Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Numera 23:1-30

23  Ona fai atu lea o Palaamo iā Palako: “Ia e fausia i lenei mea ni fata faitaulaga+ se fitu mo aʻu, ma ia e sauniuni i lenei mea ni povi poʻa se fitu ma mamoe poʻa se fitu mo aʻu.”  Ona faia lea e Palako e pei ona fai mai ai Palaamo. Mulimuli ane ua fai ni taulaga e Palako ma Palaamo i le povi poʻa ma le mamoe poʻa i fata faitaulaga taʻitasi.+  Ua faapea atili atu Palaamo iā Palako: “Ia e tū i autafa o lau taulaga mū,+ ae seʻi oʻu alu. Atonu e afio mai Ieova ma te feiloaʻi.+ O lea, po o le ā lava e na te faailoa mai iā te aʻu, ou te taʻu atu iā te oe.” Ona alu lea o ia i le aʻega taalaelae.  Ua feiloaʻi le Atua iā Palaamo,+ ona ia fai atu lea iā te Ia: “Ua ou faia ni atu laina o fata faitaulaga se fitu, ma ua ou faia ai taulaga i le povi poʻa ma le mamoe poʻa i fata faitaulaga taʻitasi.”+  Ona tuu mai lea e Ieova o le upu i le gutu o Palaamo,+ ma fetalai mai: “Ia e toe foʻi atu iā Palako, ma o upu nei e ao ona e fai atu ai.”+  Ua toe foʻi mai o ia, faauta! o loo tutū o ia faatasi ma perenise uma o Moapi i autafa o lana taulaga mū.  Ua ia faamatala atu lana feʻau faavaloaga+ ma faapea atu: “Sa taumafai Palako le tupu o Moapi e aumaia aʻu mai i Arama,+ Mai i atumauga i le itu i sasaʻe: ‘Ia e sau, e faamalaia Iakopo mo aʻu. Ioe, ia e sau, ia taʻuleaga Isaraelu.’+   E faapefea ona ou taʻusalaina o ē e leʻi taʻusalaina e le Atua?+ E faapefea foʻi ona ou taʻuleagaina o ē e leʻi taʻuleagaina e Ieova?+   Auā ua ou iloa atu i latou mai i tumutumu o papa, Ua ou iloa atu foʻi i latou mai i aʻega. O i inā ua nonofo ai le nuu i o latou faleʻie na o i latou lava,+ Ua manatu i latou e ese i latou mai i isi nuu.+ 10  O ai ua faitauina le toʻatele o le fanauga a Iakopo e pei o ni pefu ninii,+ O ai foʻi ua faitauina le tasi vaefā o Isaraelu? Seʻi oʻu oti i le oti o ē ua amio saʻo,+ Ia tusa foʻi loʻu iʻuga ma i latou.”+ 11  Ona fai mai lea o Palako iā Palaamo: “O le ā lau mea ua fai iā te aʻu? Na ou amia oe ina ia taʻusalaina oʻu fili a o lenei ua e matuā faamanuia iā i latou.”+ 12  A ua ia tali atu: “Pe e lē o fetalaiga ea ia ua tuu mai e Ieova i loʻu gutu, e pau ia o upu ou te tautala atu ai?”+ 13  Ona fai mai lea o Palako iā te ia: “Faamolemole seʻi ta ō i se mea e mafai ona e vaai atu ai iā i latou. E na o se vaega o i latou e te iloa atu,+ ae e te lē iloa i latou uma. Ia e taʻusalaina i latou mo aʻu mai i inā.”+ 14  Ua ia ave o ia i le fanua o Sofima, i le tumutumu o Peseka,+ ua faia fata faitaulaga e fitu ma fai ai taulaga i le povi poʻa ma le mamoe poʻa i fata faitaulaga taʻitasi.+ 15  Mulimuli ane ua ia fai atu iā Palako: “Ia e tū i autafa o lau taulaga mū a o aʻu ma te feiloaʻi ma ia i o.” 16  Ona feiloaʻi lea o Ieova ma Palaamo ma tuu le upu i le gutu o Palaamo, ua faapea mai:+ “Ia e toe foʻi atu iā Palako,+ ma o upu nei e ao ona e fai atu ai.” 17  Ua toe foʻi mai o ia iā te ia, ma vaai foʻi! o loo tutū o ia faatasi ma perenise uma o Moapi i autafa o lana taulaga mū. Ona fai mai lea o Palako iā te ia: “O le ā le mea ua fetalai mai ai Ieova?” 18  Ua ia faamatala atu lana feʻau faavaloaga ma faapea atu:+ “Inā tulaʻi ia Palako ma faafofoga mai. Ia faafofoga mai iā te aʻu, Le atalii e, o Seporu.+ 19  E lē o se tagata le Atua e tala pepelo ai o ia,+ E lē o se atalii foʻi o se tagata e salamō ai.+ Pe na fetalai ea o ia i se mea ae na te lē faia, Pe na fetalai foʻi o ia i se mea ae na te lē faataunuuina?+ 20  Faauta! O laʻu feʻau ia faamanuia, Ua Ia faamanuia,+ ma e lē mafai ona ou toe liliuina.+ 21  E leʻi silafia e ia so o se mana faataulāitu+ e faasagatau iā Iakopo, E leʻi silafia foʻi e ia ni faafitauli e faasagatau iā Isaraelu. Ua iā te ia Ieova lona Atua,+ Ua iā te ia viiga leotetele mo le tupu. 22  Ua aumaia e le Atua i latou mai i Aikupito.+ E vave tele lana gaoioi e pei o le povi poʻa o le vao.+ 23  Auā ua leai se faalauatau e faasagatau iā Iakopo,+ Po o se valovaloga faataulāitu faasaga iā Isaraelu.+ E mafai ona faapea atu nei e uiga iā Iakopo ma Isaraelu, ‘Maʻeu le mea ua faia e le Atua!’+ 24  Faauta, o le a tulaʻi se nuu e pei o se leona, E pei foʻi o le leona o le a faatū e ia o ia lava i luga.+ E lē taoto i lalo seʻi vaganā ua ʻaina mea ua saeia, E inu foʻi i le toto o ē ua fasia.”+ 25  Ona fai mai lea o Palako iā Palaamo: “Afai e te lē taʻusalaina lava o ia, e lē tatau la ona e faamanuia atu lava iā te ia.” 26  Ua tali atu Palaamo iā Palako e faapea: “Pe na ou lē fai atu ea iā te oe, e faapea, ‘O mea uma e fetalai mai ai Ieova, o mea ia ou te faia’?”+ 27  Ona fai mai lea o Palako iā Palaamo: “Faamolemole sau ia seʻi ta ō i se isi mea. Atonu o le a lelei i le silafaga a le Atua moni, ma mafai ai ona e taʻusalaina o ia mo aʻu mai i inā.”+ 28  Ua ave e Palako o Palaamo i le tumutumu o Peoro lea e faafesagaʻi ma Iesimoni.+ 29  Ona fai atu lea o Palaamo+ iā Palako: “Ia e fausia i lenei mea ni fata faitaulaga se fitu ma ia e sauniuni i lenei mea ni povi poʻa se fitu ma mamoe poʻa se fitu mo aʻu.”+ 30  Ua faia e Palako e pei ona fai mai ai o Palaamo, ma ua ia faia taulaga i le povi poʻa ma le mamoe poʻa i fata faitaulaga taʻitasi.+

Faamatalaga Pito i Lalo