Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 9:1-38

9  Ona maliu aʻe lea o ia i le vaa, ua sopo atu i le isi itu, ma agaʻi atu ai i lona lava aai.+  Faauta! ua latou aumai iā te ia le tagata ua pē le tino o loo taoto i le moega.+ Ua silafia e Iesu lo latou faatuatua, ona fetalai atu lea o ia i le tagata maʻi: “Loʻu atalii e, ia e lototele, auā ua faamagaloina au agasala.”+  Ae faauta! ua faapea ifo nisi o le ʻautusiupu: “Ua upuleaga lenei tagata i le Atua.”+  A ua silafia e Iesu o latou manatu,+ ma faapea atu: “Aiseā ua manatunatu ai o outou loto i mea leaga?+  Auā o lē fea e sili ona faigofie, o le fai atu ea, Ua faamagaloina au agasala, po o le fai atu, Ia tū i luga ma savali?+  Ae peitaʻi, ina ia outou iloa ua iai i le Atalii o le tagata le pule i le lalolagi e faamagalo ai agasala+—” o lea, ua ia fetalai atu ai i le tagata maʻi: “Inā tulaʻi ia ma ave lou moega, ma e alu i lou aiga.”+  Ona tū lea o ia i luga ma alu i lona aiga.  Ua matuā matataʻu le motu o tagata ina ua latou vāai i lenei mea, ona latou faamamaluina lea o le Atua,+ o lē ua foaʻi mai lenā pule+ i tagata.  A o malaga ane o ia mai lea mea, ua silafia ai e Iesu se tamāloa e igoa iā Mataio, o loo nofo i le ofisa aolafoga, ona ia faapea atu lea iā te ia: “Ia e mulimuli mai iā te aʻu.”+ Ona tū ai lea o ia i luga ma mulimuli iā te ia.+ 10  Mulimuli ane, a o taoto* o ia e taumafa i le fale,+ faauta! ua ō mai le ʻauaolafoga ma tagata agasala e toʻatele, ma taooto e aai faatasi ma Iesu ma ona soo. 11  Ae ina ua vāai atu le ʻau Faresaio i lenei mea, ona latou faapea mai lea i ona soo: “Aiseā ua aai faatasi ai lo outou aʻoaʻo ma le ʻauaolafoga ma ē e agasala?”+ 12  Ua ia faafofoga atu i a latou upu, ona ia fetalai atu lea: “E lē manaʻomia e tagata malolosi se fomaʻi,+ ae na o ē mamaʻi. 13  Ia outou ō ma aʻoaʻoina le uiga o nei upu, ‘Ou te loto i le alofa mutimutivale, ae lē o le taulaga.’+ Auā ua ou sau e valaau i ē agasala ae lē o ē amiotonu.” 14  Ona ō mai ai lea o soo o Ioane ma fesili mai iā te ia: “Aiseā ua matou anapopogi ai ma le ʻau Faresaio, ae e lē anapopogi ou soo?”+ 15  Ona fetalai atu lea o Iesu iā i latou: “Pe e iai ea se māfuaaga e faanoanoa ai uō a le alii faaipoipo+ a o faatasi o ia ma i latou? Ae e oo mai aso e aveesea+ ai le alii faaipoipo mai iā i latou, ona latou anapopogi ai lea.+ 16  E leai se tasi e na te fonoina se ofu tele tuai i se fasiʻie fou; auā e atili masae ai pe a mimigi le fasiʻie fou.+ 17  E lē mafai foʻi e tagata ona utu le uaina fou i fagupaʻu tuai, auā pe a faia faapea, ona pāpā ai lea o fagupaʻu ma masaa ai le uaina ma leaga ai fagupaʻu.+ Ae e masani ona utu e tagata le uaina fou i fagupaʻu fou, ona tau fai sao ai lea o nei mea.”+ 18  A o ia faamatala atu nei mea iā i latou, faauta! ua sau se tasi pule,+ ua ifo+ ma faapea mai iā te ia: “E lē taumatea ua oti loʻu afafine i le taimi nei;+ ae ia e maliu atu ma faaee lou aao iā te ia, ona toe ola ai lea o ia.”+ 19  Ona tulaʻi lea o Iesu ma mulimuli atu iā te ia; e faapena foʻi ma ona soo. 20  Faauta! ua alu atu i ona tua se fafine ua sefulu lua tausaga talu ona maʻi i le punatoto,+ ma paʻi atu i le pito o lona ofu tele.+ 21  Ua faapea ifo le fafine iā te ia lava: “E tau lava ina ia ou paʻi atu i le pito o lona ofu tele, ou te malosi ai.”+ 22  Ua faliu Iesu ma ua silafia ai o ia, ona ia faapea atu lea: “Loʻu afafine e, ia e lototele, auā ua e malosi ona o lou faatuatua.”+ Ona malosi ai lea o le fafine i lenā lava taimi.+ 23  Ua ulufale atu o ia i le fale o le pule,+ ona silafia ai lea e ia o tagata o loo fetagisi+ ma ē o loo tā* ni pese faavauvau. 24  Ona faapea atu lea o Iesu: “Ia ō uma i fafo, auā e leʻi oti le teineitiiti, ae o loo moe o ia.”+ Ona latou toē faaamuamu+ lea iā te ia. 25  Ua ō i fafo le motu o tagata, ona ulu atu lea o ia ma tago i le lima+ o le teineitiiti, ona tū ai lea o ia i luga.+ 26  O le mea moni, ua salalau atu lenei tala i lenā vaipanoa uma. 27  A o agaʻi ese atu Iesu mai i inā, ua mulimuli mai iā te ia ni tamāloloa tauaso se toʻalua,+ ma alalaga mai: “Le Alo e, o Tavita, ia e alofa* mai iā i maʻua.”+ 28  Ua maliu atu o ia i le fale, ona ō mai ai lea o tamāloloa tauaso iā te ia, ona fesili atu lea o Iesu iā i laʻua: “Pe e te lua faatuatua+ e mafai ona ou faia o lenei mea?” Ona la tali mai lea: “O lea lava, le Alii e.” 29  Ona ia papaʻi atu lea i o la mata+ ma faapea atu: “Ia faapea lava ona faia iā te oulua e tusa ma lo oulua faatuatua.” 30  Ona pupula loa lea o o la mata, ma ua matuā faatonu atu Iesu iā i laʻua: “Ia aua lava neʻi iloa e se tasi lenei mea.”+ 31  Ae ua ō i laʻua i fafo, ma faailoa atu i vaipanoa uma le tala e uiga iā te ia.+ 32  A o ō i laʻua, faauta! ua aumai e tagata iā te ia se tamāloa gūgū ua uluitinoina e se temoni.+ 33  Ina ua uma ona tuliesea le temoni, ona tautala ai lea o le tagata gūgū.+ Ona matuā taufaiofo+ ai lea o le motu o tagata ma faapea ane: “E leʻi vaaia muamua lava se mea faapenei i Isaraelu.” 34  A ua fai ane le ʻau Faresaio: “O le pule o temoni, ua mafai ai ona ia tuliesea temoni.”+ 35  Ona malaga atu lea o Iesu i aai ma nuu uma, ua aʻoaʻo atu i o latou sunako, ma talaʻi atu le tala lelei o le malo, ma faamālōlō i maʻi eseese ma maʻi tigāina uma.+ 36  Ua silasila atu o ia i le motu o tagata, ona mutimutivale ai lea o lona alofa+ iā i latou, auā ua pei i latou o mamoe ua faamanuʻalia ma agaleagaina, ua leai so latou leoleo mamoe.+ 37  Ona fetalai atu lea o ia i ona soo: “E moni, e telē le galuega o le seleselega, ae e toʻaitiiti le ʻaufaigaluega.+ 38  O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.”+

Faamatalaga Pito i Lalo

Na masani ona taooto tagata e taumamafa i ona pō o Iesu.
Po o “ē o loo ili ni fagufagu.”
Pe “ia e alofa mutimutivale mai.”