Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Numera 20:1-29

20  I le masina muamua, ua ō atu ai le fanauga a Isaraelu, o le faapotopotoga atoa lea, i le toafa o Tisina,+ ma ua nonofo ai i le nuu o Katesa.+ O i inā na oti ai Miriama+ ma tanu ai o ia.  Ua oo ina leai se vai mo le faapotopotoga,+ ona latou faapotopoto ai lea ma tetee atu iā Mose ma Arona.+  Ua misa+ tagata ma Mose ma ua latou faapea mai: “E sili ai pe ana matou feoti i le taimi na feoti ai o matou uso i luma o Ieova!+  Aiseā ua oulua aumaia ai le faapotopotoga a Ieova i lenei toafa, ina ia matou feoti ma mamate ai a matou manu ave avega?+  Aiseā foʻi ua oulua aumaia ai i matou mai i Aikupito ma tuu i matou i lenei nofoaga leaga?+ E lē ola ai i lenei mea ni fatu, o mati, o vine, ma rimoni,+ ma e leai foʻi ni vai e feinu ai.”  Ua ō atu Mose ma Arona mai i luma o le faapotopotoga i le faitotoʻa o le faleʻie o le feiloaʻiga, ua faapaʻuʻū faō,+ ona faaali mai lea o le mamalu o Ieova iā i laʻua.+  Ua fetalai mai Ieova iā Mose e faapea:  “Ia tago i le tootoo+ ma faapotopoto mai le faapotopotoga, o oe ma Arona lou uso a o vāai mai i latou, e ao ona oulua tautatala i le papa ina ia tafe mai ai le vai; ma e te aumaia le vai mo i latou mai i le papa e feinu ai le faapotopotoga ma a latou manu ave avega.”+  Ona ave lea e Mose o le tootoo mai i luma o Ieova,+ e pei ona ia poloaʻi mai ai iā te ia. 10  Ona faapotopoto ai lea e Mose ma Arona o le faapotopotoga i luma o le papa, ona ia fai atu lea iā i latou: “O outou tagata fouvale,+ faalogo mai ia! Pe e ma te aumaia ea mai i lenei papa se vai mo outou?”+ 11  Ua sii i luga e Mose lona lima ma tā faalua le papa i lona tootoo; ona tafe mai ai lea o le vai, ma ua feinu ai le faapotopotoga ma a latou manu ave avega.+ 12  Mulimuli ane ua fetalai mai Ieova iā Mose ma Arona: “Ona ua oulua lē faatuatua mai iā te aʻu ma ua lē faapaiaina+ aʻu i luma o le fanauga a Isaraelu, o lea o le a oulua lē avatua lenei faapotopotoga i le laueleele ou te tuuina atu iā i latou.”+ 13  O vai nei o Meripa,*+ auā ua misa ai le fanauga a Isaraelu ma Ieova, ma ua faapaiaina ai o ia i lea mea i luma o tagata. 14  Mulimuli ane, ua auina atu e Mose ni avefeʻau mai i Katesa i le tupu o Etoma:+ “O le tala lenei a lou uso o Isaraelu+ e faapea, ‘Ua e silafia lelei faigatā uma na oo iā i matou.+ 15  Na ō o matou tamā i Aikupito+ ma na matou nonofo ai pea i Aikupito mo le tele o aso;+ na sauāina foʻi i matou ma o matou tamā e tagata Aikupito.+ 16  Ona matou alalaga atu lea iā Ieova+ ma na ia faafofoga i o matou leo ma ia auina mai se agelu,+ ma aveese i matou mai i Aikupito; ona matou nonofo ai lea i Katesa, o se aai i le faatausiʻusiʻuga o lou laueleele. 17  Faamolemole seʻi o matou ui ane i lou laueleele. E matou te lē ui i se fanua po o se togāvine, e matou te lē feinu foʻi i se vai o se vaieli. E matou te malaga i le auala a le tupu.+ E matou te lē afe i le itu taumatau po o le itu tauagavale+ seʻia matou sopoʻia lou laueleele.’ ” 18  Peitaʻi ua tali mai Etoma iā te ia: “Aua neʻi e uia loʻu laueleele, ina neʻi oʻu alu atu ma le pelu e faafetaui ai oe.” 19  Ona fai atu lea o atalii o Isaraelu iā te ia: “E matou te ō aʻe i le ala tele; ma afai ou te inu ma feinu laʻu lafumanu i lou vai, ou te avatu iā te oe le tau o lea mea.+ E leai se mea ou te manaʻo ai tau lava o le ui atu o oʻu vae.”+ 20  Ae ua ia faapea mai lava: “Aua tou te ui ane.”+ Ona ō mai lea o Etoma+ ma tagata e toʻatele ma le lima malosi ina ia faafetaui iā te ia. 21  Ua lē faatagaina e Etoma Isaraelu e ui ane i lona laueleele.+ Ona liliuese ai lea o Isaraelu mai iā te ia.+ 22  Ua malaga ese le fanauga a Isaraelu, o le faapotopotoga atoa mai i Katesa+ ma ua oo atu i le Mauga o Horo.+ 23  Ona fetalai mai lea o Ieova iā Mose ma Arona i le Mauga o Horo i le tuaoi o le laueleele o Etoma: 24  “O le a faatasia Arona i ona tagata,+ auā e lē ulu atu o ia i le laueleele ou te avatu i le fanauga a Isaraelu, talu ai ua oulua fouvale i laʻu faatonuga e tusa ai ma vai o Meripa.+ 25  Ia aumai Arona ma Eleasaro lona atalii ma ave i laʻua i le Mauga o Horo. 26  Ia tatala ese ofu+ ositaulaga o Arona, ma faaofu ai Eleasaro+ lona atalii i ia ofu; ma e oti Arona i inā ma faatasia atu i ona tagata.”+ 27  Ona faia lea e Mose e pei ona poloaʻi mai ai Ieova; ma ua latou ō aʻe i le Mauga o Horo a o vāai atu le faapotopotoga atoa. 28  Ona tatala lea e Mose o ofu ositaulaga o Arona ma faaofu ai Eleasaro lona atalii i ia ofu, ona maliu ai lea o Arona i inā i le tumutumu mauga.+ Ua ō ifo Mose ma Eleasaro mai i le mauga. 29  Ua iloa e le faapotopotoga atoa ua uma le ola o Arona, ona fetagisi ai pea lea o le aiga o Isaraelu i aso e tolu sefulu ona o Arona.+

Faamatalaga Pito i Lalo

O lona uiga, “Femisaaʻi” po o le “Fefinauaʻi.”