Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Numera 18:1-32

18  Ona fetalai mai lea o Ieova iā Arona: “O oe ma ou atalii, ma le aiga o lou tamā faatasi ma oe, e tou te tali atu i le solia o poloaʻiga e faatatau i le mea paia,+ ma o oe ma ou atalii faatasi ma oe, e tou te tali atu i le solia o poloaʻiga e faatatau i la outou faiva o ositaulaga.+  Ia faalatalataina mai foʻi ou uso o le ituaiga o Levi, o le ʻauaiga o lou tamā faatasi ma oe, ina ia aufaatasi ma auauna iā te oe,+ o oe atoa ma ou atalii faatasi ma oe, i luma o le faleʻie i le mea ua iai le Atolaau o le Feagaiga.+  Ia latou tausia la latou tiute tauave iā te oe ma tiute tauave i le faleʻie atoa.+ E na o mea e faaaogā i le mea paia ma le fata faitaulaga, e latou te lē faalatalata atu i ai, neʻi feoti i latou,+ o i latou atoa foʻi ma outou.  E ao ona latou aufaatasi ma oe, e ao foʻi ona latou tausia la latou tiute tauave i le faleʻie o le feiloaʻiga e tusa ai ma auaunaga uma o le faleʻie, e sā ona faalatalata atu iā te outou se isi tagata.+  E ao ona outou tausia la outou tiute tauave i le mea paia,+ ma la outou tiute tauave i le fata faitaulaga,+ ina neʻi toe oo le toʻasā+ i le fanauga a Isaraelu.  Faauta! ua ou aumaia ou uso, o le ʻau sa Levī mai i le fanauga a Isaraelu,+ o se meaalofa mo outou,+ o i latou ia ua avatu iā Ieova e faia le galuega o le faleʻie o le feiloaʻiga.+  E ao iā te oe ma ou atalii faatasi ma oe ona faataunuu la outou faiva o ositaulaga, e tusa ai ma mea uma i le fata faitaulaga, ma mea uma ua i tua o le ʻie puipui;+ ia outou faia le auaunaga.+ Ou te avatu iā te outou le auaunaga o le faiva o ositaulaga e fai ma meaalofa iā te outou, e fasiotia se isi tagata e faalatalata atu i ai.”+  Ua toe fetalai mai Ieova iā Arona: “Faauta! ou te avatu iā te oe le pule i foaʻi ua faia iā te aʻu.+ Ua ou avatu iā te oe ma ou atalii o mea paia uma o le fanauga a Isaraelu e fai ma au tufaaga, e fai foʻi ma au vaega i aso uma.+  E fai mo oe ia mea mai i mea e sili ona paia, e mai i taulaga ua faia i le afi, o a latou taulaga uma faatasi ma a latou taulaga uma i meaʻai,+ ma a latou taulaga uma o agasala,+ ma a latou taulaga uma o le nofosala,+ ia ua latou aumaia iā te aʻu. O le mea e sili ona paia mo oe ma ou atalii. 10  E tatau ona e ʻaina i se nofoaga e sili ona paia.+ E aai ai o tane uma lava.+ E ao ona avea o se mea e paia iā te oe.+ 11  O au mea ia: o le foaʻi+ o la latou meaalofa faatasi ma taulaga lūlū+ uma a le fanauga a Isaraelu. Ua ou tuuina atu ia mea iā te oe ma ou atalii ma ou afafine faatasi ma oe,+ e fai ma tufaaga i aso uma. E aai ai ē uma e mamā o lou aiga.+ 12  “O le suāuu e sili ona lelei, ma le uaina fou aupito i lelei, o fatu ma uluaʻi fua,+ o mea ia e latou te avatu iā Ieova ou te avatua iā te oe.+ 13  O uluaʻi fua ua matua o lo latou laueleele e latou te avatu iā Ieova, e fai mo oe.+ E aai ai i latou uma e mamā i lou aiga. 14  “O mea uma ua taofia mo se fuafuaga paia i Isaraelu, e ao ona avea ma au lava mea.+ 15  “O ulumatua+ uma a tagata ma manu, ia o le a latou avatu iā Ieova, e fai mo oe. Peitaʻi e tatau ona e toe totogi atu lava ulumatua a tagata;+ ma e tatau ona e fesuiaʻi ulumatua a manu lē mamā.+ 16  O le tau e toe faatau mai ai, e amata mai i le masina agaʻi i luga, e ao ona e faatau mai e tusa ma tau faatulagaina, e lima sekeli siliva e tusa ma le fua masani o le mea paia.+ E lua sefulu kire.+ 17  E na o ulumatua a povi poʻa, po o ulumatua a mamoe poʻa, po o ulumatua a ʻoti e te lē fesuiaʻia.+ O ni manu paia. O toto+ o ia manu e te sausau i luga o le fata faitaulaga, ma le gaʻo o ia manu e te susunu e fai ai le taulaga i le afi o le mea manogi e faamalieina ai Ieova.+ 18  Ia ave mo oe aano o ia manu. E pei ona faia i le fatafata o le taulaga lūlū ma le alagavae taumatau, ia ave ma oe.+ 19  O foaʻi paia+ uma ia o le a avatu e le fanauga a Isaraelu iā Ieova, ou te tuuina atu mo oe ma ou atalii ma ou afafine faatasi ma oe, o se tufaaga i aso uma.+ O le feagaiga masima lea mo se taimi umi i luma o Ieova, mo oe ma lau fanau faatasi ma oe.”+ 20  Ua fetalai atili mai Ieova iā Arona: “E leai sou tofi i lo latou laueleele, e leai foʻi sau vaega iā i latou.+ E fai aʻu ma au vaega ma ou tofi i le fanauga a Isaraelu.+ 21  “Faauta! ua ou tuuina atu i atalii o Levi le tasi vaesefulu+ o mea i Isaraelu, e fai ma tofi ona o la latou galuega ua faia pea, o le galuega o le faleʻie o le feiloaʻiga. 22  E sā ona toe faalatalata atu le fanauga a Isaraelu i le faleʻie o le feiloaʻiga, neʻi agasala ai ma feoti.+ 23  E tatau i le ʻau sa Levī ona faaauau la latou galuega o le faleʻie o le feiloaʻiga, o le a latou tali atu i mea sesē e faia e tagata faasaga i le mea paia.+ O le tulafono lea mo se taimi umi iā te outou ma o outou tupulaga o loo mulimuli mai, e lē maua so latou tofi i le fanauga a Isaraelu.+ 24  O le tasi vaesefulu o mea a le fanauga a Isaraelu ia latou te foaʻi atu iā Ieova o se foaʻi tauofo, ou te avatua i le ʻau sa Levī e fai ma o latou tofi. O le mea lea ua ou fai atu ai iā te i latou, ‘E lē maua so latou tofi i le fanauga a Isaraelu.’ ”+ 25  Ona fetalai mai lea o Ieova iā Mose e faapea: 26  “E ao ona e fai atu i le ʻau sa Levī, e faapea, ‘E tou te maua mai i le fanauga a Isaraelu, le tasi vaesefulu o mea ua ou avatu iā te outou mai iā i latou, e fai mo outou tofi+ ma e ao ona outou foaʻi atu mai i lenā tasi vaesefulu, le tasi vaesefulu iā Ieova.+ 27  E ao ona taʻua o a outou foaʻi, e pei o fatu ia mai i le mea e soli ai saito+ ma e pei foʻi o le tele o le uaina ma le suāuu o le olive. 28  O le auala lea, o outou foʻi, ua outou faia foaʻi iā Ieova mai i le tasi vaesefulu o mea tou te maua mai i le fanauga a Isaraelu, ma mai i na mea e ao ona outou avatu iā Arona le ositaulaga, le foaʻi mo Ieova. 29  O meaalofa uma ua avatu iā te outou, ia outou fai atu ai foaʻi o mea eseese iā Ieova, o mea uma e sili ona lelei,+ o le mea paia lea.’ 30  “E ao ona e fai atu iā i latou, ‘Pe a outou foaʻi atu le mea e aupito sili ona lelei o na mea,+ ia manatu i ai le ʻau sa Levī e peiseaʻī o ni mea ua totoe o mea ia ua maua mai i le mea ua soli ai saito, ma e pei foʻi o fua e maua mai i le mea e soli ai le uaina ma olive. 31  E tou te ʻaina i nofoaga uma, o outou ma o outou aiga, auā o lo outou totogi lea mo la outou galuega i le faleʻie o le feiloaʻiga.+ 32  E tou te ʻalofia le faia o le agasala pe a outou foaʻi atu mea e sili ona lelei mai i ia mea, aua foʻi tou te faaleagaina mea paia a le fanauga a Isaraelu, neʻi outou feoti.’ ”+

Faamatalaga Pito i Lalo