomia le faamaoni o lana avā, ae e leʻi faia e le avā se mea e leaga ai; 15  ona aumaia lea e le tamāloa o lana avā i le ositaulaga+ faatasi ma le taulaga a lana avā, o le tasi vaesefulu o le efa o le falaoamata e faia i le karite. E na te lē sasaa i ai se suāuu pe tuu i ai se lipano,+ ona o le taulaga i meaʻai e faatatau i le fuā, o le taulaga i meaʻai e faamanatu ai, o loo faamanatuina ai le mea sesē. 16  “ ‘E ao i le ositaulaga ona aumaia le avā i luma ma faatū i luma o Ieova.+ 17  Ona aumaia lea e le ositaulaga le vai paia i ipu omea, e ave foʻi e le ositaulaga ni efuefu ua i luga o le fola o le faleʻie paia ma tuu i le vai. 18  E faatū e le ositaulaga le fafine i luma o Ieova ma tatala i lalo le lauulu o le fafine ma tuu i ona alofilima le taulaga i meaʻai e faamanatu ai, o le taulaga lea i meaʻai e faatatau i le fuā,+ ma e uu i le lima o le ositaulaga le vai oona e malaia ai.+ 19  “ ‘E ao i le ositaulaga ona faatautō o ia, ma e ao ona ia fai atu i le fafine: “Afai e lua te leʻi momoe ma se isi tamāloa a o e iai pea i le pule a lau tane+ ma e te leʻi liliuese foʻi e faia se mea e lē mamā ai, ia lē afāina oe mai i lenei vai oona e malaia ai. 20  A o oe, afai ua e liliuese a o e iai pea i le pule a lau tane,+ afai foʻi ua e faia se mea e te leaga ai ma ua faaalu le sua+ o se tamāloa iā te oe ae e lē o ia o lau tane,—” 21  E ao la i le ositaulaga ona faatautō le fafine i se tautoga e faamalaia ai,+ e ao i le ositaulaga ona fai atu i le fafine: “Ia faia e Ieova oe ma faataʻitaʻiga o le malaia ma o se tautoga i totonu o lou nuu e ala i le faapaʻū ese e Ieova o lou ogāvae*+ ma ia fula ai lou manava. 22  E ao ona oo lenei vai e malaia ai i lou gaʻau ina ia fula ai lou manava ma paʻū ese ai lou ogāvae.” E ao ona faapea mai le fafine: “Amene! Amene!” 23  “ ‘E ao i le ositaulaga ona tusia nei malaia i se tusi+ ma tapē ese+ ai i le vai oona. 24  E ao ona ia faainu le fafine i le vai oona e malaia ai,+ ona oo lea i totonu iā te ia o le vai e malaia ai ma onā ai o ia. 25  E ave e le ositaulaga le taulaga i meaʻai+ o le fuā mai i le lima o le fafine, ma lūlū i le isi itu ma le isi itu le taulaga i meaʻai i luma o Ieova, ma avatu ai e latalata ane i le fata faitaulaga. 26  E ao i le ositaulaga ona ave se luuga o le taulaga i meaʻai e faamanatu+ ai ma susunu i luga o le fata faitaulaga, mulimuli ane ona ia faainu ai lea o le fafine i le vai. 27  Afai e na te faainu ai o ia i le vai, afai sa ia faia se mea e leaga ai o ia e ala i le faia o se gaoioiga lē faamaoni i lana tane,+ pe a oo i totonu iā te ia le vai lea e malaia ai ma e onā ai o ia, ona fula ai lea o lona manava ma paʻū ese ai lona ogāvae, ma e taʻua foʻi lea fafine e tagata o lona nuu pe a faia a latou faamalaia.+ 28  Afai e leʻi faia e le fafine se mea e leaga ai ma ua mamā o ia, e sao o ia mai i lenā faasalaga;+ ma e ao ona alu atu iā te ia le sua o lana tane ina ia maʻitō ai. 29  “ ‘O le tulafono lenei i le fuā,+ pe a liliuese+ se fafine a o iai pea i le pule a lana tane,+ ma faia se mea e leaga ai o ia, 30  pe afai foʻi ua oo ina maua se tamāloa i le loto fuā, ma ua ia masalosalo ua lē faamaoni lana avā iā te ia; e ao ona ia faatū le avā i luma o Ieova, ma e ao i le ositaulaga ona faatinoina lenei tulafono i le avā. 31  E sao le tamāloa mai i le sesē, ae e tali atu le fafine i lona sesē.’ ”

Faamatalaga Pito i Lalo

O lona uiga, “e lē foaʻi mai e Ieova iā te oe ni fanau.”