Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Numera 22:1-41

22  Ona malaga ese lea o le fanauga a Isaraelu mai i lea mea ma faatutū o latou faleʻie i le fanua laugatasi o le toafa o Moapi,+ i le isi itu o Ioritana e faafesagaʻi ma Ieriko.  Ua iloa foʻi e Palako+ le atalii o Seporu mea uma sa faia e Isaraelu i le ʻau Amorī.  Ua fefefe tele Moapi ona o lea nuu, auā ua toʻatele i latou; ma ua matuā atuatuvale ai Moapi ona o le fanauga a Isaraelu.+  Ona faapea atu lea o Moapi i toeaina o Mitiana:+ “E faatamaʻia e lenei faapotopotoga mea uma e siʻomia ai i tatou e pei ona ʻai e le povi poʻa o le vao o le fanua.” Ua avea Palako+ le atalii o Seporu ma tupu o Moapi i lea taimi.  Ua ia aauina atu ni avefeʻau iā Palaamo+ le atalii o Peoro, i Petoru+ lea e i tala ane o le Vaitafe*+ o le laueleele o le fanau a ona tagata, e aami iā te ia, ua faapea atu: “Vaai oe! Ua ō mai ni tagata mai i Aikupito. Faauta! Ua latou ufitia le laueleele i le mamao e mafai ona vaai i ai se tasi,+ o loo nonofo i latou i oʻu luma tonu lava.  Faamolemole seʻi maliu mai; ma faamalaia+ nei tagata mo aʻu, auā ua sili atu lo latou malolosi nai lo o aʻu. Atonu e mafai ona ou faatoʻilalo i latou ma tutuliese mai i le laueleele; auā ua ou iloa o lē e te faamanuia i ai e manuia a o lē e te faamalaia i ai e malaia.”+  Ona malaga atu lea o toeaina o Moapi ma toeaina o Mitiana faatasi ma le totogi o valovaloga+ i o latou lima, ua taunuu iā Palaamo+ ma fai mai iā te ia o upu a Palako.  Ua ia fai atu iā i latou: “Ia outou tofafā i inei i le pō lenei, o le a ou taʻu atu lava iā te outou upu e pei ona fetalai mai ai Ieova iā te aʻu.”+ Ona nonofo faatasi ai lea o perenise o Moapi ma Palaamo.  Ua afio mai le Atua ma fetalai mai iā Palaamo:+ “O ai nei tamāloloa o loo faatasi ma oe?” 10  Ona tali atu lea o Palaamo i le Atua moni: “Ua oo mai iā te aʻu le feʻau a Palako+ le atalii o Seporu, o le tupu o Moapi, e faapea, 11  ‘Vaai foʻi! Ua ō mai le nuu mai i Aikupito, ma ua latou ufitia ai le laueleele i le mamao e mafai ona vaai i ai se tasi.+ Ia e sau ma taʻusalaina i latou mo aʻu.+ Atonu e mafai ona ou tau ma i latou ma tutuliese i latou.’” 12  Ae ua fetalai mai le Atua iā Palaamo: “Aua e te alu faatasi ma i latou. Aua foʻi e te faamalaiaina le nuu+ auā ua faamanuiaina i latou.”+ 13  Ua tulaʻi Palaamo i le taeao ma faapea atu i perenise a Palako: “Ia outou ō i lo outou atunuu, auā ua lē finagalo Ieova tatou te ō.” 14  Ona ō lea o perenise o Moapi ma ua ō atu iā Palako ma faapea atu: “Ua musu Palaamo e matou te ō mai.”+ 15  Peitaʻi, ua toe aauina atu e Palako nisi perenise e toʻatele atu ma e sili atu ona aloaʻia nai lo o le vaega muamua. 16  Mulimuli ane ua latou taunuu atu iā Palaamo ma faapea atu iā te ia: “O le tala lenei a Palako le atalii o Seporu, ‘Faamolemole aua nei iai se mea e taofia ai oe mai i lou maliu mai iā te aʻu. 17  Auā o le a ou matuā faamamaluina lava oe,+ ma o mea uma e te saunoa mai ai o le a ou faia.+ Faamolemole maliu mai. Ia e taʻusalaina lenei nuu mo aʻu.’” 18  Ae ua tali atu Palaamo i auauna a Palako: “Afai e foaʻi mai e Palako iā te aʻu lona fale e tumu i siliva ma auro, ou te lē mafai ona solia le poloaʻiga a Ieova loʻu Atua, e fai ai se mea itiiti po o se mea telē.+ 19  O lea faamolemole outou tane, ia tofafā i inei i lenei pō ina ia ou iloa ai po o le ā se isi fetalaiga a Ieova iā te aʻu.”+ 20  Ona afio mai lea o le Atua iā Palaamo i le pō ma fetalai mai iā te ia: “Afai ua ō mai tane e aami oe, ia e tulaʻi ma ō ma i latou. Ae tau ina ia e tautala atu i upu ou te fai atu ai iā te oe.”+ 21  Ona tulaʻi lea o Palaamo i le taeao ma faanofoa lana asini fafine ma ua ō faatasi ma perenise o Moapi.+ 22  Ua matuā toʻasā le Atua ona ua alu o ia; ona tū lea o le agelu a Ieova i le auala e tetee atu iā te ia.+ Ua tiʻetiʻe o ia i lana asini fafine ma ua ō faatasi ma ana auauna e toʻalua. 23  Ua iloa e le asini le agelu a Ieova ua tū i le auala, ua i lona lima lana pelu ua seʻi;+ ua taumafai le asini e liliuese mai i le auala ina ia alu atu i le fanua, a ua sasa e Palaamo le asini ina ia toe liliu i le auala. 24  Ua tū pea le agelu a Ieova i se ala vaiti i le va o togāvine, ua iai le pā maa i le tasi itu ma ua iai foʻi le pā maa i le isi itu. 25  Ua iloa atu pea e le asini fafine le agelu a Ieova ona oomi lea e ia o ia i le pā ma omia ai foʻi le vae o Palaamo i le pā; ona toe sasa ai lea e ia o le asini. 26  Ona toe alu atu lea o le agelu ma tū i se mea vaiti, o se mea e lē mafai ona liliu ai i le itu taumatau po o le itu agavale. 27  Ae ua iloa e le asini le agelu a Ieova ona taoto ifo ai lea o ia i lalo o Palaamo; ua matuā ita+ Palaamo ma soona sasa le asini i lona tootoo. 28  Mulimuli ane ua faatautala e Ieova le asini+ ma ua faapea mai le asini iā Palaamo: “O le ā laʻu mea ua fai iā te oe ua e sasa faatolu ai aʻu?”+ 29  Ona fai atu lea o Palaamo i le asini: “Auā ua leaga lau amio iā te aʻu. Pe ana iai se pelu i loʻu lima, semanū ua leva ona ou fasimatea oe!”+ 30  Ua faapea mai le asini fafine iā Palaamo: “Pe e le o aʻu ea o lau asini fafine na e tiʻetiʻe ai i lou olaga atoa seʻia oo mai i le asō? Pe e masani ea ona ou faia faapea iā te oe?”+ Ua ia tali atu: “E leai!” 31  Ona faapupulaina lea e Ieova o mata o Palaamo,+ ma ua ia vaai ai i le agelu a Ieova o loo tū i le ala, ua uu i lona lima lana pelu. Ona ia ifo toʻele loa lea ua tootuli ma faō. 32  Ua fai mai le agelu a Ieova iā te ia: “Aiseā ua e sasa faatolu ai i lau asini fafine? Faauta! O aʻu, ua ou sau e tetee atu iā te oe auā ua e lē mafaufau i lou ala, ma ua lē tusa ai ma loʻu loto.+ 33  Sa iloa aʻu e le asini fafine ma sa taumafai faatolu e liliuese mai i oʻu luma.+ Seʻi manatu i le mea e ono tupu pe ana lē liliuese le asini mai i oʻu luma! Semanū ua leva ona ou fasiotia oe,+ ae faasaoina le asini.” 34  Ona fai atu lea o Palaamo i le agelu a Ieova: “Ua ou agasala+ auā ua ou lē iloa o oe lea ua tū i le ala e fetaiaʻi ma aʻu. Afai e leaga lenei mea i lau silafaga, ia tuu mai aʻu ou te toe foʻi.” 35  Ae ua faapea mai le agelu a Ieova iā Palaamo: “Ia ō ma tamāloloa;+ ae tau ina ia e tautala atu i upu ou te fai atu ai iā te oe.”+ Ona ō pea lea o Palaamo faatasi ma perenise a Palako. 36  Ina ua faalogo Palako ua sau Palaamo, ona alu atu loa lea o ia e faafetaui iā te ia i le aai o Moapi e i le auvai o Arinona, o loo i le faatausiʻusiʻuga o le laueleele o le atunuu.+ 37  Ua fai mai Palako iā Palaamo: “Pe na ou lē aauina atu ea nisi e aami iā te oe? Aiseā na e lē sau ai iā te aʻu? Pe e lē mafai ea ona ou faamamaluina oe?”+ 38  Ona fai atu lea o Palaamo iā Palako: “O lea ua ou sau. Pe mafai lava ona ou fai atu se tala?+ O le upu e tuu mai e le Atua i loʻu gutu, o upu ia ou te tautala atu ai.”+ 39  Ua ō Palaamo ma Palako ma ua la taunuu atu i Kiriatausota. 40  Ona faia lea e Palako o taulaga i povi ma mamoe+ ma aauina atu nisi vaega iā Palaamo ma perenise ua faatasi ma ia. 41  Ua oo i le taeao ona ave lea e Palako o Palaamo ma la ō aʻe i Pamotapaala,*+ ina ia iloa atu ai tagata uma o le nuu.+

Faamatalaga Pito i Lalo

O lona uiga, o le “vaitafe o Eufirate.”
O lona uiga, “o mea maualuluga a Paala.”